今日派左功課，平時口水禧規定自己星期二先開工做功課。但今日打開個「快路」，佢已急不及待立晒架生話要做功課。唔洗十五分鐘就攪掂晒，放返落書包準備明日交貨。
呢度嘅幼稚園程度好淺（相對我以前讀幼稚園嗰陣，高班已經迫我哋計百位數加減，重要係比個答案你，空左中間嗰個數叫你揾返出黎嗰隻！而家香港嘅幼稚園小朋友係咪計緊乘除？
）
聽禧婆婆講，我細個放左學返黎會即刻做功課，書檯側邊有電視開住都唔會射呢眼偷睇。我可以話係一個做功課同背書嘅機械人，啟動程式後就會自動波。抄抄寫寫，最憎數學，所以上面嗰啲百位加減眞係>>>！記得有次考小學，嗰間變態野竟然要我計成版百位數隔位加減，我成版空左佢無做，因為我唔想讀間咁難嘅學校。當時個心諗：「嘩，考入學試都咁難，考到入去死梗都似！」就係咁識諗嘅情況之下，我第一次為自己揸主意謀福利，留左條生路比自己。結果梗係入唔到嗰間野啦！
口水禧邊做功課邊話：「嘩！啲功課幾好玩喎！」邊油顏色邊食生果。我唔知道小一嘅功課會點，但保持愉快學習非常重要。只要有興趣，再難你都會想學。我唔想我嘅下一代好似我咁做個功課機械人，因為機械人只會你叫佢做乜佢就做乜，其他野乜都唔識，識嗰啲又好快會唔記得。而且當有一日個機械人黐咗線就會唔再聽你洗，乜野都唔會做，佢會話你聽佢唔再做因為佢受夠啦，佢要自己揸主意。
有人話，幼稚園基礎打好左，往後嘅讀書生涯就會較為順利。所講嘅基礎並唔係指識幾多野嘅基礎，而係對學習嘅興趣呢樣基礎，打得好，小朋友鍾意學習，覺得學習係一件有趣嘅事，往後返學就唔覺係一件苦差。所以我唔贊成喺學校功課以外再額外加補充練習比口水禧做，連老師都唔會喺長假期比功課，我何解又要為自己為個仔添麻煩呢！學習唔一定要透過做九萬幾樣功課先得，其實睇下書，玩玩具，出去行下，去下乜館物館參觀一樣都可以學到野。
物以罕為貴，功課少，變得珍貴。啲細路收到功課鬼咁開心，好似人哋啲散工工人咁，長期無工開，一有工開嗰日你唔叫佢都會自己做。當然，大前題係佢要對學習有興趣。
我个仔就係識讀未識串,可能我太心急~同埋我又係港式教育下啤出黎嘅成品,一开始唔知如何落手~又驚佢會落後,英文又唔係佢母語,不過我覺得美式教育制度幾好,佢好享受學校生活,唔討厭已經係好開始。
by the way,睇完你Blog先知原來加州同紐約州教育制度都會有小小唔會,好喜歡你个blog,因为好有共嗚感,亦可以提醒自己嘅不足之處
我个仔啱啱今年上kindergarten,我想問吓你有乜方法令佢記得d字点串?
靠拼音同多睇書(或揾人讀比佢聽) 囉，口水禧識左phonics之後識睇好多學校都未教嘅字，呢啲字其實平時都有聽到，只係佢唔知點串。但佢識拼音之後就認得隻字啦。 呢度嘅kindergarten 唔會要小朋友默好深嘅字，黎黎去去都係cat 呀dog 呀嗰啲。佢哋叫frequent words, 即好似the, is, it, his, she 嗰啲。 睇得多其實自然都記得架啦。 :)