37

Fritzgerald Marine Reserve

聽禧婆婆講香港呢排成日都落雨,哇!「落雨」呢樣野對我地加州黎講已經係好奢侈嘅事啦。今年嘅雨量真係少得驚人,好多市鎮都已經開始實施禁止使用太多水淋草地,寧願有得啲草黃晒,都唔比日日淋草淋花。你唔遵守嘅話就有可能要收告票。呢兩個禮拜,氣溫升到有時過100度華氏(即大約攝氏40度),真係唔係講笑,對格肋底真係未乾過。尤其每日都要帶口水禧去練水,坐喺池邊乾煎嘅父母,真係唔中暑都偷笑!我對腳上嘅人字拖印曬到好似紋身一樣,一除鞋就清楚見到,幾特別呀,人地紋啲龍呀鳳呀,我紋對人字拖!人地唔知,重以為我梗係啲沖浪高手頂啦……

熱到嘔電,通常我地都會去第二個市鎮避暑,一來慳電費唔洗係屋企開冷氣(係,我係cheap!)二來咁鬼熱,除左游水,重有咩戶外活動可以做呢?但有人已經日日都游水架啦喎,放假搵啲其他活動做下好唔好?

近期買左本書,專門介紹喺北加州適合一家大細去玩嘅地方指南,本野真係打救我於水深火熱之中!事關我地雖然喺度都住左超過10年,但真係唔係知道好多可以成家人都適合去玩嘅地方架咋。莫講話我地,就連口水禧啲同學嘅父母都唔係識得好多地方啱細路仔去玩,所以本野真係無得頂,重分埋地區,有晒地址或網址、電話、入場費、附近嘅餐廳同酒店等等。

上個週末,搵到一個地方叫Fitzgerald Marine Reserve嘅地方,叫得做Marine Reserve,即係有人管理兼做緊保育嘅工作。睇網上嘅資料,呢個地方每年嘅10月至6月都會退潮退得比較勁,當你撞啱嗰個勁嘅鐘數,你就可以行到好出嘅海面,企喺石頭上面睇海洋生物。聽講,有時會見到海星呀,八爪魚呀,珊瑚之類嘅野。再唔知行咩狗屎運嘅話,你甚至有機會見到鯨魚添。(當然啦,鯨魚係喺好遠嘅地方游,你就企喺海邊睇,你都唔想佢游埋黎架?)

適逢口水禧先生之前一日猛話要去海灘,呢度就啱晒啦。事關我都幾怕同佢去沙灘玩沙,條友玩完之後,我架車,洗衣機同埋我本人真係大災難!真係聞沙色變呀!但呢個保育區唔係比人黎淨係玩沙,個個走晒去海邊睇野,邊有時間玩沙丫,咁就啱晒我嘅要求啦。加上呢個應該係石灘黎嘅,就算有沙都好大粒嗰種,所以最好著住拖鞋落水,上返黎重有個位比你沖腳,哈!好!

IMG_8583

Errrr,呢張相同個保育區係無關嘅,純粹係影下佢手術三日後食餅嘅情況。個傷口喺細隻啲嘅門牙嗰邊後面。隻小三牙都唔細粒架喎,大過粒米1/3左右。唔怪之得會頂到隻門牙分道揚鑣啦佢老闆!concerned食埋今日嘅抗生素就攪掂,縫針條線會自己溶,所以下個禮拜覆埋診,如果無問題就ok。不過睇佢棚牙嘅走勢,大個應該走唔甩要箍牙架啦,到時慢慢嘆啦!哈哈!

IMG_8677

由我地屋企揸車去呢度,加埋塞車,大約都個幾兩粒鐘。天氣熱,個個都向呢邊貢過黎,塞車係在所難免架啦。算係塞得少架啦,我地之前一日去point reyes,淨係一個燈位都塞左半粒鐘!唉!

九曲十三彎之後,終於到啦。落車嗰一刻,哇!涼爽舒服!

IMG_8590

呢個保育區距離民居幾近,哇!你話住喺附近都咪話唔正!又近海邊,又有個散步嘅樹林,環境無懈可擊!重有人管理個海灘,唔怕有咩無公德嘅人喺度攪攪震添。

無收入場費,你鍾意就隨量喺捐款箱放低錢或幫襯買下紀念品支持下人地嘅經費啦。

門口有個攤位擺放左一隻海獅嘅標本,重有幾塊海獅皮比人摸下,有個專人企喺度解答大家嘅疑問。

盡量將自己嘅聲線降低,太大聲講野會破壞個生態環境,啲動物都比你嚇走晒,咁就無野睇架啦。所以我屋企嗰個大聲公口水禧,時時都要提佢細聲啲講野,細路仔一得意忘形,見到乜新奇野就即刻大叫:「媽媽!你睇!呢度有個貝殼呀!嘩!」唔夠兩秒又黎:「爸!你睇下我執到幾大舊石!」嗰日我地講得最多應該係「禧禧,你細聲啲啦!」同埋”shhhhh”。(shhhh到自己聽到都幾乎賴尿!)

IMG_8587

呢度嘅野生公園都好鍾意擺放啲標本比人摸下,呢度摸夠啦,就唔該閣下轉頭唔好走去騷擾啲生嘅。

IMG_8591

沙灘上有一忽地係啲海獅攤唞嘅地方,佢地會訓埋一堆曬下太陽回下氣,hea夠就會落水。如果比人打擾攪到佢地無得唞要不停喺水裡面游嘅話呢,咁樣會嚴重影響佢地嘅健康,攪到佢地攰死餓死。所以法例規定但凡喺度見到有海獅攤唞嘅地方,所有人都必須遠離佢地300尺範圍以外,違例者會比檢控兼罰錢。

IMG_8669相中一堆野攤晒喺度嘅就係hea緊嘅海獅。因為唔可以行埋去,只可以用相機勁zoom影過去啦,下次真係要帶個望遠鏡去。係我企喺度影相嘅地方前面只有一個雪糕筒咁大把用黎提醒啲人唔好越過個筒,大家都好自律,無人行過個雪糕筒,即使連小朋友都無。所以啲海獅先可以優哉游哉咁歎!

IMG_8607

睇下佢幫自己塊面搽太陽油搽到幾白!同個身唔同色,塊面可以去表演做能劇架啦!Errrr…個彌敦道九號髮型乃出自佢呀媽嘅手筆,唉!講左比佢知唔係咁梳架嘛,但佢係都要咁樣撥啲頭髮,攪到一忽忽咁,我都無眼睇啦。

IMG_8610求其喺地下執到啲野就當寶嘅佢真係好鄉下佬呀!呢個地方好似有退潮嘅時候會安排有管理人員帶團講解水裡面嘅生物。每年10月至6月就係退潮退得勁嘅時間,所以過多幾個月,我地就可以再黎,到時可以行出去遠啲嘅海中,企喺石頭上睇更加多嘅生物。

我由細到大都好鍾意睇動物,天上飛嘅,海裡面游嘅,地下行嘅乜都啱,除左蟲( 如果放喺缸入面就ok),唔知口水禧有無呢個喜好?

IMG_8623錯誤嘅示範:絕對唔可以係水裡面扯任何野上黎揸上手。口水禧手中呢塊係沖左上岸乾死左嘅就算啦。水中其實有啲寄居蟹,魚仔,蝦等等,呢啲植上黐左啲微生物,佢地係某部份海洋動物嘅食物,如果人人都扯走啲,咁人地海裡面嘅動物無飯食就會餓屎bye bye 架啦。

IMG_8620See?話口未完就見到一條魚仔攝喺石罅之中。側邊一粒二粒野係啲好似蝸牛嘅野,我估咁細粒應該係BB黎嘅。因為我見到有更大粒啲嘅。初初以為係寄居蟹,點知望極佢都唔見佢伸啲腳出黎但又會郁架喎,原來根本就無腳,個樣好似蝸牛……唔通係啲人要黎炒嘅東風螺?IMG_8617

IMG_8603

呢隻野我尋日喺facebook先見到有朋友 post嘅新聞話最近喺Monteray 海邊見到大量,又話有啲地方已經失去佢地嘅蹤影成8年咁耐!堅定流呀?我嗰日見到好多喎,黐喺啲石頭上面,啲浪點沖都沖唔走喎。

IMG_8619

若要人不知,唔該醒DDbitter

IMG_8645

喺呢個時候,我仔已經自動波自己去左玩啦。

IMG_8639

衫又濕,褲更濕,內膽就唔洗講啦。失策左,其實應該帶條泳褲比佢著。不過因為有過經驗,所以帶佢去邊度玩都要幫佢帶多套衫褲鞋襪底橫,有一次去個博物館唔記得帶,佢竟然喺裡面玩水玩到由個頭濕到落腳,對鞋都濕埋,臭到冤!無幾耐重周身痕,結果要出去搵地方買過啲衫褲同埋拖鞋,真係為佢嘅瘋狂滴汗呀我!

IMG_8632

細路仔出門牙嘅時候要影多啲相,真係無乜幾何會有咁樣丙嘅時候啦,唔洗捕祝,隨時都有得影,除非佢唔開口。

IMG_8654

洗衣機大災難前傳no-snitching

IMG_8655

比面望鏡頭唔整衰樣嘅一張相……啲陰……唉!

IMG_8697

 

人地開始郁 ,口水禧就話隻野行到佢隻手好痕。哇蟹!第時如果比人握手R手心,想無人知都幾難,隔離啲人唔知佢做乜同人握手握得咁開心!

IMG-20140728-WA0004See?我呢啲攤慣手板問人攞錢嘅幾咁專業呀!隻蝸牛行得唔知幾順暢開心,舒服到咩咁!同佢講左bye bye就送佢返去水中嘅石頭上面,跟住佢繼續以龜速去散步。

有無高人指點下我嘅掌紋有無機會中六合彩呀?IMG_8681

 

機會又黎啦!你地都知我想出邊句架啦!

~在水中央,有茂利一雙!~

我真係被迫架!hard-laugh

IMG_8707

唉,好啦,比張正常嘅相過佢地啦。

IMG_8713

臨離開個海灘之前,見有班人靜英英咁企晒喺個欄杆前面,我梗係唔執輸都埋去八下咩事先。原來有隻鷹企左喺度R痕。大家好靜咁影佢相,隻鷹R完痕轉身見到一棚人一字排開企喺佢面前都不禁呆一呆,好似佢要準備射十二碼咁。我地離佢大約十幾尺咁遠,但相信以鷹嘅視力,企喺嗰度望過黎我地每一個人,佢應該可以好清楚見到邊個無剃鼻毛,邊個未抹眼屎,同埋睇到我朝早剃完又生返出黎嘅鬚根。hard-laugh

IMG_8734

離開個海灘後,洗好腳就去左隔離個小徑散下步,想影結婚相嘅人,呢度無得頂!我比較鍾意室外影嘅相多過影樓入面影。如果有陽光嘅話應該會幾靚下,你睇,口水禧塊面又抽晒筋咁,但襯左後面個景之後,係咪覺得佢無咁面目猙獰呢?(平時想煎佢兩巴,而家最多煎一巴啦,係咪先?)

IMG_8726

IMG-20140728-WA0005我發現我好鍾意丫開對腳影相,好似好高要特登擘開腳就口水禧,其實純粹係腰痛所以懶得向前彎腰,索性擘腳黎就位。好彩我啲牛仔褲嘅彈性足夠我擘幾多都得,唔會爆呔。如果唔係,喺馬會門口咁擘法再爆呔唔知會唔會比人打穫!

IMG_8736

行行下見到有棵訓低左嘅樹,有人即刻急不及待要大顯身手。影完呢張相後,佢爬到去第一個樹幹分叉位,然後竟然唔敢落返黎。因為樹皮滑,呢位大俠驚「羨」,於是kick住左喺上面不知所措。後面已經有人排緊隊等住上去影相,眾目睽睽之下,唯有叫佢倒轉背脊向天咁倒後爬返落黎。於是就有個dup頭dup尾嘅茂丙緩慢地成隻樹懶咁龜速落黎。正所謂「出得黎行,預左要還,上樹容易落樹難」,「火羅」爆都要架啦。

IMG_8741

早輪禧爸重喺香港嘅時候,其實我已經想帶口水禧過黎,但我唔敢一個女人帶住個細路行呢度,我驚比人老笠。雖則我有鬚根啫,但我比起外國人嘅身型叫做矮,如果行行下喺樹林跳個傻佬出黎,我都唔知攞唔攞得切我支胡椒噴霧請佢歎就可能比佢揮拳打暈我啦,所以唯有等禧爸返黎先一齊黎。我無理由袋住把菜刀(!!!) 喺腰間架哇?個氣勢怕會太勁,比警察見到好難解釋架喎,唔通同人講話我特登帶把菜刀黎海邊嘅樹林剃鬚咩?佢信我自己都接受唔到啦,係咪先?

IMG_8749

後面個茂利追得幾咁牽強!

IMG_8752

當日whatsapp上面離遠影嘅海獅相比呔媽,佢問我呢堆係咪死魚?hard-laugh 

我「碌」埋落去攤喺佢地中間就真係有死魚啦。

IMG_8755

IMG_8683

小朋友嘅好奇心好大

一滴水一粒石都可以諗好多野

就襯呢個時候開始教佢地要愛動物

愛護生態環境

尊重生命

唔好拋海星

唔好亂咁掘蜆

唔好抱起條擱淺嘅海豚影相

唔係好難啫,呵?

 

禧媽

37 Comments

  1. 口水禧真係高左勁多! 開始有d 少男feel, 將來(其實e+ 都係) 會幾靚仔。 禧媽要學定點樣幫佢抵當d 女埋身

    • 幫佢擋女?呢啲咁筍嘅位,梗係要留比禧爸啦,做人要識時務丫嘛!佢兩個keep 住忙碌,咁我先有機會鼠出去shopping丫嘛! ;-)

  2. 好鍾意睇你個blog 哈哈 !爆笑!其實你家老爺係咪公事先猛玩電話 定係已經中毒太深

  3. 嘩終於有得追番口水禧個blog啦 :yahoo: :yahoo:
    冇見一排口水禧大個左好多,不過俾D牙出賣左 :wacko:

  4. 有得追返禧媽Blog真係爽~~~ :good:

    想問下D海獅係上岸休息緊定係已經”all呢吉帝”左? :scratch:

  5. 禧媽,你寫嘅blog真係好好笑 :yahoo: 有機會一定要黎呢個保育區睇下!

  6. 禧媽 ;-)
    你會唔up 反以前d yahoo blog丫 :cry: :cry:
    好掛住以前d笑料同正能量 :good: :yahoo:

  7. 禧媽 ;-)
    你會唔up 反以前d yahoo blog丫 :cry: :cry:
    好掛住以前d笑料同正能量 :good: :yahoo:

  8. 禧媽會唔會up反之前yahoo blog 呀 :good:
    好想睇反以前d笑料同正能量丫 :yahoo:

    • 如果你有睇過周星馳套’算死草’就會知彌頓道九號即係意思話人個髮型好核凸咁解。 哈哈!

    • 我揾佢做緊實驗架咋,唔知係咪真係洗得架,要過多十年八年睇下佢有無行差踏錯先知啲書同老師有無老點我。 :yes:

    • 我嗰本好似就係你買嘅呢本喎,係咪有個細路女揸住相機喺封面架?

    • 下次影我對腳比你睇,你就會明點解我紋左對人字拖喺對腳度……

Leave a Reply to Mamama Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)