0

Winter Wonderland 最簡單的快樂

一連幾日嘅聖誕﹑新年假期如風一樣咁過去﹐明日開始又係年初四咁嘅面口喇。成個假期除咗聖誕去咗朋友屋企打邊爐之外﹐好似無乜點慶祝D乜野﹐或者係有我都唔記得咗成家人到底呢個假期做咗乜。你話我D老人痴呆係咪越嚟越嚴重呢﹗

呀﹗記起少少﹐31號嗰日去咗學織野﹐唔係講笑話呀﹐我真係去學咗一同織野架﹐不過都係D基本野﹐其實中學嗰陣已經識﹐所以嗰堂只係幫助我回憶返已經失憶N年嘅基本功咋。講你都唔信﹐六個人當中﹐我織嗰塊已經叫咗似返D樣﹐其餘嘅同學仔都未學過﹐所以佢哋嗰塊野可以用慘不忍睹嚟形容﹐成塊野好似輻射完咁穿晒窿﹐D邊亂七八糟﹐凹凹凸凸﹐同我縫野嘅功力真係有得揮﹗無喇喇做乜學織野﹖皆因家有一佬﹐要戴冷帽﹐喺街揾嚟揾去都揾唔啱心水冷帽﹐咁不如自己整喇﹐包保又啱size ﹐又可以織幾頂替換。

其餘日子都係打掃下﹐做下家務咁喇﹐鬼叫之前對手整親﹐搞到所有野都做得慢﹐堆堆下變咗一大堆等住做﹐好彩有個假期咋﹐如果唔係真係唔知幾時先做得晒。

講起對手﹐大家有心﹐我心領喇﹗早幾日已經拆咗線﹐雖然個傷口重有D爆爆地﹐不過就住嘅話都已經可以扭到毛巾﹐唔洗洗完面條毛巾扭極都重好濕。以後打爛野﹐記住戴咗手套先好去執﹗

Winter Wonderland

口水禧學校除咗靠收生嘅收入之外﹐每年都會有兩個大型節目嘅收入嚟維持學校部份嘅開支。其中一個就係聖誕節嘅Winter Wonderland ﹐即係好似我哋細個學校開嘅聖誕聯歡會喇。當然喇﹐家長要一齊參與佈置或者個節目完咗之後要留低執野。我就鍾意揀事前佈置多過執野﹐因為拆野嗰陣D人都係亂Qfing野﹐大塵到爆﹐我費事執完返屋企打幾日乞黐﹗所以我兩年都係揀佈置。雖然佈置比較花時間﹐唔及執野嗰D一拆就全部拆晒落嚟快好多﹐又唔洗花心機諗點樣佈置﹐不過其實都係為咗D細路整個聯歡會玩下﹐時間長少少都OK。其實講緊都係兩個幾鐘﹐真係一陣就做完到第二個接力﹐話都無咁快﹗


除咗要負責佈置之外﹐每個家長都要自己捐份食物比人買﹐你可以自己焗或者出去買﹐到時就送去學校﹐聯歡會當日嚟參加嘅學生家屬或親友就會以USD2買一份﹐當係其中一個籌錢嘅項目。今年我整咗布朗尼﹐重買咗D盒裝好晒一份份先攞去學校﹐入鄉隨俗﹐人哋個揾個靚盒包得靚靚先攞去學校﹐咁我都跟喇。核核凸凸咁又真係好難會有人買得落手嘅。(雖側唔擔保包得靚就等如好味)

呢個布朗尼﹐原來焗好後要用膠刀切先唔會黐住把刀兼切到變形。開頭揾平時切野嘅刀切﹐點知黐住晒把刀﹐搞到好核突﹐上網揾下有咩唔黐刀嘅方法﹐有人話用膠刀切可以切得好靚好乾淨﹐我試咗喇﹐真係得喎﹗完全唔黐刀﹐D邊切得好俐落﹐邊個有呢個困難不防試下用膠刀。

一如以往都係呢D指定動作﹐同聖誕老人影相。其實聖誕嘅時候﹐周街都好多人扮聖誕老人同小朋友影相﹐已經係一個唔可以缺少嘅節目嚟架喇。今年呢為聖誕老人應該都係其中一個學生嘅呀爺/公嚟幫手扮架喇﹐記得舊年多人D ﹐舊年嗰位聖誕老人做完半日佈景之後﹐對腳連企起身都無力﹐事關佢話佢由朝早個聯歡會開始就舉D小朋友上自己對大脾坐﹐一路舉到下晝﹐所以舉咗一日重之後﹐佢已經手軟腳軟﹐企唔到起身﹐真陰公﹗所以下次見到聖誕老人﹐不防讚多兩句﹐等佢辛苦得嚟都覺得係抵吖﹗

呢份佈景可能已經用咗廿年都唔定。聽講真係有D野係由廿年前就用嚟搞呢個聯歡會架喇﹐學校認真環保架﹗

重有唔少得嘅梗係小朋友上堂嗰陣做嘅手工喇。超過癮﹗記得有一堂我哋用麵粉整雪人﹐有個小朋友搓好咗雪人嘅頭同身之後就突然噤扁佢﹐原來佢話想整個就嚟溶嘅雪人。諗落又真係幾得意喎﹐人人整雪人都搓到鬼咁圓﹐但佢就諗到整個溶溶哋嘅雪人﹐果然係有創意喎﹗其實呢個小朋友係有少少讀寫障礙同學習問題﹐但佢做手工係好有心機做嘅﹐兼且佢成日都有好多鬼主意其實真係好有創意。喺呢度當然唔會有好大問題﹐不過去第二D學校就好難講。我希望佢嘅創意千其唔好比人握殺﹐已經越嚟越少呢D人架喇﹐如果無佢哋﹐今時今日大家邊有iphone用呀﹖

幾蚊買六張飛就可以去呢間小商店買聖誕禮物﹐口水禧自己唔洗兩分鐘就揀咗幾樣野﹐果然有「敗家仔」嘅傾向呀下﹗

睇下五歲人仔嘅眼光﹐D組合都幾特別喎﹐明明有電動牙刷但又買支手動牙刷﹖皆因牙刷上有隻熊貓。唔係車就係動物﹐呢D就係五歲嘅口水禧嘅品味。其實我係特登放佢自己入去買嘅﹐因為我就係想睇下佢會買D乜野出嚟。結果應該都幾明顯證明呢位小朋友唔係好識理財﹐買埋D「唔等洗」野多﹗不過亦睇到佢都係做返佢嗰個年紀會做嘅野﹐重有童真吖﹗

玩下攤位遊戲﹐佢成日話鍾意玩保齡球﹐不過技術就……

D哥哥見佢碌嚟碌去都碌唔到淨低嗰幾支樽﹐於是私人醒咗個特大波比佢出茅招。睇下後面位小朋友幾咁不值口水禧嘅所作所為﹗

呢個遊戲當然都係出茅招喇﹐拋咗幾野都笠唔到支野﹐哥哥唯有手快快幫佢執起笠落其中一支野度﹐動作快到幾乎睇唔到﹐你話哥哥仔幾咁偉大﹐一邊幫小朋友出茅招氹佢哋開心﹐一邊又要顧及唔好幫得太出面傷咗人哋自專心﹗真係辛苦晒D哥哥仔﹗最後人哋送份野比口水禧﹐個衰仔重扮晒野唔要﹐哥哥面懵懵收返﹐心諗﹕「你小學唔好入嚟我讀嗰間﹐包保拉你入後巷打一身呀﹐咁串﹗」

撞到同班同學﹐結果兩條友喺沙池玩。

表情誇張已經成為佢嘅習慣。唔知學邊個﹐反正而家睇親電視﹐佢就會學入面D卡通人物個樣﹑對白﹑動作﹐喺窗出面睇仿彿屋入面有個黐線佬喺度鬼殺咁嘈兼四圍亂咁走。

Face painting口水禧揀咗聖誕鹿。呢個聖誕乜都係聖誕鹿。

畫完重要同隻佈景鹿合照。

返屋企重即刻要揾自己隻聖誕鹿公仔一齊影相添。

最後一年喺呢間學校﹐唔知口水禧有無唔捨得﹐但我就有。呢間係一間好好嘅學校﹐搞咁大壇野都係為咗小朋友。氹佢哋開心﹑籌錢辦學﹑唔加學費等等。見過有D學校喺酒店開聖誕派對﹐小朋友個個衣香鬢影﹐著晒靚衫﹐成個大富貴咁。當然各人有各人喜歡嘅方式﹐只係呢個唔係我喜愛嘅style。學校嘅野雖然又殘又舊﹐但每一舊野都係家長合力整出嚟嘅﹐成個聯歡會嘅氣氛有D似我細個時喺學校同同學老師開嘅一樣﹐嗰陣時嘅聯歡會好有人情味﹐一切都好簡單。有時﹐喺享受物質嘅同時﹐大家都忽略咗有D好基本嘅野﹐其實先係令人真正開心嘅元素。以前﹐聯歡會上﹐老師每人派粒糖﹔小朋友圍一個圈玩遊戲﹔嗰日提早放學等等﹐我哋已經好開心。(特別係老師喺聯歡會嗰日係特別溫柔﹑特別大方﹑特別仁慈﹗)聖誕節交換禮物﹐收一支筆都好開心﹐唔捨得用。我唔知道呢種聯歡會而家喺物質咁充裕嘅社會重有無﹐但我喺雞雞學校完全感受到﹐簡單但溫馨﹐小朋友一定會揾到乜野叫開心。



禧媽

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)