(我知﹐好核凸﹗但我唔知點樣可以將篤野由個喉嚨運送去到嘴邊吖嘛﹗
)呢次嘅感冒認真神奇﹐第一日係喉嚨痛到爆﹐食咗屋企嘅成藥都係唔掂﹐於是走咗去睇醫生﹐希望佢會寫醫生紙比我去藥房買藥。點知個醫生話感冒食成藥都得﹐點咗我去買咳藥水同止痛藥。後來D喉嚨痛係食我屋企嘅中成藥搞掂嘅﹐嗰陣都未有鼻水住﹐心諗個醫生都唔知係咪玩野亂咁講我感冒架﹖點知嗰晚就開始多鼻水同咳﹐第二日重要去口水禧學校co-op添﹗唉﹗我都唔想去播菌架﹐但因為唔夠co-opers兼有D家長本身嗰日都要co-op嘅都病咗﹐咁我無第二個人替我﹐咪只好頂硬上囉。最多唔同D細路講咁多野同埋離俥哋遠D喇。
之後接連嘅幾日發生乜野事﹐我諗有試過感冒嘅人都應該好清楚喇。主要都係食同瞓喇﹐莫講話間屋幾日無吸塵﹐張床都幾日未執過喇。真係超頹﹗每當我食咗藥眼瞓到爆嗰陣﹐我就迫埋口水禧一齊瞓﹐好彩而家佢大個仔﹐自己瞓醒咗會自己出廳玩﹐呢幾日一撻落床瞓覺就諗﹕「好彩我得一個細路咋﹐你話如果我重有多一個細嘅要湊﹐真係命都比埋佢呀﹗
」而家都重咳緊﹐不過已經好過前幾日﹐嗰個衰仔口水禧重要我一咳﹐佢就笑﹐佢話我咳嘅聲好好笑喎﹗呢幾日咳少咗﹐佢重問我點解唔咳多D﹐佢竟然話﹕「我想你咳多D呀﹗」
你個衰仔﹐係咪想呀媽咳都吐血呀大佬﹗
嗰個公園都唔係好近大街﹐所以嗰日都幾乎比我哋包場咁濟。班細路玩到四圍騰﹐好彩都有幾個家長留低睇住﹐如果唔係﹐得嗰幾個co-op家長嘅話就真係生多一打眼都唔夠睇班細路。
但有時口水禧都未係好識享受呢個遊戲係點玩﹐當D同學撲埋嚟猛話”Colin, I have to put you to jail!”繼而拉扯口水禧隻手時﹐禧哥就會大力推開人哋隻手﹐然後雞咁腳走咗去﹐我肯定佢唔當自己係賊嗰隻走佬﹐而係以為D同學要打獲佢而掙脫嗰隻走佬。似乎佢都重要多D playdate先可以領會乜野叫兵捉賊喇。
個公園嘅滑梯比起我哋去開屋企附近嗰D高好多﹐有D成兩層樓咁高﹐所以口水禧嗰日喪玩咗好多好多次滑梯﹐再玩就真係褲穿窿架喇﹗重有就係D靜電勁到爆﹐睇下佢個頭D頭髮係幾咁爆﹐完全唔係因為風嘅問題而係靜電咋﹗雖然電到佢霹靂啪叻咁響﹐但都無損佢嘅雅慶﹐總之一邊玩一邊有如坐電椅咁電埋髮都無有怕﹐後生仔係咪真係唔怕C架﹖我平時去超市推架手推車行幾步就電一電都想一刀劈爛架車﹐因為真係好Q痛架﹗但呢班細路好似無感覺咁嘅﹖
記得今年暑假前嘅家長日份問卷裡面都有一條問題關於拋波﹐嗰陣老師同我講過想試下口水禧識得接波未(個波要由幾尺外拋過嚟)﹐當時我話原地佢自己拋自己接就無問題﹐但人哋幾尺外拋比佢就好似接唔到住。幾個月後嘅今日﹐呢條友仔已經接到波同識得拋返比人﹐所以嗰日喺公園度﹐除咗同老師拋波之外﹐重有同幾個同學仔拋。係咪好奇怪呢間學校點解家長日會同家長研究埋D咁嘅野﹐反而對學術嘅事就一D都無傾過呢﹖或者佢哋覺得呢個年紀傾學術嘅野傾嚟都多鬼餘﹐字又唔識寫唔識睇﹐講都無謂。不如睇下個細路嘅體能發展去到邊個程度﹐有無野係未做到﹐要家長留意重好。其實呢排我都留意到口水禧開始學睇字﹐街上嘅”stop” sign同停車場嘅”No parking”﹐佢已經識得睇喇。有好幾次佢指住地下話﹕「呢度No parking。」呢幾日我食緊藥嗰陣﹐佢會拎住我個藥盒﹐問我藥盒後面寫住「stop乜野呀媽媽﹖」(有副作用就要停藥嘅指示)。我覺得好神奇呀﹐因為從來無人教佢學字﹐學校無﹐屋企都無。我知道班中有D小朋友都同口水禧一樣開始識得睇某D字﹐而根據家長講返又係D細路自己學﹐無人教過佢哋。
填鴨教育養大嘅我從來都未經歷過自己學字﹐一向都係喺學校學幾個生字﹐然後返屋企抄到PK﹐寫到手斷﹐死記死認咁學字﹐所以對於口水禧呢個學字嘅過程非常有興趣。就算無嗰隻字喺面前﹐你叫佢串S-T-O-P都串到出嚟﹐但你問我究竟佢係點記得嘅﹐我就真係唔知。除咗識某幾隻字之外﹐佢嘅拼音能力重好過佢老豆﹗當然﹐並唔可以拼晒成隻字出嚟﹐但字頭一定無問題。連廣東話都識拼。例如﹐口水禧個口字係H字頭﹑水係S字頭﹑禧都係H字頭咁樣。
除咗字之外﹐佢呢期重好鍾意睇路牌嘅符號﹐最熟係唔可以/可以U-TURN﹑可以/唔可以轉左/轉右﹑No Turn On Red﹑大卡車唔可以駛入某D路等等。細路仔喺路上會留意嘅野真係估佢唔到﹐但唔好睇少佢哋呢個學習嘅模式﹐好多時佢問一次﹐你講一次﹐之後佢就會記得﹐而且會伸延去其他野度﹐例如佢會知道圓形入面嘅圖畫﹐如果打斜有條線叉咗個跳畫嘅話﹐即係代表嗰樣野唔可以做﹐例如唔准食煙嘅標誌係圓形入面有支煙比條斜線叉咗等等﹐如果下面有寫埋No Smoking﹐口水禧見到會照讀。(唔知幾時會比唔守呢D規則嘅人食緊煙聽到口水禧讀No Smoking﹐以為我叫個仔串佢﹐跟手埋嚟打獲我呢﹗
)
相中食咗隻蛋同少少生果之後就話食唔落喇。
睇下我哋成群幾似D去圍人哋消防局嘅爛仔咁款﹗
消防員叔叔睇住我哋衝埋去﹐心諗﹕「唉﹗成朝喺對面E嘩鬼叫﹐家下夠鐘就嚟攞債喇﹗」
小朋友們一字排開企喺度聽叔叔介紹架消防車有乜架生﹐真係呀媽老豆講野都唔見佢班友咁留心﹗無計喇﹐個叔叔又高又大隻﹐真係一隻手都可以揪起幾件﹗當然﹐唔止D小朋友好聚精匯神咁睇同聽喇﹐我哋嗰幾個呀媽喇喎﹐一樣都好留心……「目及」住個叔叔架﹗有型又有款嘅消防叔叔﹐真係人見人愛架﹗哈哈﹗
讚﹗﹗﹗﹗
放心喇老公﹐我唔會特登燒間屋嚟博呀消防叔叔嚟英雄救美嘅……(燒你本數簿就會……)
不過個仔呢排學識咗911呢三個數字……
消防員叔叔應小朋友嘅要求攞咗件特大工具出嚟﹐問小朋友呢舊野愛嚟做咩架﹖小朋友答﹕「愛嚟比媽咪斬餸﹗」
消防叔叔﹕……
相中嘅叔叔著好晒D野之後重叫D細路埋去亨佢個頭添﹗初初D小朋友唔敢去﹐老師帶頭亨咗個消防員一野﹐小朋友見狀即刻起身你亨一野我亨一野﹐企喺叔叔隔離嗰個小朋友亨咗好耐﹐佢好鍾意扮消防員﹐嗰日佢身上著嘅T恤都係消防員衫。所以嗰日有得亨消防員個頭﹐就等如D fans亨到偶象個頭一樣咁興奮﹗叔叔重話比小朋友﹐佢背脊嗰個氧氣筒會喺消防員唔郁嘅時候發出BB聲響﹐因為萬一喺火場裡面有消防員暈咗﹐其他人都可以憑住BB聲去救個暈咗嘅消防員。
個叔叔都算係咁﹐烈日當空下著住呢件野﹐戴埋氧氣罩頭盔手套﹐睇見佢面都紅晒﹐真係見到都熱﹗
後來個叔叔就叫小朋友坐低﹐因為叔叔要小朋友返屋企做功課。其實就係叫小朋友返屋企之後叫父母檢查個火警/煙霧警報器同埋喺屋企出面揾個集合點﹐萬一火警逃生嘅話都唔會走失咗。講完一大輪野之後﹐小朋友可以發問﹐我哋D呀媽梗係唔執輸乘機請消防員幫我哋教仔喇﹐教咩﹖咪就係要個叔叔講﹐要做消防員嘅話﹐一定要食多D有營養嘅野﹐要聽話同乖﹐重有要好好讀書囉﹗真係問你怕未﹗咁都得﹗真係任何可以教仔嘅機會我哋都唔會放過架﹗
咁你明點解我哋要叫D消防員叔叔呀﹑警察叔叔呀﹑醫生叔叔幫我哋教仔喇﹗
驚呀呢﹗消防員叔叔重同D細路話得閒可以去探佢﹐我開口水禧玩笑話叔叔叫我如果口水禧唔聽話﹐就帶口水禧去消防員叔叔度住幾日喎。
消防員話架車有天梯嘅就叫fire truck﹐無梯嘅叫乜我已經唔記得咗。(邊個得閒睇架車啫﹐睇個消防員之嘛﹗我講其他D呀媽咋﹗)
