尋日堪稱係我哋嘅破財日！一日破左成千蚊美金財！我知，好多人一日都洗到成千蚊，但我哋唔係大富之家丫嘛，仔細老婆「亂」（我點敢認自己係嫩口個嫩呀！），禧爸一個人賺三個人洗，一日跌咁多錢出街都咪話無感覺！
事緣係前幾日當我出去後園淋花嘅時候，駭然發現一篤人屎咁大篤嘅屎訓左喺我草地上，簡直係勃然大怒！一望就知邊個做嘅好事啦頂！正是纏繞我哋多年嘅浣熊。頂，以前喺一個位爆石我都算，家陣轉移陣地，攪到去草地屙，重要爛爛哋嗰隻，剷又唔剷得晒，留返啲黐喺啲草上幾核凸呀！都未嘔完，尋日再留兩大篤比我留念，重要開始有擴散嘅跡象，惹黎好多烏蠅兼臭到飛起，真係忍無可忍，呢穫唔揾人黎捉真係唔掂！事關浣熊嘅糞便裡面有種寄生蟲對小朋友嘅腦非常危險，輕則破壞個腦，重則送個細路去賣蛋。以前係硬地屙都好清理，而且黎黎去去都係同一個點上屙。家下係四散草地上，需知我屋企有條友會係草地上打滾，見野就執黎玩，萬一執左篤屎黎玩嘅話，我唔敢想象會發生乜野事。早排有人玩我喺出面掃貓屋嘅掃把，結果成頸生粒粒，攪左兩個禮拜先好返。點都唔可以冒險博佢唔會玩屎，唯有call人黎擺籠捉浣熊。
第一隻盛惠三百美金，之後每隻一百二十五蚊，捉到唔再黎為止。真係驚捉完之後，我哋三個要去訓街！
個叔叔話通常捉幾隻就會停幾年，望就咁望啦！我有一晚半夜望過出窗，見到十幾廿隻……
攪完浣熊，個銀包重滴緊血，部吸塵機跪低左，攞去整，個叔叔報價同部機買返黎個價差唔多。即係不如買過部好過。又跌幾百蚊！
跟住手提電話去左賣蛋，又跌幾百……
呢個月褲袋穿晒窿，係時候要同個銀包止下血啦！
