家長日2012

今年係口水禧喺雞雞學校嘅最後一年﹐嚟緊九月就要去幼稚園喇。本來未去見老師之前都唔肯定口水禧適合去幼稚園未﹐不過而家已經都幾肯定佢應該夠料去做幼稚園生了。

點解話五歲嘅人都未必適合去幼稚園呢﹖之前喺學校聽咗個講座﹐有關小朋友何時適合去幼稚園。一般人認為夠五歲就要去架喇﹐再拖就會變超齡架喇喎大佬﹗我同意衡量一個細路仔讀得幼稚園未係應該睇個細路嘅心智發育去到邊個階段﹐而唔係淨係單憑歲數或識幾多野嚟決定。有D細路足晒五歲又識好多野﹐但佢如果完全控制唔到自己嘅情緒同行為嘅話﹐佢根本就唔適合喺幼稚園返學。呢D小朋友可以喺家教(home school) 或者去D一班人數好少嘅學校返學。普遍嘅政府學校一班幼稚園有三十幾個學生﹐老師一個人好難對每一個學生都照顧周到。遇上需要特別照顧嘅小朋友就大件事喇﹐唯一嘅方法只有日日都打電話叫父母帶返個細路返屋企架咋﹐因為呢D小朋友係連老師罰佢都唔驚/唔聽﹐情緒失控到直頭影響全班同學繼續上堂﹐所以只有請佢離開﹐其他同學先可以照常上課。日日都咁樣嘅話﹐不單止影響老師同學﹐家長同個小朋友都唔好過。口水禧班中有幾個咁樣嘅小朋友﹐我聽佢哋嘅媽咪講好大機會都會留個細路喺屋企自己教﹐等到佢適合過學校生活嘅時候先送返佢去學校。

唔好怪呢D小朋友或者佢哋嘅父母﹐其實佢哋都好慘。有時唔係話鬧或者罰就搞得掂個小朋友﹐因為佢去到失控嘅地步﹐連佢自己都唔識控制自己。個小朋友被帶走嘅時候都喊到豬頭咁嘅樣﹐其實佢好鍾意返學﹐但又知道自己闖咗禍所以要返屋企﹐佢自己都好唔開心。呢種小朋友唔可以稱之為曳﹐其實佢哋只係未去到嗰個階段而已。有D大人都會比較容易發脾氣兼失控喇﹐何況係一個幾歲嘅細路呢﹗

A~~~做乜叉咗去咁遠架呢﹖放心﹐口水禧無以上嘅問題﹐佢好少係阻住個地球轉嘅嗰個﹐因為佢想阻都阻唔到。到目前為止﹐口水禧嘅英文在老師眼中重爭少少﹐原因可能係去咗咁耐香港﹐慣咗聽同講廣東話嘅緣故﹐返到嚟唔肯講英文。上堂發夢唔再舉手答野或發口翁風。同堅成一齊玩都唔係好肯講野。好彩呢兩個星期開始好返少少﹐有時喺屋企睇電視或者玩嗰陣都會自己爆英文喇。

根據呢兩年返咗學之後所得﹐我對於生長喺外國雙語家庭嘅小朋友學語言有少少總結。我仍然覺得喺小朋友一開始學講野嘅時候先學母語﹐因為咁樣令父母同仔女之間嘅溝通會好D。到佢去preschool嘅時候就開始要教少少日常用嘅英文字﹐例如去打招呼﹑多謝﹑去廁所﹑食野﹑口渴﹑揾爸爸媽媽等等。喺屋企比D小朋友英文電視節目佢睇下。因為口水禧細個唔鍾意睇書﹐所以我以前好少讀書比佢聽。好彩可以去學校幫手做野﹐同時亦都知道老師教咗咩﹐返屋企可以教下口水禧﹐解比佢知老師講咩。到咗pre-kindergarten嘅時候應該接觸多D英文﹐即如老師所講喺屋企嘅時候要撥D時間同佢講英文﹐等佢習慣講一句而唔係淨講完粒字嘅英文。如果針對口水禧個人嚟講呢﹐喺學校或街上都應該講英文﹐因為佢唔多喺學校同同學吹水嘅關係﹐變相即係少咗機會喺同學身上學英文囉。之前逢星期二車堅成返屋企嗰陣都好D
﹐但喺香港返嚟之後唔洗再車堅成﹐所以口水禧只係喺學校先有機會同同學傾計(但佢又掛住玩﹐好少真係坐喺度吹水嗰隻) 。平時要返學﹐好難約同學嚟playdate
﹐唯有放假嘅時候盡下人事喇。

五月會去新學校做評估﹐唔知學校覺得口水禧嘅英文程度如何。不過尋日同老師傾過﹐佢覺得雖然爭少少﹐但應該都無問題﹐而且有D小朋友唔係即學即講﹐鍾意儲多D字先一次過爆出嚟比驚喜嗰隻。呢期口水禧成日叫我讀書比佢聽﹐讀多幾次之後佢重識講返成句野出嚟﹐甚至有時會套其他字入去句野裡面﹐咁即係其實佢已經開始學緊一句句子而唔係單字。暑假會放佢去參加下暑期活動﹐等佢繼續聽人英文﹐如果唔係﹐一陣容乜易又好似香港返嚟咁﹐隔咗個暑假又唔肯講﹐到時點開學呢﹖

口水禧喺學校其中一分認字練習……淺到無人有﹗

同老師傾咗半個鐘頭﹐都係圍繞之前做嘅問卷答案內容。同舊年一樣﹐家長日之前﹐我哋父母要做少少功課﹐就係做份關於小朋友不同範籌嘅進度問卷﹐方便同老師傾嘅時候可以知道更多小朋友嘅強項同弱點。口水禧總括嚟講每樣都合格(多謝祖先保佑﹗喔li吉帝﹗)﹐呢幾方面包括communication(溝通能力﹑gross motor(即比較大嘅活動如跳同跑) ﹑ fine
motor(即小如用手執野﹑剪野﹑寫字等嘅活動) ﹑problem
solving (自理能力)﹑social skills (社交能力)。

口水禧眼中嘅人類(老師話收貨﹐因為畫咗五筆以上就OK)

溝通能力方面需然重未可以好似D同學咁講到流利嘅英文﹐但已經有一定嘅表達同理解能力﹐即係就算我唔洗去學校做野嘅嗰D時候﹐口水禧一條友喺學校係完全可以「生存」到嘅。

任何嘅活動能力都毫無疑問係完全正常嘅﹐你睇佢周身郁無時停﹐手多腳多就知佢呢方面係幾咁發達﹗老師重話口水禧寫自己個名嘅時候D筆畫證明條友隻手已經可以用力揸筆。唔講唔知﹐原來對呢個年紀嘅小朋友嚟講﹐畫正方形同三角形D轉角位係有D難度﹐不過口水禧已經可以畫到出嚟﹐所以對於佢隻手嘅活動能力完全唔洗擔心。(係都擔心某人手多多第時喺學校搞爛人哋D野要我賠錢重好喇﹗)

畫出嚟嘅野D色夠實就代表揸筆嘅力OK(比著我細個﹐畫成咁﹐比禧婆婆擦咗重畫九年喇﹗)

人哋搓麵團做水餃﹐有人話要搓兩野

當係比佢練下手指力都無壞吖﹗(多個童工幫手)

學校有棵樹﹐上面綁咗一條繩至地面。繩上每隔一尺就打咗一個結﹐用嚟比小朋友爬上去最頂位置打鐘。到目前為止﹐口水禧係未識點爬上去﹐通常佢都只會好似泰山咁攬住條繩fing嚟fing去跟住跳落地。老師話嗰條繩其實都幾難爬嘅(我試過﹐當然係一尺都爬唔到喇﹗下身太重﹐重到對麒麟臂都負荷唔到﹗)但係只要口水禧識得做遞起左手時遞埋隻右腳﹐然後遞右手同左腳﹐咁就算未爬到條繩都好﹐都唔係大問題﹐因為最主要係想睇下佢識唔識手腳交叉並用啫。

最後我問咗老師關於口水禧食蛋嗰件事﹐我想睇下如果老師係我﹐佢會點做。佢話如果係佢﹐佢會講比口水禧知喺學校食蛋會有乜野事發生﹐例如可能同學會因為唔鍾意D味而唔同口水禧坐﹐甚至講好難聽嘅說話話佢等等﹐然後等口水禧自己決定想點。同時老師話佢都會留意下D同學嘅反應﹐適當時候會教D細路要學識接納唔同人食唔同鍾類嘅野食﹐自己頂唔順D味就自己行開﹐唔應該出口傷人。我明白老師係想訓練細路由細開始要識得自己判斷事物﹐大個就唔會做個無主見或依賴嘅人。而佢覺得口水禧係個對自己充滿自信唔受人影響嘅人﹐所以絕對可以有得佢自己做決定。

屋企男人多嘅好處

口水禧又有得發揮佢嘅創意(老豆執佢手尾就……)

有時都覺得我哋做父母嘅成日都唔放心比小朋友決定一D事﹐下下都要佢哋跟從自己嘅指示去做﹐漸漸個細路就乜鬼都問呀媽﹐連件玩具應該放邊都問呀媽﹐自己個腦好似唔識運作咁。而且比佢哋做決定﹐就算衰咗都係一個好好嘅教訓﹐等佢哋知道有D事做咗嘅後果係點樣﹐兼且要自己去承受個後果嘅感覺又係點樣﹐呢D都係成長必經嘅階段同人生無可避免嘅現實。口水禧而家呢個歲數﹐應該要開始學習做每件事必然會帶嚟嘅後果﹐從教訓以及經驗中學習﹐比起呀媽哦到斷氣更有效。

口水禧眼中嘅MIMI﹐我屋企度玻璃門黐滿佢嘅大作﹐就嚟唔洗抹玻璃﹗

最後﹐我最開心就係聽到老師講咗一句話﹐講咗咩﹖佢話 “Colin is a very happy boy that he always has
full confidence in himself. He’s proud to be himself for whatever he does in
school. ”( Colin係一個非常快樂嘅小朋友﹐佢時時都對自己充滿信心﹐做任何事都好有自信﹗ )
話我知我個仔識幾多字﹐識背幾多乘數表都比不起上面嘅說話﹗我哋送佢去學校返學﹐揀間咁樣嘅學校﹐喺人哋覺得我攞嚟辛苦嘅情況下﹐我覺得我已經得到100%嘅回報。

當然﹐加埋老師之後嘅一句“you really did a good job!” ﹐心花怒放﹗