34

Bay Area Discovery Museum I

決定開返個blog其中一個好重要嘅原因……呢幾個月,我地屋企嘅女揸fit人都「入過廠維修」,而家重繼續休養康復之中。踎喺醫院同屋企都係得個悶字同呆字,於是我希望可以開返個blog寫下口水禧D野比兩個揸lift人睇,呀唔係,係揸fit人至o岩!等佢地可以解下悶,順便睇下粒孫最近有咩新攪作,激到我彈起,從而帶D歡樂比兩位女士,等佢地開心下,咁就好快好返啦。

 

歡迎各位問候 喂,唔好諗錯其他野呀,真正嘅問候呀,唔係我平時揸車o個陣D「問候」呀大佬!

 

D舊嘅相重執緊呀,太多太多,都怪有人平時影影埋埋,學校嘅,自己嘅一大堆,學校o個D趕住要交貨整校刊,所以唔執唔得,自己o個D就…… 

喺執緊舊相之餘,不如趁新鮮滾熱辣放左今日嗰啲出黎先啦,再過一排,我老人痴呆一發作又會唔記得件事架啦!哇,年紀呢家野真係唔可以睇少,尤其是係我,黐線,真係可以轉個頭就唔記得。(有時係連個頭都未轉就唔記得啦!幾勁!)成年都重未唔記得接仔放學,我覺得已經係奇積!(其實都試過一次唔記得佢提早放學,遲左半粒鐘去學校,下場梗係比人丙啦!)

正所謂,既然個腦退化緊,咁就要多啲出街行下睇下野,刺激返個腦。早排呢,禧嫲嫲唔係好舒服,於是幟哥就返左去香港探望嫲嫲同屋企人,佢去左香港成個月裡面,我帶口水禧四圍去左好多地方嘅博物館玩。事關星期一至五都要練水同比賽,有時連星期六都要,無理由成個暑假都淨係游水同困佢喺屋企架?所以我決定放假唔洗練水嘅日子就帶佢去玩,唔係咁都唔知搵咩消磨時間好。

喺金門橋附近有個地方叫Fort Baker,o個度以前本來係軍事重地,後來荒廢左之後就被改建成遊覽嘅地方,其中一「忽」就係Bay Area Discovery Museum。叫得discovery就梗係話自己係啓發小朋友對事物嘅好奇心,等佢地自己去探索搵個答案出黎啦。第一次揸車去到,見到眼前嘅軍營樓房,我不禁倒抽一口涼氣,心諗:「大穫!乜壇野咁嘅樣嘅?一「忽」二「忽」咁,完全同平時去其他o個D博物館唔同樣嘅?唔通……」此時,坐o係後座嘅口水禧重興緻勃勃咁好奇待落車後有好多新奇野玩,而我就o係心中努力盤算緊如果真係唔掂,要即刻改去邊度好呢?真係驚到隔肋底有D濕氣!

 

IMG_8544你話o勒,邊忽似博物館呢?一座座完全唔相連,門口乜標誌都無喎,人又少,你話望見咁嘅景況個心唔驚就假啦!

 

 

 

 

 

 

正所謂「唔滾唔知身體好,唔睇就閃實走寶!」(前面o個句睇戲學架咋,後面o個句係我老作嘅)唔入去尤自可,入左去就知道佢係小朋友嘅天堂!除非個小朋友對外界所有事物完全無興趣、唔鍾意跑跑跳跳、摸呢摸路、擒高擒低,一句講晒,成個植物人咁樣,如果唔係,裡面一定可以搵到最少一樣佢會鍾意嘅玩意嘅。所以第一次去完之後,口水禧就話等老豆返黎之後要同老豆黎多次玩喎,見佢呢個宏願講得咁實牙實齒,尋日就話佢老豆知佢個仔想帶佢去一個地方。

好啦,今朝起身後幟哥話去屋企附近食D野先去玩啦。本來諗住整pancake嘅,慳返!唔洗我整,正!

IMG_8275

家陣影親相都特登整D衰樣出黎,車!反正樣衰又唔係我,有時我都懶得理佢,照影。第時想攞張見得人嘅相去溝女,想show比人睇話自己細個點可愛點得意o個陣就知味道,到時唔好怨呀媽當年無提你呀!

IMG_8277

無論點,我總會偷影到正常嘅一面,我總唔信你塊面可以長時間抽筋還原唔到嘅。

IMG_8281

掛住食就係我偷襲嘅好時機啦!

IMG_8285呢個增肥餐梗係比肥人食架啦,邊個?唔洗講到明呀哇?對腳唞緊暑嘅我已經好耐無去跑步。間唔中夜晚等佢地去晒訓覺之後都會拉下筋舒援下腰酸背痛。同減磅無乜關係。所以增左磅係走唔甩架啦喂!

 

IMG_8282IMG_8279禧爸早餐食意粉,重要係好多忌廉嘅carbonara,真係好放肆,我地兩個食嘅野可謂自殺式早餐!唉!ok ok,跟住落黎幾粒鐘都要企同行,當扯平少少啦。

無嘅,平時o係屋企都會收斂下,出街就無計啦。食前、食緊、食完,無時無刻都要望實部手機嘅佢,我極度懷疑如果有日由100樓掉佢部手機落街,佢會跟住部電話「You jump I jump」,完全唔會「忍著淚說一聲goodbye」嘅!(無論同佢部手機或我同口水禧)

 

IMG_8291

天色雖然麻麻地,不過都唔少人黎。因為呢個地方好近金門橋嘅,所以想影條橋嘅朋友可以o係呢度同條橋合照,低炒條橋。想高炒嘅話,就要去附近一個山腰,即係口水禧種mimi  o個度,個位影落去條橋好靚(如果無霧嘅話……Errr有少少霧都靚……多多霧靚唔靚?搵到條橋話你叻!)而家有朋友黎三藩市想睇橋嘅話,我地實帶佢地去種mimi o個度影相,除非佢地想親身企o係條橋上面行下,影張自己o係橋上嘅相,如果唔係,我地都唔會去條橋上面,太大風又超多人,好難搵位泊車。不過第一次黎條橋嘅人都應該去行下條橋嘅,食下風,感受下D車o係你隔離呼呼聲咁駛過囉。不過我樣衰,試過比人從車上掉沙炮落我度,嚇到我幾乎「撲街」!唔洗驚,無乜人會好似我咁連個背脊都咁乞人憎,見我後面憎我前面嘅…… (都唔知係咪禧爸比錢搵人睇準時機掉我……) 

IMG_8290

佢而家想影相嘅時間同對象真係令我地好摸不著頭腦。佢揀嘅景物係你諗極都唔明有乜特別呢?不過無乜所謂嘅,小朋友唔係凡事都一定要跟大人o個套先叫o岩嘅。大人唔明又唔等於小朋友係錯,只可以話大家嘅智商同口味唔同而已。

IMG_8293一入到去大堂,當堂定晒,唔驚啦。咪睇佢外牆殘舊,其實裡面裝修得好靚架!大人細路同價,都係美金十二蚊,你可以由朝早九點玩到下晝五點人地收工。除左間精品店同間cafe之外,其他野都唔洗再比錢嘅。

有無可以玩咁耐?你定啦,D細路唔會同你客氣,舊舊摸下玩下睇下,轉個頭又黎再玩過,真係一個館隨時可以玩成個鐘都樂此不疲。

IMG_8295呢條友就更加唔洗怕佢會悶啦,連o係個大堂影張相都可以玩一大餐,同佢呀媽一樣,手指都可以係玩具!

每個館嘅主題都唔同,有D同科學有關嘅;有D同創作有關嘅;有D同訓練邏輯思考有關嘅;重有就係體能項目。除左講故事時間之外,其他館大部份職員都唔會參與同小朋友互動。呢D梗係留返比父母做。年紀大D嘅小朋友可以自己玩,館裡面重有坐位比D謝晒皮嘅老豆呀媽坐低篤下電話,吹吓水,恰下眼訓。我地係隨得口水禧想幾耐就幾耐,既然黎嘅目的就係為左佢,咁就唔好打亂佢嘅決定,比佢自由發揮啦。

IMG_8297

周街擺左幾架鐵片琴任得D細路敲。放心,一D都唔嘈,唔會製造到噪音出黎,事關D聲好柔和,初初唔知重以為個博物館咁有氣質播D咁清嘅音樂添!我對敲擊鐵片樂器情有獨鐘,尤其是東南亞國家某D敲擊音樂,有D著晒文族衫,手指戴晒金色假長指甲跳舞嘅o個D伴樂,細細聲o係屋企開黎聽好洗滌心靈。

IMG_8300

咪阻住晒啦老豆!

覺唔覺張相入面,好似好多藍色嘅烏蠅「嬲」住幟哥個頭?

IMG_8305

咁集中精神究竟o個邊有咩睇呢?就係泡泡囉。有幾部吹泡泡機係度不時吹泡泡出黎,令場內小至o岩o岩識行,大至幾歲嘅都為之瘋顛,四圍咁追住D泡黎拍,奉勸揸機影相嘅人要離遠少少,因為呢班友為左拍泡,已經進入左精神亢奮嘅狀態,隨時連你部手機或相機都拍埋,到時你喊到嘔白泡都無用。

IMG_8313通常呢D溝埋不同年齡嘅小朋友一齊玩嘅場地,甚至係一D吹氣嘅彈彈床,口水禧入去玩都會令我精神緊張。事關小朋友有返咁上下高度,年紀同體力,佢地玩起上黎真係會連老豆姓乜都唔記得,橫衝直撞。同同年齡相撞都唔算恐怖,因為大多都識閃開避到,但你放個一、兩歲嘅o係隔離,比口水禧呢個技安咁嘅身高撞埋去,個BB即刻可以變「嘔泡機」,最驚係佢地向後跌撞穿頭,咁就大件事啦。

就係咁,場內有D地方畫分左比toddler (即係四、五歲以下嘅小朋友)去玩,o個D大牛龜係唔准入去嘅。咁就安全好多啦。另外,當然父母自己都有責任要睇實啦,職員係唔會幫你託兒嘅。至於其他無規限年齡嘅場館就真係大家都要小心,有時細路玩起上黎真係無心撞跌D細嘅,發生意外大家都唔想架嘛。所以入親去每個場館前都要千叮萬囑口水禧慢慢行,睇住D細小朋友,唔好推佢地。好彩外型似技安嘅佢個格唔似技安,比D小朋友攞左佢玩緊嘅野,佢最多都係自言自語鬧下跟住就行開。不過同齡o個D就可能會揸實唔放,然後鬧人。唉。有時,我專登企遠D睇下佢會點拆解,唔想太干予小朋友之間嘅互動 (係呀,我當爭玩具到係互動架!),有時聽朋友講佢地o係公園為左小朋友爭野玩,竟然同另外嘅家長開片,其實小朋友自己可能覺得「有無咁大件事呀,呀媽?我地無諗住同人開片架喎!」你會發現,有時D細路,呢頭爭餐死,下一秒糖黐豆又一齊玩,佢地真係無野架。係我地大人諗多左架咋!

 

IMG_8318第一個玩嘅就係同水有關嘅玩意。呢個缸模擬海浪嘅形成,佢重有D沙o係缸底,你好清楚就可以見到D浪係點樣推D沙或點樣捲走D沙。小朋友至在推支棍睇下D水郁就算。其實側邊有塊板解釋嘅,不過呢D年紀,有幾多個會真係認真睇?都無所謂,到佢有興趣時佢自然就會睇。無興趣,你迫佢埋去背左佢都無用。

IMG_8319有齊中、英,西班牙語嘅解釋,其實呢三個語言係呢度都成日周圍見到架啦。個博物館話佢地希望可以同四周圍唔同種族嘅社區人士溶合,希望任何語言嘅小朋友都可以黎參與博物館嘅活動,所以佢地大部份嘅告示牌都有唔同語言嘅。

其實我個人覺得既然人地都會想比機會大家,唔同文化背景嘅人溶合下,作為o係呢個地方生活嘅一份子,自己都好應該改變下自己配合下人地。好似我十年前嘅o個種堅持,死都唔肯接受人地嘅文化同生活方式其實係好傻嘅事,到頭來都係辛苦我自己。去到人地嘅地方,入鄉隨俗係好理所當然嘅事,如果唔係,你點解重要o係呢到住呢?

IMG_8321

黎兩次我都以為呢幅牆係裝飾架啫。點知比禧爸一語道破……

IMG_8320

人地有放大鏡比小朋友睇下D海洋生物架,傻丙!<<<我話我自己咋。

IMG_8330

口水禧超鍾意玩同水有關嘅野。呢個池簡直係天堂!池中有一塊塊唔同形狀嘅零件比小朋友自己砌一隻「船」,跟住會有風吹出黎掀起微浪吹郁隻「船」,D 細路會砌好同人比賽睇下邊個隻野最快去到對面。

IMG_8337

奇形怪狀乜都有,最快去到對面唔反艇就叫設計成功。

IMG_8334

點解口水禧指住架野笑到咁呢?

IMG_8336

你睇下佢老豆隻野,甩皮甩骨,一出發先打左幾個白鴿轉,佢係以璇轉式 (!!!) 前進嘅,大概未去到中段,自己轉到頭暈解體。所以有時都未必樣樣野大人做嘅先係最正確架,有D小朋友隻艇砌得好穩又快,其實佢地有諗過,而且應該係失敗左好多次集合左經驗最後先整到架勁野出黎。所以比D時間佢地慢慢研究,唔好一開始就比意見迫佢地跟從大人,你唔會知道,呢個遊戲分分鐘就係啓發一個將來偉大嘅發明家,第時可能我地坐嘅船就係以呢到池裡面嘅設計做籃本。

IMG_8329

呢度有三條魚,下?見唔到?唔洗驚,你對眼無事……

IMG_8328咁樣襯埋D沙度都比你搵到嘅話,佢早就比人食左啦。o個日o係個魚缸哺左一輪先搵到D魚,咁都證明我嘅視力未衰退得晒丫!條魚個樣真係好攪笑,佢對眼係平排o係佢個頭頂,唔知佢睇唔睇到下面嘅野架呢?

IMG-20140720-WA0013

你話D細路見到呢個遊樂場點會捨得企o係度發呆唔去玩丫!

IMG_8343IMG_8361唔知係咪近海嘅原故,個博物館有好多野都同海洋有關,所以四圍都會見到船。

IMG_8359

掌舵啫,洗唔洗扮man 呀?

IMG-20140721-WA0008

上次同呔家去完紅樹林之後,佢地見識過口水禧係野都摸,見野就爬,weak7都不禁要問我係咪忍緊啖氣所以無鬧口水禧。哈哈!我比左個忠告佢,就係百忍成金啦。當佢第一次做嘅時候,你鬧;佢再做多十次,你就會麻木,鬧都費事。再細諗下,其實我自己細個都係呢隻style,咁自然就會明點解佢會咁樣。講緊係唔影嚮或傷害他人嘅情況下喎,佢立架生追住人地個仔黎打就梗係要阻止佢啦。

其實帶佢黎玩,就係預左佢會係野都摸,見野就爬。基本上,場內絕大部份嘅小朋友都係咁樣。既然個場嘅宗旨就係想小朋友自己去探索的話,咁就有得佢地去探。呢度有好多唔同嘅模型,船呀、橋呀、山窿呀、河呀 (放心,個模型細到人都坐唔落,唔會浸親!)等等,比小朋友邊玩邊自己設計場面同劇情,你可以當自己係海盜都得。隨得佢地自由發揮想象力。

IMG_8371

後來我地o係角落頭搵到一舊巨木,人企埋去都唔夠佢高!

IMG-20140721-WA0003IMG-20140721-WA0006見口水禧「捐」得咁過癮,有人身痕都想試下究竟會唔會”kick”住o係中間出唔到黎,要叫消防員黎鋸木救人呢?開頭真係唔敢試,後來見有個肥過我嘅男人都過到,心諗:無理由我會kick住架?

於是鼓起勇氣,我捐

而家諗起,做乜當時禧爸好似好鼓勵我試,猛話:「你梗係得啦,點會kick住呀?」

Hmmmm…… 其實佢內心係:「肥婆,最好kick 住出唔到黎,咁我就唔洗帶你返屋企啦!哇哈哈哈!」devil

IMG-20140721-WA0001

登凳!破木而出,問你怕未!諗返起,如果真係kick住左要等消防員黎,重要keep 住呢個手勢,消防員黎到,應該會第一時間……影我相(或同我合照!!!!)然後放上網,標題 – 華裔無知婦被困巨木,消防到場婦比雙V手勢。報導重點係 – 該婦人丈夫兒子齊失蹤影, 相信已啟程回家……   

我唔可以咁樣諗個老公嘅,佢唔係咁嘅人。佢真人係會……直接搭飛機移民去第二個星球啦!

~完~

禧媽

34 Comments

  1. 禧禧游水游到黑晒之餘頭髮都金埋真係好靚仔
    禧媽好耐冇見換左造型又後生左啊!!!

  2. 當佢第一次做嘅時候,你鬧;佢再做多十次,你就會麻木,鬧都費事。 <- I haven't gotten that yet. I still continue to nag.

    • 有危險性嘅事就梗係唔比得佢做啦,嗰啲就一定要出聲制止佢囉。不過唔危險嘅實在太多啦,如果每次都要話佢嘅話,我驚我條聲帶已經斷左啦!哈哈!

  3. 祝禧嫲&禧婆身體健康….,身邊所有人都健健康康!

    見到你一家嘅近照, 好抗奮呀! 你索咗好多呀!

    • 每當我聽到或睇到「你索左好多」呢句說話,就知道前幾年嘅我幾不堪! :cry:

  4. 實在太好喇,禧媽終於重出江湖 :good:
    首先祝你地身體健康,因為健康真係無價之寶:)
    另外,我覺得你個新髮型好有女人味,哈哈:P

  5. 祝兩位老友記身體健康,長命百歲!

    禧禧愈來愈靚仔,好似TBB嘅藝人羅仲謙。第時讀完大學返黎香港做明星,益吓我地一班師奶仔眼睛食冰淇淋 :whistle:

    • 多謝你,啲揸lift 人收到架啦!XD
      做明星就唔好等讀完大學啦,今日好開始出去賺錢養家啦喂! :whistle:

  6. 祝禧嫲嫲早日康復,身體健康!口水禧大個仔好多呀~~~

    • 多謝你!有心有心!
      係呀,7歲半啦,好快就大個仔唔洗我理佢啦 <<<<< 我每日都係咁樣安慰自己! :yahoo:

  7. 口水禧越黎越似你,.,哈哈!!!!

    希望兩位搓FIT人身體健康!!!!!!!!!!!!!!!!!!!!!!! B-)

    • 因為佢唔似佢老豆,所以唯有話似我呀呢?(oopsss,咁講野好易惹人誤會……)

    • 係呀,而家7歲半都大約有54寸高,同佢生得高o個班西人同學差唔多高,唔洗驚比人恰,哈哈!

  8. 祝婆婆麻麻身體健康!人大左,無野比自己同家人o既健康緊要!!
    口水禧已經一個大哥哥樣,睇黎大個左應該幾靚仔!!^^(流口水中………)

    • 多謝你,師妹!其實佢地唔舒服,家人都好擔心,佢地知道家人擔心其實自己都唔好受嘅。真希望佢地快D攪掂,以後要多多注意保養好自己身體啦。
      口水禧已經變左舊炭屎啦,黑到就黎見唔到眼耳口鼻,你咁都睇得出佢大個會點嘅樣?果然係眼力好,我已經有少少老花嘅跡象,真係無咁好眼啦。哈哈!

  9. 祝福妳家長輩各人都身體健康!
    自從見到你個BLOG出現UNDER CONSTRUCTION! 真係好似唔見左嚿$咁, 好DOWN, 每隔一兩個星期就嚟巡下場睇吓你有冇開番檔! 今天終於俾我等到嘞! THANK YOU SO MUCH! 希望就算日後幾忙, 間唔中都上嚟UPDATE吓, 冇你啲BLOG睇真係吊晒癮咁呀!

    • 唔見錢咁嚴重??? 盡量寫啦我,不過以後可能係一篇blog分幾日寫,好似呢篇咁,每日寫D寫D, 所以你記住要去篇blog嘅最底睇下有無加左新野呀!

  10. 祝兩個「百友」早日康復,龍馬精神,繼續縱口水禧等佢激到你扎扎跳。

    你個仔大到我唔認得喇!

    • 咁我諗要去盡啲,叫我仔激到我噴血先得啦!(而家係嘔血,要噴血先夠有heart!)

      佢自從泳隊開始練水之後,我就狠心剪左佢個冬菇頭啦,個樣即刻老幾年!

  11. 兩個揸lift人要早日康復, 身體健健康康

    禧媽咁你要出多些BLOG先得

    • 多謝你,佢地會收到架啦。 :yes:
      唉,我都想唔好隔太耐先出一次blog, 但成日未寫完就已經訓著左! :wacko:

Leave a Reply to Mimi Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)