23

Happy (Chinese)New Year!

真係無得再離譜架啦我,下面所有斜體字嘅內容由2015嘅1月寫~~~~~~~~~到家陣都重係攝喺「草稿」嗰欄度封塵,唔知我夠「資格」入健力士未?梗係啦梗係啦,我知,我唔係入啲咩勁野紀錄嗰欄,我係入「懶」嗰欄丫嘛。收到。好啦,愛好研究「歷史」科嘅朋友,下面好多「咸豐年」嘅野比你睇呀!(睇下,連上面個標題都由happy new year 變左Happy Chinese New Year 就知我嘅成就啦!

唔知啱啱2015左嘅第幾日我打過下面一堆字……(《《《連呢句都變埋歷史嘅一部份!)

~~~~~~~~~~~~耐無見。(作屎呀….xyz@^##$^&@#^(@&^~!!!!!下刪一萬字兼我自丙,ok?surprised

自揮九萬幾拳之後爬返返黎……同大家拜年 ☜飲大左?未拜年住,但祝各位新年快樂,身體健康!(大家咁話啦!)

2015身體健康好重要呀,尤其係我地嘅兩個女喳lift人。啱啱過左去嘅十月,靜雞雞「宣佈」 – 有三個外星人落左黎地球嘅香港探親。正所謂「俏俏的我走了,正如我俏俏的來。我揮一揮衣袖,就黎比人打到七彩!」點解會比人打呢?如果我重有朋友睇呢個blog而我又無喺香港同你見過面嘅話,家陣見到我話返過黎香港呢件事後,係咪好想打穫我呢?silly

IMG_9439

 

真係無誇張,我地兩個女揸lift人喺2014年裡面唔知係咪約定左一場比賽,睇下邊個入得最多醫院,影呢張相嘅個幾兩個星期前佢地先相繼入完院再出院,到我地而家返左黎幾個月啦,中間都入左幾次啦,賽事鬥得非常激烈,簡直係叮噹馬頭,難分勝負!佢兩個堪稱係我目前識嘅人裡面幫襯得香港醫療服務最多嘅人,唔知重以為佢地加入左啲咩秘密組織,專責考察香港嘅醫療體系!禧婆婆已經熟手到可以自己搭車去醫院然後自己上房換衫,就黎可以考牌自己做埋醫生……隔離嗰個助手都得啦。

無啦,總之返黎係為左幫手照顧家人嘅任務而已,真係唔係為享樂。連口水禧返緊學都要同佢向學校請假,重要咁啱撞啱嗰個「對出席率極度痴迷嘅」校長企喺度聽住我要幫個仔請3個幾禮拜假,校長頓時望住我嘅眼神仿彿好似我要同佢「踱」一百幾廿個過大海翻身咁款!

再寫呢篇野之時已經係一月底啦。真係服左自己。人所皆知我嘅中年痴呆日益嚴重,所以經已將想講嘅野忘記得八八九九啦。只好諗起咩就寫咩啦。

IMG_9462

 

(深呼吸!)……係咪好想中佢呢!「好好地影張合照」對佢黎講真係有難度!不過就算唔用個枕頭,佢都總會整埋啲九唔搭八嘅表情,所以睇呢個樣可能重好啲添。今次返去香港,因為主要都係照顧呀婆,所以多數都無乜點去邊度玩,日日都係屋企附近嘅商場食下野行下街。不過對於人山人海嘅場面,我其實已經招架唔住,出過一次銅鑼灣食飯,一出地鐵站嗰一刻已經好想返屋企。鄉下婆出城係咁架啦。

IMG_9461點解後面幅畫會有啲蜘蛛絲架呢?事緣我地2014年嘅萬聖節係喺香港渡過嘅,於是喺美國返香港前,我地已經計劃好要佈置下呀公呀婆間屋,等佢地感受下萬聖節嘅氣氛(實情係有兩個屎忽鬼羅友痕……)。於是當日不單止係幅畫,我地連部電視都包滿蜘蛛絲,周屋都係蜘蛛呀、枯顱骨呀、寫住”caution”嘅彩帶呀之類,但勢估唔到呀婆連包住蜘蛛絲嘅電視都可以照睇,我真係服左佢!

至於攞糖嗰部份就梗係無啦,香港唔興丫嘛,口水禧帶埋件戰衣去香港,不過我已經記唔起佢萬聖節嗰日有無著過件野啦。無所謂啦,反正佢都得閒戚起條筋就會自己攞黎著,理得佢萬聖節定係重陽節,佢隨時都可以變身超人拯救地球,打救佢呀媽!咩?我無講粗口呀!無呀真係!

20140825_171519

佢話呢個造型係太空人喎。

IMG_9376呢次去香港,呢條友總共食左超過三十件馬拉糕!重顛到晚市都問人有無馬拉糕,呀婆重顛,真係想叫餐廳特登為佢個寶貝孫蒸籠馬拉糕出黎,救命!點心師傅收左工九世啦兩位!唉!比下面,正常少少好唔好!

講起正常呢兩個字,我突然諗起有日同口水禧喺巴士站等緊巴士嘅時候,排喺我身後有個呀嬸突然指住口水禧個頭同我講:「乜佢啲頭髮咁長架?成個女仔咁!」我答佢話我地喺外地返黎嘅,嗰邊好多細路都係咁嘅髮型架。點知個呀嬸繼續講:「車!人地係咁嘅頭就要跟架咩?鬼仔同中國人唔同丫嘛!呢!好似嗰個明星個仔咁,留咁長頭髮,成個人妖咁!剪短佢丫嘛,呢!而家啲韓星好興嘅嗰種髮型呢,短得黎又好睇!」我覺得佢真係好無禮貌呀,第一,男仔長頭髮唔一定係人妖;第二,我仔個頭喺佢條頸上面,要留咩髮型連我都管唔到啦,其他人講咩屁呀!我完全無咁好氣同佢研究韓星個頭呀,妖!求鬼其應佢兩句就算。呢個世界就係有好多人硬係要管埋人地嘅事,真係得閒得滯!

IMG_9746因為返香港,所以我先知道原來向學校申請自修 (independence study)攞到盡都只可以係20日,多過呢個數嘅話,我估係要向教育局特別申請,比足理由先得。自修同請假嘅分別就係前者唔影響政府向學校嘅撥款資助學生嘅教育費用而後者係會攪到學校收少左錢嘅。對於我地學校個校長黎講,當然係兩者佢都唔like啦,攞少一日錢同返少一日學攪到影響學生進度都係校長個死穴,最好就唔好篤得佢咁行啦,成日篤人個死穴,口水禧黎緊呢幾年就無運行啦。

正所謂「出得黎行,預左要還」,咁「話左自修,日日無休」,係咪先?何解咁講呢?事關自修呢家野唔係浪得虛名,20日之後,個仔返到學校就要即刻跟上其他同學嘅進度,無錯,係即刻。好似美源髮彩嘅「立即變黑」咁樣,絕對唔可以「逐漸變黑」個隻呀。所以臨行前,老師好開心咁掉左一大堆功課同書比我,講明第一日返返學就要交,起碼要交一半。(外國嘅教育果然係寬鬆!)

由幼稚園請病假收學校警告信到申請自修20日比校長怒啤,我永遠都好明顯咁比返個訊息呀校長~~~~(李小龍經典豎起食指,個頭35度少少打側顎高,瞪大對眼,嘴邈邈咁嘅樣啤返校長):「我地唔係東亞病夫,啲功課我地唔要交一半,我地要交晒!」<<< 當然無真係咁樣同校長講啦,心諗啫。因為以本人同校長嘅高度,要啤到校長塊面,我個頭要顎高至少180度先勉強對到佢對眼,正常人呢個情況下,條頸應該會斷左先做到。

就係咁,喺香港每日都要睇住口水禧做功課,我地預先計好晒每日要做幾多頁,電腦功課做幾多時間,加埋閱讀時間,重忙過係美國嘅生活。係美國,口水禧每日返黎做功課都好神速咁完成,皆因堂課嗰啲由老師啃晒。原來當我要啃埋堂課家課之時,真係比條友激活又殺死唔少細胞,個人肥左又瘦左,殘左又靚左,半邊人半邊野獸!

IMG_9570

二年班嘅生涯一轉眼就過左一個學期啦。今年好「不幸」又同返好多幼稚園嗰陣嘅同學一班,即係又無乜人去學校幫手囉。雖然我唔係room mom,但個room mom 有野要搵人幫手嘅時候總會諗起我呢個其中一個鐵腳嘅,所以呢個亦係個blog封晒塵嘅其中一個原因。唉!衰野唔再講啦。

暫時口水禧嘅成績都算幾好,無乜煩腦比我。基本上佢都會自動波做功課嘅,係有時要同佢拉鋸下幾時做電腦上嘅數學功課。其實我覺得有時啲功課都幾重疊下,比著係我都唔想做啦。學校做一大堆,返屋企又做一樣嘅野。倒不如比佢地多啲時間睇下書,搵下自己有興趣嘅野發展下重好啦。

2014-12-30_20_17_57

最近因為睇左一本叫Captain Underpants嘅書之後開始迷上畫漫畫,開頭係跟住人地本野照抄,後來就識得自己創作。除左畫漫畫之外,口水禧鍾意寫野,佢會自己寫個簡短嘅故仔,中間會加啲插圖,整好之後佢就會帶返去學校比佢個老師睇,所以家長日嗰日佢個老師問我口水禧係咪好鍾意睇書,因為佢發現口水禧識得寫啲好長嘅句子,重識用” ” 呢啲符號,啲插圖重有擬聲詞添。所以話睇書對小朋友係好重要架,好多知識都係喺書本入面學嘅。呢期條友鍾意睇超人,蝙蝮俠同埋關於狼狗嘅書。通常帶佢去圖書館,佢自己會去攞自己鍾意睇嘅書,一借就借十本八本。曾幾何時,我會覺幫佢揀書,但後來發覺我揀嗰啲佢未必有興趣睇,咁不如有得佢自己借佢鍾意嘅書重好啦,咩書都好啦,佢有興趣睇嘅話,點都會學到野嘅。就算唔係學野,當係培養閱讀嘅興趣都好丫。

IMG_9794

今年聖誕前嘅時段不停落雨,攪到我地想攞假野聖誕樹出黎洗下啲塵先擺入屋都唔得。結果唯有買真嘅聖誕樹黎擺下。揀左一棵好大棵嘅,搬到隻野咁!但真嘅聖誕樹擺喺屋企確係好香,不過啲樹葉就真係跌得好勁!以我呢啲見到地下有粒塵都周身唔自在嘅人黎講真係無時無刻都想搵吸塵機去吸!結果擺到過左口水禧生日,我就頂唔順搬返棵野去路邊等垃圾車黎收啦。下年睇下咩天氣啦,如果好似今年咁樣係咁落雨,就唯有幫襯泳隊買真聖誕樹啦。

2014-12-21_16_30_23

 

2014-12-21_08_07_18今年聖誕前幾日,我地上左雪山踎左幾日民宿。我學左兩日滑雪之後就決定以後都係留返啲錢比口水禧學好過。我應該係已經過左學呢啲刺激野嘅年紀啦。今年學左兩日,第一日因為錯鞋嘅關係,腳痛到乜都學唔到,第二日搵返對啱我腳形嘅鞋,但始終因為以前去溜冰P過K,仆到尾龍骨都裂埋,自嗰次之後,對於好「羨」嘅地面有陰影,完全處於失控嘅狀態,我決定以後都順其自然啦,”sir”到就玩下,唔得嘅咪唔玩囉。搵間咖啡室坐下睇下書都好啱我,無謂一把年紀仆多鑊甘,有排都唔好返就大件事啦。上次仆嗰次已經係廿幾年前嘅事,嗰陣都要幾個禮拜嘅時間先好返,而家間唔時都會突然痛到行唔到,40歲再跌,我驚到80歲都未好返呀!

2014-12-21_12_32_16聖誕係呢度其中一個好大嘅節日,尤其係正日,啲滑雪場超多人,餐廳完全訂唔到位!前幾年試過撞正多人到爆嘅時間去,滑唔到雪不特止,重容易發生意外。所以今次我地決定平安夜前幾日就上去住幾日玩下,平安夜之前就返屋企,唔同人地迫啦。

我地揀嘅嗰間民宿勁正,又乾淨又靜重佈置得好靚添。兩間房,一個細廳仔,一個洗手間,屋主雖然住喺樓上,但完全唔會落黎打攪我地。住咁多日大家都無見過面,而價錢只係酒店嘅一半,無野好講啦啩!
2014-12-24_19_00_45

 

(2月25號繼續寫)就喺大家都趕住衝上山過聖誕之際,我地三條怪誕就係平安夜之前一日落山返屋企。平安夜嗰兩件男士食牛扒當晚餐;我就……唔牛唔豬,淨返雞肉同海鮮比自己揀。無錯,豬肉都唔食啦家陣(我指我自己咋,我無虐待嗰兩「兄弟」架!)。如常食完晚餐同生果之後,我地就要踢禧哥去瞓,因為有個大行動要做,條友喺度嘅話,我地邊度進行到丫!唔好諗邪野啦,我地嘅大行動好有意義架!2014-12-24_19_01_15

2014-12-24_21_58_45

究竟發生咩事呢?點解啲麥皮會倒瀉晒喺客廳張coffee table (喂,呢件野中文叫咩?突然諗唔起添!)個答案就係昆人昆到底,唔佈置下個場境,好難入戲架嘛大佬!

 

 

 

 

 

 

 

 

 2014-12-24_21_57_27

我地呢啲製作認真,昆人都要昆得有血汗!本來想用火爐裡面啲灰印聖誕鹿同聖誕老人嘅腳印,點知原來唔上色架喎,正當唔知點算好嘅時候,我內心一個邪念就飄出黎:「係玩就玩大佢啦!洗C咩!」就係咁,有個茂利把心一橫,一手執起爐裡面嘅灰,忍痛灑落乾乾淨淨嘅地板上,越灑越落力,場面震撼!下?碎料?哈,我開頭都係咁諗,到第二日要吸塵嗰陣就好後悔自己嘅一時衝動!不停咁諗,究竟前一晚係咪飲大左,點解同自己咁過唔去呢!唉!

2014-12-26_19_44_31

 

何解要咁認真製造疑似聖誕老人黎過嘅痕跡呢?無他嘅,有見某人都已經八歲人啦,其實唔呃得佢幾耐架啦,趁佢重有呢份童真,重覺得世界上係有聖誕老人同聖誕鹿呢回事,就繼續比個美好嘅童年回憶佢啦。佢完全無懷疑過聖誕老人重肥過佢呀媽,我地屋企個火爐位咁細,莫講話聖誕老人啦,連mimi都入唔到個窿啦大佬!奈何,小朋友就係相信有聖誕老人,口水禧重覺得聖誕老人臨近聖誕嗰排會check住佢睇下佢乖唔乖先送禮物,所以嗰排撻聖誕老人嘅朵果然令我地一眾嘅呀媽過左一段好日子,唔洗日日做潑婦。

結果聖誕嗰日,口水禧一起身就一支箭咁飆出去客廳,當佢見到地下嘅灰同檯上倒瀉左嘅麥皮,佢非常興奮地大叫:「媽媽,聖誕老人同聖誕鹿真係有黎呀!你睇下!」喺嗰一刻,我梗係要入戲啦,雖然自己知道禧爸咪係聖誕老人,而我就係嗰隻鹿囉!但都要扮驚訝,重要加啲嬲添,因為平時咁緊張個地板有無塵嘅呀媽,喺見到一地灰塵嘅時候唔發火確係唔合情理架嘛,於是點都要爆兩句:「攪錯呀!整污糟晒個地下!」而嗰個比我地昆到入晒局嘅口水禧當然察覺唔到面前嘅呀媽原來係咁好戲啦。

每年呢封扮聖誕老人寫比口水禧嘅信裡頭都寫左我地對佢嘅讚美說話,更唔少得嘅更梗係對佢來年嘅要求啦。正所謂我講一百次都唔及聖誕老人半句都唔洗講,齋用聖誕禮物就可以KO佢。當然,做到幾多樣野,除左要靠佢自己之外,老豆呀媽平時喺旁邊嘅鞭策又點少得呀!功課上佢自己可以攪掂,而家主要係睇實佢嘅品格同生活習慣嘅訓練,例如講野有無禮貌呀、有無望住人講野、打乞癡同咳要遮住個口、喺街或搭電梯唔好攝人位、個人衛生等等。非常老實咁講,呢啲野口水禧可以話係未完全掌握到,雖然由細教到而家,但佢都重係無時無刻要我地提佢先記得。書有講呢個年紀嘅男仔確係大頭蝦又不修邊幅,真係提少陣都唔得。無計啦,我啲「天哦功」一直都係年中無休架啦,鬼叫我係佢呀媽咩!

2015-01-01_16_04_26

呢排有一件令我既興奮但又有啲感慨嘅事發生左,令我突然多左個領會。無乜野嘅,有經驗嘅人士,睇完應該會明白我講緊乜野。

事緣係有日,我同口水禧講,如果佢中午喺學校想食牛肉麵,咁我就朝早唔同佢帶午餐住,到佢放午餐時,我喺屋企整熱左啲牛肉麵就會帶去學校同佢一齊食午餐。記得佢一年班嘅時候成日叫我去學校陪佢食午餐。點知嗰日,佢聽完我講之後,佢話:「呀,你唔洗同我食啦,你攞比我就得架啦。」我問佢點解,佢話:「我同同學食得啦。」嗰一刻我簡直無辦法用任何字去形容我有一半為左我期待已久嘅自由已離我唔遠而興奮;但同時又驚嘆從前癡住我嘅仔會有一日叫我唔洗去陪佢食飯,佢要同朋友食。又興奮又驚嘆,兩種極端嘅情緒撞到bang bang 聲,幾乎內分泌失調!

曾經,我有擔心過我同禧爸喺度無乜有同齡小朋友嘅朋友,口水禧平時都無乜點同學校以外嘅小朋友有互動。有時難免會驚佢唔識同其他小朋友相處,第時變左孤獨精就大穫。但經過呢兩年嘅觀察,其實佢鬼咁多野講,一見到佢啲同學又好,泳隊嘅隊員又好,連打功夫嗰邊嘅大朋友小朋友,口水禧都傾到停唔到口,有次去佢課室做野,條友重可以傾到同隔離嗰行嘅同學隔住條巷都照傾,真係服左佢!於是我開始覺得與其驚佢無朋友,不如珍惜下佢而家重肯同我地出街或去旅行重緊要,因為我知道佢好快就會飛甩我地兩老,有佢自己嘅天地啦。

所以而家一放長週末,我地就會搵地方去下小旅行,長假期就去遠少少。八歲嘅小朋友會好需要霸佔媽媽,呢個歲數對母子將來嘅關係,與及對口水禧將來同其他人相處兼待人接物都好重要。一句講晒,呢個年紀如果媽媽同小朋友嘅關係良好嘅話,小朋友大個就比較少人際關係嘅問題。所以揭盡所能,蛇咬都要誓保呢年同口水禧兩母子之間嘅和諧,為佢邁向開始自立嘅九歲做好準備。就係咁,口水禧隨時過黎想媽媽攬下佢,我梗要配合;佢想我聽佢讀故事,睇佢寫嘅故事或漫畫,除左爆緊石或沖緊涼之外,所有事都要放低理左佢先。淨返嘅時間,家務、同屋企講電話、呢樣嗰樣,blog方面就……哈哈!

blog成日脫期,facebook無乜更新。之前重開呢個blog時講過啦,唔好喺facebook “friend request”我啦,我唔更新架,真係無野睇架嗰度。但我講過我會搵到一個好地方,又唔洗好多時間,但相又最新鮮之餘,大家又有私隱咁同我有互動架嘛,講得出就做得到,而家有計啦……

最近有人公司整左個新電話app,叫做wrapLive,簡單黎講就等同instagram或facebook。但呢個app 唔係所有人會睇到我嘅相,只有我加左佢喺我個列表裡面嘅人先可以睇到相兼留言。我喺wrapLive裡面有一個Life in SF 嘅相簿,裡面嘅相係可以比blog友們睇嘅,當然其他有啲相簿因為夾雜其他家人或朋友,而佢地唔想公開啲相嘅話,個相簿就只會係我同家人或朋友之間先可以睇。

我下一個blog會再講多啲wrapLive 究竟點用同點download同登記。家陣最緊要嘅係……

如果你信得過我嘅話,就將你嘅手提電話號碼email比我,因為個app加人係要用手機號碼黎加嘅。而個相簿人物列表中只會顯示你電話號碼嘅後面四個號碼。前面嗰四個號碼除左我,唔會有人見到嘅。

點解我係可信架呢?

  1. 我無閒錢打長途電話去叫你半夜起身屙尿。
  2. 我無閒錢買好貴嘅吸塵機,叫人黎試野再出賣你個電話號碼。
  3. 就算我真係出賣你個號碼,我唔信有美國嘅sales會打長途電話比你sell野。
  4. 我無時間打長途電話去香港騷擾你,迫你同我傾心事。我一日只傾到一個電話,而嗰個quota長期都係我呀媽用左。
  5. 就算我喺香港,我都唔會做以上#2同#4嘅事,你睇我返親黎連朋友都無見幾個就走,就知道我喺咁有限嘅時間裡面真係做唔到試吸塵機同傾心事呢啲事啦。

OK,一句講晒,信就比,唔信嘅唔好比。

喂,我無話唔寫blog呀,不過脫期之嘛。

Screenshot_2015-02-25-23-05-48

 

 

幾乎唔記得最重要嘅野:

lizalch@gmail.com

禧媽

23 Comments

  1. 衰婆呀…乜野WRAPLIVE?? 又要D/L APPS?? 我洗唔洗再比電話號碼你喞!?
    BTW,你究竟收唔收到我1月SEND 既FB MSG???

  2. 禧媽!自從無左YAHOO BLOG後就甩左你地一家O既BLOG, 偶然O係FB見到呔媽個PAGE貼LINK先知你仲有寫BLOG, 口水禧都變成一個青少年喇, 睇左一陣有樣野8卦想問下, 佢個老婆掉左未呀?

  3. 依家仲會黐住你,第二日展翅高飛嘅時候,再見都懶得同你講,好好珍惜依家的一分一秒喇!

  4. Hei ma, I just emailed you my phone number,
    looking forward to hear from you :)

  5. 新年快乐啊禧妈,美国的朋友仔电话可不可以send 比你啊

  6. 新年快樂!! 祝你一家身體健康, 永遠都咁幸福快樂!! 各位長老亦要身體健康啊!!
    我會SEND我電話比你呀, 好想繼續睇你寫既野, 因為我好BUY你湊仔既方式, 希望我可以繼續KEEP到唔好做怪獸家長啦.
    如果你打長途比我一定開心死, 哈哈!!

  7. 新年怏樂呀!!! 祝大家身體健康!!
    我都EMAIL左我電話號碼俾你啦,..,等你呀!!!!
    :heart:

  8. 禧媽!勁呀!你蒲頭所以我即刻追咗以上嘅blog!!! I just emailed my phone number to you!!! happy Chinese New Year to you and your families, wish you good health and happiness daily :)

  9. 祝福你們身體健康!
    已經email了電話給你 唔好漏左我呀 ;-)

  10. wah…..long long time no c ar hey ma!!口水禧靚仔到dup一聲,大個左好多呀

  11. 你要加返,除左吸塵機, 仲有洗床褥sales……..我部電話memory 爆哂,DL 唔到APPS了, 等轉部新機再比你ADD我 喇~ 祝你身體健康

Leave a Reply to Salina Cheng Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)