60

小學龜I(完)

其實喺扮非洲旅行篇blog前已經開波寫左少少口水禧一年班嘅野,點知中途比第二篇野騎劫左添……geeky

(8月唔知邊日寫嘅) 重有唔夠兩個禮拜 (出呢篇blog嘅時候佢已經開左學一段時間啦),口水禧就要回歸佢又愛又恨嘅學校啦。正衰仔,學都未開就已經周街同人講佢以後都唔洗返學,發夢啦你,有排你捱呀,傻丙!sneaky

IMG_7534細路仔差唔多到咁上下年紀都唔想返學,口水禧話淨係想喺屋企玩咋喎。點解我會將我童年嘅夢想遺傳左比佢架?其實佢算遲架啦,我幼稚園第一日已經唔想返學架啦,時時都諗辦法點樣可以夢想成真,不過無計可施,結果返返到尾,二返比人剃眼眉,三返眼淚流一地…… 四返返咩?返去受死囉,重洗問嘅!depressed (PG家長指引,此乃個人觀感,如有雷同,實屬巧合!本人絕無誤人子弟之意圖架!)

既然我自己都會有唔想返學嘅念頭,我都好明白小朋友有時唔想返學嘅諗法,自然就對個仔話唔想返學嘅「偉論」都無乜大反應。我重話比佢知我細個嗰陣都有咁樣諗添。

有啲人一聽到細路話唔想返學,反應極其大,好似個仔講完呢句野之後會累個父母跌左幾億出街咁。跟住嗰句好有威嚇性嘅無敵金句「唔讀書,第時大個做乞衣」又會出現。講真,有幾多人細個聽完呢句野之後真係會因為驚做乞衣而發奮圖強即刻考個第一返黎呀?

畢竟,口水禧而家已唔係三歲細路,佢開始有佢自己嘅思想同意願,我覺得佢有表達個人感受嘅自由。有時叫佢做野,佢識反抗話:「你點解要迫我?」唔好誤會呢個行為叫反叛或者曳,甚至係唔尊重父母等等,在我眼中,我覺得佢根本唔知邊樣野係佢應該要做嘅本份,邊樣野係佢有權選擇做唔做而已。試問有邊個人細個嗰陣已經深明呢個大義先?我細個讀書都以為係父母叫我做,我就做,讀書只係為左滿足佢地咋喎。到好大個,差唔多高中先知道讀書係為自己嘅將來,同父母係無關係嘅。

通常我聽到佢發表唔想返學嘅偉論之後,我第一個反應就係問佢:「咁你諗住做乜呢?」

小朋友最直接又真實嘅答案梗係「玩囉」。哈哈,中計,重陰你唔到!devil

然後我再講:「唔……但你唔返學,唔識字嘅話,有好多玩具都玩唔到架喎。個盒寫咩你又唔識睇,說明書教你點玩你又唔識睇,卡通片啲人講乜你又唔識睇,連朋友仔黎playdate同你玩你又唔識玩,嘩!無野好做架喎,悶到飛起都似!」

辣到佢啲玩具,佢一定會沉思……呢個時候,我再加多幾腳:「呀!重有,你上次咪話大個要做動物醫生嘅,又話要醫mimi,你唔返學去學野,點醫呀mimi先?佢咩病你又唔識,比邊種葯佢食,比幾多佢食你又唔知,你唔識字唔識計數點醫mimi呀?重有呀,又話要去揸直昇機,你都唔識字,噤邊個制起飛都唔識,架直昇機唔會飛起架喎!嘩,乜都做唔到,真係悶!」

近期迷上Lego Movie裡面嘅Batman, 重重落多腳佢嘆:「呀,你知唔知做Batman都要識字識揸飛機架,Batman平時唔出動救人嗰陣都要返工賺錢架喎,你唔學野乜都唔識賺唔到錢,買唔到Batman嗰架飛機架喎老細!」

死未!devil 唔好同佢講第時大個做乞衣啦,第時第時,太遠啦,佢唔驚架!講啲眼前嘅野,到肉啲,呢支針吉落去先覺痛!(A~~~咁陰毒嘅?唔通唔記得左嗰個係自己嘅親生仔?)

IMG_8155

喺外國鼓吹民主呀,自由呀嘅風氣之下,作為一個自細接受傳統中國人家庭教育嘅我,都要自動調節下對口水禧嘅教育方式。佢出生係呢個比較自由開放嘅地方,受嘅教育同我有極大嘅不同,勉強將我由細到大被灌輸嘅個一套放落佢身上,盞遲早攪到母子關係核爆。其實,唔單止係中國人或亞洲人,連外國人都會有思想比較傳統啲嘅家長,呢啲家長管自己嘅仔女都好嚴謹下,不過我唔知佢地有無「唔讀書大個做乞衣」嘅呢種金句。哈!

但我唔想做一個至高無上,擁有極權嘅家長呀,因為口水禧係我個仔,我清楚佢嘅性格,所以呢個純粹係我個人唔鍾意獨攬大權而已,絕對無批評任何人嘅意思呀下,唔好誤會!OK?拿!你係真係OK先好繼續睇落去呀,唔好睇完把幾火走黎插我呀,OK?

我唔喜歡用父母嘅權威地位黎訓斥口水禧唔可以再講唔想返學,因為就算迫到佢應承我唔再講又點丫?我阻止唔到佢心入面唔再諗嗰下慘呢!最重要係先攪清楚佢唔想返學嘅原因係咩,好似口水禧係純粹齋想hea就無所謂。再講丫,佢一時話唔返學,轉個頭又話讀大學嗰陣想研究機械人呀、研究點樣令mimi識講人嘅語言呀等等,真係五時花六時變,我根本唔需要喺呢個時候同佢認真討論點解一定要返學。

我之所以咁做,完全係因為想佢覺得同媽媽乜都傾得,唔怕講完出黎會比我鬧,第日返學有乜唔開心都會返黎同我講而唔係瞞住我走去逃學丫嘛。

IMG_2978

一年班無幼稚園咁多剪貼堂課或派對攪,變左老師無咁需要家長投放大量時間喺學校做義工。舊年我好錫身呀,淨係揀左影相、電腦堂同閱讀堂嘅義工工作咋。雖則每個禮拜都要去,不過都係一個鐘意咁大把,我重有時間理下屋企嘅家務又唔洗黐膠花黐到半夜三更。

重記唔記得呢條友學期初突然日日喊話唔返學?原因係佢見班主任鬧同學鬧得甘而嚇親,佢重話佢驚到震添。做義工嘅好處就係可以了解小朋友喺學校發生嘅事,我都有見過佢班主任鬧啲細路個樣,確係幾得人驚嘅,不過班野又真係抵鬧嘅,雖然我從來都唔同意咁樣嚇啲低年班嘅小朋友,但我明白有時真係無計,一個老師要照顧31個小朋友,佢點可能專門服侍一兩個成日遊魂嘅細路丫?顧此失彼又會比其他家長投訴,咁唯有對學生嚴少少,開頭訓練得好,啲細路慣左每日返學嘅程序,好快就唔會好似食左豬油咁架啦。

IMG_2974

如果安排到嘅話,禧爸都會黎參如一下學校嘅活動嘅。舊年聖誕前嘅學校旅行就係全級步行去學校附近嘅市政廳唱歌比市長聽啦。朝早好多家長凍到雪雪聲企喺操場等出發。口水禧見到老豆黎陪佢參加活動會份外興奮,繼而就係面部肌肉失控作出呢啲騎呢表情。

IMG_3186記得嗰日都幾凍,有啲家長薄薄地一件褸真係賴晒野啦,同呢班友仔一齊行,平時用十五分鐘,嗰日用半粒鐘,真係凍到手都無知覺咁濟!

IMG_3087

 

唱完歌仔,呀聖誕老人就喺樓上出現,佢就係小朋友眼中嘅大明星啦,咩韓星、荷里活大明星冚o彭冷彈開,唔好阻住聖誕老人落黎派禮物啦唔該!個聖誕老人乜都唔洗講,淨係猛喺度HO HO HO,啲友仔已經發晒顛,,啲歌星演唱會洗咁多錢整咁多靚衫做乜鬼丫,呀聖誕老人件野著左幾廿年都重著緊,洗鬼換咩!

IMG_3099當然啦,聖誕老人喺呢個大場面點會派禮物呀?好似依稀記得市長有搭老師返到學校時派左啲士的糖比班細路。喺市政廳嘅時候就淨係比啲小朋友寫佢地嘅願望喺張卡仔度,然後比佢地掛上市政廳棵聖誕樹上面。唔好講笑,淨係咁小嘅活動,啲細路已經開心都顛,佢地對掛野上聖誕樹真係有份情意結架!

 

IMG_3459

口水禧每日八點十五分前就要到學校。我地屋企離學校揸車大約係十五分鐘內嘅車程(計埋朝早交通繁忙混亂情況之下所需時間)。但我地要朝早五點半起身食早餐。係,你無睇錯,係朝早五點半,即返學時間前兩個半鐘就要擘大眼離開張床架啦,何解呢?早餐囉!或許有人會覺得多鬼餘,求其塞兩塊麵包比佢咪得囉,再唔係嘅話,塞包奶比佢就送佢去返學啦。噢,梗係唔得啦,早餐唔食好啲,上堂會恰眼訓,肚餓會分心架喎!(即係心散啦!)

朝早,人人一碗水煮麥皮加杞子(☜呢個係禧婆婆話要加嘅)同flaxseed (☜亞麻籽係我話要加嘅)、一隻雞蛋、麵包、口水禧飲我整嘅荳漿、我同禧爸飲咖啡。食晒全部野先比離開。七點五十出門口,去到學校重有時間同同學踢波。九點半小息食生果做茶點。十一點半食午餐。放學返黎食啲乳酪,六點前晚飯,呢輪撞啱我傷風,夜晚好早訓覺,所以五點幾已經要開飯啦。食埋飯後果,口水禧七點半上床訓覺。其實都唔係好夠訓,不過無計啦,時間真係得咁多就係咁多。每日嚴格執行呢個時間表,星期五可以睇一套戲,有時睇到十點先訓都得。偶爾有朋友黎或出左街就夜少少無辦法。放假嘅日子都係咁上下時間去訓,暑假可以遲少少,但都唔過九點就要上床啦。何解暑假都要早訓?因為有時游水比賽都要朝早五點幾起身囉,如果平時慣左夜訓,咁要早起嘅時候就好難調較時間架啦,夜晚訓唔著,朝早起唔到身。

你有無發現啲細路訓唔夠或睡眠質素唔好就會影響佢地其他所有野,包括食飯、活動、社交、甚至連玩都會發火?我比較鍾意有規律嘅生活時間表,咁樣就唔會打亂我每日要做嘅事。(係咪年紀大嘅人都會咁樣架?)looking-shocked 

IMG_3461

 

口水禧學校嘅種族比例都唔算太極端,佢啲波友有白人,亞洲人,墨西哥人,黑人等等,暫時佢好似乜人都啱玩,唔覺佢對其他種族有乜抗拒感。有時喺學校都會聽到有家長討論唔鍾意個仔同某種族嘅同學玩,叫個仔疏遠嗰個同學。其實我覺得好鬼多餘,佢第時出黎社會,唔通又叫佢疏遠某種族嘅同事咩?咁如果佢份工嘅上司就係嗰個種族,唔通連份工都唔要呀?

IMG_3462

 

我同禧爸係絕對唔會干涉佢同乜野種族嘅同學玩,即使佢返黎會講邊個邊個同學點樣特登整佢攪到比老師罰都好,我地只會叫佢小心啲囉,如果嗰個同學郁手郁腳嘅話,千其唔好還拖,話比老師聽先,口水禧曾經試過比人用波掉完,佢轉頭以牙還牙,點知比老師見到,罰左佢企(係咪蠢呢!睇清楚無人見到先掉丫嘛!hard-laugh講笑啦,點會咁教佢。),佢條氣好唔順,日日返黎都同我講個同學嗰日又做左咩激嬲佢又點又點,我地叫佢一係就唔同再同嗰個同學玩住,直至佢肯改善為止,一係就同佢講清楚囉。我又唔信口水禧100%係啱晒嘅,同同學之間嘅恩怨,就等佢地自己拆啦。結果今年兩個分別去左唔同班,口水禧話有日小息見到嗰個同學,口水禧去同人講”you don’t have to be a bad guy. (你唔洗做壞蛋嘅)” 同學答佢”ok”,口水禧返黎同我講:「呀XXX好似好左啦喎,無咁mean(衰)啦喎。」hard-laugh 

男仔比較容易郁手郁腳,所以自細要教佢地用言語解決問題,拳頭係解決唔到問題嘅。佢每日返屋企同我哋分享學校嘅事,無論係好事或壞事,大家一齊傾下計分析下,聽下佢意見,我地會比啲建議比佢,但唔會夾硬要佢接受,日子耐左,佢自然自己識分辨應該同邊類人做朋友,邊類人做點頭之交就好啦。將來佢長大左,我都無能力去隔走佢身邊嘅壞人,唯有靠佢自己去睇人架咋。

IMG_3464

 

佢話有時同同學踢緊波會有啲高年級嘅過黎攪事,口水禧會同人鬧交,我問佢「唔驚比啲哥哥姐姐打咩?」,佢話:「唔驚,佢打我,我會話比老師聽。」至弊穫穫都唔記住人地個樣著咩衫,走去告狀但唔見左個真兇!hard-laugh唉!經驗係要慢慢儲嘅……

IMG_7668Tattling turtle故名思義就係二五龜囉。係口水禧班主任專門特設喺班房比啲細路篤人背脊用嘅。將人地嘅罪行寫喺一張紙仔度,然後放入去個箱比隻龜睇。唔洗講啦,放最多實係我個仔同嗰個同學啦。日日都互篤,皆因佢兩個係一齊坐嘅,磨擦自然特別多啦。最好笑係佢兩個寫完會話比對方知自己寫乜架喎,真係唔知佢地想點!

我覺得班主任呢招勁呀,一來可以知道一啲佢唔在場睇唔到嘅時候發生嘅事;二來可以知道邊個同邊個係唔啱key嘅,編班嘅時候就會分開嗰兩個細路;三來將佢當做一個比小朋友講心事嘅出口,發洩佢地心中嘅不滿情緒。細路仔都有想發洩嘅時候,但好多時都搵唔啱時間搵唔啱人去發洩,一想講就已經比人制止住會令佢地好困擾,積積埋埋無地方發洩嘅後果係好嚴重嘅。從小鼓勵小朋友將心中嘅不滿,唔開心嘅感受搵個信任嘅人講出黎絕對係一件好事,比佢地發洩之餘,亦可以知道佢地有乜野困擾,及時幫助佢地,唔好等太遲先黎後悔就無用啦,係咪先?

其實要套細路講野好易架咋,佢地唔知老師會打開個盒攞啲「狀紙」黎睇架,佢地以為得隻龜知架咋!所以佢地好放心盡情爆料架!hard-laugh

IMG_6573

只要唔係測驗嘅時候,有時企喺度做野都唔會比老師鬧嘅。佢地一堂課上個幾鐘頭,老師上上下堂會叫佢地起身伸展下,行黎行去郁下,唔洗成舊木咁坐定定唔准郁。同香港嘅小學唔同,佢地係一個老師教晒咁多科(高年班唔知點樣),教咩同幾時教都係老師決定,所以佢地係無上堂嘅時間表嘅,即係無好似我細個嗰陣規定星期一上中英數社會科學音樂嗰啲時間表,佢日日上左咩堂同學左咩我係唔知嘅。所以佢成日放學返黎會話嗰日測左咩科,事前係無得溫習嘅。據其他有高年級仔女嘅家長講,咁樣做係因為老師要知道每個細路嘅進度,所以特登無得比佢地事前準備或者溫書,考嘅野全部都係上堂老師講過嘅野,就睇下你吸收到幾多。到高年級嗰陣先會預告比你知幾時有測驗,等你可以溫習左先。

IMG_2923

一年班每個禮拜都有閱讀報告要交,不外乎畫公仔同撮要下本書嘅故事內容;跟住就係閱讀理解功課 – 睇一段文字然後答題;數學功課計數嗰部份好簡單,但有啲題目答完要解釋點解,例如:點解1+2=3?;phonics閱讀功課 – 開始教咩係vowel(元音)同consonant (輔音);寫生字(每個寫3次,星期五默);成個學期做左兩次project。

起初睇見佢啲數學功課真係R晒頭,10+ 1= 11因為係1+1+1+1+1+1+1+1+1+1+1=11 ➪ten (1) + one (1) equals 11

睇完心諗:下?咁都要解?唔係啩!後來有一次同一個大學讀數學嘅學生傾開,佢話其實而家好多數學家研究緊一啲方法去教數學,等多啲人學數學得容易啲,喺背公式呢個咁死嘅方法以外創一啲新嘅方法出黎,佢地覺得如果啲人明白最淺嘅道理,自然就會一理通百理明,所以我估呢個十個(1)加一個(1)就係朝呢個方向去教啲細路學數。講真,喺我讀書嘅年代,我只著重計啱個答案,從來無諗過點解。唔知大家有無同感?

IMG_2710

除左數學,另一樣好重要嘅就係讀寫能力。佢地有好多野要睇,尤其係故事書。每個禮拜都有一堂全班人去圖書館借書同聽故事。唔知而家香港嘅中文圖書內容係點,但呢邊嘅圖書真係好多元化,內容精彩,有啲無厘頭得黎又幾得意,比著我係細路去到圖書館眼都花到唔知揀邊本好!

每個星期嘅電腦堂除左做數學練習之外,重要喺課室先睇幾本圖書(周圍都有書睇)然後喺電腦堂上網做閱讀理解選擇題,做完之後個程式會將學生對嗰本書內容嘅理解程度傳去班主任張分數紙,跟住老師就會因應啲細路嘅程度編排適合佢地睇嘅圖書,每個細路都有一個閱讀程度嘅範圍,例如口水禧係2.1-3.1,即係佢可以睇二年班程度至三年班程度嘅圖書。根據口水禧所講,佢有啲同學甚至可以睇四年班以上嘅書!佢地老師對於一年班就有咁樣嘅閱讀能力已經滿意到不得了!口水禧所識嘅字同文法,全部都係靠睇書學返黎,佢平時作嘅句子,佢老師唔會改佢文法,寫錯串錯都有得佢,淨係做英文練習嗰陣先會教佢地文法。佢地相信咁細個叫佢地背文法盞o徙氣,睇書睇得多,自然就會學到架啦。呢個我同意喎,我細個好鍾意睇書,我嘅作文功課同測驗成績都唔弱雞架,大部份嘅詞彙都係睇故事書學返黎嘅,所以真係唔可以睇小閱讀為細老仔帶黎嘅好處!

IMG_2873

每星期嘅電腦堂亦係我要做義工嘅其中一日。電腦堂同學電腦係無關係架喎,哈哈!純粹係叫佢地做十五分鐘數學練習同閱讀理解練習架咋。每隔幾個禮拜就要做一次Star test,內容主要考學生嘅詞彙、閱讀能力、邏輯思考等等。一年班只需要練習,到二年班就真係要去考架啦。呢個係每年一次嘅公開試嚟嘅,有啲似我細個嘅學能測驗,愛黎幫學校攞分架咋,即學校越高分,政府撥資比學校嘅錢就越多,所以除左學生平時嘅出席率之外,呢個試係校長另一樣當命根嘅項目黎架!今年學校入選為其中一間加州嘅distinguished school,個校長開心到黐左線咁,爭在未喺學校操場擺一百幾廿圍盆菜大宴親朋!明嘅明嘅,黎左三年就有咁嘅功績,抵佢囂嘅!

IMG_3537

 

曾經喺呢度寫過一篇叫「一張紙」嘅blog,對口水禧黎講,呢張仍然係一張紙。只要達到學校嘅要求,例如上學期你透過做呢個網上數學練習,學識左五十種新嘅野,咁就可以得獎狀架啦。

IMG_7266由於呢度暑假係無暑期作業做嘅,所以口水禧喺幼稚園升小一嗰個暑假已經做晒一年班嘅數學練習,返緊一年班嘅時候佢只係有時做下二年班嘅練習就得啦。對比香港學校嘅程度,呢度公校嘅小一二都重係淺,不過淺嘅背後有佢嘅原因喺度。啲練習由淺入深,一個練習嘅題目換下殼換下啲字眼或數字,不停做幾廿題,答錯嘅話,佢會有解釋比小朋友自己睇,唔明再問大人。完成啲練習攞夠分就會有啲圖畫彈出黎氹下啲細路開心。學校覺得先打好個底,鞏固好之後再上,小朋友日後學野會容易啲,而且訓練佢地自己解決問題嘅能力,如果一開始就太深的話,搵鬼同你有興趣做咩,個個走晒啦,係咪?再講,一個六七歲嘅小朋友,有無必要學啲深到佢R晒頭嘅野先?行路都未學好就已經叫佢去跑嘞,盞仆死佢架啫!

呢度有間野K字頭嘅補習社,差唔多好似seven-eleven咁開到差唔多個個市鎮都有一間,佢就黎可以同Starbucks合作攪合資架啦。口水禧有啲同學幼稚園已經開始去嗰度補數或學讀寫練習。或者係因為父母要返工無時間同能力教小朋友,於是送佢地去啩。既然我成個棟喺屋企咯,咁功課嘅野就梗係我跟啦。曾經有朋友建議我如果覺得口水禧英文唔掂嘅話,就不如送佢去補英文啦,但我總係覺得咁細就要去補習,會唔會”chur” 得太勁呀大佬?所以到目前為止,只要做好晒學校要求嘅野,我就有得佢玩,無街外補充練習,無補習,無上中文堂。學中文等佢大個如果有興趣咪學囉,無興趣綁住佢去學都無用。有啲中國人同學媽媽自細喺呢邊長大,佢上幾代都喺呢度架啦,所以唔識寫同睇中文。佢話我識講識寫識睇都唔教個仔好浪費,但我覺得學語言嘅野都要講天份。口水禧有無學中文嘅天份我暫時唔知,但唔覺得佢有興趣學。我最怕聽到啲批評好似咩「身為中國人都唔識中文」、「唔識中文第時大個點去用中文嘅地方做野呀?」、「學多樣語言馨香啲架!」、「你自己識都唔教個仔,有無再懶啲呀你!」……

angry-sick關你鬼事呀!哼!我點止無教佢中文呀,我連鋼琴都無教佢添呀,吹咩?世界咁大,乜都話要學,好攰呀!(大家唔好誤會呀,我唔係鬧睇緊呢篇野嘅人呀,我鬧緊嗰啲多管閒事嘅人咋!)

IMG_20140327_155314一年班做過一次動物報告同一次海洋生物模型。口水禧嘅動物報告揀左長頸鹿。佢個老師有規定格式,亦都比左幾條問題比學生朝住嗰個方向搵資料。報告做好之後,每個學生都要出黎向全班同學做個簡短嘅演講,其實即係揸住份報告朗讀,跟住同學有問題發問,做報告嗰個就要答。

IMG_20140327_155438IMG_9372喺圖書館借左幾本書返黎一齊睇,搵左老師要嘅資料之後,口水禧要撮寫落份報告裡面。當然,佢第一次做報告,根本就唔知究竟要寫到幾詳盡先叫OK,於是我每個單元讀左一次內容比佢聽之後,就要佢自己習低有啲乜野關於長頸鹿佢想話比同學同老師知道。離唔開都係嗰幾樣啦,住喺邊、身高體重給身體特徵、食乜野等等。其實對父母黎講都有難度,幫得太多,個細路指意晒你,咁佢喺課堂上點答人地問題呢?幫得太少,佢份報告肯定無人睇得明,嘥時間心機之餘重打擊佢自信。

IMG_6773點解要做呢份報告呢?咪就係因為之後學校旅行去動物園囉。

IMG-20140517-WA0013第二次做海洋生物模型( Ocean Diorama)。今次老師比學生自己揀做定唔做,揀唔做嘅就要做一份閱讀報告。口水禧咁鍾意試古怪野,梗係棄讀書報告,揀做模型啦。

每次老師都會通知家長大概要點做同埋點解要揀做呢個模型。睇左啲指示之後就同口水禧去買啲材料返黎,呢度最好就係賣勞作嘅鋪頭相當之大,好多野你揀,你一定會揀到合心水嘅材料。

我嘅藝術天份,睇我車窗簾都有目共睹兼慘不忍睹啦,數一數二……弱雞!估唔到呢樣野遺傳左比口水禧添!所以我地決定啲鯊魚呀、鯨魚呀嗰啲就用現成嘅塑膠模型,其他野我地用泥膠整啦。你見到又估到係乜嘅嗰啲係我整嘅,見到估唔到嗰啲或見唔到又估唔到嗰啲呢係口水禧嘅傑作黎嘅。點解會見唔到呢?因為佢壓扁晒,無整立體架囉,所以佢嗰啲全部訓晒係底,重要比啲灰色扮石嘅遮住左,咁咪見唔到囉。重有上下左右底面有海洋圖案嗰啲紙係佢剪同貼嘅,張相睇唔出,但現場睇,你會以為呢個小朋友屋企梗係窮到無錢買較剪同間尺頂嘞!

IMG_7315

除左做模型,喺學校做堂課都有學關於海洋生物嘅野。呢個就係我地家長次次都係到學校開放日嗰日先知道究竟自己個仔日日返學做啲乜學啲乜架呢?睇返佢地啲堂課、測驗卷呀,其實佢地好似學左都幾多唔同類別嘅野架喎,例如佢地有英文、數學、美國歷史、科學、社會科學、地理、生物電腦、體育、音樂等等,都幾唔悶架喎!

IMG_7305

早喺今年二月農曆新年嘅時候,禧公公同肥玲過黎玩,我地同口水禧申請左自修(independence study)去左LA同Las Vegas。臨行前,老師派左自修功課比口水禧,其中一樣就係要佢紀錄每一日嘅天氣情況,溫度、風向、雲嘅形狀。原來嗰段時間佢地學緊「望天打卦」,哈!係觀天象先啱。佢地學左雨水嘅形成同埋睇雲嘅狀態去判斷幾時會落雨。其實我細個學呢啲野嗰陣得個背字,我相信用做模型嘅方式,肯定易入腦好多!

IMG_6061

睡衣日連埋Dr Suess’s birthday一齊攪活動。Dr Suess係一個寫好多古靈精怪兒童圖書嘅作家,口水禧喺雞雞學校嘅時候就已經開始接觸呢個作家嘅書啦。相入面呢個同學媽媽戴嘅帽就係Dr Suess圖書其中一個好出名嘅角色叫Cat in the Hat所戴嘅帽。嗰日,個個都著睡衣去學校,連老師校長都唔例外。我?梗係跟啦,幾爽呀!頭都唔洗梳就出門口,靚到呢!

IMG_5327

IMG_5863

我地情人節都有party架,唔係鼓勵啲細路去拍拖,只係教佢地對其他人要有愛啫。大部份嘅家長都會預先準備好全班同學兼老師嘅小禮物,通常嗰排各大超市或百貨公司都會賣有情人節主題嘅糖呀、文具呀、精品等等,預左啲人會帶返學去送人嘅,所以我地買包糖、貼紙、鉛筆、心形嘅卡之類分三十幾份咁獨立包好寫好名就可以帶返學校送架啦。

IMG_5932Party完之前,老師就會安排啲細路逐個逐個同學嘅禮物袋裡面攞一份放落自己畫左公仔嘅袋帶返屋企。有啲同學好有心機,特登預先影左自己嘅靚相,加句Happy Valentine’s Day然後吉支心形糖喺度。

最攪笑係嗰日口水禧帶去送人嘅禮物包裡面有個鉛筆刨兼擦膠嘅野係裡面(係,我地好唔浪漫架,情人節禮物都送啲實際野先覺得抵!),點知第二日我去學校做野嘅時候,有幾個細路走黎問我攞,有啲話返到屋企比細佬搶左,有啲話唔見左,結果呢,我又去再買多次比佢地囉。唔買會點?無野嘅,喊囉!哈!唉,一蚊個唔係好貴,又實用嘅野,算啦。

IMG-20140611-WA0009

每年都有一穫Picnic on the green day,即叫家長黎學校,坐喺草地上陪個仔食lunch。有無家長唔黎,梗係有啦,不過我地會「的」全部細路坐埋一齊食,家長吹水,細路食完就四圍玩。

IMG_7216IMG_7218IMG_7219每年臨學期尾學校會有個Staff Appreciation Week,成個禮拜都會有禮物送比學校做野嘅職員。班主任都好識做嘅,佢會送禮物比成日去幫手做義工嘅家長。呢啲花係我地全班小朋友喺自己屋企嘅花園摘幾枝湊湊埋埋,家長插好喺花樽送比老師架。Errr,插花我就無份啦,但啲裝飾野就係我整嘅,係咁上下啦我啲手工……hard-laugh (平時少收花丫嘛……concerned

其實外國人嘅學校或家庭都時時有教小朋友要有禮貌,識感恩,做好事架,守規舉,不過細路仔唔係個個一教就聽,好似口水禧咁教左咁多年都重係講野聽野唔望人,唔會主動同人打招呼或講多謝,打乞痴唔用手遮住,唯有每次都不停提佢囉,無辦法啦,係咪?有時唔好話小朋友啦,有啲大人講野都好無禮貌啦,更何況係細路仔呢!

IMG_3812

呢個係口水禧一年班時最鍾意同佢玩嘅同學。今年去左第二班啦。口水禧話全班最靚仔就係呢個同學喎,點解會特別鍾意同呢個同學玩呢,因為佢都好鍾意整埋啲古靈精怪樣同動作囉,同口水禧咪最啱key囉咁!

IMG_3595點解叫長期洗頭呢?其實係因為我個仔唔知係咪體溫失調,返學嘅時候氣溫比較低,通常都會要佢著件厚啲嘅外套先出門,因為佢地返到學校唔係即刻可以入課室嘅,要喺操場玩幾個字先入室內。入到課室有暖氣嘅,但呢條友夠膽懶到連外套都費事除,有時甚至係著住羽絨喺暖氣房上幾個鐘頭嘅堂,熱到滿頭大汗好似洗完頭咁!佢重要出晒名大汗架添,第時大啲有體味嗰陣邊個坐佢隔離就陰公囉!sickno-snitching

IMG_5974

老師嘅生日,我地都會全班夾錢送禮物比佢。嗰日我地幾個呀媽在場,啲細路一齊唱生日歌比老師聽,頓時已經標淚,拆埋禮物之後直頭講唔到野。老師教埋今年就退休,可能因為咁樣就更加激起佢嘅感性啩。一陣重有學期尾老師讀出每張小朋友臨別寫比佢嘅字條同最後一日返學嘅相。其實我最驚面對呢啲離別嘅場面,唔係驚我自己喊,而係驚面對人地喊,我會完全不知所措,條脷打晒kick唔知點安慰人好。好彩送生日禮物呢日有幾個呀媽陪我咋,如果唔係我都唔知點好。

稍為控制到情緒之後,老師逐個呀媽擁抱一下。而家我已經習慣左呢啲擁抱,以前初初黎呢度嘅時候,我對於同人擁抱呢個動作真係有啲抗拒,唔係怕人地污糟或搏懵之類,我怕嘅係唔知要點樣攬埋去先啱呀,要攬幾大力呢?攬幾耐呢?攬邊度呢?男人攬唔攬得呢?始終唔係真係好熟好熟嘅人(就算好熟嘅人,我都無同人擁抱嘅習慣),又怕人地攬落feel到我縮縮下尷尬。不過日子耐左慢慢開始習慣,而家係男又攬得女又攬得,重識得用雙手攬返人添……errr,以前我好似條木那衣咁垂直雙手比人攬,側邊望落應該都幾攪笑!問你怕未!

 

IMG_7542學期進入尾聲之時,每個小朋友都穫派一張卡紙寫上佢地要寄語老師退休之後記做嘅野。家長代表收習好後連埋學生嘅相釘成一本野送比老師。有啲小朋友提老師記得每日要同隻狗去散步;有啲提老師做運動減肥(呢個高危動作黎喎,成績表都未派夠膽講呢啲!);有啲提老師去多啲旅行同捉棋。另外佢地重有寫上覺得老師有咩好……哇!嗰日得我一個人去影相,乜搵啲咁嘅野攪呀?寫呢啲!超級催淚架喎!好彩,我諗老師都知我R底,都叫做好控制架啦,嚇得我丫!

IMG_7822IMG_7819離別嘅一刻終於都要來臨。一年級最後一日返學,我地同老師攪左個party,小朋友喺白板上寫左好多We Love You, Happy Retirement, You are the Best Teacher Ever等等字句。

小朋友,你比左愛佢地,佢地會十倍比返你,呢樣係真嘅。嗰日一個又一個緊緊攬住老師嘅畫面;一張又一張抹眼淚嘅相片;小朋友喊到變豬頭,老師晨早已經連妝都溶埋啦!真係聞者傷心,見者流淚!一個二個喊喊喊,簡直將我嘅驚恐指數推到最高點!

IMG_8044

喊呀喊呀~~~

IMG_7937

 學期初,口水禧重處於「月經失調引至眼淚失控」之時,日日返黎喊話唔返學。我走去搵佢老師問個究竟。但連老師都R晒頭唔知點解口水禧會咁樣。

其實喺註冊嗰日去睇班房嘅時候已經同呢個老師打過下招呼,當日已經大約感覺到佢係個點樣嘅老師。聽幼稚園嗰個老師講佢係特登放口水禧入去呢班,原因係呢個老師嘅強項就係訓練小朋友嘅閱讀能力,幼稚園個老師話既然口水禧嘅閱讀能力有返咁上下就應該加強培訓,因為老師覺得細路閱讀能力好先有助學習,唔識字曉飛都無用。就係咁樣,口水禧就入左呢班。

第一次見面,呢個老師同口水禧吹左幾句水,當時嘅口水禧見陌生人又係老師,驚到成隻鵪春咁,答人問題一字起兩字止。我企喺佢側邊嘗試幫佢答,但只見老師完全無望過我亦無理我答咩,佢只係猛微笑望住口水禧等佢答。見咁嘅形勢,我明啦,老師嘅反應即係叫我收嗲企埋一邊唔好再幫個仔答問題啦。無論口水禧幾細聲,唔望人,求其答個yes字就算,老師都會自圓其說打個圓場,重對口水禧講好期待佢黎呢班返學添。

IMG_8076直至口水禧真係返學啦,開頭成日因為一啲好小嘅事夜晚訓覺之前都會突然喊住要求我幫佢寫張紙仔比老師話比佢知口水禧將圖書放錯左喺書櫃第二格,諸如此類嘅小事情。

如此寫字條比老師寫左兩三次之後,有日我去做義工嘅時候,我問老師有無睇到我嘅字條,佢話佢有睇到,不過佢想口水禧自己去同佢講。叮一聲,我明佢意思啦。之後口水禧當然重有叫我幫佢寫啦,但我叫佢試下自己同老師講啦,我話老師唔鍾意媽媽插手呢啲事,最初我同口水禧講如果佢講唔掂先再同我講,我陪佢去同老師再解釋清楚啦。

有一日,口水禧又唔知做錯咩野定唔記得一啲野,當然我拒絕幫佢寫字條。咁啱嗰日朝早喺走廊撞見老師,我問佢口水禧有無話佢知有啲野又做錯左,佢話口水禧無同佢講喎。我話我無再幫佢寫字條啦,我叫佢自己同老師講。老師聽左之後好大聲講左句” Good for you!” 佢意思係我終於開竅啦,肯放手啦。可能佢覺得教家長其實重難教過細路。

其實大家有無發現,我地大人成日好容易幫小朋友答問題?每當我地一覺得小朋友答人答得唔清楚、唔夠大聲、唔夠詳細、唔夠大方得體之類,我地就會飛撲即刻代答。咁樣做不單止阻礙左小朋友同其他人嘅社交機會,亦會打擊佢同人地社交嘅自信,變得更加唔想同人溝通,有乜事就推個老豆呀媽出去咪得囉。我其實間唔中重會有呢個毛病,但我盡量提醒自己啦。另外就係嗰啲同小朋友講野嘅大人,唔該要有心理準備,有啲細路真係唔係好叻同大人吹水架咋,有時你問嘅問題太難答,太無聊,或者太尷尬,小朋友就會唔想答你或者求其答你就算。請你喺呢個時候一係行開唔好再問;一係問啲有趣啲嘅問題啦。重有重有,唔該唔好將你個人嘅觀點夾硬變成全世界都要認同嘅金科玉律,然後強行攞去做批評人地個仔嘅理據。

例如:男仔頭髮咁長,成個女仔咁樣,剪左佢啦;

你咁瘦咁un,梗係食好少野啦,唔得架,要食多啲先會高架;

你做乜唔返學嘅?哇!請假去旅行,返去咪跟唔到人地個進度囉?

你識唔識背成數表呀?識唔識XXXXXXX?下?唔識,呀邊個邊個都識啦喎!

點解你食野咁慢嘅?呀邊個邊個都快過你!

點解你畫花晒自己隻手架?咁污糟!

你喺學校學左乜野呀?(咁多,叫佢點答你呢?)

請問,如果你係小朋友比人問呢啲野,你會有興趣答佢嗎?答佢「嗯」經已比左面佢架啦,比著係我,我答佢「關你咩事啫?」無禮貌?車!我究唔覺得上面嘅問題有幾禮貌啦大佬!

如果你唔知點樣同小朋友打開話題,就不如唔好撩人講野。因為個下場通常都係唔多愉快嘅。如果你純粹係想搵個細路黎整蠱佢,激下佢,奚落下佢嘅話,唉!何必呢?稚子無辜!

 

IMG_9371

唔知其他學校係點,暫時口水禧嘅成績表係無分數,無ABC級別,只有分below basic(基本以下), basic(基本), 同埋Proficient(熟練)三種,無分全班或全級名次。家長教師日嘅時候,老師都有解釋第一學期嘅成績有可能會見到basic嘅評語,咁係因為佢地當時只係學期初啫,啲野都未教完,無理由會有proficient架。

通常家長教師日喺第一個學期舉行。如果你完全唔去學校做義工嘅話,嗰日就係成個學年你唯一一日會見到你仔女嘅老師。當日我同禧爸都有去,聽左好多老師講關於口水禧學業上嘅事、學校嘅事、學習進度、有咩攪笑野呀等等,老師話最鍾意口水禧嘅笑聲,啲同學成日會俾口水禧嘅笑聲感染跟埋一齊笑,明明唔好笑都變左好好笑。我仔嘅笑穴確係有啲鬆鬆地,成日都唔知為咩狂笑。

最後,老師問我地有無野想問佢,真係想問「乾燒依麵食左未?」(唔知我講咩呀?睇審死官啦!)我問佢覺得口水禧嘅程度喺班中算係中上、中間,定中下呢,有無野要我地喺屋企幫佢練習或要我地注意架呢?有無行為上嘅問題呢?(係咪比乾燒依麵大方得體呢?)

老師話:「佢係中上。無野要特別留意或加強練習。我好滿意佢嘅成績同進度,各樣都好好。Good parenting!」

我同禧爸嘅成績表都唔錯吧?happy-wink

 

 

 

 

 

 

 

 

 

禧媽

60 Comments

  1. 禧媽, 你知道我有幾掛住你MA??? 2014掛到就2015,.,.,哈哈!!!
    祝你地一家新年快樂, 最緊要身體健康, 努力寫BLOG!!!!
    HAPPY NEW YEAR!!!!!!!!!!!!!!!!!

    • 嚴禁於本平台示愛! B-)
      新年快樂!祝你2015 日日都想嗰樣有嗰樣!多謝你咁有心!

  2. 禧媽、好掛住你地一家呀!聖誕過成點呀?有時間可以寫少少blog update 下嗎 :p

    • 我地整緊一啲野,應該好快就得架啦,到時就可以密啲update到,不過要用手機睇先得。遲下攪掂左就通知大家!Happy New Year! :yahoo:

  3. Hei Mom, missing u a lot. ]
    I would like to wish Hei Heiou, U & Hei Pa + ur beloved family members especially Hei’s grandmother the best of this festive season. And all of you have a safe & happy 2015.

    • 雖然我地喺好遠嘅地方,但都有留意香港新聞同報紙,睇到近日發生嘅事都有啲心煩!如果問我企邊一邊,我真係答唔出,因為唔係親身企喺現場,根本唔知邊篇新聞係真邊一篇比人故意改過黎。呢頭話有件咁嘅事,轉頭又有人話係流料,一次一次錯信啲報導真係令人好火滾!所以我選擇唔評論邊個好邊個唔好,唯有耐心等待真相大白嘅一刻。但我最希望係大家最後一定要安全返屋企,作為一個媽媽,我最肯定我自己最想無論最終結果如何都好,個個人嘅仔女都可以平安返到屋企。 :cry:

    • 禧媽~ 想請教下你點訓練小朋友閱讀
      我大女佢英文較弱, 每當睇英文故事書時, 佢遇到唔識既字就會飛過, 咁我就叫佢拎本字典出黎查, 但佢即時無哂興趣繼續睇故事啦…..
      我記得你以前講過口水禧識拼音, 實拼就識讀識串, 其實你點教佢?用咩方法架?
      唉~ 我女女而家係香港讀緊英文小學, 數學常識樣樣都係英文, 所以我做家長既, 都有點迷惘點從平時訓練好佢英文底子, 希望好快會收到你既分享啦~ ^_^/

      • 其實閱讀呢個習慣係要培養出黎,但又唔迫得佢,因為有啲人真係一望見字就覺頭暈。呢度嘅學校會定期同啲細路做評估,搵出佢地嘅閱讀程度去到邊個級數,然後再搵適合佢程度嘅書比佢地睇。所以如果你女女睇嘅內容太深嘅話,佢可能就無興趣睇落去架啦喎。喺呢邊黎講,通常每頁如果有超過五個字係佢唔識點解嘅話就代表本書對佢黎講太深,要換過本淺少少嘅比佢睇。
        幼稚園嘅時候學校就教phonics架啦,所以佢地默字都唔洗特登死記啲字點拼。但香港嘅情況比較特別,除非老師默字嘅時候發音發得好準,如果唔係嘅話,學生好難用拼音去串字。口水禧細個嗰陣有個玩具教phonics嘅,所以佢未去幼稚園前已經略略知道大部份字母嘅發音。上到幼稚園嘅時候,學校有用ipad比佢地學拼音,加上老師有教,所以啲細路好快就上手。你不如試下搵下網上有無關於小朋友學phonics嘅野比女女學,始終都要外國人或以外語做母語嘅人黎讀先至夠準確嘅。
        香港日日都好多功課架呵?如果平日無時間的話,週末搵個時間睇下英文故事書,有無啲會發聲嘅電子書呢?聽得多自然就會學到發音,自己發到正確嘅音,串字就無咁難。
        希望幫到你,我諗如果我喺香港嘅話,我都會叫口水禧做差唔多嘅野黎學英文。 ;-)

        • 禧媽, 你真好, 咁快就覆我~ 其實係香港做家長, 細路仔真係好大壓力, 為左入間好學校就要不斷去學野, 為求爭取好成績考入心儀學校囉….
          我大女而家2年班啦. 晨早6點起身, 6:30就上校車, 下午4點先返到黎屋企, 返到黎又要趕功課, 又要趕溫習, 9:30個女要上床瞓啦. 驚佢太夜瞓,第二朝唔夠精神! 所以唔好話平時閒日睇故事書, 連我食飯都要限時限刻, 我日日放工返到屋企都好似同時間兢賽咁,身心都好累
          由於我女女入左間英小, 所以好多科目都係用英文問&答, 最慘係我個女係學校有野唔識又唔夠膽問老師, 儲埋儲埋先一獲過問我,,,,, 有時我都擔心自己會教錯佢……陰公~ 你地係外國生活, 教育制度好似輕鬆好多, 但反之學既知識唔會單單侷限課本, 仲學到好多課外野. 所以好想以你分享既教學方享, 讓我參考下, 作出調整點樣令個女學好英文之餘又唔會討厭英文……. 當初點解你會移民左去美國?

  4. Hi Dear Hei Mon, I read this writing for 3 times. Learn a lot — (i) start to drink 荳漿 as I am having asthma, & (ii) eat flaxseeds. Can see that you have put a great deal of thoughts & efforts in caring the family & Hei Hei. Why eat 杞子? Take care!

    • 我睇啲資料話越純嘅荳漿越好,即無加糖呀,有機大荳嗰啲。最好就自己整啦,咁就可以肯定係最純正嘅荳漿。不過如果無時間自己整買街外嘅都無計啦,唯有揀啲信得過嘅牌子。

      杞子中國人話保肝腎,對眼好呀嗰啲。不過唔係個個人都啱食,我要搵多少少資料睇下先。

  5. Like! 呢個世界咁大咁多野學,乜都學晒好疲啫。鍾意咪學囉,硬塞係無用既

    • 有啲人問人有無學乜學物嗰陣啲態度同批評真係攪到被問嗰個好想轉身就走,而家唔學遲啲學,或者甚至永遠都唔學,我真係奈口水禧唔何架喎,有啲野學唔學都唔會世界末日嘅,咁咪有佢囉,無咩大不了啫,係咪?

  6. 10+ 1= 11因為係1+1+1+1+1+1+1+1+1+1+1=11 ➪ten (1) + one (1) equals 11 <– that's common core curriculum.

    Don't like it at all :(

    • 睇落好似係有啲戇居,但對於數學真係差到爆嘅人黎講可能真係有用。 :yes:

  7. :rose: 祝你地+Mimi :heart: 中秋節快樂啊禧媽。超開心啊你終於浦頭喇哈哈
    你們那邊好像還沒到八月十五吧,我們這邊還有一個小時就八月十六了
    btw,,,我是在紐西蘭的 :-)

    • 中秋節嗰日我連個月光都未見過,呢度無假期呀,所以嗰日應該唔多中國人會慶祝做節,因為第二日大人要返工,細路要返學。不過第二日我殺左去買減價月餅,榮華買一送一,食到嘔都得啦。你有無做節呢?嗰邊應該都會有月餅賣架呵?

    • 要吉就一定要中佢個死穴,吉落去要又準又痛先有效丫嘛,你話係咪先!(呢番話出自一個呀媽嘅口真係太無人性啦!哈哈!)

        • 我地無人性,但無可否認,我哋嘅母性超強先會諗得出或同意咁樣「招呼」自己嘅骨肉丫嘛! :yes:

    • 好耐之前佢重成日咳又氣喘嘅時候,我曾經懷疑佢對乳類產品有敏感,又諗住出面買嘅牛奶始終都有防腐劑呀,激素呀嗰啲(美國都有好多食壞人嘅食物,尤其比動物食嗰啲,可能有GMO食品,人食左有機會生野),於是覺得不如自己喺屋企整荳漿啦,買啲有機嘅黃荳返黎整,一次整一星期嘅份量,咁就肯定最少有害物質喺啲荳漿裡面啦。後來有日禧婆婆睇書話有講原來有氣喘嘅人飲荳漿最好,因為有氣喘嘅人身體缺乏左麥氨酸,遇上天氣變化,條氣管就會痙攣,呼吸困難,荳漿入面有麥氨酸呢種物質,所以長期飲嘅話,對氣喘病人有幫助。知道呢樣野嘅時候,口水禧都飲左成年幾荳漿啦,所以見咁正,咪一路飲落去囉。

      • 原來係好嘢黎嘅! :good: 可唔可以教下我點整呀?我個女而家18個月大,以前飲普通奶粉會肚痾,轉左飲無乳糖奶粉。醫生話佢到2歲可以轉鮮牛奶,但要睇情況(有冇肚痾),所以睇下飲豆漿會唔會更適合。點樣儲藏1星期份量呢?

        • 有啲人對黃荳都會敏感架喎,我諗你同你女女嘅醫生check清楚先好比佢飲呀!重有啊,一日唔可以飲太多,我唔知咁細嘅小朋友可以飲幾多,成人一日唔可以飲超過4杯茶餐廳水杯咁上下嘅容量嘅荳漿架,如果唔係,會走去練葵花寶典變東方不敗架!哈!
          我通常先浸1cup嘅黃荳,要浸大半日等啲黃荳發大差唔多一倍(有啲人話浸8粒鐘),香港天氣比較熱同潮濕,最好浸住水放入雪櫃,如果唔係會發酵架喎。浸好啲荳之後就用搾汁機搾出荳漿,1 cup黃荳加4cup水打出荳漿。啲黃荳浸大左之後,只要幾廿粒就裝滿1cup架啦,所以你大約會從複呢個1 cup荳+4cup水嘅動作幾次左右。打到啲荳變荳漿後,倒落個nut bag ( 比嗰啲用黎隔魚湯入面啲渣嘅袋更細窿嘅袋)隔走啲荳渣,荳漿落煲,荳揸隔起留返做肥料(如果你有種花)。如果啲荳漿面有泡就「畢」走埋佢,煲滾啲荳漿再加糖就飲得。一定要煲滾喎,未滾嘅荳漿有毒,唔飲得架。記得睇火,因為荳漿滿瀉出黎落左爐頭啲積好鬼難清!

          • 唔記得講埋煲完點添。煲完攤凍左就入落玻璃樽放雪櫃,應該可以放一個禮拜左右。唔好放落保溫杯,會變味。

      • 禧媽 禧禧每日都飲荳漿唔怕吸入太多estrogen嗎? 我上網睇過話由其事係發緊育既男仔唔好飲太多 因為estrogen會令到男仔青春期發育女性化,令到男性特徵冇咁明顯 甚至係有女性特徵, 對發育可能會有影響

        • 係咪驚口水禧變左東方不敗呢?哈哈!每日唔好飲超過四杯茶餐廳水杯嘅份量就無問題嘅。如果有日我發現佢暱喺房練葵花寶典嘅話,我會捉佢去睇醫生架啦!哈哈!

    • 如果香港有flaxseed賣的話,買黎加落麥皮度其實好好架,去厠所開大又順暢,又可以增強抵抗力,幾無得頂架!

  8. 我哋朝早要7:45am返到學校,都係6:45am起身!只係飲杯奶,食塊你地好犀利!

    • 希望佢年紀越大食野越快,到時我地唔洗倒X咁早起身食早餐啦!咁早起身,夜晚十點前就要訓啦,如果唔係第二日好攰!

  9. 我一見到5點半起身,我已經暈一暈!! 點解要甘早起身呀?因為禧禧食野慢?定係你煮
    左九大鬼比佢做早餐呀? 我睇怕我以後都可能同你一樣,倒塔甘早起身,因為我屋
    企個兩隻係超級魔王!

    • 邊有九大鬼丫,係佢食得慢啫!唉!不過朝早係忙啲嘅,除左要整早餐,重要熱返啲野比佢地兩父子帶走做lunch,攪呢攪路,我出得廚房坐低開始食都差唔多6:30啦。你仔女學校有無早餐?我仔有啲同學係返學校canteen食,但我仔唔肯食學校野,所以要整比佢食咋。(不過唔整比細嗰件,老嗰件都要食,所以我走唔甩架啦,點都要整架啦。)

      • Preschool 要響學校食就要自己帶返學,K 應該就有!但我兩隻野比我昅實都食成大半個鐘,如果返學校食應該唔洗食!
        佢地都係唔食hot lunch,我朝朝起身整壽司呀飯團呀o甘! 我隻佬就無你個隻o甘幸福啦,佢自己食cereal jar,因為我無時間整埋佢個份!

  10. 禧禧手字好靚,英文文法都好好呀!
    雖然我無細佬,但次次都係禧媽個blog學到野。 :good:

    • 多謝你!:)
      佢手字呀?一時時啦,有啲都打風咁架!睇下佢趕唔趕住去玩啦……

Leave a Reply to 禧媽 Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)