口水禧嘅新竇終於「批檔」好可以用住先啦！經我家嘅電車公執左N日，總算見得下人，不過嗰邊係未開始寫新blog嘅，所以入到去只會見到幾篇由呢度抄過去嘅舊blog，用黎做實驗試下啲野係咪真係洗得嘅。無所謂啦，比定個新架步過有興趣嘅blog友記低先，咁就唔怕走失啦。前面篇野有人話「緣盡」要bye bye咁話，乜咁悲呀老細，我未收皮住架，揾緊新單位安置自己啲廢話咋！
新架步係電車公禧爸操控嘅blog，即只要一日有寫blog嗰個口水婆喺度豬嗡，一日都唔會摺埋嘅。呢度一直都唔係咩巴C閉（＜褒義黎架，絕無貶人嘅意途）blog，唔去啲大blog度開檔係就係會走左啲blog友，不過有心嘅就算唔係成日黎都會間唔中黎「窺探」下口水禧有乜新近況，或者佢老豆呀媽又老左幾多肥左幾多。
所以，順其自然啦，有緣千里能相會，無緣有blog不相識。
嗰度無人氣唔人氣嘅事，因為最人氣最妖氣最長氣嘅就係我，一千零一個我喺度坐陣，就算無人黎，自言自語自問自答係我嘅專長，我得架！
無諗過喺微博開檔，因為我seafood鬼睇唔慣嗰個版面，我知我知，有英文版呀嘛，唔怕啲簡筆字呀嘛，我明，不過我實在無時間一拖幾，有野傾去blog度傾啦，反正唔洗咩登記做用戶先可以留言嗰啲麻煩野，想留就留，不過啲留言需要我確認先可以出街，嗰啲廣告呀，變態野呀，不懷好意嘅留言係唔會出到黎嘅……除非我黐左線或發雞盲啦！
順帶一提，口水禧係無facebook賬號嘅，唔會好似其他blogger有佢地嘅fans facebook網頁，我懶嘛，做少一樣得一樣。
至於用我個名開嘅嗰個呢，實情係我同我家人親朋戚友聯絡嘅專頁，唔係唔受大家玩，只係其實都無野可玩，我甚少上載我哋啲相去嗰度或更新啲咩，嗰個賬號我用黎留言調戲我啲朋友或家人架咋，我屋企人要睇口水禧啲相都係要去blog度睇架，我一視同仁架！ 所以add我係無用架，因為嗰度真係無野睇架！
講咁耐，咩地址呀大姐？
www.gocolin.com 或就咁打 gocolin.com 都得。
會黎嘅到時見；唔諗住黎嘅，我哋喺呢度忍著淚說一聲goodbye啦，後會有期！
