46

再見,不再見

當大家睇到呢篇野嘅時候,相信mimi檔「 Mi 記鹹鴨蛋」已經正式營業,即係佢已經完成今世嘅使命,排緊隊去接受新挑戰啦。

大半年一年後嘅今日,我終於可以平復情緒,再次打開寫咗上面兩句野嘅呢篇稿,坐喺度慢慢回想當日,甚至係得知佢不久於貓世之後發生嘅事。寫第一段嘅時候,mimi仍然喺度,不過已經差唔多要去賣鹹鴨蛋咁濟,我諗住趁自己啲記憶重未消失前早少少寫啦,其實早寫定遲寫都好,呢啲記憶原來係唔會消失,除非腦退化到連自己都唔記得自己係邊個,咁如果到咗嗰個地步嘅話,我諗應該咩都無所謂,反正都就快同mimi會合,在晴朗的一天出發咯。

mimi同我地共處咗十三個年頭。我喺2002年領養咗佢返屋企。佢可以話係我嚟咗美國之後,除咗禧爸之外,唯一嘅家人。無錯,我當佢係我嘅家人,相信佢都一樣咁諗。家人,就係無時無刻都包容你嘅脾氣,你嘅低B,你嘅任性,你嘅一切。mimi由我廿零歲一直包容我所有嘅好與唔好,直到佢生命嘅最後一刻。我同禧爸兩手fing fing,少不更事嚟到呢度,經過十幾個年頭,當中每一個被搓圓㩒扁嘅日子裡頭都有mimi陪我哋渡過。佢嘅重要性其實真係不比口水禧小。

如果你有睇過好耐之前寫嗰篇關於mimi嘅blog,你應該對於我地屋企點解會有mimi嘅出現唔會陌生。當年,mimi係嚟破解我地屋企「黑洞之謎」嘅勇士。多咗佢喺度,屋企多咗啲生氣,有條友不時會喺度行嚟行去,meow兩聲,做「幾陪小姐」,負責陪你睇電視,陪你上網,陪你OT,陪你瞓覺,重有就係我獨有嘅待遇 – 聽我發噏瘋,貪佢夠口密唔會爆返出嚟吖嘛

或許同我相遇係mimi今世嘅宿命,好撞唔撞,撞正個唔識養貓嘅人。曾經我因為聽到佢發出呼嚕呼嚕聲而差啲要帶佢去睇醫生,原因係我以為佢哮喘發作!好彩嗰陣同個同事講起,佢話我知貓開心嘅是候就會發出呢種聲(幾無養寵物嘅常識呢我!)。如果,我當初行多一步,睇多啲養寵物嘅書,或者mimi會陪多我哋幾年。事緣喺領養mimi返嚟嘅初期,我帶過佢去醫生度做檢查,當時重問醫生係咪要定期帶佢去檢查身體,頂!個醫生竟然話唔洗。之後亦都帶過佢去其他幫寵物打預防針嘅地方問過一樣嘅問題,頂!又係答我唔洗。攪乜呀我,咁都信嘅?人都要定期檢查,點解動物唔洗㗎呢?

直至舊年八月嘅某一晚,mimi突然好唔妥地縮埋一二邊唔郁,雙眼發呆,我哋相處嘅時間就開始倒數了。

第二日帶佢去睇醫生,一摸之下,醫生「轆」大對眼問我:「嘩!你隻貓咁瘦嘅?你知唔知㗎?」表情甚至有啲暗示我虐待隻貓咁款。然後佢問我隻貓食乜嘢做主糧,我答佢mimi係食乾糧嘅,因為我覺得濕糧罐頭有防腐劑又對牙唔健康。醫生一聽即刻撬開mimi個口,然後驚嘆:「嘩!你隻貓好多牙石喎!有無同佢洗過牙㗎?」我重好意思問人:「乜貓要洗牙㗎咩?」(而家諗起都覺得自己問都多鬼餘!)

一切已經太遲啦。 

嗰幾個禮拜,我哋由驚嚇到開心再變擔心然後到傷心。初時驗血報告只顯示mimi白血球指數較高,其他嘢都正常,於是醫生覺得mimi咁瘦可能係佢天生係咁啦。既然其他嘢正常,咁可能係身體發炎㗎啫,咁就開咗葯佢食,重book好時間去洗牙𠻹。到洗牙嗰日,醫生發覺mimi望落好似重係唔多妥,於是問我哋想唔想比mimi做超聲波仔細再檢查,比佢拋一拋,我哋嚇一嚇,梗係要做啦。諗住應該都唔會有咩問題啩……之前醫生重讚mimi份驗血報告以十五歲嘅貓嚟講算唔錯㗎喎。

下晝四點,醫生打嚟,唉……

由嗰日起,眼淚就無停過。有人嘅時候,心裡面流;無人嘅時候,眼裡面流。口水禧面前,我喊過兩次,一次係收到醫生電話後話比禧爸聽醫生話mimi無得醫啦;第二次係mimi流鼻血,我哋帶佢去睇醫生,醫生話”it’s time to say goodbye.” 。好耐無喺其他人面前喊到豬頭咁樣啦,醫生睇見我咁嘅樣極無奈,於是提出幫mimi打止痛針。嗰晚mimi超級呆滯,縮喺紙箱裡面完全唔理人,點解會喺紙箱呢?因為佢一向唔鐘意用寵物瞓覺嘅床,買過好多比佢,結果佢都係瞓啲好騎呢嘅地方。但嗰排醫生話貓唔舒服嘅時候怕比人打擾或被見到自己無晒力嘅樣,叫我哋要搵個方法比佢「喱埋」,我見佢平時好鍾意跳入紙箱裡面,於是試吓鑼個紙箱放喺客廳,佢即刻走入去趴低瞓覺,有時會出嚟瞓大門口,總之就只會喺呢兩個地方打𧄌。

其實醫生有講過唔需要等到佢唵唵一息先送佢走,咁樣就可以幫佢減輕痛苦。最初佢嘅情況望落真係唔太差,除咗胃口麻麻哋之外,精神算唔錯,重會跳梳化睇街,喵嚟喵去。所以我從來都無諗過要即刻人道毀滅佢。

一日一日過去,佢一日一日消瘦憔悴,繼而連喵叫聲都減少,到最後聲音柔弱到完全唔再叫。每日我最驚就係同佢打鹽水,嗰支針勁粗,超利,我都比佢割損過幾次,可想而吉入後頸係幾咁痛!有時吉唔正個位重要吉幾次,真係生不如死呀!

就係咁,mimi靠鹽水針、新鮮雞肉粒、雞蛋吊多兩個月命。我真係唔明,點解我可以咁蠢,到最後先發現超市有賣用新鮮雞肉做嘅寵物糧食,其實根本可以自己整都得啦,為何當初完全無知到咁樣,而家先嚟後悔有咩用?只怪自己當初養寵物之前無好好做資料搜集,唔識養又學人養,累鬼死mimi。

睇見佢每況越下,我開始諗到底係咪要做決定呢?每晚都不停上網睇啲人講佢哋覺得應唔應該人道毀滅寵物,過程係點,隻寵物會唔會有痛苦之類。有啲人覺得萬物有時,動物亦有佢地自己嘅時間表,夠鐘自然會bye bye;但有啲人認為如果隻寵物有痛楚,主人重勉強留住佢哋,咁樣係拉長佢地受苦嘅時間。我睇咗幾個禮拜都決定唔到,直至2015年10月20號,我幫mimi決定咗,比佢離開呢個世界,得到解脫。

嗰幾日,mimi開始屙血,我心知都差唔多啦。20號中午,我同mimi一齊喺前院,佢偷偷走咗出去路邊嘅水渠口,有隻松鼠喺電線杆上見到有半隻貓身喺渠口凸咗出嚟而狂叫,我當時重未知隻貓走咗出去,直到我行出去睇吓咩事先發現mimi已經半個身入咗去,只係個渠口太多樹葉阻住佢前進。慌忙之下,扯返佢出嚟,因為如果佢入晒去的話就拉唔返佢出嚟㗎啦,加上當時天氣已經係早晚超凍,渠裡面又可能會有浣熊或老鼠之類,mimi已經唔會有能力自衛㗎啦,所以佢只會喺條渠入面慢慢等死,重係好痛苦咁等𠻹。當時禧爸其實喺醫生度諗住幫mimi攞新嘅鹽水袋返嚟,點知返到嚟,我同佢講唔洗再打鹽水啦,我哋帶mimi去醫生度打針啦。

如果你問我點解會狠下心腸突然決定送mimi一程,我只可以講我眼見到佢咁樣縮入坑渠,我直覺佢想話比我知佢想離開,而我最後一件可以為佢做嘅事就係比佢舒服咁離開。到今日為止,我仍然覺得當日嘅決定係對佢最好嘅決定。之前已經因為我無知,累佢咁多年嚟都無去比醫生檢查,食又食得唔好,口水禧出世後連平時嘅注意力都無乜得淨,對於mimi,我實在係太多歉疚,但一切都太遲,已經無得補救。我只希望佢下世千其唔好又搵著個好似我咁智障嘅主人,好好搵個主人家,好好對佢,等佢開心過每一日就好。

去到醫生度,護士準備間房比我地入去坐。最後機會抱住mimi,千言萬語都已經太遲,有機會嘅時候又唔講,到嗰一刻講咩都無用。或者佢都懶得聽。我哋選擇先同佢打麻醉針,等佢瞓咗,然後先落針送走佢。醫生入黎之前,我抱一陣mimi,禧爸抱一陣。當佢抱嘅時候,mimi突然爭脫,走向我,個護士唔知係咪玩嘢,突然爆一句“oh,she wants to be with mommy.” 我抱起佢,決堤。手上骨瘦如柴嘅佢,軟弱無力伏喺我膊頭,我同佢講「你如果要再嚟搵我,我幾時都歡迎你再成為我哋屋企嘅一分子。我哋個個其實都好愛你㗎,我地永遠都會喺心裡面想念你。你好好照顧自己,再見。媽媽愛你!」

醫生呢個時候入嚟,都無講咩嘢(應該都知唔應該講咩嘢),放下mimi喺張檯上,mimi 無爭扎。落第一針,合眼瞓著。第二針,永遠瞓著。

醫生用聽筒聽吓佢重有無心跳,我問醫生:「死咗啦?」佢話:「係,死咗啦!」

嗰一刻,百感交雜,唔知喊好定開心好。我喊,因為知道永遠都唔會再見了。我開心,因為佢終於都無痛苦了。

一直以嚟無喊過嘅禧爸,呢個時候崩潰到嚇親我同醫生,幾驚佢壓爛人地張檯,攪到mimi 條鹹魚跌落地呀!

護士剪咗一執mimi嘅毛比我哋留念,另外我哋揀咗將佢獨立火化同打掌印,揀咗個盒裝骨灰。

三個入去,兩個出嚟,好唏噓!

我對眼經已腫到睇唔到路,我自己企喺診所登記處,面向牆,腦海一片空。

禧爸比完錢,我地就離開診所。

嗰個禮拜,吸塵專登唔吸梳化罅,留住少少mimi啲毛喺裡面。以前一路吸一路怨乜佢甩咁多毛㗎,最後一次吸完,四圍都再搵唔到一條黎睇吓。想搵都已經無機會。

之後,每一日仍然係有人嘅時候,就眼淚心裡面流;無人嘅時候,就眼裡面流。

一直直到有一晚半夜兩點半,我一個人坐喺床上緊網,突然右邊耳仔傳嚟一陣好矇,好似你聽人哋留口訊有雜音嘅高音聲線,對我講”thank you”。兩隻字拉得好長,細細聲咁講,講完就消失。坐直咗個身四圍再仔細聽,無聲。

之後,都無再聽到任何聲了。

又大半年過咗,仍然係有時無人嘅時候會想起mimi,不禁又內疚。突然有一日,見到一本關於動物通靈嘅書,好奇買嚟睇吓,睇完我覺得冥冥之中,mimi想我知道佢無怪過我,而且佢想我好好生活落去。所以一年後嘅今日,提起勇氣,為佢完成呢篇blog。

口水禧而家講起mimi已經唔會再眼濕濕。我相信佢已經明白咗mimi離開係事實,我哋心裡面留個位置比佢就好,以後仍然可以開心面對每一日。所以佢不斷問幾時可以再養寵物。真係要諗清楚,學識好好照顧先好去養,千其唔好重蹈覆轍。

當日,口水禧知道mimi離開咗之後,佢問:「幾時可以再養寵物呀?」,我當時唔識答佢,佢爆咗一句嘢,我諗到而家。佢喊住話:「小朋友就係要有pet一齊grow up吖嘛!」

當頭棒喝。

IMG_8266IMG_8261IMG_8260IMG_825320130729_091401IMG_8271

有一日,我睇到呢輯相,口水禧嗰句嘢又浮現我腦海。

我感激mimi有份貢獻一個快樂嘅童年比口水禧,口水禧為佢笑為佢喊都應該嘅。而家mimi終於功成身退,我期待佢有一日再返嚟同我哋重聚,再次成為我地嘅一份子。到時我一定會盡力,好好照顧佢。

去抹眼淚啦你哋,我知你眼淺,我明嘅。

 

 

禧媽

46 Comments

    • 估唔到咁多年後重有人時不時嚟呢到關心我哋一家,多謝你!我哋都好好呀,口水禧已經就快15歲啦,家陣都高過我同佢老豆啦。已經讀咗high school啦。

      自從禧婆婆同嫲嫲都相繼離開咗我哋之後,個blog就停咗啦。都有諗過繼續寫,不過要揾啲時間先得。話晒家陣有個麻甩仔要管教丫嘛。你知啦,青少年嘅年紀加個就快更年期嘅年紀係幾咁震撼呢!

      • I come here sometimes to see if you have any new post. :). Glad to know you are well and I just saw the new video, why was he so High? Hahaaa!!

  1. 好衰嫁,喊 c我啦😭😭😭😭😭

    你幾時再浦頭呀?

  2. 係公司LUNCH HOUR睇, 一路食住碗面一路喊, 好傷感!! 禧媽, 見你今日有勇氣寫出來, 知道你傷口已慢慢地好番, 加油喔

  3. 禧媽,其實係咪營養不足,mimi先會瘦? btw,我覺得您已經做了對事情,不必覺得對mimi有愧。You are the best!!!!

  4. 睇到我一路喊一路笑。。。

    唉,我成日同媽咪講要俾屋企位大少食多啲罐頭。。
    但佢當我發up瘋。。。。

    • 咁你想像吓我當時喺現場嘅情況,有條友喺隔離突然失控咁趴落張枱到大喊,張枱冇腳嘅,喺個啲喺牆反落嚟,得一邊黐住幅牆嗰種,只夠頂住貓狗嘅重量而唔係人嘅重量,點知禧爸成個人伏喺mimi個身度大喊,你話我同醫生見到喺咪俾佢嚇死丫?唔阻止佢的話,張枱就會斷架喇,斷咗的話,mimi條鹹魚咪sir落地囉,你話個場面喺咪好詼諧?!😫

      • 仲有呀,整爛人哋張枱,我諗張單真係貴到不如即係人道毀滅我哋兩個好啦!😲

          • 會出呀,梗係會啦,自己同自己出囉,屋企有printer有A4紙,㩒個制就出書㗎啦! :yahoo:

    • 做乜個個都整蠱自己喺大庭廣眾之下睇呢啲嘢㗎,好彩係mimi啲相而唔係我啲性感相咋……擺得喺blog就預咗大家睇到架喇?係呀,但我驚大家喺公眾場合睇完啲相之後,唔止睇blog嗰個,連埋側邊唔小心見到嘅人會集體嘔呀! :cry:

      下次爆緊石嗰陣先睇啦,不過要小心唔好跌落屎坑喎……部電話。 :whistle:

  5. 諗住入嚟睇下囗水禧 點知有洋蔥
    我個女今年6歲獨生 成日話要養隻狗
    Daddy 話都係時候比佢養 因為隻狗係應該同呀女一齊成長 但我心大心細
    但連禧哥都話 「小朋友就係要有pet一齊grow up吖嘛!」…. 咁就養啦

    • 養寵物係十幾年或分分鐘成廿幾年嘅承諾,我知口水禧只會玩唔會真係幫手照顧隻寵物,所以我要肯定自己有能力同時間先敢再養。但我四張嘢,年紀有返咁上下,體力唔係好好,口水禧又日日要去游水,加上學校嘢都唔少,可能要等佢再大啲,唔洗我理嗰陣先有時間照顧一隻寵物。

      可能你地養狗之前試吓呀囡對狗毛有無敏感先好養。口水禧對貓毛敏感,食咗幾年敏感葯,我就比呀婆鬧足咁多年,但我未有口水禧之前已經有mimi㗎啦嘛,所以堅持唔會棄養,呀婆都無符。不過攪到口水禧食咁耐葯我其實都好擔心有負作用,因為有時佢氣喘要吸啲有類固醇嘅葯,醫生話過細路吸得多會長唔高。所以你要小心,希望呀囡對狗毛無敏感,咁你哋就可以養返隻,陪住呀囡成長啦! ;-)

  6. 無啦啦唔想溫書click入黎好開心見到竟然有update,點知搞到流眼淚。你遍野寫到我又喊又笑。

    • 喊完笑完好快啲去溫書啦 !(諗起要溫書係咪更加想喊呢! :wacko:

  7. 禧媽,我好少留言,但有一直睇你Blog架. 呢篇睇到一半眼淚已經一直流… 係呀,Mimi都想你開心生活下去. 希望你唔好太難過… 加油! :rose:

  8. 禧媽!
    我同你嘅經歷好似,不過我養嘅係狗,佢叫肥佬⋯走咗兩年啦!由我來加拿大就開始同佢一齊生活。肥佬幫我好多,每次同佢散步都有人搭訕,因為佢太肥,好多人鍾意佢,令我識到好多朋友。我年年同佢做身體檢查,食得健康過我,新鮮牛羊雞加菜⋯⋯咪又係突然一曰流鼻血去醫院就無得出返來⋯⋯傷心過,自責完就回味過去開心的日子吧⋯⋯Mimi 想你開心過每一天啊!

    • 吓???點解會咁嘅?醫生無話你知究竟肥佬係咩病呀? :cry:
      唉!生命真係同買六合彩一樣,永遠都你估佢唔到!中就中,唔中就唔中,吹佢唔賬! :cry:
      咁你而家重有無再養寵物呀?

    • 無計,人長大就要開始學習接受生命有盡頭呢樣嘢。但我相信有緣大家先會相聚,遲早有一日,mimi會再同我哋重聚,可能到時變咗我係佢隻貓,佢係我主人呢! :yes:

    • 如果邊個覺得眼好乾,淚線唔發達嘅話,我唔介以幫吓佢嘅! :cry:
      等我先養掂我第二個寵物口水禧,我就會向新成員進發㗎啦! :yes:

    • 學我咁,即刻面向牆,邊個叫你都唔好應佢,咁就無嘢㗎啦!至於個鼻就……還掂都向住牆,唔爭在伸隻手指入去通吓佢啦! :yes:

  9. 我真係流眼淚……..仲要係公司睇你篇blog
    (仲要老闆岩岩行過)
    anyway 好開心你地放開左,岩架!!要正面d迎接未來美好既事物~ ;-)
    禧媽加油!!寫多d blog啦 :rose:

    • 多謝你! :good:
      你老板有無望住你睇吓你做乜流眼淚呀?可能會加你人工呀! :yes:

Leave a Reply to 禧媽 Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)