28

窮養?富養?

早排網絡上有好多人都傳一篇野叫「窮養兒富養女」,大約係講男仔呢就要自細過下克苦耐勞嘅日子,要佢地受下挫折,唔好比太好嘅物質生活佢地,總之就係苦過dee dee,從而培養男仔嘅責任感,培養堅強嘅意志同埋唔怕失敗嘅鬥志。原因係男仔長大後因為要養妻活兒,孭起頭家,如果唔捱得嘅話就好快比社會淘汰。相反呢,女仔就要自細培養佢地嘅氣質修養,送佢地去學下琴棋書畫,學下點養打扮自己嘅儀容,要比佢地出去見識多啲,等佢地將來嫁左人之後做一個體面嘅好老婆,所以女仔細個除左要投放多少少資源喺佢地身上,父母無時無刻都要喺佢地身邊多鼓勵佢地,等佢地可以建立自信等等,呢個叫做富養。

睇完篇野,我想話:咩年代呀家陣?窮養兒富養女?黐線!Out 啦!

當屋企無個男人喺度嘅時候;當一個女仔未嫁人甚至唔諗住會嫁人嘅時候;當一個女人嫁錯人嘅時候;當一個女人擁有所有野嘅時候,我想問一句寫呢篇野嘅人:「女人,難道唔洗撐起半邊天呀?」嗰撐起半邊天嘅能力從何而來呀咁?現今社會好多夫婦兩人都要工作,富養女只適合著古裝嘅人架咋!女人出黎工作或喺屋企湊仔,少一滴責任感、堅強嘅意志或唔怕失敗嘅鬥志都唔得!而家講男女平等架啦,仔又好女又好,應該都一齊要窮養富養,咁先適合喺呢個世代生存。我真係唔明,湊細路點解要因唔同性別而用唔同方法去湊,乜唔係應該因應個細路嘅性格同特質黎揀適合佢嘅方法去照顧佢架咩?

如果真係想養一個唔怕失敗,有責任感,有堅強鬥志嘅人出黎,唔需要特登要佢過啲苦過dee dee 嘅生活嘅,其中一個方法就係從細開始送佢去參加一樣運動,而嗰樣運動又會有比賽嘅,假以時日,就算養唔出個世界冠軍出黎,你都至少會有個擁有以上條件嘅仔女。就算唔方便運動嘅人都可以參加其他靜態嘅活動,一樣都可以磨練自己,培養鬥志同責任感。

喺我嘅童年時代,培養仔女做運動員絕對唔流行,嗰陣時小朋友聽到最流行嘅「鼓勵性」說話就係你唔讀書,大個就去做乞E!可能而家都重係咁樣,讀書係小朋友嘅所有,讀唔到書,你就玩完架啦!但喺美國,讀唔到書都重有好多出路嘅,其中一條路咪係去做運動員囉。當然,你可能會話:「車!成功出左名嗰啲先有得名成利就架啫,你睇下嗰啲做左幾廿年運動員嘅邊有運動明星搵咁多錢呀?」每場比賽都只有一個冠軍,但即使得唔到冠軍嘅其他人,我相信都總有啲得著嘅,最起碼會有個健康樂觀嘅人生觀啩!

幾年前,口水禧開始有氣喘嘅問題,當時醫生話如果七歲前都攪唔掂,咁佢就好大機會有哮喘。因為我有屋企人有哮喘,我見過佢病發時嘅痛苦,所以知道口水禧有可能會有哮喘之後,萬事都要小心。mimi我就100%唔會放棄架啦,咁點算好呢?當時想起我以前有個學生細個身子好弱,佢媽媽送左佢去泳隊,之後越黎越壯,我亦聽好多人講過話游水對有哮喘嘅人好好,所以三年前就送左口水禧入泳隊,希望佢可以同氣喘講bye bye。

IMG-20140710-WA0000

記得初入泳隊嘅時候係四月底,天氣都重係有啲凍凍地。游慣室內池嘅口水禧頭幾日一落水就喊,佢話室外池啲水好凍,唔想游。但為左要佢游多啲等身體好啲,泳隊一個星期練四日水,我都堅持帶佢去。喊都要落水,打冷震都要上水企喺度聽教練講野。其實我見住自己個仔濕晒身企喺池邊震到我眼都花咁濟,我何嘗唔心痛呢?但想起哮喘病發作時個人會喘到震嘅情景,我寧願睇住個仔游水震好過喘到震。其實室外池水溫有華氏80度,喺水裡面應該無問題嘅,係上水嗰下攞膽啲。當時禧婆婆都喺度,平時個孫熱到出汗佢都唔比佢除外套,當佢見到佢個寶貝孫企喺池邊凍到震,佢都曾經勸過話不如等夏天先比口水禧去游啦,不過最後佢都無堅持,因為當時口水禧都就黎五歲,離開七歲個限期唔係好遠,見過屋企人搣左好多年先搣得甩哮喘,呀婆都唔敢阻個孫游水。就係咁樣,口水禧就開始左佢加入泳隊嘅生涯啦。

IMG-20140613-WA0026唔經唔覺已經加入左泳隊三年,一年除左冬天四個月嘅「休游期」之外,每星期都要練三或四日水。攝氏幾度又好;四十度又好;落雨又好;行雷又好;打風又好,係除左閃電,地震或病之外,夠鐘就落水,練完先上水,無人有例外。有啲泳隊甚至連冬天都要游,有時重會去落雪嘅地方游室外,問你怕未!

而我地當初嘅目標只係想口水禧練壯啲個身體,游冬泳嘅事完全無諗過,直到而家佢都未試過去落雪嘅地方游室外,我覺得呢個就隨佢自己想啦,因為游左大半年嘅水,我就比佢自己揀冬天想玩嘅野,所以多數會上左雪山。(咪一樣係喺落雪嘅地方喺室外玩,睇黎係我慘咋喎!)

1403986747325

 

本來為左驚佢有哮喘而去游,後來發現佢除左身體無咁「鐵布衫入冬即變底衫之金玉其外,豆腐其中」之外,加入泳隊對佢嘅心智發展原來都有好大嘅幫助。無論你喺屋企有幾多個人服侍你,你係何其大爺都好,黎到泳隊,你都要服從教練所有嘅指示,叫你跳一百下你就算覺得戇居都要跳。比人丙或罰你游多幾次都要游,喺泳池,教練係大晒的,即使你呀媽都要企埋一邊唔准插手,睇住個仔比教練罰都唔出得聲,心裡暗鬧就適隨尊便啦。運動員服從教練係必須嘅,你叻到曉飛都要遵守。

IMG-20140721-WA0010運動員除左要服從教練之外,堅強嘅意志力係唔少得嘅。郁下就放棄,永遠都唔會成功。隊入面有四、五歲嘅小朋友,細細粒肥嘟嘟好得意!即使你再得意可愛,一樣要堅強。好多比賽入面,我見過唔少咁細年紀嘅小朋友邊游邊喊,有啲游極都撞到兩邊嘅繩,有啲點郁個身都唔見佢有前進嘅意途,有啲一跳落水會驚到游返轉頭添。但佢地係唔可以放棄,喺起點上返水嘅,一定點都要捱到終點先比上水。佢地會盡力游,望見佢地喊到面容扭曲,但佢地都會游到終點為止。上水後,教練會好勁讚佢地無放棄,堅持游完為止,無論佢地得獎與否。

1403985705230有啲大型嘅比賽係唔比父母陪個小朋友排隊落水,啲細路要喺一個地方集合,然後就自己入去場地等比賽。父母最多可以喺池邊禁區外睇同等候個小朋友游完上水離開泳池時遞毛巾比佢。

禧婆婆以前每逢聽到教練話練水完畢後就好似貼身丫環咁揸住條毛巾棟喺池邊恭候佢個孫上水。我地試過為左呢件事意見分歧互頂幾句。佢覺得我唔應該坐喺池邊啲凳等口水禧上水後自己凍到震咁行埋黎,佢話咁樣會凍親佢個孫。我話教練唔鍾意啲家長咁樣,呀婆話其他呀媽都係咁行埋去池邊啦,點解我唔肯。但試諗下,喺啲大型比賽入面,我未必時時都可以等口水禧游完即飛撲埋去遞毛巾架喎,佢一樣要捱凍咁行出黎搵我先有毛巾,平時唔習慣下,到突然要咁樣做嘅時候,佢咪重辛苦,係咪先?其實佢而家習慣左之後,天冷時都無咁怕凍,有時坐佢隔離重會感覺到佢個身有啲暖氣滲出黎添。

IMG-20140528-WA0001 copy

比賽嘅時候,有時會甩泳鏡或者有啲突發狀況,通常教練平時都有教佢地無論發生咩事都好,聽到嘟一聲之後蛇咬都要跳落去游架啦,唔理係中途撞到野又好,甩左假眼睫毛又好,繼續游就係應對嘅唯一方法。咁樣訓練到佢地就算面對困難都處變不驚,臨危不亂,勇往直前,唔會因為少少野而阻礙自己前進。差唔多等如「唔理咁多,總之你自己死掂佢呀!」

IMG-20140802-WA0020

最重要嘅係訓練小朋友嘅同理心。口水禧係獨生子,除左同父母之外,學校同泳隊就係佢學習同理心同社交嘅地方。但學校都未必成日有機會比佢學咩叫同理心,只有喺泳隊先有機會學。原因係每次比賽中,泳手之間雖然會存在兢爭嘅心態,但大家比賽之餘都會同其他人打氣。尤其係當泳池中有啲泳手游得比較慢少少,其他人都上晒水,但池中間重有人爭扎緊咁游,呢個時候,在場嘅人都會一齊幫嗰個游緊水嘅人打氣,不論游嗰個係自己隊定係人地嗰隊都好。當嗰個人到達終點時,大家都會為佢歡呼拍手,令到嗰個上水嘅人知道大家都為佢無放棄,堅持游完個比賽而高興。有啲選手會喺游完之後同隔離左右兩條線嘅選手握手或擁抱,一句” good job”互相鼓勵,我覺得呢個先係比賽真正嘅意義,小朋友唔好一尾淨係知道輸贏,體育精神遠比獎項重要。

重有一樣野我覺得都好重要嘅就係培養小朋友對自己泳隊或國家嘅忠誠。每一次比賽開始之前,各隊嘅教練都會集合所有隊員一齊嗌口號,之後全場就會肅靜企起身面向支美國旗唱國歌。唱完之後,比賽就正式開始。

曾經,口水禧因為自己泳隊唔夠其他泳隊砌而嫌棄自己嘅泳隊,重夠膽當眾話想加入人地泳隊添!但咁嘅年紀真係又唔知咩叫忠誠,見到邊到好玩就梗係一支箭飆去玩,邊度有好野食就飛撲去猛食,邊個多玩具就同佢做朋友架啦,細路仔就係因為無大人咁多顧慮,呢個又話要比面,嗰個又話唔得罪得人咁,細路係睬你都傻,自己鍾意嘅就去馬。結果有兩次因為佢咁「大逆不道」踩自己泳隊兼話要去人地嗰隊,我叫左佢離開個池,唔好再黎參加我地泳隊攪嘅比賽。如非必要或人地趕我走的話,我從來都係一個加入左一個團隊就諗住唔走嘅人(揸車換線嗰陣除外hard-laugh)。我覺得忠於你自己嘅隊伍係必須嘅,無論佢係好係壞。所以我覺得係時候要教導口水禧咩野係忠誠,我知道呢樣野好抽象,小朋友好難明,唔通真係要喺佢背脊紋住「精忠報國」同喺腳板底紋低「反清復明」咩!(又唔知我講乜呀呢?哈哈!「反清復明」喺星爺做韋小寶嗰陣喺腳板底寫架嘛)但都要從細就開始教佢,因為忠誠係做好人其中一樣基本要素,大個唔會出賣自己人,知心嘅朋友先會多。

於是我地不停灌輸「教練咁比心機教你訓練你,你就要游好啲,砌低其他隊,幫自己隊攞多啲獎牌返黎。自己做好自己嗰份先,自己人游嗰陣幫佢地打氣,支持自己嘅隊友」。而家雖則佢重未知咩叫歸屬感,但至少聽到其他隊友話自己隊游得慢嗰陣,口水禧都會即刻叫佢啲隊友唔好咁講自己隊,我覺得叫做有進步架啦。

IMG-20140709-WA0041

正如上面講過,每場比賽都只有一個冠軍,有人甚至一個獎都無添。但係,你好少見有運動員因為輸左一場比賽就走去自殺,因為佢地訓練有素,輸贏喺佢地做運動員嘅生涯入面幾時都要面對架啦,無人可以真係永遠都世界第一,宇宙最強。天外有天,一山還有一山高,呢場唔得最多咪下次比心機努力啲囉,就算到最後最後都無獎,人生就係咁架啦,自己技不如人,對手太強,人地天生異稟,呢啲係無得怨嘅,唯有接受同享受個過程架咋。將呢個態度用喺平時嘅生活,面對挫折嘅時候,你就唔會被打倒,睇得同失就唔會咁重囉,係咪? 

講咁多無非都係覺得「窮養富養」呢種傳統諗法已經過時啦,無論係男仔又好,女仔又好,都應該一視同仁,因為到佢地長大之後都一樣要面對困難同挑戰,挫折呢家野係唔會專揀男人而避開女人嘅,煮到埋黎話之你係王子定公主,一樣要硬食,各人都有自己嘅煩惱架啦,啱唔啱先?

之前禧爸重喺香港嘅時候,口水禧每個禮拜都有兩場比賽。週日係黃昏,週末就晨早。老公唔喺度嘅時候,真係女人都要當男人咁用!比賽前兩粒鐘要先去霸好位開好帳蓬,重要幫另一個隊友霸埋佢成家個位,因為泳隊規定我要去做義工,我只可以求人幫我睇住口水禧,咁我霸開位唔通唔幫人霸咩?咁樣亦都方便人幫我睇仔啦。

1403992475492

帳蓬、兩張凳、幾條大毛巾、游水用品、佢一大袋玩具、「林林嬸嬸」,加加埋埋重到乜咁,搬落車搬上車真係攞命!朝早趕頭趕命,夜晚又趕頭趕命,唔好講笑,而家萬一要著草走佬,啲行裝一立就走得人,真係來無影去無蹤呀!我自覺可以同無牌小販有得鍊添!devil

1403991149251中型比賽嘅呢啲場面,上千個家庭喺度,成個難民營咁款,啲無太陽曬嘅位都係要霸返黎嘅。你可以唔霸……如果頂得順喺攝氏40度嘅太陽底下坐幾粒鐘嘅話。我就算坐喺無陽光嘅地方對格肋底都未乾過,自問真係頂唔到烈日當空咁坐幾粒鐘。得我一個人湊住口水禧,我唔中得暑架大佬,我病左就無人理佢架啦。IMG-20140802-WA0001

 

IMG-20140802-WA0012

呢,早前提過我一雙紋左人字拖嘅腳呀。經已特登縮細張相,費事大家見到唔開胃!

IMG-20140709-WA0033

我通常都係比賽最後兩粒鐘先要去開工做義工,於是之前嗰幾粒鐘裡面,就會猛灌呢條友食野同去厠所,事關呢條友係唔會自動波嘅,特別係佢成堆friend黎同佢玩嘅時候就更加唔洗旨意佢會識得提早去定交水費。佢試過已經企喺跳台準備游接力,前面嗰棒已經游緊過黎,呢位人兄突然轉頭話要去交水費,咁嘅緊急關頭教練梗係蛇咬都唔會放你走啦大佬,結果有人咪夾住對腳,「太監游蛙式」咁囉,真係比佢激死!

IMG-20140802-WA0008

 

由於有玩具嘅關係,我地個帳蓬長期都好似托兒所咁坐左幾個細路喺度。無論係家長或教練,搵親6至8歲嘅都會先黎我度搵。其實我應該收錢……

 

IMG-20140607-WA0022

我最開心就係有人帶狗黎,咁我就有娛樂啦。

IMG-20140721-WA0011

準備紋精忠報國 looking-smirk

1403976747283

以前會自己整野食帶去,但而家覺得好麻煩,一來凍晒唔好食,二來無時間準備,喺現場買,熱辣辣重好。

 

IMG-20140709-WA0047

香港返黎第二日就有比賽,禧爸比時差打倒,訓到隻野咁。有太陽訓到太陽落山。looking-shocked

1403989881812

 

教練比每個隊員嘅卡 ,算係咁啦係咪先!

IMG-20140625-WA0000

三場個人加兩場接力,而家囂啦,要寫eat my bubble 叫人食佢啲泡喎。

1403989797176

除左姣屎凳篤,我再諗唔到其他形容詞啦。cyclopse

IMG-20140803-WA0007 copy

夏季最後一場比賽終於收工

1403979235931

喺訓練佢嘅同時,其實我都被訓練緊。我要學「面對、接受、放下」。面對佢比賽落敗;接受佢能力有限;放下輸贏得失。池邊人生百態,父母打氣打到現青筋,上水鬧仔女點解唔游好啲,輸贏得失太誘惑。舊年,我曾經都會覺得口水禧無盡力游,人地比賽博老命,佢大哥當自己喺渡假酒店休哉游哉慢慢游,有時真係會好慶,雖則未破口大罵,但心裡面都不禁火起。細想之下,與其怪佢,倒不如諗下點樣幫佢,於是搵教練每個禮拜私人同佢上一兩堂,執好佢啲手勢,我同禧爸係負責在旁鼓勵嘅角色,游得好唔好,贏唔贏都只講鼓勵嘅說話,其他嘅廢話唔洗講。我覺得養細路就係咁樣,窮或富都唔重要,最緊要有愛。in-love

禧媽

28 Comments

  1. “我同禧爸係負責在旁鼓勵嘅角色,游得好唔好,贏唔贏都只講鼓勵嘅說話,其他嘅廢話唔洗講。”

    最近因為小朋友考試在即, 好大壓力,好沮喪,好迷失, 成日發脾氣鬧人…. 今朝睇完你呢篇BLOG, 特別係以上quote呢句, 叮一聲睇開左^^ 明明係人人都知既道理, 但當局者迷, 好多謝你呀!

    • 唔洗多謝我,係你自己諗通左啫! :yes: 其實我間唔中都會失常架,做父母壓力真係唔細,偶爾失常都係人之常情丫。最緊要快啲清醒理智返就無野架啦!乜野都係次要,父母同仔女關係親密先係最重要丫嘛。 ;-)

  2. 禧禧真係好靚仔~禧媽你電左髮都好靚呀
    我細佬細細個都係hk游開泳隊, 宜家大個左
    真係睇得出佢同其他男仔唔同, 其他男仔好多都掛住玩,打機咁
    但做開運動既人真係健康d, outgoing d~對佢成長學習都有好長遠既影響
    仲會令到佢既身型好好睇,將來口水禧就變型仔禧啦~

    • 多謝你!咁大頂高帽照頭笠! :good:
      睇完你細佬嘅實例,真係蛇咬都唔比口水禧離開泳隊呀! :good: :good: :good:

  3. 一直都係潜水員,
    But想問下今年個給禧兒書個卜係邊呀?(唔好側側膊喎)
    禧禧真係大個仔啦,你同熾哥就快重獲自由啦! :yahoo:

    • 給禧兒書VII……errrrr :whistle: (不如夾埋VIII一齊寫啦,而家補寫好似怪怪地咁喎……)
      我一路都等緊「出策」架,應該重要等多幾年啩! :unsure:

  4. 游水除左係基本求生技能,亦可以訓練小朋友意志力!! 不過唔知點解我覺得D 美國
    泳池D 水真係冰水甘凍! 隱若記得D池水都幾暖!
    Natto 都學緊游水BB班,主要想佢郁動多d,可能食得好d! 佢學左差不多一個月,
    仍然好蛇gwa! 不過已經由喊住唔落水變到而家肯響吹吹水,間唔時濕下個頭! 佢
    游暖水池都可以由上落震到落堂!好難想像佢可以游凍水!
    口水禧學幾耐先學識自己游架? 加油呀!!贏多幾場!!

    • 係?啲水好凍?我又未試過喎,我淨係覺得上水嗰下凍到震,就算氣溫有華氏100度,上水都要即刻曬住太陽先掂。
      好快呀仔就可以夠膽潛水架啦,到時佢上堂嗰陣,如果係幾個一齊上堂,企喺水入面個台嗰幾件重會襯教練教緊人嗰陣,嗰班企喺度嘅自己會潛個頭落水添,到時你要睇緊啲佢,雖則池邊都有職員會幫手睇。我仔而家都重會怕落水凍一凍嗰下,不過要練水,教練望住佢無計架咋,同埋開始知瘀皮啦嘛,蛇咬都要頂住扮無野啦。
      口水禧係盆沖涼嘅時候,我已經成日偷襲佢將水照頭淋佢架啦,所以佢去學游水嗰陣已經唔怕水,由正式學到自己游,大約都要幾個月,因為嗰陣係group lesson,每星期得半粒鐘,重要四個小朋友share,所以真正游嘅時間唔多。如果你想呀仔快啲學識,可以試下揀兩個小朋友嘅group,甚至係一個人上嘅,咁個先生就可以多啲時間教佢。其實佢一唔驚潛個頭落水之後,如果佢有興趣游嘅話,你已經可以送佢去泳隊,例如下年春季咁樣。你可以上網搵下屋企附近嘅泳隊,睇下佢地係幾時招生,佢地收左啲小朋友就會即刻教佢地游自由式,跟住再逐個逐個式咁教,一個星期要游幾日 (3-4日),好快就學識架啦。 ;-)

  5. 禧媽, 睇你的BLOG除左文筆幽默之外, 仲好有啓發性, 我都做左人呀媽, 教仔真係教埋自己點做人, 真係學海無崖, 香港而家嘅家長心態真係好受壓, 我都唔想自己變怪獸, 個仔變高分低能。我相信能夠培養佢嘅人格, 堅強, 樂觀唔怕失敗, 絶對比一疊優秀嘅成績表更終身受用。共勉之

    • 多謝你!
      其實去到邊度都好,做父母嘅就好大壓力架啦,做負責任嘅父母就更甚啦。唯有盡力培養啲仔女堅強同唔怕失敗,將來等佢地自己都做人父母嗰陣起碼都有足夠嘅力量去教育佢自己嘅小朋友。人生好多野真係要講際遇,盡左力但都唔得嘅話其實真係唔係世界末日,無人會永遠失敗或者永遠成功嘅,永遠進步,今日嘅自己贏尋日嘅自己先最有用丫嘛,係咪? ;-)

  6. 禧媽, 你上水拿? 之前個WEB SITE 入極都無野睇, 以為我同你會失散呀!
    無見咁耐, 禧禧又大個咗.. 同靚仔咗~ 你又後生咗~~ 你不要不寫BLOG 呀,
    你寫野太好睇了~~!!
    我睇咗你幾年, 大仔都4 歲半, 我好記得我坐月睇你個BLOG 架~~ 哈哈~~~

    • 個blog係特登閂左嘅,因為費事長期脫期咁款丫嘛……其實係諗多左啦我,鬼理我脫唔脫期咩,脫衣都無人理啦! B-)
      多謝你睇左咁多年,真係好感動!哇,大仔四歲半,咁即係重有個細架啦?勁!堅! :good:

  7. 細路有無做開運動,真係差好遠,尤其係住喺美國。不過我發現亞洲移民多數只係俾小朋友玩個人運動(例如男仔就打網球,女仔就學溜冰),個個一式一樣都係為咗個人個porfolio好睇啲,極少玩美國小朋友玩嘅團體運動(如棒球、足球、美式足球),其實團體運動對人格心智訓練先最好。到口水禧再大啲,你都考慮吓。

    我兩個女就係人版,大女無乜運動,膽小乜都怕、容易放棄投訴、無毅力、朋友唔多。細女小中學都係運動狂,一直田徑籃球校隊,付出非常非常多時間練習比賽,家長都付出非常多時間同金錢。依家兩個都大學畢業出嚟做嘢無乜運動喇,但係細女從小到大獨立性強好多,非常堅韌,捱得苦,有自信、自我解決問題能力高,呢啲優點都會成日跟住佢。

    • 佢今年終於’夠稱’參加waterpolo 啦,不過唔係正識嗰種住,只係比啲6-12 歲嘅細路試下先嗰種。 唔知條友頂唔頂得順呀,因為要打到11 月底(嗰陣凍到爆炸!), 真係要睇佢嘅造化啦,哈哈!
      係呀,我都覺得有運動嘅細路成長左之後啲思維都唔同啲,佢地比較積極同樂觀啲,做野有毅力啲無咁易放棄。
      有時唔係人人都係讀書嘅材料,揾多樣野發展下,或者第時就係靠呢樣野食餬! :-) :yes:

  8. 其實小朋友可以參加泳隊, 家長都要好有毅力, 又要有時間天天接送練水, 又要大熱天時曬到憹去做義工, 等比賽時呆居居……being a swim mom is not easy at all. My son is five years old. He have been taking swimming lessons since he was 1.5 years old. I am thinking of taking him to swim team, but they need to practise 4 days a week right after school. And I need to work, its so rush to drive here and there. And the volunteer thing, Oh god, it’s a lot of work. But I really like swimming and my son loves it too. Hope I am a stay home mom and can do all of these activities!

    • 你嘅工作容唔容許你返早啲放早啲? 即係返7:30, 放3:30咁樣? 又或者喺泳隊揾個同你住得近嘅家長,請佢幫你接埋呀仔去練水,然後練完就你負責接埋佢嘅小朋友送佢返屋企,一個負責接,一個負責送;通常weekday 嘅比賽都喺5點幾先開始,游到夜晚8點幾9點左右;weekend 就多數朝8到中午2點左右,除左啲大型少少嘅swim meet 就可能要大半日,朝頭早到下晝4-5 點。 睇你泳隊要求啦,多數都係每個家庭一季做20 幾個鐘嘅義工,每個比賽大約做2-4 個鐘左右。係真係好多comittment, 不過如果呀仔鐘意游的話都值得嘅。 :yes:

  9. 最緊要有愛好緊要!! :good:
    其實禧媽妳可以兼職做插圖配文字之類既野,一定大受歡迎~ :mail: ;-)

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)