0

如果你可以……我就會好開心!

身為泳隊成員嘅口水禧有個好神奇嘅C穴,就係非常驚喺踏板上跳水。教練攪左呢個問題成年都攪唔掂。每次個個隊員一聽到教練話放踏板比佢哋玩跳水,個個都非常興奮,飛身轉體後空翻咩招都有,務求用盡嗰段企喺踏板上短短嘅幾秒使出渾身解數,懶理撻生魚又好,鼻哥窿入水又好,總之都爭住跳多幾次。無論係全場年紀最大又好,最細都好,無一個會唔鍾意跳……

唯獨是我個仔,叫佢跳水重慘過叫佢跳橋!佢以前會直頭唔肯去排隊,後來隊照排,但任憑幾個教練落足嘴頭氹佢又好,昆佢都好,甚至上踏板準備推佢落水都好,口水禧會堅持到最後一秒點都唔會跳架啦。後來好啲,喺上面縮縮下想唔跳但又唔敢唔跳,跟住焗跳,跳完上黎兩行眼淚,口中念念有詞:「我最憎跳水呀!」然後發老脾。

今日,教練又安排大家去跳水,我望見口水禧望住塊踏板有啲猶疑,同佢一貫嘅作風無兩樣,都係嗰隻無何奈何跟住去排隊咁嘅款。

我坐喺佢哋條隊附近,口水禧就黎上踏板之前經過我身邊,我向佢話:「禧禧,比心機,如果你跳到,媽媽會好開心!」(我仔好鍾意日日都問幾次我同禧爸嗰日最開心嘅事係咩,通常我哋都會講一件關於佢嘅事,借啲二讚佢鼓勵下佢。)

最初驚到老豆姓乜都唔記得嘅口水禧望住我無表情,原來佢已經驚到聽唔到我講野。於是我又再講多次,今次佢聽左後望左我幾秒就上左踏板。

從來都無見過咁主動唔洗教練三催四請先誓願咁行去最出嗰個位,雖然個姿勢無人地咁威風,但勝在勇氣可加。

跳下一刻,我實在開心過中六合彩!

拿拿臨走去對面岸等佢上水, 

再次誇張十倍讚佢。

我知道其實佢自己都好開心。

佢問我:「媽媽,你今日最開心係咩呀?」

我:「媽媽為你肯試下跳水好開心!因為你肯試。」

呢排考試,聽到好多朋友話同個仔/女溫習好煩好火,

溫極都唔識,

溫完又唔記得,

打打鬧鬧,大又喊細又喊。

我鍾意正面鼓勵細路,

盡量唔鬧佢啲衰野

你估佢自己真係唔知自己衰乜野咩!

(明嘅,真係好難忍到唔鬧佢啲衰野!)

但盡人事啦,猛讚佢啲好野!

加多句:「如果你可以…… 咁我就會好開心好開心啦!因為我信你實得!」

我用呢招攪掂好多口水禧啲同學。

小朋友,你越話佢慢佢越慢,

你讚佢勁,佢越想表現好啲得到多啲讚賞同注意力,

咁佢會更落力。

有邊個鍾意比人用負面嘅說話鬧架?

禧媽

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)