49

新一頁

Big Boss呀~~~~新屋確係好,鍾意加乜減乜都得,最緊要係有野唔work嗰陣可以即柄個管理員,唔洗好似以前yahoo咁鬧完都係要繼續忍。(係嘅,我唔應該太囂,咁樣會比人笠麻包袋拉入厠所打架喎!Hit with Ball

估唔到未開張已經有blog友黎左,實不相瞞,前面嗰幾篇blog只係作實驗用途,當呢度完全運作嘅時候,嗰幾篇「白老鼠」係會~~~~~消失….. 睇唔到啲字,無錯,嗰幾隻白老鼠咪就會好似啲顏色咁唔會比你睇到囉。所以啲留言都會……在心中 (搥心口)。

 

好啦,請返個主角出黎先。

 

八月底就已經開左學嘅口水禧,上小一之後好多野都同幼稚園嘅生活好唔同。除左老師同學之外,就連上堂放學時間都比以前長左。以前只返3.5粒鐘,家陣返全日,要喺學校食午飯。正所謂佢有個新開始時,我何嘗唔係呢?每日多左幾粒鐘洗嘅我,間屋再度會復正常運作,我重有時間去跑下步添!成個暑假無跑,磅數回升係好自然嘅事,一定要喺未返返去家鄉個數前減返落黎,或者至少都唔好比佢再惡化丫!A~~~講講下又講左我架呢點解?

 

上星期去左學校嘅Back to school night,私校唔清楚,但我呢頭嘅公立學校都會喺開左學之後嘅幾個禮拜攪個咁嘅環節黎招呼下我地呢啲怪獸家長。點解會係開左學先攪而唔係開學前攪呢?我估個目的係想等所有野都投入運作之後,等家長黎到學校時可以睇到佢哋個寶貝仔/女喺學校做左乜野啩。例如每日課堂教左咩做左咩,老師教學嘅「風格」等等。最重要梗係比校長向新黎嘅家長炫耀下學校喺成個郡嘅成績,同埋佢最鍾意嘅出席率啦。

 

繼上年嘅ipad大行動之後,今年電車男校長又引入左啲新科技黎學校,例如咩smart board。如果我無聽錯,呢個野係老師平時教野嗰陣揸喺手上寫,然後佢寫乜,課室個白板就會見到乜,咁樣方便個老師可以喺課室四圍行住教書,唔洗一定要企定定喺白板前,明顯呢樣野係針對嗰啲坐得離開老師比較遠嘅學生,等佢哋無得襯老師睇唔到自己而喺課室為所欲為,即你唔洗旨意上堂瞓覺,畫公仔,傳紙仔,睇漫畫等等,個老師隨時都可以企喺你隔離一邊教書一邊住你。(好!呢招「含笑半步釘」果然夠陰毒!Yeah... Sure)重有另外一招「一日陷包散」都唔弱雞,就係每個學生派一個好似而家啲智能手機咁嘅機仔,比佢地用黎選答案嘅。呢招係用黎對付sorry,校長嘅意思係幫助啲唔(敢)舉手答問題或鍾意填六合彩嘅同學用,等老師知道大家嘅進度,啲「蛙人」上水或將「隱形俠」現返形嘅。你話校長呢兩招係咪「攞你命3000」呢?(唔知我講緊咩含笑半步釘或一日陷包散同攞你命3000嘅朋友絕對唔洗擔心自己係咪脫左節,因為我講緊我個年代嘅戲,對你哋黎講可能係粵語長片)總之就係一句講晒,校長確係為保學校嘅「貞節牌方」真係乜野招數都洗出,要傳達嘅訊息好呼之欲出啦,咪就係你唔洗旨意黎hea囉!Furious

 

講返犬兒嘅一年班生涯將會係好精彩嘅一年,淨係嗰日去到聽佢班主任講今年要學乜野,每個禮拜要做乜野,資料多到以我呢個中年痴呆嘅腦袋就已經唔記得左一大半啦!(咁都得?係呀,我得架!問你怕未?我都服左我自己!Big Smile)呢度嘅課程同香港真係好大分別,首先最唔同嘅係大部分嘅科目都係由班主任教返,除左體育、音樂、美術有另外嘅老師或家長義工教(有啲學校係無呢啲科目嘅添!)。幾時教、教乜野、教幾耐都係老師自己決定,我連口水禧星期幾上咩堂嘅時間表都無,完全唔知佢邊日上英文邊日上數學。全靠佢自己放學返黎講架咋,有幾多成係準確嘅就只有佢自己先知啦。每個星期一,老師會派張通告比家長預告下嗰個禮拜學生將會有乜功課做。通常每日都係得一樣,寫嘅字唔會超過30隻。以口水禧嘅能力,若莫10-15分鐘內會做完。抄寫計數嘅功課佢自己攪掂,有啲係閱讀理解嘅功課老師就要求家長同個細路一齊睇左再傾下先做。點解要一齊睇一齊傾?因為嗰份野係無答案嘅,完全靠學生自己嘅想象力、理解力、平時嘅觀察力等等去答問題。近年美國教育更加著重讀寫、科學同數學,所以啲功課都圍繞呢幾方面。

默生字……淺到爆!

學校鼓勵學生睇多啲書,口水禧每個禮拜有個時間會被帶去學校嘅圖書館借書返屋企睇,加埋我哋定時每個幾兩個禮拜都會去圖書館借書,佢個書櫃已經爆咁濟!我非常鍾意睇書,我細個啲作文都幾好架,完全都係因為睇得圖書多學好多生字或句子而成嘅。所以口水禧都識好多字,每個禮拜五老師都會同佢地默生字,基本上佢哋唔洗死記,識讀就識拼。加上老師會將啲字分成使用率較為高嘅字教左先,呢啲字平時周街都會見到,有睇書有聽人講野嘅都無理由會唔識,默起上黎根本無難度。

開學日

開學第一日,喺操場排好隊後,老師叫埋啲家長一齊入課室幫手搵位坐,老師一早就分好啲坐位,不過嗰日佢個助手重放緊假,所以特別准許家長入課室幫下手分野準備上堂。暫時低年班嘅都係一張大檯坐幾個小朋友。每人個位都有個櫃桶擺野,書包要放課室出面,裝飯盒同茶點個袋就擺檯底。我每日都要提口水禧記得閂好個書包,事關我唔想有小強爬入去佢書包,然後佢放學帶個friend返黎屋企投宿!Dribble

我的呀四媽媽

好彩我都唔算肥到爆,勉強重攝得入口水禧同佢隔離個同學中間幫佢哋兩個執好要用嘅文具,同埋將佢哋帶返黎捐比自己班用嘅文具攞出嚟擺喺老師指定嘅位置。隔離個女仔,佢舊年同口水禧一班,見佢阿媽無入黎課室,個女仔唔知自己帶黎嘅文具喺書包入面,攪完口水禧嗰啲,跟手咪幫個妹整埋佢嗰啲囉。呢啲野舊年都做慣左,已經係經驗豐富無有怕!

以發呆狀態開學

一年班開學,老師要做嘅第一件事就係好好收拾呢班習慣無拘無束嘅反斗王!其他班嘅老師係點我唔清楚,但口水禧呢個班主任就開始執行家法去調教啲細路。除左比time out note (老師本「數簿」,將犯錯嘅同學名,犯咩錯集低,然後月結。),聽口水禧講傾計傾得勁嘅同學會被罰企喺班房出面,直至老師叫返佢地入黎為止。

口水禧入過本數簿未?梗係入過啦,佢話係因為掂到同學所以比老師派過time out note喎。每日放學之後,佢就會盡力向我匯報嗰日喺學校發生嘅事,包括邊個入左數簿、邊個出去罰企、邊個比老師讚、邊個做野最快/慢、邊個跌親等等。我同禧爸唔會因為口水禧喺學校做錯野受罰而加以斥責,當然亦唔等如唔理佢啦,教仍然要教,但我哋覺得難得佢自己夠膽返黎講比父母知佢比老師罰嘅話,咁我哋都唔應該勁剷佢一穫,鬧驚左佢,比著我係佢,我下次重敢返黎講咩大佬!一定蛇咬都唔認啦,係咪先!況且既然佢都比老師罰左咯,咁我哋做父母嘅就唔應該再罰多佢一穫,我哋只會再將老師想佢點做嘅事再提醒佢一次,除非佢變本加厲更上一層樓,衰到去校長手上,攪到要校長見家長啦。但我相信我哋平時又唔係唔教仔,個仔無理由會咁唔聽話啩!

有一件事一定要喺度寫低。話說口水禧開學幾日後就開始日日都喊幾次話唔想返學。開頭以為佢唔慣返學返咁耐,第二個星期應該會好啲啩。況且佢每日返黎講學校嘅野都講到眉飛色舞咁,於是我哋無為意特別去處理佢少少嘅哭鬧。直至第二個星期三,嗰日學校放早,但有中年痴呆嘅我唔記得左要早去接放學,我照平日嘅時間,即比平時放學嘅時間早45分鐘去到條街,見條街無乜車先醒「大穫!今日早放喎,賴晒野添!」,其實當時口水禧學校已經放晒學超過30分鐘啦!一條氣跑去學校,鬼影都無乜幾隻,即刻衝去校務處,見口水禧同另外一個舊年幼稚園同班嘅同學都喺度等緊家長接放學,口水禧見到呀媽第一句有啲埋怨咁問:「點解你咁遲嘅?」接左佢返去,佢將同一條問題問左我N次!之後唔肯返學嘅問題更趨嚴重,差唔多係每日好多次喊住哀求點先可以唔返學,明明之前重好地地笑晒講緊嗰日學校做啲咩野,唔夠幾分鐘就突然變瞼喊住話唔想去返學。無論點應承佢我以後逢星期三一定唔會再遲到,set埋手機個提示,佢都仍然係喊喊喊,每日送佢去返學,我同佢老豆好似送佢去機場入閘咁,佢都係標晒眼淚咁無奈地入去學校。問佢係咪做錯野比老師罰,佢話無;問佢係咪比同學蝦,佢又話無,真係R爆頭都諗唔到究竟係咩事呢?

 

細路仔嘅情緒問題如果持續咁耐重越黎越嚴重的話,我覺得係時候去搵佢班主任了解下係咪學校發生左咩事。有一日,比左約見老師嘅紙仔口水禧叫佢交比老師,結果嗰日放學老師請我入去課室傾下。但老師話佢都諗唔到點解口水禧會返屋企喊話唔返學,因為口水禧喺學校無犯過咩嚴重嘅錯,功課無問題,亦都好主動參予課堂上嘅活動,老師問野佢都會舉手答問題,同同學亦都玩得埋丫,除左入過一次數簿就無再比人罰過,照道理無理由會唔肯返學架喎。嗰日老師重爆埋有人曾經喺學校操場玩嘅時候爆左兩次”shit”字,比老師叫過佢唔好再講,但老師話知道佢根本就唔知個字係點解,所以完全無鬧過佢亦無罰佢。喺大家都無頭緒嘅情況下老師話唯有繼續觀察啦。眼見當時口水禧已經驚到喊到變左豬頭,老師攬左佢一野後就放左我哋返屋企。

 

直至當晚,口水禧突然醒起一啲野,佢話:「呀!媽媽,我知道我唔想返學嘅其中一個原因啦!就係呢先生好惡呀,佢嗰日鬧xxx同學嗰陣我嚇到成個人震呀!」我哋即刻問佢咁老師有無咁惡鬧過佢呢?佢話:「無喎。」

 

Confused係咁咋哇?大佬,老師鬧人哋關你咩事呀? 比人鬧嗰個都未震,你震咩呀大哥?唉,真係比佢嚇餐懵!完全未見過大場面呀!舊時我哋嗰啲罰企黑房呀,打手板呀,膠紙封嘴呀,罰抄100次「我以後上課不再xxx」怕且會嚇到口水禧休克都似!唉!

 

不過嗰穫遲左接放學都有份嚇親佢嘅,大家都知佢細時同我分開過一個月之後一路唔敢自己返學,所以童年陰影呢家野真係咪睇小,有時細路唔識表達出黎,唔好就以為件事過左。其實只要一有啲野觸發到佢對以前嘅經歷嘅回憶,所有唔好嘅情緒都會返黎。加上一下子突然要喺學校留咁長時間,確係對大部份時間都同我一齊嘅口水禧黎講真係個考驗黎嘅。

 

克服恐懼呢家野並唔係話講一次兩次就會克服到。總要有啲引誘嘅……

我的戰利品

正所謂邊有貓唔食魚,邊有小朋友唔愛玩具架?拿,呢個係我一直用黎幫口水禧克服困難嘅其中一樣有效方法,唔等如全部人都要效法我咁做。口水禧比較感性,有時要佢好理性咁克服一啲心理障礙係好難嘅事。於是我慣用嘅技兩就係用玩具去轉移佢部份嘅不安情緒,繼而等佢有啲自信心後再慢慢克服個困難。就等如佢preschool嘅時候唔敢自己返學,後來陪左佢咁上下時間後,我哋試下用「如果你可以,我就獎你xxx」嘅方法氹佢試下自己去返學。有左目標,佢會為左要得到而盡力去唔驚,咁細個嘅人,我真係唔知點樣淨係用說話可以鼓勵佢去明白恐懼係咁樣咁樣點樣點樣就可以克服,強迫或夾硬黎都唔會係我用嘅方法,咁我唯有用利誘啦。Sweet Kiss (對老公就梗係……What?! 或Hit with Brick 啦!講笑啫講笑啫!Big Smile 我而家成個blog交喺佢手,唔得罪得佢架!)

我哋答應口水禧如果佢可以返學唔喊同埋唔再話唔返學嘅話,我哋就比佢揀一份玩具。結果好快佢就無再返學喊或同我哋講佢唔想返學嘞。而我哋亦都守我哋嘅承諾,送左呢份佢自己揀嘅mickey mouse club house比佢。買返黎嗰日急不及待自己邊睇說明書邊砌。(雖然份野寫住係比2+嘅人玩…Canny

微笑的母雞

 

乳牛 (PG家長指引)

嗰幾隻雞髮型誨諧,五官明顯過左一次韓國整過容,有兩隻重set左髮型先出場添。我見過好多細路畫嘅野,我覺得最「贊人熱淚」嘅就係畫動物!我以前見過一隻斑馬係連塊面都有斑紋,個樣似比人亂鞭掃射之下打到塊面多左好多紋,獅子老虎完全唔惡,老實啲講句係直頭有啲蠢添!所以建議要留低小朋友第一次畫嘅動物畫,第時心情唔靚,攞啲畫出黎睇下,包你開心返晒!

第一下打開佢本野我嚇左一跳,繼之前”shit”事件之後,我以為口水禧喺學校畫鹹濕野,後來睇真啲,原來係畫緊乳牛!Yeah... Sure 

森林裡的一隻兔

「唔想返學」事件告一段落之後,另一樣曾經令我有啲頭痛嘅時候就係準備佢嘅飯盒。暑假嘅事候買左本教人整小朋友飯盒嘅書,買齊工具整裝代發之發現,原來望落好易,整落原來都要花時間。有啲野要前一晚整定,然後第二朝要整返熱。但學校係唔比學生叮野嘅,所以整幾靚都無用啦,最終都係凍冰冰咁食!加上今年口水禧有茶點時間,就係喺午飯前嘅一個鐘,佢食飽左茶點,一個鐘後根本就食唔晒呢盒野。我用半粒鐘整,佢用40分鐘食幾舊,真把鬼!我放棄整呢種飯盒啦,轉用保溫壺帶熱野去食好過。

我是誰?

 

 

我嘅手藝大家都有目共睹啦,真係算把啦。Canny 隔離呢堆,估到話你叻!

加上有三日放左學要練水,唔好攪咁多野啦,快快食完上床訓好過。

最歎係我zzzzz

禧媽

49 Comments

  1. 終於見到你的新blog,睇住口水禧返學的相,我幻想出年大公主返學的情況.
    公校都咁有錢買器材?好high tech的學校呀!!你地的學校稅一定好”金”.
    另外,想問你用邊個web hosting?貴唔貴呀?

  2. 睇唔到相呀!reload 幾次都係咁。同埋文字去到半路停咗,到底老師一路行一路可以點呢?其他blogs 睇得哂正正常常架喎!

  3. 間新屋好企理呀禧媽!!!
    口水禧間學校d老師同校長似乎幾嚴喎!不過嚴師出高徒!!

    • 每次一有人讚呢度呢,有條友就會鬆毛鬆翼架啦!(分分鐘開心過生頭髮!哈哈)

      呢度啲學校再嚴都唔夠香港啲學校嚴,口水禧呢啲hea慣嘅第一次見惡嘅老師先會咁R底啫,習慣左我怕佢下學期就開始作反啦!XD

  4. 啲相好有冇得教翻大少少 太細張喇
    BTW…你去邊我跟到去邊架..support u!!

  5. 祝禧媽個新blog開張大吉。你去邊我跟你去邊㗎喇。
    Colin 學校咁揼本,對學生要求咪好高囉?!

    • 多謝你!:)
      佢個校長係讀資訊科技出身嘅,所以對呢啲產品非常有興趣,佢話家下呢個年代應該開始要比多啲機會啲學生接觸下電子產品喎,因為將來個世界嘅趨勢都係向科技嗰個方向行喎。

    • 多謝你! 你係咪用電話睇個blog? 因為我試過用手機睇,又唔覺好細喎 …… 不過可能我自己影自己放落個blog 度所以自己唔覺 …..

  6. 新Blog d圖好細幅,好難睇呀,要時間適應。叫你家個電車公記得將舊blog搬埋過來,我周不時會回味㗎。總之你去邊跟,二仔底死跟啦!

    • 我有啲相特登整細佢,因為張張都一樣大巧悶呀嘛。 你用手機睇定係用電腦睇架?你都覺得細,咁禧婆婆佢哋咪大件事!等我問下佢睇唔睇到啲相先 …… 好彩得你提一提。

      舊blog 呀電車公已經差唔多攞到晒返黎架啦,不過佢要實驗下先敢整上黎呢度,佢驚一野整瓜我個新blog 我會追斬佢呀! :)

  7. 禧媽~我依啲資深潛水員上水,賀你開blog大吉!!!你去邊,我點都會跟住哂,你唔好諗住賣甩我咁陰公呀T^T

    • 我無試過味呀……不過凍冰冰就肯定係架啦,因為嗰個盒唔係保暖盒,而係普通不銹鋼咋。除非裝冷盤,如果唔係,啲熱野變凍野咁食,我諗都唔方好味。

      presentation? 我諗無啩,不過佢哋平時上堂嗰陣,老師都比好多機會佢哋向住全班同學講野,presentation嗰啲我諗要再大啲先會啦。

    • 你又啱喎,咁又真係用蛋捲成嘅。 :) 而家先發現我同我仔嘅藝術天份真係先天同後天都嚴重不足,佢畫嘅雞同我整嘅雞都係外太空生物,地球係唔會揾到架!哈哈!

    • 好野!咁甩皮甩骨都比你估到!恭喜你,你實在有超凡嘅聯想力!恭喜恭喜!

  8. 禧媽,中秋節快樂呀!終於等到你個新檔開張啦,好開心呀!你同禧禧都要加油呀

  9. Why don’t you just make different sandwiches as pack lunch? Different varieties like sandwich with bread, chicken wraps. They are nice even it doesn’t serve hot.
    we are back to HONG KONG…my elder daughter is at K1 :-)

    • 你都知外國一買材料就鬼死咁大包架啦,我買左包芝士同火腿,兩個禮拜都食唔晒。所以都好難整唔同款嘅三文治比佢帶。chicken wrap嗰啲又怕唔雪入雪櫃會有菌,佢哋啲lunch pack係就咁劈喺課室地下就算,就算塞左冰都唔夠凍,所以唔敢比佢帶食凍肉去食(除左火腿)。

      香港嘅生活習慣左未?女女返幼稚園覺得好唔好玩呀?返全日?

  10. 禧媽,睇左你個blog好耐,我個囡3歲半,跟你學到唔少野!anyway, 中秋節快樂!!

    • 中秋快樂!我哋呢度雖然有月餅賣但就無乜中秋嘅氣氛。

      大家交流下啦,跟我學就唔好啦,我係壞人黎架!哈哈!

Leave a Reply to 禧媽 Cancel reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)