重振雄風

千其千其唔好誤會我喺度講緊三級野﹐絕對唔係嗰方面嘅事。入得口水禧個blog呢一欄﹐梗係關佢事喇。

自從上次踩單車仆損面之後﹐某人架單車就一直坐住冷板凳坐左幾個月﹐封晒塵生晒蜘蛛網﹗期間口水禧都有踩過單車嘅﹐不過係攞返架四輪嚟踩之嘛。正所謂跌咗一獲咁甘嘅之後總有D創傷後遺症嘅﹐所以佢一日自己唔開聲話要踩返兩輪﹐我哋都無迫佢去踩﹐反正我哋都知佢同架四輪唔會好得幾耐﹐遲早會頂唔順想踩返架兩輪。

果然不出我哋所料﹐有人呢排睇返CARS 2,見到D賽車場面之後﹐開始有追求快嘅刺激同成功感﹐主動要求話要踩返架兩輪﹐見佢重拾信心咯﹐梗係捨命陪君子同佢去操返下手車喇(<<<<佢老豆負責﹗)上個週末﹐佢兩父子已經試咗一次﹐禧爸呀自從跌過一次勁嘅之後﹐口水禧明顯踩得比以前小心咗﹐唔會再顧住講野唔睇清楚前面嘅路。落斜路時重會專心踩同剎制﹐重識得叫佢老豆唔好喺落斜嗰陣同佢傾計﹐因為佢要專心揸車喎。證明咗有時真係要比D細路碰下釘﹐跌獲甘先可以教訓到佢哋﹐任憑以前點叫佢小心睇路呀﹑小心踩﹑睇清楚有無人﹐留意路面情況﹐講一萬次都當我哋唱歌﹐如今只需跌一獲﹐乜都學識晒重自動會做﹐呢個教訓加塊面嗰達疤痕真係值得﹐千金難買呀大佬﹗你話喇﹐你寧願而家跌損塊面定係第時揸車炒斷對腳好吖﹖

我諗佢對自己之前跌完之後唔敢再踩架兩輪係有在意過嘅﹐不過礙於膽怯﹐唔敢上車其實都好無奈。上個禮拜戰勝心魔之後非常開心﹐今日開口話要我去睇佢
踩單車﹐見佢咁有誠意﹐當係對佢鼓起勇氣再嘗試嘅鼓勵﹐頂住個大太陽都跟佢哋去喇。

有人個呀婆聽見我迫佢粒孫洗碗即大叫我虐兒兼勞役佢個寶貝﹐噓﹗我呢個魔頭點止咁少野呀﹐想踩單車呀﹖自己推喇﹗見你唔夠高唔夠力﹐唔洗你掛架車勒最
多。係咁架喇呢度﹐所有野自己做到的話都要自己做﹐無人會幫你。有時我去買野﹐即使係高過我兩個頭嘅燈都係自己舉上車﹐你可以叫商店嘅人幫你﹐不過一

來要等﹐二來件野又唔係重到自己舉唔起﹐無謂麻煩人哋。我見過有D闊太﹐買到成車野食﹐出面落大雨﹐佢唔想自己推架車﹐於是叫超市嘅職員同佢推。佢大姐就成個闊太喺前面擔住遮行﹐完全無理後面嗰個幫佢推住架購物車嘅職員比雨淋濕晒身﹐重要個女人行到鬼C咁快﹐個職員眼鏡又濕﹐衫褲鞋襪又濕咁係咁追住個女人。去到架車﹐個女人開咗個車尾箱後﹐重要個職員淋住雨同佢逐件野擺上車(乜逐件野擺上車都要用好多力架咩﹖)而個女人就早已跳咗上車呆等個職員同佢放好晒D野兼夾重要幫佢閂返好個車尾門﹐又一身濕咁推返架手推車行返入超市。個女人就一腳油走咗lu。

我﹐容忍唔到我嘅仔女﹐有手有腳四肢健全好哋哋﹐但乜野事都翹埋手等人哋幫佢做。我唔想養件廢柴出嚟累街坊﹗

趁而家佢對每樣野都重有好奇心時就比佢自己試下﹐只要佢做到一次﹐以後就無理由推搪話唔識做或做唔到喇。( 擺明係陰佢嘅﹗)

自己架戰車應該係自己推﹐呢樣佢身為一個賽車手係非常緊張嘅。永遠都係﹕「呀﹐我自己推我自己推得喇﹗」

無頸賽車手呢一副戰鬥look係咪好惡呢﹗

呢達疤痕就係第時你喺靚女面前耀武揚威嘅證明喇﹗ 做呀媽嘅﹐個仔塊面多達野當然會覺得有D可惜﹐生塊咁滑嘅面比你﹐你就轉頭整達野上去﹐重要跟一世添。但諗深一層﹐我應該多謝佢﹐多達野好過少咗野﹐一達疤痕更勝千言萬語。

幾咁親力親為﹗

我哋幫佢戴好晒護墊頭盔﹐前面嘅路就靠佢自己去喇。做爸媽嘅最好都係喺佢哋身後﹐咪企喺前面阻住晒﹐又比指示咁樣點樣﹐又伸手拉佢哋行。總有一日我哋都會要被迫放手﹐而家已經無力逗住佢同架車行喇﹐識踩之後無力追佢添。我絕對唔想喺佢18歲嗰陣重要企喺側邊逗住佢。

暫時係未識自己起步﹐要老豆扶一扶﹐架車郁咗之後就自己踩喇。 

有毛有翼曉飛喇﹗

囂得佢呀﹗重叫我行開D﹐因為佢手車快﹐驚會撞到我喎﹗

點解我會有時間影佢哋﹖我架單車呢﹖之唔係無帶嚟踩囉。咁我做乜好﹖

↓

影完我自己都想嘔。但我想比大家知我真係全程除咗影佢哋之外﹐就係揾個有樹陰嘅為坐喺度撥下扇﹐睇下書咁。點解唔踩埋一份呢……女士有D時候係唔多想踩單車的……再講吖﹐我去咗踩單車嘅話就唔會有呢篇野喇﹐邊個影相呢﹖係咪先﹗

呢架野好不幸已經被打咗入冷宮喇。好快重會消失添。事緣部野頻頻甩鏈﹐未踩之前甩一次(真係出師未折先甩鏈﹗唉﹗)﹔跟住喺一粒鐘內甩咗四次﹐整到有人發火。

上鏈上到個頭都唔見埋﹗架野真係好濕濟﹗﹗﹗ 最後嗰次都係因為甩鏈﹐有人唔肯再整而收隊返屋企。又係嘅﹐連甩幾獲﹐整到對手黑mi munk﹐比我都無晒癮。

然而你又以為呢個人會肯就咁罷休乖乖哋跟你返屋企咩﹖梗係唔會喇。不過因為一個原因﹐佢非常樂意跟我哋返屋企。

嘩﹗我從來都唔知你個頭盔可以電埋髮架喎﹗喺salon偷架﹖

嗰個「制服誘惑」咪就係新歡囉﹗二手野但九成新。一早都打算買過一架好少少嘅比佢﹐今朝喺網上見到有人賣﹐個媽媽話佢個仔只係踩過幾次就無再踩喇﹐所以架車重好新淨。比原價平一半有多﹐禧爸話呢個牌子嘅單車好﹐所以揀咗佢比口水禧。以後唔洗再甩鏈。所以我哋踩完單車後返屋企食D野再出發去買呢架野返嚟。有人知有新單車﹐所已就範。

攞咗架車後重話要去試車添

我攞住D褸﹐咩住兩支水﹐手袋﹑相機﹐真係無力跑去追佢。留比老豆搞掂。

順便影低嗰度嘅風景﹐超靚。但離我哋好遠﹐應該唔多會嚟呢頭踩單車架喇。

廿四孝老豆跑到要剝衫。踩多陣﹐應該會連褲都除埋。

呢個禮拜無返兩日學﹐唔知喺邊度賴咗野﹐感染咗病毒。星期二晚臨瞓話喉嚨痛﹐星期三朝早起身猛流鼻涕﹐見佢個樣唔多掂﹐同學校請假帶佢去見醫生。人哋要驗佢喉嚨定﹐伸支雪條棍入佢口﹐佢棚牙好似鑲咗鋼咁﹐箝實人哋支雪條棍C都唔放。重要左右fing。醫生無晒計﹐叫我好似捉精神病人咁從後捉住口水禧﹐有人個頭就好似大內密探個佛印講豈有此理豈有此理咁兩邊左右fing﹐又箝人雪條棍又唔肯擘口﹐搞咗好耐先攞到D喉嚨定口水去化驗﹐證實係virus﹐唔係感冒。其實見開學喇﹐本來都諗住嗰個禮拜去打流感針﹐點知針都未打就賴野。不過醫生話無發燒就照打針喇﹐結果有人又喊。真係黐咗線﹐平時都好勇唔喊﹐嗰日失常﹗見我都陪埋一齊打針﹐佢先無再喊。重問我驚唔驚。我話我重驚過佢﹐不過無計喇﹐驚病吖嘛﹐痛都要打喇。

本來諗住第二日可以返學﹐點知當日黃昏就發燒﹐學校規定有燒就要最少退燒後24小時先可以返學﹐於是星期四又請多日假。

嗰日夜晚去學校開家長會﹐校長將過去三年學校嘅公開試分數比我哋睇﹐重話爭14分就可以升上去做distinguish school???我都唔知係乜東東﹐總之就知校長意思係你咪洗旨意嚟hea!個校長重計埋由開學到嗰日為止一共有66次提早放學個案﹐佢話咁樣會影響課室老師教書。真係咁big deal??? 佢話舊年全校嘅出席率係98%﹐算係全區最少人請假嘅學校。(但我仔嗰兩日先啱啱請完假﹐怕且今年應該會幫手將個%拉低喇﹗校長應該好快就會追擊我哋﹗)

有個以前都喺雞雞學校返學嘅同學仔而家同口水禧一班﹐佢媽同我講﹐原來我哋班有好多個細路今年係第二年讀幼稚園﹐舊年喺第二度讀﹐今年呢間收佢哋﹐佢哋嚟再讀過幼稚園。個家長好擔心﹐驚佢個仔會落後於人哋。我話﹐觀乎我去過兩次課室幫手﹐我都睇唔出有邊個特別標青得好緊要﹐唔講我知我完全唔知有人讀過幼稚園添﹗暫時都唔覺邊個細路特別跟唔上吖﹐成班野幾過癮架喎﹐好多野講﹐朝早見到我會問”mom, are you coming to work today?” (媽﹐你今日係咪嚟幫手呀﹖) 

不過尋日老師同我講﹐佢話D家長唔踴躍參與課室嘅義工工作﹐好多崗位都無人做﹐唔知點算。佢重問我﹐嗰日開會﹐佢個樣係咪嚇親人﹐所以無人肯嚟做義工。唉﹗希望係因為家長唔知要做乜先無乜人做義工喇﹐如果唔係﹐老師搞唔到D活動﹐結果被迫要取消嘅話﹐到頭來都係小朋友賴野。