一件事不停講完又講﹐問完又問﹐認真係考驗我同佢老豆嘅EQ。佢老豆EQ出名好﹐但個呀媽喇喎﹐出名係無EQ的。係﹐我一出世就漏低咗我嘅EQ喺禧婆婆個肚裡面架喇。
點解突然要爆某人長氣呢﹖見到佢身後嘅聖誕樹嗎﹖家陣先至11月中咋喎﹐未有耐到聖誕喎﹐點解棵樹會出咗嚟架呢﹖咪就係有人一日不段播帶咁哦住佢嘅雙親要砌聖誕樹﹐由halloween未到已經開始哦﹐完全無比佢老豆呀媽有喘息嘅機會。 結果喺不勝佢嘅奪命煩厭黑白天哦嘅一輪襲擊之下
﹐佢老豆呀媽宣告投降﹐喺車房攞盒封晒塵嘅聖誕樹出嚟「降樹」喇﹗
睇下佢幾孝順﹐當個呀媽啱啱幫佢班忙完個thanksgiving party之後﹐重咳緊舊膶出嚟之時﹐佢就催促我砌聖誕樹﹗頂佢吖﹗但我寧願咳住咁砌樹塞住佢把口﹐好過比佢冤住係咁要我哋砌樹﹐重煩﹗
A~~~點解會有些少豆雞架呢﹖
有少少覺得當初買呢棵樹有D瀨野﹐因為實在係太大喇﹗幢咗棵野喺廳後﹐加埋條火車軌同堆火車﹐我每日做運動嘅位真係細到吖﹗就喺棵樹同個足球機中間嗰條嚹﹐放一塊墊後就喺上面拉我嘅筋﹐做我嘅sit up。真係大動作少少會撼頭撞手撞腳。點解唔去其他位做﹖因為呢個位近個火爐﹐暖吖嘛﹗
其實我唔明D男仔點解咁鐘意望住D火車轉圈。轉咗十個圈﹐佢都重喺度望緊﹐究竟第一個圈同第十個圈有乜唔同呢﹖我淨係知D火車好嘈(買cheap野吖哪﹗)﹐但有人會睇得津津有味﹐換唔同姿勢都係同一個位度睇。
感恩節假期無功課﹐正呀﹗而家係逢星期一派功課﹐星期五交。有D小朋友堂上做唔晒D野就要帶返屋企做。口水禧好少要帶堂課返屋企﹐所以我話以佢半桶水英文程度嚟講﹐唔係最慢做完堂課嗰幾個已經叫好好架喇。多數重係做得最快嗰幾添﹐算係咁喇大佬﹗
記得我提過佢班中有好多同學舊年已經讀過一年幼稚園﹐今年因為呢間收咗佢哋﹐為咗入呢間野佢哋嘅父母就質呢班細路再讀多年幼稚園。唔好以為咁樣係一件好事。以我眼見嘅﹐讀過一年幼稚園嘅小朋友喺班中唔算特別標青﹐反而成日恰眼瞓﹐做野做得好慢。時時遊魂﹐搞到堂課做唔晒要返屋企繼續開工。有D就成日老師教緊野嘅時候﹐由於佢已經學過﹐於是佢唔聽書﹐四圍搞隔離個同學。一唔係就鬼咁大聲講晒D答案出嚟﹐搞到比老師柄。其實小朋友唔知咁樣會影響其他同學﹐佢哋只覺得「我識吖嘛﹐咪講個答案出嚟囉。點知反而比老師鬧。」本來佢哋主動答問題係好事﹐但喺唔適當嘅時候答就變咗壞事﹐比老師柄得多﹐以後重邊夠膽答問題。佢都唔知究竟應該答定唔應該答好。
重有好多細路個書包裝咗補充練習……
<<<佢哋每日都係咁嘅面口嚟返學。結果做堂課做得慢又比老師柄﹐做錯重衰﹐重頭再做﹐再再錯又再做再……無止境……我見到佢個樣我自己都想瞓。
唔好以為鬼佬唔谷細路﹐呢個世界有好多種類嘅父母﹐不分國籍都做緊一樣嘅野。
有好多人叫我一定要成日質佢讀多D書﹐要佢記住讀多D書第時先有作為。我真係唔信呢套﹐我覺得基本嘅學咗就OK﹐其他嘅睇佢自己做化。人好衰﹐你唔係成日發生嘅事﹐見到嘅野﹐你反而想佢發生﹐想睇下佢(講緊係好嘅事喇當然﹗)。我哋屋企無強迫教育﹐強迫學習呢回事﹐但口水禧會自動喺白板寫字計數﹐問我哋邊個字點串﹐呢個中文字係咩字﹐去餐廳時叫我哋教佢讀菜單﹐得閒(悶嗰陣喇應該係)攞晒自己學校做嘅功課出嚟嚟睇。
呢個先係我覺得最理想嘅教育方法。(睇下上小學多D功課嗰陣你有無咁瀟灑喇﹐顛婆﹗
)
Write without tears (寫字無淚),我仍然支持﹗
叫佢扮屎仍然係我嘅最愛……係﹐我有D變態﹐但屎真係好難扮﹐好考佢想象力架﹗
