42

農場生日會

上幾個星期六,口水禧參加左一個好特別嘅生日會,舉行嘅地方係一個農場仔裡面。你book個日子、時段、報個人數等等,就會有專人幫你安排一系列嘅活動,幫你湊仔兩三粒鐘,即使係主人家都可以翹埋對手唔洗分分秒秒都要顧住招呼客人,好!

成日都覺得天氣暖嘅季節出世嘅人攪生日會最好,可以揀室外攪或室內攪都得。最唔著時咪就係口水禧囉,喺正一月頭出世,天氣又鬼死咁凍,唔係落雨就係陰天,室外生日會就算有人黎我都唔想攪啦,得嗰兩、三度,唔通個個陪你企喺出面食幾粒鐘西北風咩!跟住呢,一月頭一來個個聖誕洗晒啲錢,分分鐘用凸添,正愁緊唔知點找卡數,就算我叫人唔洗送禮物,齋比面黎參加生日會,人哋都唔好意思真係唔送禮啦,咁唔想再洗錢買禮物咯,咪唯有話唔得閒黎參加囉!重有就係一月頭重放緊假,好多人真係重外遊緊未返黎,攪個生日會但無乜人黎,攪黎做乜呢咁?所以口水禧年年生日都揀去滑雪,幾醒!Ha Ha

IMG_1675嗰日同學嘅生日會由中午1:30開始。事前人哋呀媽講明地點係個農場而且會有行山活動,咁就梗係唔好再著人字拖啦!(見過鬼重唔怕黑咩!)大家準時去到,簽好晒啲免責條款後,小朋友就乖乖坐好聽講之後生日會嘅活動同埋要守啲咩規則啦。

當日主要由一個哥哥帶住班細路去玩,另加三個助手從旁協助幫手睇住班野,你知啦,就算之前講明要聽話唔可以點點點,啲細路都會間遏性失憶架嘛,萬一發生意外就唔好啦。雖然話簽左免責條款啫,咁都無理由想任何小朋友受傷嘅。

IMG_1680口水禧每逢「初到貴境」都會影帝上身Matrix,呃晒全場人士架!又呆又靜,望落實會覺得呢個小朋友好乖好留心聽講,又守秩序,真係大方得體,即使係在場有任職教師嘅家長都會賴佢野,墮入口水禧嘅圈套,比佢副乖乖仔面具昆左。

IMG_1699乖到難以置信呀!有個教師家長重話:「呀!Colin真係最乖嘅一個,次次咩場合最聽話都係佢,靜靜哋坐定定聽,又守秩序又有禮貌……」

Ugh! Eh~~~~呢位老師家長梗係新入行頂啦,咁都睇唔出口水禧嘅技量,明顯係觀察環境,方便一陣出擊,正所謂「知己知彼,百戰百勝」呀嘛,唔探清楚對方個底,容乜易賴野架!熟悉口水禧嘅其他家長個個都知我仔係咩料架啦,佢只係比佢隔離嗰兩個男仔慢熱少少而已,但破壞力一啲都唔比佢哋弱架!佢地有嘅野口水禧都有,但口水禧有嘅野佢地就未必有喎,就係一顆「唔識死」嘅膽量,呢件蛋散,唔睇實啲,佢真係橫衝直撞飛落山都得架!

早幾個星期,正當禧爸送左口水禧去返學,我喺個廁所梳洗緊嘅時候,突然學校打黎,好彩我當時開住廁所門又咁啱無開水,但都接唔切個電話,飛左去留言信箱,聽住個人留言,大約係話:「……佢跌親整到個鼻流左好多鼻血,成件外套都係,我哋同佢止左血啦,不過你快啲黎睇下佢,順便帶件外套比佢換啦。」霎時間,牙又未刷,面又未洗,頭就梗係無梳啦,揸住支牙刷都唔知點好,好在禧爸重喺屋企附近,於是我即刻叫佢去學校接左口水禧返黎先,然後再睇下要唔要去睇醫生啦。打完比佢又再打比學校話佢哋知口水禧老豆去緊學校啦。而我自己梗係九秒九梳洗刷牙洗面換衫準備去學校啦。(係,九秒九咁短嘅時間當然會梳唔切個頭啦,點?唔梳就咁出門囉!)

正當我要出門嗰下佢地兩個就到屋企啦,有人梗係一面眼淚一衫都係血啦!安慰幾句,佢話鼻哥入面痛,諗諗下都係唔放心,卒之都帶左佢去比醫生照下鼻入面有無整親。等緊醫生嘅時候,佢講左句野,我就肯定佢無大礙。講咩?佢話:「媽媽,我返唔到學架啦,但我下晝可以去游水同打功夫。」

What?!衰仔!你當你呀媽尋日先出世呀?

當然啦,喺呢個關頭,我又點會甘心做衰人呢?呢啲粗重野梗係留比……醫生做啦,係咪先!而我,就梗係扮晒民主,猛話:「你問下醫生睇下佢點講囉。」結果呢……醫生都唔係尋日先出世架嘛,可以游水同打功夫但唔返得學,家陣去學校幫手拓石油氣咩?What?!

醫生話:「可以返學,不過游水同打功夫就要停一日啦。」

口水禧>>>>So Tired 

IMG_1708

喺行山之前,導遊哥哥先同小朋友講解下一陣有可能會喺山上發現一啲野生動物嘅腳印,於是佢攞住啲整腳印嘅模比各位團友睇下,順便就安排下邊個小朋友攞邊隻動物嘅腳印早紀念品。

IMG_1720只見說時遲那時快,哥哥已經唔知喺邊度攞左袋粉出黎再倒左啲水入去溝勻後再倒落啲腳印模度。每個腳印模前都有小朋友自己寫好嘅名,費事一陣爭餐懵。

IMG_1727

嗚嗚~~~~我哋C得巧剷呀!

講解好晒之後,我哋正式去地獄式減肥啦。行最頭嘅就係導遊哥哥,最辛苦都係佢啦,一個人又要講解,行到邊解到邊,然後重要每隔幾秒就要話下啲百厭星(無錯,係隔幾秒!)。此時嘅口水禧亦都熱身得差唔多啦,開始黎料,簡直係將哥哥嘅工作量百上加斤!

黎到一個景點,放左幾副骸骨係度,呢啲當然係堅野啦,周山都有得執啦,洗鬼整假野咩。有一隻相信係鹿或羊嘅腳、兩個鹿頭、一隻鹿角、一條蛇乾、重有幾塊我唔記得係咩嘅骨咁啦。

哥哥就有問有答形式教佢哋點樣睇鹿角而知道隻鹿幾多歲;點樣睇鹿頭分公定乸;響尾蛇係咩樣等等。由於我同禧爸都唔係熱愛行山人士,呢啲咁靠近大自然嘅野真係一無所知!反而係小朋友團友當中有個小朋友差唔多哥哥問十條佢就答啱九條咁濟,呢啲完全係書本以外嘅知識,喺課室未必學得到,要多睇書多出去行先會有機會接觸到。

IMG_1744細個嗰陣,唯一有機會掂到鹿角係比人切左落黎做中藥材嗰啲,好似呢啲唔係因為比人捉到脫角而得到嘅鹿角,我都係第二次見咋。

我鍾意睇小朋友對事物好奇嘅樣,更加鍾意睇佢哋揸上手研究嘅神情。佢哋嗰一刻,腦裡面可能諗緊一啲你同我都意想唔到嘅野,我唔會去打擾佢哋,有得佢哋慢慢諗,唔好覺得咩污糟呀,有細菌呀嗰啲,其實比得你掂嘅都唔係有嚴重嘅細菌架啦,除非條鹹魚重攤喺隔離吽緊蟲四圍烏蠅就話啫。

不過哥哥都有提佢哋摸完之後,隻手唔好放入口或攪自己塊面。同埋呢啲場合,大人最好就帶定消毒紙巾或酒精,明知自己嗰件實會賴野,咁就要自己格外留神。我連支epi pen都帶埋,慎防有人比蜜蜂針完嚴重敏感至窒息或者摸左咩有毒嘅野敏感窒息嗰啲,去呢啲戶外地方,救急藥點都要有啲旁下身嘅。

IMG_1747

踎喺到做乜呢?原來嗰度有棵大樹,哥哥指住嘅地方有好多屎喺度,於是佢就考下班細路啲’care’究竟係邊個屙架呢?小朋友話係樹上面嘅雀仔屙嘅。抬頭望就見到幾個雀巢喺樹上面。驚唔驚咁近睇’care’會有禽流感?無喎,呢下只係遠觀咋,一陣重有啲會令人大叫嘅情況添呀!

IMG_1760

我絕對無踎喺度影!行到大家索晒氣呀,呢段路同上次燈塔有得鍊呀!但上都唔係最令人R 底嘅,落嗰下先驚!因為一個唔覺意就會sir到去山腳,C就應該唔會,爆缸就應該走唔甩。點解咁都比小朋友去行?係咁架啦,大部分外國人喺呢啲場合都無咁寶貝啲細路,當然都要啲小朋友有返咁上下年紀嘅,段估都無人會叫個一歲嘅去行呀哇!其實四、五歲以上,身體無乜大礙嘅都行得架啦。總之就係個細路自己決定要行就比佢去,佢唔想行亦都唔會迫佢夾硬上。但上得去就要自己行,無人會孭或抱,因為太危險啦,萬一個大嘅PK,細嗰個咪會跟住跌囉,咁咪重大穫!

IMG_1804相都影唔到現場嘅感覺,但你唔會後悔用左咁多腳骨力上黎。

IMG_1757

發現動物嘅嘅腳印,大家踎喺度研究緊。之後哥哥重叫佢哋扮隻動物行添。一個二個趴喺地下,前前後後,唔知佢地知唔知自己做緊乜。

IMG_1802各為觀眾,登登登凳……無敵風火輪嘅練習兼比賽場地!!!!!!Ahh!黎自各國各地嘅選手喺比賽現場實地考察周遭嘅環景包括地勢、賽道、風力同風向等等,務求比賽當日一穫過以光速「碌」落山腳,秒殺其他選手奪冠!究竟係瘦人會「碌」得快啲丫定係大隻妙「碌」得快啲呢?以我PK王嘅經驗,應該係嗰啲無諗住「碌」但唔小心……「碌」左嘅嗰啲人會最快。Hit with Ball 

就以嗰日大家嘅水準,嗰日有個妹妹應該都算係大熱人馬,事關佢行平地嘅時候已經仆左一穫,喊到豬頭咁樣,正所謂「無心插柳柳成蔭,無心PKP穫甘」,都係睇實條o靚妹穩陣。但係呢個重任,佢呀媽就肩負唔起啦,事關第二個大熱人算咪就係佢呀媽囉!當日人人都著左波鞋黎,除左嗰位媽咪,佢著左對2013年美國西岸九唔搭八郡最流行嘅「凸趾高『爭』涼屐」,係,佢係一對屐,即好鬼厚底,望落會覺得比佢踩一腳肯定從似殘廢嘅嗰種「屐」。

落山嘅時候,我著住波鞋都要將對腳打斜咁一步一步落去,費事一個唔覺意鞋底「羨一羨」「碌」落山嘅話,前面成堆人就會比我推埋落山架啦,我唔想錯腳殺人呀,我對腳去左坐監嘅時候,咁我嘅上半身點算好呢?我怕佢會悶親呀!而當我小心地落緊山嘅時候,阿「屐媽」喺山頭執左支幾粗嘅樹支,於是佢就係一個農場嘅員工陪同下,篤下篤下咁慢慢落山啦。

IMG_1805我哋一行人順利落左山之後,去厠所嘅去厠所,無聊嘅無聊等。而我就梗係博大霧四圍去搵啲動物同我影相啦。

一入門口我嘅視線就無離開過佢啦,呢隻白馬馬好靚但……好忙。佢由我哋到達都離開嘅一刻都係食緊草,係dup低頭不停咁食。任憑我點樣高呼佢名字George(佐治),阿佐生都仍然無動於衷繼續食,完全當我透明。

好,我就當自己屋企,唔同佢客氣啦。佢有佢食,我有我影。無眼嘅都照殺!Ahh!

IMG_1815

行完山之後,哥哥就正式準備帶班細路去騷擾探望下啲動物。未入去之前當然要講下規舉先啦,你知啦,啲細路一見到啲動物好忘我好失控架嘛! 為免探動物變左虐待動物,事先教好佢哋見到動物要點做都應該嘅。崇尚自然嘅農場哥哥連烏蠅都話要尊重佢哋嘅屋企(!!!)。事緣係口水禧見到好多烏蠅四圍飛,於是佢大叫’kill the flies!’,此事哥哥聽到就話’this is their home, we have to respect their  home, so no killing of flies.’ (呢度係烏蠅嘅屋企呀,我哋要尊重佢哋,唔可以殺佢哋架!)初初我都好R頭,「下?尊重啲烏蠅?咁夜晚凍,洗唔洗幫佢地『妗』被呀」原來哥哥嘅意思係要啲小朋友喺大自然環境嘅時候唔好殺任何生物,因為嗰度係佢地生活嘅地方。不論係好定唔好嘅生物,殺晒佢哋,咁呢個世界從此就唔會再有嗰種生物架啦。喺你屋企嗰啲烏蠅因為會影響你嘅生活,而嗰個係你屋企,所以你係可以趕佢哋走或滅左佢哋;但大自然環境中嘅任何生態都有權生存,喺唔影響其他人嘅情況下,唔應該隊瓜佢。我諗哥哥係咁嘅意思啩,我嘅智商係明咁多架咋。

IMG_1881

 講完數佢哋就入左兔仔屋睇兔仔。由於間屋太細,所以淨係小朋友入左去睇,而大人就喺出面吹水。跟住哥哥就帶左佢哋去養雞嘅地方,首先梗係又要講解一番啦,因為一陣有得比佢哋抱下啲雞嘛。但哥哥驚佢地唔識放返啲雞落地,驚佢地就咁掉落地下攪到雞腳斷左就要人道毀滅隻雞架啦,所以事先教左佢地先。講完重比佢地逐個去揀雞蛋,但唔係比佢哋帶返屋企喎,只係幫手收蛋再放落個裝蛋嘅盒啫。要帶返屋企呀?唔該磅水啦。

IMG_1862

喺地下抱起隻雞之後(當然要你情我願啦),要好似哥哥咁抱,千其唔好當抱貓貓狗狗咁兩隻手攝係人哋個隔肋底。將呀雞抱埋身放喺腰間或肚腩前,當然啦,你抱住隻雞咯,就唔好跑啦,一陣跌左隻雞落哋又死,自己PK再坐埋落隻雞度佢就實死添!放佢落地要半踎烏前個身慢慢放,千其唔好掉佢落地。記得我細個嗰陣養雞仔,有個鄰居姐姐好鍾意掉我隻雞仔落地,佢話要訓練隻雞仔飛喎。妖,重掉損左雞仔塊面,我叫佢唔好再掉佢重掉,好Q嬲呀我!鬼叫我矮人成個頭,搶又搶唔到,好慘呀我隻雞仔!Crying跟住婆婆重送左比另外一個鄰居,而家諗諗下,個鄰居養左好多雞,我估佢係養黎食架!嗚~~~~Crying

IMG_1833不懷好意嘅神情……Yeah... Sure

IMG_1880說時遲那時快,哥哥講完就大開雞籠度門放班友友去大肆搜略,真係人追雞雞甩毛,小朋友好想抱下雞雞同佢哋做朋友,場面幾咁……溫馨!Baffle

口水禧揀左隻大雞黎抱,雖然佢無攝對手去人個隔肋底度,但呢隻抱法,我相信隻雞都唔識欣賞,好唔enjoy之餘但又走唔甩嗰隻無奈印晒喺隻雞塊面度。抱左一陣,見隻雞真係被口水禧抱到想喊咁嘅樣,於是叫口水禧放返人地落地啦,好彩口水禧重記得要慢慢放,如果佢一野掉左隻雞落地,我都唔知點算好啦。

IMG_1891

睇完雞又黎同馬梳毛,小朋友梳嘅係細馬,我影相呢隻純粹係住喺隔離然後見到咁多人,佢探頭黎八掛下架啫。當我一企埋去,佢喺遠處就開始向住我行過黎,話時話,見到咁大隻野行埋黎其實都有啲驚驚哋!雖則有啲驚但其實心裡面又好開心,我未試過有馬肯自動行埋黎我度架嘛!行到埋黎之後,我梗係唔客氣係咁索佢油啦,等我過完手癮之後就要幫啲細路影相,呢隻靚馬就行開左啦。

IMG_1910呢隻我唔記得左佢叫咩名嘅馬仔個日左邊身比啲小朋友梳左九萬幾次,真係乜野’kick’都解晒啦。呢度嘅動物同雞雞學校嘅動物一樣,見慣啲小朋友,所以完全無驚過班豆釘,任梳唔嬲。口水禧出街返學唔見佢會主動梳下自己個頭喎,但同隻馬梳,佢就鬼咁積極起勢咁梳,真係唔知佢想點!Angry

 

IMG_1895梳梳下毛,突然殺出一隻孔著黎睇熱鬧,佢個名叫Kevin。呀Kevin不停喺我地眾人面前行黎行去,似係扮睇野實則黎搶鏡就真。不過嗰日可能一眾C奶呀叔無個睇得上眼,呀Kevin都懶得開屏比大家欣賞。

IMG_1937最近迷上左Despicable Me嘅口水禧亦愛上玩槍戰遊戲。無論係樹枝、筷子、手指、厠紙、匙、杯都可以變做佢把槍。重自己配埋音同特技效果添,製作好認真架!

是日口水禧得到bever腳印一隻。IMG_1932睇隻腳嘅大小,隻野好似都有啲大隻喎,好彩我屋企無呢啲動物黎探我地啫!E呀!

IMG_1807

呢個係一個好正嘅生日會

小朋友多接觸大自然

對其他與我地喺呢個地球共存嘅動物或生物多認識同了解

有助大家和平共處

大自然嘅烏蠅都要尊重

試問世上淨返幾多敵人?

忍一時風平浪靜

退一步海闊天空

禧媽

42 Comments

  1. 雖然篇BLOG好多字, 但真係笑到標眼水. 睇左咁多年, 千其唔好斷稿呀, 精神食糧嚟架 :yahoo:

    • 既然係咁,你都應該磅返些少水過我喎,幫你keep住對眼水汪汪…… :yes:

  2. :bye: :bye: hey ma…
    其實路過好多年架喇…如今因為呢度可以唔駛開account 都比人搭訕幾句…實在太好太方便了…所以決定面懵懵黎嗲兩句…
    尤其呢句呀”無心插柳柳成蔭,無心PKP穫甘”…. :good: :good: 笑到我呀…
    我會多d黎留底腳毛架喇…係呀, 不請自來果隻呀 :yes:

  3. You were being so nice at the doctor appt. If my 4yo son asked me whether he could go to those extra-curriculum activities, I would ask him sarcastically “what do you think?”

    Does Colin like school?

    • 我成日都做衰人好蝕架,有人幫我頂一頂重唔乘機咩! :whistle: 還掂向來醫生都係小朋友最厭惡嘅人,一件污兩件穢,我諗醫生唔介意嘅,最緊要有磅水比佢就得啦。 :yes:

      佢成日都話唔返學架啦,但做功課或者講學校嘅野比我地聽嗰陣好雀躍架喎,家陣啲男人心都同女人心一樣,係海底針,令人R頭! :unsure:

  4. wow, it was a fun day! Did you have to tip the tour guide? I ask this question because it seems in America, tipping the service sector is very important

    • 參加生日會嘅人就唔洗,但主人家有無比小費我就唔清楚。不過比都唔出奇嘅,呢度啲人如果覺得對方服務好嘅話,都好願意比小費或讚賞下對方嘅。 :yes:

  5. 幸福!香港既細路恐怕無咁既閒情,亦無咁好既環境配套。排隊、面試、默書、考試。。。

  6. 我都1月中出世…say hi先
    呢d生日會幾好玩… 不過你影左咁多相都唔知個主角係邊個wor :unsure:
    學術求教:乖既英文係乜呢?good boy?

    • 唔敢放人哋個女嘅大頭相呀! :wacko:

      乖?通常啲大人都讚佢地做左一啲啱嘅野,例如” good job! “, ” nice”, ” great”, “super”…..好少聽到佢地同細路講good boy/girl,呢句同寵物講比較多。 :yes:

      • 點解你咁搞笑既?淨係「好少聽到佢地同細路講good boy/girl,呢句同寵物講比較多」都引到我笑。快d開幾場棟篤笑。

        • 真係架,佢地會同啲寵物講good boy/girl架。其實我都係咁同mimi講野…… :yes:

  7. 你笑死我啦。。如果住喺南半球,禧禧嘅生日咪係夏天囉!

    • 熱得濟又唔得喎,一個二個曬到變左狐仙,咁個生日會咪好臭囉? :-(

      • 黎紐西蘭搞生日會咪得咯,依到夏天一般都系26°,何其爽啊 :whistle:
        by the way,你家電車男重搬唔搬啲舊blog過黎? :unsure:

        • 下?舊blog有啲搬左黎啦喎,唔通電車公未放出黎?(因為我自己係admin login,所以我睇到啲舊blog )

  8. lee個生日會真係唔錯呀, 香港唔會有lee d節目
    禧哥果句返唔到學但可以游水打功夫真係好正, 哈哈!! 果然叻仔! 有其母必有其子,.,.,wahahahahahhaahah

  9. 咁既生日會真係特別又有教育意義, 下次口水禧生日不如搞參觀銀行金庫~? 唔該請埋我, 我想攞紀念品 :yahoo:

  10. 依篇blog堅好笑~喺沉悶嘅星期一生色不少!!!btw,,,禧媽…你瘦咗呀!!!

  11. 請問禧媽, 呢個新blog好用嗎, 容易放相上去嗎, yahoo blog死期到啦, 要開新blog, 希望你比d意見, 謝謝, 我係逸媽。

    • A!唉呀,家陣先見到你嘅留言添!yahoo 停左啦喎,死勒,咁你最後點處理你嘅yahoo blog呀?

    • 佢自己PK撞親個鼻流左好多鼻血囉!前幾日喺操場同同學玩到郁手郁腳,人地打到佢個鼻,攪到又流鼻血囉!唉!

  12. 我都最憎冬天生日,年年都凍到傻,邊度都唔去得,又過咗聖誕無人有錢同我慶祝,好無癮,不過幾十歲人都慣哂喇。

    呢個生日會真係正,有得玩有嘢學。

Leave a Reply to hkccng孖展 Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)