發泄blog一篇﹐我係你的話﹐閂咗佢去瞓覺好過。因為話明係發泄﹐無邏輯道理可言﹐齋噴而已。唉﹗走喇……(叫人走﹐咁你又寫﹖) 有得我喇﹐唉﹗
我﹐有一個仔﹐一個喺美國出生但識講唔多英文嘅仔(重加D口吃)。出於一半自私嘅理由﹐我喺佢開學嘅第二個禮拜﹐因為老師嘅一句”he doesn’t understand most of the instructions”, 我自動獻身去咗學校做義工﹐喺課堂上以幫手為名﹐實則係想視察下個仔有幾咁唔明老師嘅指示。結果發現佢都唔算好大獲﹐在我眼中叫做幾OK添。但自從嗰一次自動獻身後﹐我嘅後患就係為自己帶嚟咗一個”head mom” 嘅名銜﹐實則係”呀四“。班中大小事務上咗我身﹐甩極都甩唔到身。夜媽媽先有時間覆十幾個電郵﹐覆到
。老實講﹐雖則讀過書(重要係讀翻譯嘅添)﹐又喺度痞咗十一年﹐普通嘅英文溝通技能絕對無問題。電視﹑報紙雜誌﹑同人傾計各樣都過得去(雖則有時都要pardon幾獲先聽得清楚人哋講乜)﹐但我最驚嘅就係寫email﹐尤其係同一大群人溝通嗰種email。我唔識好多地道英文俚語(學校邊有教啫﹖)﹐學嘅大多係正統英文文法吖﹐以我嘅資質﹐「鬥」一段見得下人嘅英文分分鐘要成粒鐘﹐視乎要去到幾見得下人喇﹐好嚴重嗰D﹐真係鬥成日都疴唔出﹗ 但係隨住”head mom” 上咗身之後﹐每晚都有好多email要覆﹐真係「福夭」~~~~
隔咗幾日再寫﹐啖氣落咗lu。
事隔幾日﹐無咁嬲之際再嚟繼續呢篇野。
不能否認﹐公立學校又好﹐私立學校又好﹐家長無義務要幫手。返工忙﹐湊仔忙﹑家務忙﹑玩又忙﹐唔係個個人願意或可以投放時間落嚟幫手。但最基本嘅禮貌如覆下人email﹐講聲唔得閒又好﹐無興趣又好都得啩﹖再唔係的話﹐花一分鐘時間登入個家長通訊網址﹐等我知道邊個email係邊個粉皮嘅都得啩﹖改埋D email名又騎呢﹐估到我頭都大都唔知邊個打邊個﹐三十幾個email得十零個有名﹐真係「福夭」﹗有著數時就個個都浦頭﹐要出力嗰陣就個個龜縮﹐好有家教呀真係﹗
唔出力都算﹐咪賴話指示唔清楚又乜又物﹐又要提早通知又呢又路﹐個個唔出力的話﹐D資料﹑時間表喺個天度疴落嚟你度呀﹖ 唔check email嗰D粉皮﹐唔知係咪要人去差館揾佢指模先可以聯絡到佢。
前幾次同D細路放通告入書包﹐竟然重見到上個月第一日開學嗰份功課成份霉菜咁瞓喺個書包底﹐成個書包已經變咗廢紙回收箱。有D細路返學無茶點﹐周圍問人攞野食﹐一係就無得食捱肚餓到放學。生咗人出嚟點解又唔理人呀﹖送佢哋入得呢度﹐唔好話係唔小心送咗嚟。一心只諗住掉咗個細路入學後就woohoo交比學校搞掂﹐係呀﹐學校幫你養大埋佢喇好唔好﹖三點放學﹐個細路喺學校游離浪蕩到六點﹐學校無閘﹐會有流浪漢入嚟瞓架﹐懵柄﹗入day care 又唔捨得﹐任得佢日日咁痞到黃昏﹐究竟係咪想佢比人拐咗去以後唔返嚟﹖
有D家長﹐自己唔想幫手﹐周圍扇動其他家長都坐視不理喇﹐有得個老師自己搞掂佢喇﹐中國人唔好下下都話OK﹐要識講No嘛。今日喺課室見到我幫D細路影緊相重潤我洗唔洗幫我搬埋張床褥嚟學校。講no邊個唔識﹐但﹐我講唔出口。同我係唔係中國人﹐係咪慣咗比人勞役或控制無關。我講唔出口係因為我覺得D細路如果因為我哋大人嘅自私而無咗party, 旅行,課外活動﹑學習機會好無辜﹔講唔出口係因為老師年紀大﹐咁多野要搞根本吃不消(學校唔請多D人﹖公立學校係咁架喇﹐吹咩﹖)﹔講唔出口係因為我想d 細路開心﹐有野玩﹐唔洗下下都坐喺度寫字油顏色計數配對做到想瞓﹔講唔出口係因為覺得唔係咩難事﹐我有心有力點解唔出力﹖講唔出口係因為我愛上D細路見到我時連手上做緊嘅野都放低﹐撲埋嚟叫我﹐猛同我講佢哋喺學校做咗乜野點點點﹐bi li ba la 好過癮﹔講唔出口係因為我由唔鍾意細路仔﹐怕咗細路仔變成而家覺得其實喺學校同佢哋相處得都算OK吖﹐班友幾搞笑吖﹗
最重要﹐講唔出口﹐係因為我見到我個仔會因為媽媽去學校﹐其他同學羨慕佢有媽媽關心佢而沾沾自喜。
去唔去學校幫手﹐一切其實都由自私開始。我自私﹐因為口水禧。有D人自私﹐係因為佢自己。無所謂﹐世上總要有一D自私又戇居嘅人存在﹐呀媽教落做人唔好斤斤計較先可以活得自在。我活得好自在﹐因為日日都蝕晒大底﹐一點幾放學﹐我同口水禧有時三點幾先散水。今日多咗一個戇居嘅呀媽加入一齊鬥戇﹐睇下邊個可以捱到學期尾﹗
無野喎我﹐感覺良好。
