其實我有寫blog……

嘩﹗好多蜘蛛網呀呢度﹗好耐無人打掃喇喂﹗

其實我係有寫blog嘅﹐不過寫極都埋唔到個尾而已。(有無咁多野寫呀﹖)有呀﹐不過係無咁多時間寫啫。堆呀堆﹐積呀積﹐索性唔寫……

又其實我係有微博架﹐不過我睇唔掂D簡筆字﹐直情係閱讀障礙嗰隻﹗ 大學時代﹐有次喺個教授房睇一段簡筆字嘅文章﹐結果係個鬼佬睇完成段﹐我重喺度估緊段野嘅第一粒字係乜。好彩佢邊睇讀出聲﹐我索性唔鬼睇﹐齋聽佢讀就算。(又好彩佢讀國語我又識聽﹐佢讀完重問我覺得點添﹗佢以為我睇得快過佢﹐喺度等緊佢。)所以個微博重多蜘蛛網﹗

又又其實我可以當呢度係微博或者facebook咁用架啫﹐我發現唔想寫嘅原因係因為我一諗起九萬幾張相同video唔知點upload﹐九萬嘅隻字唔知要打到幾時﹐真係諗起都即刻謝皮﹐無晒胃口。放棄大大篇咁上喇﹐係咁E上張相加兩句都得架啫……實則係我呢D字人點會得兩句吖﹐係都三……段喇﹗

輪住病咗幾星期﹐佢食完抗生素到我食﹐個肺咳到爆裂﹐喉嚨痛到以為飲錯漒水﹐肋骨痛到好似斷咗幾條之後﹐我哋兩個又係兩條好漢。

要寫低某人一D瘀野。話說嗰日帶佢去睇醫生﹐醫生檢查完佢個耳仔後問﹕「係咪頭先好大聲喊過或者大嗌呀﹖耳仔入面紅咗D喎。」聽完﹐我同某人對望然後陰陰嘴笑。

我﹕「無喊﹐不過係嚟嗰陣喺車度唱過歌。」

醫生﹕「下﹖唱歌﹖咩歌咁勁呀﹖」

我(唔知點解釋﹐吞吞吐吐)﹕「D鬼殺咁嘈嘅歌囉。」

醫生﹕(心諗﹕唔通個呀媽鍾意聽heavy metal?)

開估﹕呢期某人個呀媽聽蕭敬騰。車又有﹐電話又有﹐電腦又有。有人鍾意跟住演唱會版本喺車度亂嗌亂唱﹐結果瀨野。

報告完畢。