早前提過關於禧爸開始踩單車做運動。週末朝早襯我同口水禧重係好夢正酣嘅時候﹐禧爸就會出去踩單車。而家天氣凍到呀媽都唔認得(有時朝早只有零度)
條友都照出去踩﹐最多喺頭盔裡面再著多曾飛虎隊頭笠﹐身穿羽絨﹐戴埋手套就開工。我哋附近有條單車徑﹐如果一直踩一直踩係可以去到無雷公咁遠嘅﹐當然﹐要諗過自己可唔可以有力踩返嚟先好試喇。所以條友仔都唔會揾自己嚟較飛去得太遠﹐結果要打電話叫我車返佢返嚟咁瘀皮﹗通常出去踩個幾鐘就會返嚟﹐正好係我同口水禧起床之時﹐三個人可以一齊食早餐。然後再揾下之後有咩節目。
有時週末下晝佢哋兩仔爺會去踩多次單車﹐我自己喺屋己把握我嘅黃金兩小時吸塵抹地洗衫摺衫﹐你可以唔信﹐但無咗件口水禧喺度阻頭阻勢嘅話﹐真係比平時快好多就做完。所以我非常鍾意佢老豆帶個仔出去﹐等我可以用正常嘅速度去完成家務。
唔知幾時開始我被我老公認為我都要陪佢兩仔爺去踩單車﹐於是除咗佢兩仔爺有部單車之外﹐我呢個十年都唔多有做過運動嘅茂利都擁有自己嘅一部單車(如果做家務算係有做運動嘅話﹐我認我係個運動員囉﹗)﹐不單止係咁﹐重擁有一對我咁大個人以嚟好似係第二對嘅波鞋。細個上體育堂嘅白飯魚唔計﹐我真係無乜點著過波鞋﹐因為覺得著到對腳好鬼痛﹗係咪天荒夜談呢﹖著波鞋都會腳痛咁騎呢﹖係呀﹐我對腳真係幾騎呢架﹗所以咁大個都係試過一次有機會比波鞋商賺到我錢咋﹗
自從自己有能力同自己買鞋之後﹐我只著到converse ﹐其他波鞋免問。唔係同佢賣廣告﹐但實情就係得呢個牌子嘅波鞋係唔會著到我腳痛﹐問你服未﹗
(早餐加午餐) 。最近從同學家長口中得知原來我哋附近有間美國餐廳開咗﹐上網睇過個餐牌同價錢都接受到﹐於是嗰日踩單車之前就去試下。以後就唔洗食嚟食去都係嗰幾間﹐又多個選擇。
口水禧去邊都食pancake(除咗中餐之外)。個pancake份量都算幾勁﹐但某人竟然可以食晒﹐真係果然係個pancake怪﹗
食完就向住海邊嘅單車徑進發。嘩﹗今次非常唔掂﹐風大﹑人多﹑裝備唔適合﹑條路多斜路又多高手﹐賴晒野﹗口水禧重踩緊輔助輪單車﹐速度當然唔會快得去邊喇。但嗰度好多專業單車人出沒﹐路上重會有人喺度散步添﹐所以我哋邊踩重要顧住口水禧﹐實在忙到爆炸﹐一時又驚佢踩咗去條路中間阻住其他人﹔一時又驚佢撞親散步嘅人(條友真係有時會唔剎制或者係剎得太遲衝埋去人哋度) ﹔一時又驚佢比人哋踩得快嗰D撞到﹐總之就係一家三口以龜速嚟踩﹐非常唔爽囉﹗成個過程淨係聽到有個八婆喺條單車徑上喝個仔﹕「行埋一邊呀﹗」﹑「唔好去中間喇﹗」﹑「小心撞到人呀﹗」﹑「剎制喇﹗」﹑「你唔好XXXX」﹗你話係咪大人同細路都好無癮呢﹗我話下次再去嗰度踩嘅話﹐我寧願唔踩﹐用腳行當散步好過﹗還掂行到快過踩單車架喇﹗
禧爸見勢色唔對路﹐拿拿林提議去食下午茶喇﹐還掂都開始天黑又大風。果然係了解我呀下﹐食風倒不如食件餅飲下熱朱古力喇﹐室外好凍呀﹗
上返車揸去附近﹐以前我哋成日幫襯間野轉咗手﹐已經唔係食西餅嗰D野﹐唯有揾過間喇。泊好車行去揾餐廳途中口水禧見到人架紅色嘅跑車﹐即刻飛撲埋去話要同架車合照喎﹗佢話因為架車似佢最鍾意嘅卡通CARS裡面嘅MCQUEEN喎。好搞笑﹐佢而家喺街見到一D佢鍾意嘅野會主動要求我幫佢同嗰樣野影相。好彩唔係叫我買比佢啫﹗
呢個鎮平日同假日都係咁樣﹐鬼影都無。天氣好嘅時候會多D人﹐但都唔夠出面三藩市嗰D大城市咁多人多車。住呢度非富則貴﹐D屋閒閒哋都幾百萬美金。呢度嘅特色就係唔會見到大型商場﹐全部都係D小鋪頭經營生意﹐我同禧爸成日經過D鋪頭都不禁有個大問號﹐呢度鬼影都無﹐呢D鋪頭仔係點維生架呢﹖D野重要賣得一D都唔平民架喎﹗
以前後生嘅時候覺得住呢D地方肯定唔悶死都靜死喇﹐但而家覺得遠離煩囂嘅地方先係人間樂土﹐山上嘅屋有D對住海﹐有D望返落嚟個鎮仔D鋪頭﹐向邊個方向都好喇﹐一個字~~~靜﹗shuuuuuu~~~~
靚呀﹗不過未有資格住。不過夏天放假嘅時候嚟玩下都幾寫意嘅。
禧爸不嗜甜﹐得我同口水禧食。條友仔唔知係咪之前個pancake食濟咗﹐都食得唔多﹐於是咪就係我一個大啖大啖……
而家食飯都重係要時不時提住快D食呀﹗唔叫嘅話﹐佢會擔天望地﹐搞下呢樣嗰樣﹐一食就食兩粒鐘﹐成個法國人咁。
唔望住個電話會盲嘅禧爸
屋企無得食嘅野﹐一有機會喺街接觸到﹐有如屋企無飯開地狼吞虎嚥(只限正餐以外嘅野食﹐講到正餐喇喎﹐一樣係當法國餐咁食) 。
又話說過咗一個禮拜﹐當大家都仍然受到之前一個禮拜海邊食風踩單車事件嘅陰影影響之下﹐禧爸大膽提議不如試下佢平時朝早踩嗰條單車徑喇﹐多D平路又少D人﹐應該容易踩過海邊嗰個。見佢咁有誠意﹐連埋我都跟咗佢哋去。美國一到假日就成日喺馬路上見到D車一係頂住幾架單車喺車頂﹐一係就掛咗幾部係車尾。好多人鍾意放假嘅時候帶埋仔女出去踩單車﹐當做一個假期嘅家庭節目。
嗰日天氣超好﹐又有陽光﹐溫度適中。最重要係﹐嗰條單車徑真係鬼影都無多隻﹗帶住中溫雞口水禧去踩都唔會好似喺海邊踩咁血壓上升。夠靜亦係其中一個優點。唔知點解﹐去到而家嘅年紀﹐非常怕嘈同人多。
路邊嘅去水道時不時重有鴨仔游水。口水禧成日同人講﹕「Hi鴨仔﹗上嚟同我踩單車吖﹗」
竟然有人帶埋聖誕裝飾嚟同呢棵樹裝身﹗
踩咗一陣(其實都大半個鐘)
見路邊有凳﹐三條友坐下抖一抖。有無見人咁囂﹐雙手插袋喺度扮型﹖
左﹕影完呢張相﹐睇完幾乎暈低﹗乜咁似呀婆帶孫去行山晨運架呢﹖不過係戴咗頂帽遮下太陽﹐件背心多咗D點點﹐個身型脹脹哋啫﹐點解三樣野一加埋就會將我個造型變咗五十幾歲咁款架呢﹖於是﹐即刻除咗D令我年老色衰嘅野﹐再影一張。唔好得幾多﹐雖則唔再似五十歲﹐但都似四張幾。我懷疑係揸機嗰個陷害我。
生完仔﹐乜叉都比晒佢。留低嘅只有樣丙。嗚~~~
玩完影相﹐三條友打道會府。又踩返同一路線。仍然有太陽照住﹐所以唔覺凍。好過嗰次海邊多多聲﹗
假日嘅節目﹐有人選擇去逛商場﹐有人選擇去上興趣班。我覺得最正嘅節目係一家人做完嗰樣野個個都覺得開心嘅就係最正嘅節目。未必要洗好多錢(甚至唔洗錢)
﹐但能夠令每個人都想嚟多次嘅就係最好嘅節目﹐多多錢都買唔到。
