51

Bay Area Discovery Museum III

希望呢個係最後一集啦,相太多,放晒o係一篇blog真係太滯喉,我講寫o個個呀!(<<<<即係我自己下嘩?)

A~~~其實呢,重有人o係度架呵?至少我呀媽同我自己應該有睇啩……hard-laugh

IMG_8439做完泰山之後,我地就黎到一個廣場,嗰度有個地方放左好多唔同形狀嘅軟膠喺度比小朋友砌野。我見過有人砌左成間小朋友高度嘅屋比D細路捐出捐入。鍾意砌野嘅小朋友,呢度就係佢地嘅天堂啦,你鍾意砌幾耐就幾耐,無人會阻止你。除左呀媽同老豆之外,無人會干予你砌乜野,當然,我地嘅幟哥亦唔會插手口水禧嘅創意啦,佢對手都好忙架嘛!而家我影親佢篤電話,佢就會不屑咁話:「又想o係blog度話我成日篤電話呀嘛你!」

係呀,吹咩!sneaky

IMG_8441口水禧而家砌野鍾意向高發展,所以佢砌極都會變豆渣樓嘅,風吹都企唔穩。佢砌完重會話:「媽媽,我砌比你住架!」跟住棟野就喺佢眼前訓低,然後有人就會一邊發勞騷一邊砌番同頭先訓低之前一模一樣嘅「高樓」出黎,然後又話係砌比我住嘅,跟住棟野又……

仔!呀媽知你孝順啦,不過媽媽比較鐘意訓街多啲……( 至少街應該都比較紮實啲嘅no-snitching

IMG_8455
一號表情 – 驚「呀」(我個輸入法無個正字,用呢個頂住先)

IMG_8456二號表情 – 憤怒 (呢個應該唔難丫……日日都見架啦!)

IMG_8459三號表情- 疑惑 (佢真係連續比我點佢做呢啲一號二號三號表情做左一輪先發現自己比人玩緊,跟住佢有乜反應?咪做多次二號嗰個表情黎宣洩佢嘅不滿囉!)

 

呢個時候,你問我點解會突然有啲表情牌比小朋友玩架呢?我估其實係因為個場館係關於修理壞左嘅野嘅,可能佢想話比小朋友知當有野壞左之後,唔同嘅人都有唔同嘅心理反應同表情啩。除左呢啲表情牌之外,佢重有幾個攤位擺放左唔同嘅修理工具,啲工具嘅側邊重標晒啲名稱教啲小朋友認野。其中一個攤位有啲紙喺度叫啲小朋友分享下佢整壞野然後修理番嘅經驗。有啲都幾好笑架,例如有個寫:「有一日,我倒瀉左杯奶落地氈度,我即刻用布「索」左啲奶,媽咪完全唔知我倒瀉過野。真係好彩!」我成屋都係地板,加上口水禧抹野係慌死你唔知型,所以穫穫都穿晒煲,真係就算唔睇,齋聞我都知。

IMG_8461

研究緊啲一號二號三號表情

IMG_8464

成班細路好忙咁砌。你喺屋企未必會見到呢啲大爺好積極咁幫手做野,但黎到呢度,個個突然好似上左鍊咁不停做不停做搶住做!嗰種積極真係令人感動,場面真係震撼!早响丫嘛,我帶晒屋企未摺嘅衫呀褲呀,未洗嘅碗呀碟呀煲呀咁,等呢班友仔發揮佢地嘅潛能,等佢地早啲搵到人生嘅意義,最緊要係等佢地知道第時娶個入得廚房出得大堂廳堂嘅好老婆嘅真蹄!(睇黎睡魔經已急call啦,竟然叫啲好老婆出去大堂!係咪傻左呢我!)

IMG_8486

再轉場已經去左一個關於海港嘅場琯。

IMG_8482

請大家包容呢位面部肌肉隨時抽筋嘅人兄looking-shocked

IMG_8480模擬貨櫃碼頭嘅起重機。有啲細路勁攪笑,佢地會掛一抽海產喺度,再轉動個起重機模型吊起啲「倚」(我唔係潮州人,但我鍾意用嘉誠哥嘅口音讀「魚」),然後好滿足咁笑住行開,好似覺得自己好叻仔,終於完成左一項好艱巨嘅job啦!hard-laugh

IMG_8470

當口水禧盡情咁玩緊面前幾張麻雀檯咁長嘅火車之時,我就四圍睇下野,八啩下,呢個係我每日主要嘅工作,我人生嘅意義同真蹄丫嘛。

IMG_8487

牆上面貼左好多手工藝品,睇得出係出自小朋友嘅手筆。你會發現啲人嘅眼耳口鼻比例超唔對稱,甚至係無左其中一個五官。手長腳短呀;頭大身細呀;間屋嘅窗或門時大時細,高高低低之類。

但,講真,呢啲先係最好嘅野,小朋友畫嘅畫就係因為無大人嘅顧慮,所以先會有缺陷美,但缺陷美先至係最真實嘅野丫嘛。對到鬼咁工整,油顏色完全唔出界又均勻到睇唔到破綻,哇,咁咪好似o卑出黎嘅一樣?唔排除呢個世界有神童,幾歲人仔就畫到畢加索咁勁,不過其實畢加索自己都最響往畫野可以畫到好似小朋友咁,因為佢覺得最難模仿嘅就係小朋友畫嘅野。(我唔係亂講架,呢個係喺佢嘅畫展度見到咁寫架。)

IMG_8495

嗰日最後一站就係美術館。我估佢可能係每個星期有唔同嘅主題比小朋友創作。上一次黎好似係畫水彩,但今次係玩用回收嘅紙箱整屋。

IMG_8499

 

度門…….!!!!唔緊要,缺陷美缺陷美excited

IMG_8505IMG_8493

有風格,之唔係就係型囉!

IMG_8516

記得以前雞雞學校嘅老師講過關於屋嘅事, 佢話有兒童心理學嘅研究報告發現,世界上住喺唔同國家嘅小朋友,不論佢地住緊高樓大廈又好,住平房都好啦,佢地畫出黎嘅屋大多數都係尖頂,就好似口水禧手上呢間咁樣。個老師有講過個原因,但我已經完全記唔起啦。(唉!)

IMG_8503

咩黎嘅?你慢慢估啦。此乃出自一個自以為唔跟隨世俗眼光,拋開一切,不可一世嘅茂丙整嘅。究竟有邊個喺大家眼中有呢啲特質呢?

 

IMG_8532

 

自從離開左雞雞學校之後,佢無幾何可以咁樣畫架咋, 屋企啲窗可以咁樣畫?Errrr…. surprised

IMG_8533

 

好似睇卡通片時咁專心到面部肌肉放鬆looking-talking

IMG_8537

 

五點鐘,齊收工 。呢度啲人好自律嘅,唔會賴死唔走阻人收工。另一個重要嘅原因就係啲老豆呀媽已經肚餓,趕住去食晚飯醫肚啦嘛。係呀,好早食飯架我地,有時四點幾就去食飯架啦。

IMG_8556

 

 

幾經波折先搵到地方坐低開餐,真係幾乎餓暈咁濟。 佢面前嘅兒童餐之中,最欣賞嘅係嗰碗冷麵,其次竟然係……你估都估唔到呀!係……白飯!嗰兜生果都會食晒,但兜雞同天婦羅就麻麻地好,真係食野唔知價!looking-shocked

IMG_8572

S~l~u~r~p (口水禧:好食過呀媽請我嘅貓麵!)

IMG_8561

各位觀眾,有個傻丙又話要試食wasabi。佢嘅誠意真係令我恭敬不如從命,奉陪到底啦。攞好相機,準備捕捉我最想見嘅一刻…… ( 係,我唔係人!)devil

IMG_8563

辣到嘴都變形,面容扭曲……no-snitching

IMG_8567本來想收埋佢支水睇下佢有咩反應,不過我驚比呀婆斬我九條街,所以放佢一馬。

哇!呢啖水有如甘泉之露,睇佢個表情就知佢出盡奶力咁”cher” 緊啦。hard-laugh

恭喜恭喜!終於劇終啦!收工。

禧媽

51 Comments

  1. hi禧媽, 好耐好耐無見, 記得我嗎? (你點會記得我問黎多魚 :mail: )
    禧禧大個仔左好多, 又好靚仔啊呀!!!!! 希望再睇多點你們的POST!

    • 雖然我有中年痴呆,但我未至於咁嚴重嘅,我認得你”sasa” 呢個名,放心! :yes: 以前yahoo blog嗰陣見過你張相,嗰陣係短髮,係咪先係咪先?又後生又索嗰個後生女丫嘛,係咪好好記性呀我? B-)

      口水禧已經就黎8歲啦,真係時間過得好快,轉個頭佢就會變成一個麻甩仔架啦。 :yahoo: 你近況如何呀?

    • 佢而家已經完全可以同同學或老師講野都無問題啦。返左學學多左啲俚語返黎,不過喺屋企同我地都重係講廣東話多。除非有唔講中文嘅人喺度,咁佢就會自己轉台同我地全部人講英文囉。 :yes:

  2. 靚禧媽 有好多人仲係度呀!!!
    禧禧愈黎愈靚仔呀!!! 而你倆老無變過樣! (日日食防腐劑?)
    btw, 不過你都係得閒先寫下blog 覆下留言啦 :good:

    • 講笑啫,我自己都唔喺度,點叫人喺度丫!LOL
      我地點會無變樣呀?今年38啦我!嗰件41啦。 :wacko: 不過聽呢啲真係令人開心,唔怪之得平時讚啲呀婆唔似幾多幾多歲嗰陣,佢地咁開心啦,睇黎我開始有呀婆嘅心態啦! :yahoo:

  3. 禧媽!第一次睇你yblog睇通頂 幾年冇嚟過之後既今日追唔到通頂嘞 不過都追咗三粒鐘! :good:
    口水禧大個仔曬 <3 :heart:

      • 你兩個仔嘅名好似有啲印象,你寫過一段好短時間嘅blog嘅,係咪?(睇下我啲老人痴呆症有無嚴重左先……記得舊嘅野但唔記得而家嘅野 :cry:
        哇!我想知湊三個男仔嘅感覺係點?你好堅呀!我唔體投地! :good:

  4. 今次好多圖呀~!!!!!!!!!! 同吖嗚卜好大分別呀~~禧媽!!!

    • 丫烏嗰陣都多相架喎,不過呢度可以變大變細,就更加可以方多啲相啦。哈哈! :yahoo:

  5. 好開心有BLOG睇啦, 加油努力!!!!!
    祝”查”FIT人身體健康~~~

  6. YEAH, 又有得睇啦, HELLO 禧家,
    禧, 大個左好多, 明顯一個少男樣啦, 同埋高大左好多.

    • 係呀,真係一轉眼就快8歲啦,離我自由嘅日子又近左少少啦! :yahoo:

  7. 好開心呀….終於有得得禧媽長過鴨腸既BLOG…同埋靚仔禧既相啦!!
    佢高左好多呀~但都仲係好瘦…邊似技安WOR….
    不如下次影下佢D 功課黎睇下丫~

    • 鴨腸? :scratch:
      佢生得高丫嘛,行埋去啲細嘅側邊咪變左技安咁嘅款囉!哈哈!
      有呀,佢學校啲相有好多,係我未得閒寫咋。 :-(

  8. 好開心見到你終於寫番野啦,好彩果時keep住又來睇下你有冇開番,keep check你個blog,終於有種守得雲開見月明既感覺,好多謝你肯用私人時間來寫blog俾我地睇﹗

    • 你有無睇星爺啲戲呀?守得雲開見月明之後係咩你知唔知?嘻嘻嘻嘻……就係月黑風高殺人夜啦!

      • 哈哈~~~ 我細個都睇好多星爺既戲既,勁好笑﹗ 我鐘意你寫野,你係唔係成日整估個仔架?我個仔3歲啦,我鐘意整估佢﹑同佢玩,成個大細路咁….之前你個blog呢,我學咗唔少野架,多謝你﹗

        • 我係壞人黎架嘛,點會淨係整個細嘅唔整埋個老嘅先? :whistle:

          你仔仔三歲重有大把quota比你整估,我嗰個好快就調返轉整我架啦,我都係要好自為之啦!出得黎行,預左要還丫嘛…… :wacko:

  9. 入到…入唔到…入到…入唔到….個BLOG真的好難入~
    一多過30人就死SERVER…@@…想分享出來都唔得…..
    只好等待禧家回應….先再來吧~

  10. 禧媽!!!!!! 妳返歸喇!!!! 太好喇…. 又可以成日見到(睇到)妳的攪笑blog!!!!!

    • 係呀,我終於都歸啦,不過個blog 頂唔順就黎歸X 啦! 嗚~~~~~~ :cry:

  11. 終於入到你個blog 啦!
    好掛住你地一家人 :cry:
    無見咁耐 禧禧有陣少男味添啦

  12. 好開心能夠再睇到你寫blog…好喜歡睇你寫既野,口水禧大左好多呀!

    • 多謝你! 係呀,口水禧就快8歲啦,啲麻甩味開始滲出黎啦!哈哈!

  13. 終於一口氣睇哂4篇新blog,好吉動!
    我都知寫blog好花時間,但你的blog,你的文字,真係好掂。
    冇見一排,次哥個頭好似反光得勁左wo(不要打我)。
    我見口水禧的面好似有陰影,係之前單車果單嘢嘅關系,定還是影相的角度問題?

    最後,為你一家送上祝福。 :rose:

    • 多謝你!盡量寫啦,屙kare 又寫幾句,食早餐又寫幾句,臨訓前又寫幾句,湊湊埋埋就係一篇架啦。
      幟哥個頭得你咁講我就放心啦 …… 停電嗰陣只要用電筒照佢個頭,咁間屋就即刻光晒啦!
      禧哥塊面個疤痕會跟佢一世架啦,嗰陣醫生都講過佢會有痕,無計。好彩唔係女仔! :-(

  14. 真係乖 又有blog睇
    外國生活既小朋友真係好幸福,咁多唔同既博物館。。so jealous!!!!

    • 因為地方大又分得散,好難唔四圍咁起多啲博物館,如果唔係,太遠水路,啲人就好難去架啦。不過我到鍾意外國呢樣野,有好多為小朋友而設嘅活動地方,小朋友有野玩之餘,亦都係一種另類學習,唔洗下下坐課室聽書咁悶。

Leave a Reply to 孖展 Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)