Rap Session – 關於口水禧

尋日掛住講人哋個仔﹐竟然唔記得咗自己都有個仔添﹗ (tongue)

其實前幾個blog都講過下口水禧喺學校嘅情況﹐佢應該算係唔多麻煩嘅一群細路﹐而家連講英文嘅障礙都打破咗﹐所以都無乜野要特別招呼呢條友架喇。(嗰晚去完個rap session﹐我覺得應該要去還神拜祖先﹗ (thumbs up)

)

嗰晚嘅rap session中﹐輪到我講口水禧嘅時候﹐我只講咗最近覺得口水禧開始鍾意喺circle time嘅時候大聲同老師講野﹐當然喇﹐佢係喺老師無叫佢答問題嘅時候講喇。 (waiting) 有時重會特登同老師玩野﹐明明係A同學做surprise can﹐條口水禧就專登大聲嗌另外一個同學嘅名。老師叫口水禧Colin﹐條友就會話”No Colin. This is no Colin, I am bird (bird字可由其他野代替﹐視乎佢大哥嗰排睇緊邊套卡通﹐好似呢排睇緊”RIO”﹐佢就周圍同人講佢係隻雀仔 (silly) ).”有時會突然唱歌﹐再唔係就老師講開八爪魚﹐口水禧就突然話”octopus is like roarrrrrrrr……(說時重要加埋動作﹐丫大個口扮八爪魚擘大個口﹗)”

作為呀媽﹐我其實內心不知幾開心見到個仔終於都叫做maang車邊融入到學校嘅活動﹐唔洗再帶個人肉字典機即場翻譯﹐亦都好開心佢塊面皮重厚過佢老豆呀媽﹐當眾講野都無有怕。話實﹐呢方面我同禧爸都超唔掂﹐即使係rap session嗰晚﹐我開始講咗幾句﹐已經feel到有D面紅耳熱﹐真係又唔見我當街鬧人嗰陣會面紅架呢﹖ (blushing)

但我知道口水禧唔多唔少都對老師造成D不便﹐因為其他同學見個傻佬大叫豬o翁﹐於是覺得幾好玩時又跟住咁你又叫我又叫﹐搞搞下就變咗失控﹐老師淨係嘟起個嘴shu人都shu到嘴抽筋﹐所以有時我co-op見到口水禧咁樣嘅話﹐我會阻止佢﹐但佢會好茫然咁望住我問「點解唔可以講呀﹖」﹐佢可能覺得點解有時有D同學又可以咁樣﹐但自己又唔得架呢﹖其實係因為佢聽唔明老師有時同同學之間嘅對話﹐所以有時可能係老師問緊某個同學野﹐所以同學先會大聲答老師。

於是我問老師﹐洗唔洗我嚴禁口水禧再搗亂circle time嘅秩序﹐但老師嘅回應係「唔洗兼有得佢」。老師話覺得口水禧對於自己而家可以同同學﹑老師﹑甚至家長用英文吹水好有成功感﹐因為咁樣﹐佢先會不停揾機會猛講同人講英文以顯示下自己嘅「食力」﹐所以老師唔想打壓口水禧嘅自信﹐覺得無必要唔比佢喺circle time自己胡亂講野﹐最多就係教佢想講野就要舉手。不過老師又笑住話其實只要見到一個同學唔舉手就講野﹐其他嘅細路就會即刻有樣學樣架喇﹐教咗都未必會記得要舉手。

咁得喇﹐攞正牌發o翁風﹐問你見過咁嘅事未﹗ (thumbs up)

我亦都有向在場嘅家長講口水禧成日好鍾意指住A同學就講B同學個名﹐重要人哋呀媽話比佢知唔係嘅話﹐口水禧重要再講一次佢專登講錯嗰個名﹐或者調返轉唔認自己個名等等。但D家長係咁笑話聽過好多次口水禧話自己叫pig﹑cat﹑race car﹑owl﹑以及最新鮮滾熱辣嘅bird。重試過有一次企喺個圍咗四面欄杆嘅野入面﹐個家長問佢喺裡面企喺度做乜﹐口水禧話因為佢係隻雀﹐所以要企喺裡面﹐我諗起因為套卡通有好多幕講隻雀比人困咗喺雀籠入面。講完﹐其他家長猛喺度卡卡聲笑住話有時自己嗰個都會咁。

呢個手勢叫I Love You。係老師教佢哋做嘅。D細路唔可以一野就整到﹐望住佢哋好用神咁逐隻手指彈起﹐一隻手做完﹐個頭又轉過另一邊睇住自己另一隻手做﹐兩隻手做好即刻好招積咁側側頭舉起手兼露出勝利笑容﹐非常搞笑﹗ (laughing)

口水禧前日喺學校搶人玩具比人打﹐整損咗隻腳﹐甩咗D皮流咗少少血。起初佢走入嚟同我講﹕「媽媽﹐塊皮會生返出嚟架呵﹖我細個﹐新陳代謝快吖嘛﹐聽日就生返出嚟。」當時無為意佢嘅情緒﹐因為佢語氣十分鎮定﹐好似純粹同我閒話家常咁。有個家長問佢要唔要貼塊膠布﹐口水禧都話唔洗﹐之後已經急急腳走咗去玩。之後我忙完一大輪﹐諗起佢個傷口好似流咗少少血﹐眼見佢跳咗入沙池玩﹐於是諗住都係同佢貼塊膠布好D﹐走去揾佢帶咗佢去洗下傷口﹐呢個時候﹐有人就開始滴住眼淚投訴同學打佢﹐重話個同學係壞人。細問之下﹐原來係口水禧搶人野﹐嗰個同學搶返返去嘅時候唔小心車咗野落口水禧隻腳度整損咗。解釋咗點解同學會發嬲同埋叫佢以後唔好問都唔問一句﹐一野就立人哋手上嘅野去玩。放學嗰陣重話嬲緊個同學﹐以後唔同佢play date。 (laughing)

今日再問﹐佢話已經無嬲喇喎。但講極都唔係好明自己都有唔啱。屋企無人同佢搶玩具﹐嗰個又係屋企得個十二歲嘅家姐﹐所以口水禧同嗰個同學都會立人野玩同唔比人哋立佢哋玩緊嘅野玩。咪以為口水禧係小綿羊﹐條友都會郁手郁腳﹐唔打人但會大力推開人哋。男仔都係呢隻style﹐所以一定要教好﹐唔係嘅話﹐等住第時比人笠麻包袋拉去廁所打獲﹗

有個家長話男仔五歲開始就會逐漸將自己對媽媽嘅嗰種親暱熄機﹐好快就會投入去同其他麻甩仔三五成群去玩﹐唔再會好似細個咁成日要黐住媽媽。聽完唔知應唔應該開心好﹐當我睇緊電視(唔係睇劇﹐只係好資訊性嘅節目呀﹗)﹐條友就喺隔離猛咁發問呢樣嗰樣。呢個時候真係想佢熄下機﹐暫時當唔識我。但諗到有一日佢真係全天候都當唔識我嗰陣﹐都幾落漠。 (broken heart)

無計喇﹐始終都唔想佢做裙腳仔嘅。

有件事聽老師講完覺得可以喺度講下。

老師話隔離班有個細路成日向同學吐口水﹐多次教導都搞佢唔掂﹐通知家長先發現原來個小朋友喺屋企都係咁吐人。老師話有D細路個口裡面嘅肌肉唔知有咩問題﹐令到呢D小朋友成日想用個口做D野嚟得到安全感或者令自己舒服D﹐所以有細路鍾意食手指﹑咬冰﹑咬紙﹑咬指甲﹑咬書等等。吐痰對嗰個細路嚟講可能都算係其中一個郁動口部肌肉嘅活動﹐所以佢會成日咁吐。當然﹐重有個可能就係佢好鍾意睇下其他人中佢招之後嘅反應。就如有D細路鍾意定野落地﹐跟住睇住人哋執返﹐然後再定再執咁樣。咬野嗰個雖要改善﹐如果唔係﹐大咗就會變咗鍾意咬崩指甲嗰類人。老師話呢小朋友要比D野佢哋嚼下﹐等佢個口唔得閒﹐個小朋友就會舒服晒。無獨有偶﹐呢D小朋友平時都好少講野。唔知同口裡面嘅肌肉發展有無關係。