14

Bay Area Discovery Museum II

哇,太長啦篇野,唔斬開分件上,我自己都頂唔順!如果你上一篇係睇到幟哥個頭上有疑似藍色烏蠅「嬲」頭嘅話,快D入去睇埋落去,已加左新嘅內容入去。我諗住以後都係咁架啦,o個日寫左就算幾行都加入去,費事儲埋一穫過寫完先出嘅話,真係唔知幾時先寫完!你自己入黎接住之前睇到邊然後繼續睇落去啦。如果篇野已經寫完,我會加個「完」字,咁大家就知道篇野已經埋左尾,唔會再有野加。Ok? 

好,上回講到「婦人kick樹事件」之後,個老公無機會逃走,於是唯有乖乖地繼續陪佢老婆同個仔玩啦。

IMG_8379

 

其實我真係無辦法勸服佢兩父子唔好o係公眾場合咁樣。一個見野就爬就大家都知架啦;另一個見野就摸……呢家野原來係遺傳嘅!各位女士男士請放心,佢未至於會對佢仔以外嘅人落手嘅!唔洗驚!

IMG_8376

 

題外話:大家見到佢對門牙嗎?今日下晝,呢條友就要接受佢咁大個仔嘅第一個牙科手術。事緣早排牙醫叔叔照X光時發現佢兩隻門牙之間多左個「小三」,但呢隻「小三」匿埋o係牙肉裡面,攪到外露嘅兩隻門牙分道揚鑣,倒V字咁生出黎。哇,牙罅大漏財之象喎!(講笑啫)但唔整走隻「小三」就真係唔講得笑啦,所以牙醫叔叔話最好盡快攪啦,越大越難攪,況且而家攪都重有機會令對門牙返返去原位,但大D就唔會架啦,實要箍牙先得。我箍過牙,知道箍牙係長痛,比我揀,我都寧願揀短痛,趁早攪好佢,免得他日受更大嘅痛楚。牙醫話小朋友有三隻門牙嘅情況都算普遍,佢診所都做過好多個咁細年紀嘅小朋友,叫我地絕對可以放心。

IMG_8380

 

玩到甩腰帶,褲頭鈕到甩埋,爭在條褲未跌落黎架咋!

IMG_8374

絕對係浮誇嘅演技,呢期勁煲Lego Movie嘅結果。

IMG_8381對於八卦好奇心強嘅人黎講呢,佢一定會比其他人更加留意到身邊嘅事物。玩完個蜘蛛繩網陣之後,比我地發然左呢條唔知係咪用黎練武功嘅木樁路,好似上面重有野睇咁喎,好!因為八,所以決定上!

原來上面係博物館平時要攪露營嘅蚊營營地黎嘅。真係好蚊形嘅營地,但對於口水禧黎講係一個世外桃源!

 

IMG_8391

~在樹中央,有茂利一雙~

真係唔怪得我架,佢地成日都掣造機會比我出呢一句野,我都唔想架,我係比佢地迫架咋!looking-shocked

IMG_8405

 

 

佢上一世絕對係一隻馬騮,猩猩,狒狒呀個D, 因為佢見到野唔爬下真係身會痕架!唉!

IMG_8409呢期鍾意扮警犬同Lego Movie裡面嘅警察。周街見到人,識嘅又好,唔識嘅都好,佢都會同人講佢係一隻狗。去到餐廳叫野食,佢問人有無比狗食嘅野喎。重話佢食狗骨嘅,叫人比條骨佢咬下。

係咪以為口水禧黐左線先會咁樣呢?放心,佢未黐。純粹係佢想象力豐富而已。佢寫電郵比佢班主任都自稱自己係colin the dog,重問佢班主任係邊種狗(!!!) 同埋有無狗骨食添(!!!)。佢班主任覆佢電郵都會叫佢colin the dog,重會話祝佢週末搵到多D狗骨食添。

試過o係中餐館,佢一咁樣講,侍應生即刻會話:「噓!傻啦,邊有人咁話自己架!」其實細路仔真係無大人諗得咁複雜,佢地眼中嘅動物就係動物,絕對唔知話人係某種動物即係侮辱人。我地從來都唔會阻止佢四圍同人講話佢自己係狗,因為當佢主動同人地攀談嘅時候,正正係佢建立自信嘅時候,如果呢個時候飛出黎截住佢,我覺得唔尊重講緊野嘅人。況且佢又唔係對住人講咩唔好嘅野,我有乜所謂。

IMG-20140720-WA0015

呢張相初初睇嘅時候唔知點解硬係有D好奇怪嘅感覺,而家睇多次,終於知道點解。就係個鐘再加幟哥個頭,完全係絕配呀!最衰我唔識用photoshop幫佢換件衫咋,如果唔係嘅話,個效果真係一流!(相信睇到呢度,我老公應該好後悔當日無用膠水將我黐o係個巨木窿裡面!hard-laugh

 

IMG_8432

我細個住o係邵氏片場裡面嘅宿舍,o個度係一個幾偏僻嘅地方。無公園、無麥當勞、無超市,無鋪頭,凈係有拍戲用嘅廠、設施、辦公室。以前睇無線古裝片嘅古裝街就係我地小朋友嘅「遊樂場」。另外,我地最常集結嘅地方就係好似呢張相入面嘅樹林。所以,我細個嘅娛樂係咩,應該唔難估啦o卦。

爬樹、掘泥玩泥、捉蟲、玩「紅綠燈」、「何制公」,通通都o係個樹林裡面進行。後來TVB搬左入黎之後,將樹林改建做停車場,一個我兒時玩樂嘅天堂就從此o係我生命裡面消失。

o個日見到呢個蚊形樹林,令我諗返起細個同朋友仔爬樹,跑跑跳跳嘅回憶,當日一齊玩嘅細路,今日已經個個好似我咁變左中年呀叔或呀嬸。

口水禧極力邀請下,我爬左上去。不過睇下張相就知我R底,細個我就好似口水禧咁大搖大擺企o係樹上,三十年後嘅我竟然係死攬住樹幹,驚死會跌落地咁款。本來口水禧見我都上左去,佢好雀躍咁誠邀佢老豆加入埋一份,但禧爸礙於怕比人當佢係「強國人爬樹」,所以拒絕上黎。

我唔o係想係度研究爬樹呢個行為係咪等如某些人,因為我都見過其他種族嘅人係公園或荒山野嶺爬樹。其實當禧爸講左o個句野之後,我都比佢大一大,即刻爬返落黎。直至我見到樹下呢幾舊刻o係石頭上嘅字,我就覺得係我地諗多左啦。

IMG_8423

呢段野係Rachel Carson本書叫The Sense of Wonder 裡面節錄出黎嘅。我將佢譯做中文,大意係「如果要小孩保持他與生俱來的好奇心,他至少需要一個成年人當夥伴,一起分享及重拾這個我們所在的世界裡,所有快樂、刺激及神秘的東西。」

IMG_8416其實爬樹唔係一件錯事,呢度有D人將屋起o係棵樹上面添。個問題係父母點樣教導子女用正確嘅態度對待大自然。舉一個例子,如果口水禧爬一棵幼苗或者棵樹瘦到就黎斷咁嘅樣的話,咁我就要制止佢,從而教導佢幼苗唔夠力支撐佢個人爬上去,會整傷棵樹。當然更加唔可以摘人D葉或R斷人地嘅樹幹啦。

 

IMG_8418但當日所見,棵樹係非常巨大嘅,大到你起間屋上去都頂得住咁嘅樣,我地上左去亦唔係o係度跳下或者R樹枝,只係靜靜地研究下棵樹,企 o係度眺望遠處嘅四周圍環境而已,絕對無破壞棵樹,而且好快就落返黎,我地唔係做咩壞事喎。

 

IMG_8421最重要嘅係,如果要教小朋友認識大自然,咁你就要比佢地親近大自然,而作為父母嘅更應該參與一份,做小朋友嘅玩伴,坐o係樹上同企o係下面講棵樹係兩回事,小朋友嘅感覺好唔同。我爬上去嘅一刻,聽得出口水禧好開心媽媽肯陪佢玩,陪佢做佢最喜愛嘅事 – 爬樹,我覺得o個一刻我地兩個嘅距離拉近左,因為我好似返到自己嘅童年,同我嘅朋友仔o係樹上玩,談天說地,樹林充滿我地快樂嘅笑聲!happy

~完~

禧媽

14 Comments

  1. 係喎。。。你都走哂樣喎!我like你條爛牛look.仲「燒箱」左添!有繼續跑步??勁!
    btw, 禧禧既髮型又創新左,如果係你手筆就比個like你!

    • 自從口水禧放暑假就無跑啦,帶住佢跑條潤呀真係!喂,佢個頭真係我剪架喎,不過你唔覺啲陰剪到一忽忽咩?頂佢,教左佢個髮型嘅陰要撥去側邊,佢硬係要撥落黎,唉!話鬼之佢呀!核凸嗰個又唔係我!
      我好多爛褲架,襯晒我嘅為人丫嘛,爛撻撻咁幾唔扮野做自己呀!

  2. 睇到”重問佢班主任係邊種狗(!!!) 同埋有無狗骨食添(!!!)”, 我真係忍唔住狂笑!口水禧真係好正!!

    • 最慘係有時同其他人講緊正經野佢都黎料嗰下真係比佢激死!例如餐廳等緊入座,同門口姐姐講三個人,此時,我身邊有條傻丙會大叫話係兩個人一隻狗,攪到人地真係以為我帶左隻狗黎,幾乎唔比我入,跟住口水禧同人講話自己係service dog,係警犬,所以可以入去,個姐姐倒抽一口涼氣,眼神流露出好後悔同面前嗰個精神有問題嘅顛細路認真咁講左咁耐野…… :wacko:

  3. 禧媽,我通常聽係講天生冇了隻牙(因為我朋友屋企有兩個人都係咁),就真係未聽過門牙多了隻小三 :wacko:

      • 禧媽,我就係個例子啦~~~
        我天生下排就小一隻牙(小左隻下排虎牙), 我媽媽都小一隻~
        不過我d牙實在係太大隻既關係, d牙唔”梳”不特只, 仲有小小爆添XD
        上排冇小牙反而就爆哂 :wacko:

        • 我以前都係牙太大,有一隻虎牙重變左爆牙上左去牙肉度,合埋口都重凸出黎。後來箍牙前剝左四隻牙先夠位拉返隻爆牙落黎,成個過程兩年,痛到無朋友! :cry:

      • 我個朋友就係門牙同大牙中間冇了牙 (家姐係上排, 呀妹係下排), 所以個位有好大條罅(有0.5CM), 牙醫講冇得整, 箍牙要整好大工程, 因為箍牙要左右對稱返, 所以最後都係冇整 :wacko:

        • 要郁咁多隻牙唔止工程大,重好鬼痛添呀!我四個牙窿加一隻爆牙,每個月去拉緊啲鐵線之後,成個禮拜淨係可以飲野咋,粥都食唔到,痛到PK呀!
          咁你朋友就咁有得個窿喺口呀?咁其他牙無走位咩?

Leave a Reply to Sam Fung Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)