0

又有朋自遠方來

我哋終於返嚟地球喇﹗無聲無氣咗一排﹐相信大家都有一個同感……就係睇blog無咁煩﹐睇少一個顛婆發o翁風真係一大享受﹐講中咗你諗乜呀呢﹖(幾抵死呢你話﹗)

除咗因為某人返學嘅事令我哋忙過以前之外﹐今個月有兩個朋友嚟探我哋一家喺呢邊發mo多時嘅霉人家庭﹐令我哋嘅生活簡直係生色不少。

中學時期嘅同學V同D分別喺兩個禮拜嚟咗呢邊探下同十幾年前個樣差天共地嘅我﹐V同學只到我家食咗餐飯同甜品﹐第二日就繼續佢嘅美國之旅喇。至於D同學呢﹐佢重堅﹐因為佢嘅三藩市處女下海四日遊係由一個亂字嚟開始﹐亦以一個亂字嚟結束嘅﹐你話堅唔堅呢﹖

事緣係佢嘅老友因為年紀有返咁上下﹐個腦時運作時唔運作﹐D同學一早就電郵咗佢嘅航班資料比我﹐而我亦都睇咗N咁多次﹐非常老定地安排好佢喺呢度嘅衣食住行。正當我星期日帶住十萬分老定夜晚去接機﹐十點幾起床諗住整早餐食﹐然後攞D被鋪﹑枕頭﹑床單出嚟執好客房之時﹐手提電話就響起﹐呢個亦都要幫D同學多謝神明保佑﹐事關識我嘅人(包括少有打比我而我又接到佢電話嘅呔媽)應該講起打電話比我嘅經驗﹐就會禁不住有一籮粗口想爆嘅衝動﹗係﹐十次有十點五次我係接唔到電話﹐好彩嘅幾日會覆人問人係唔係頭先打比我(通常對方會話「幾日前呀﹐大姐﹗」)﹐唔好彩嘅﹐電話無電自己熄埋﹐連miss call嘅紀錄都會灰飛煙滅﹐我直頭唔知人哋揾過我﹗(我明﹐我揾到火箭航班嘅話﹐我會返去火星架喇﹗)所以呢個同學D真係嗰日唔知行咗咩運﹐竟然打到電話比我喎﹗(快D去還神喇八婆﹗)

我風騷地接咗D嘅電話﹐重開埋speaker phone﹐所以連禧爸都聽到我哋講乜。

我﹕(超風騷嘅聲線) H~E~L~L~O!(<<重要扮埋鬼婆咁嘅發音﹗)點呀﹐喺邊呀﹖

D﹕喂﹐我到咗喇。

我﹕準備上機呀﹖(因為佢之前去咗多倫多﹐然後再由當地飛過嚟我度)

D﹕咩上機呀﹐我到咗SFO(三藩市機場)喇。你喺邊呀﹖

此時嘅我有乜野表情﹐相信唔洗形容﹐大家都可以諗到喇啩。禧爸企喺廚房門口同我無言對望咗幾秒﹐電話嘅另一頭繼續問我喺邊。

我﹕乜你唔係夜晚機咩﹖

D﹕咩呀﹐朝早十點幾到吖嘛﹗你無收到我email比你個itinerary咩﹖

我﹕(懶有急才)喂﹐你揾間coffee shop坐坐先﹐我而家即刻出嚟。

跟住電話唔知係斷咗線定我掂到個電話營幕邊度收咗線(之所以我最憎用touch screen嘅電話﹗)。廚房一片混亂﹐pancake粉倒咗出嚟喺個兜度﹐好彩未溝水﹔房未執﹐亂過狗竇﹔Sunroom仍然有禧哥一地嘅玩具﹔間屋……未吸塵。但呢一切都唔重要喇﹐最緊要係即刻飛奔去離我屋企揸車要九個字嘅機場接人先喇喂﹗

以最快嘅速度梳洗﹑換衫﹑執禧哥嘅餐具出門。

唔知日係咪有球賽﹐路上有D塞車﹐好彩禧爸識兜路避開D車籠﹐但點避都總有D係避唔開嘅。結果﹐我哋成十二點幾先去到﹐D同學應該飲咖啡都飲到腎虧咁濟﹗真係萬分嘅唔好意思﹐雖則我諗佢會多謝我益咗佢嗰兩粒鐘喺SFO睇靚仔以及增加佢對SF嘅了解……

至於點解我會以為人哋係夜晚到架呢﹖唉﹗算把喇……

一上車﹐梗係即刻問佢想周圍去定點喇﹐因為佢星期日到﹐留四日就走人﹐咁盡量都會喺星期日帶佢去D我平時無勇氣自己揸車去嘅地方﹐難得嗰日有司機吖嘛﹗邊D地方會令我變得咁懦夫﹖咪就係三藩市遊客區囉﹗即有如叫我喺香港揸車去旺角或銅鑼灣﹐我覺得會係對其他路面司機嘅一大懲罰﹗因為對我嚟講﹐人多車多嘅地方會令我頭暈﹐路窄多彎多線要轉隨時會見我表演飄移﹐所以呢D咁艱炬嘅工作﹐都係留比禧爸做喇﹐佢都唔想多架爛車喺屋企架﹗

我哋首先係去咗醫肚﹐當然少不免係坐底受靶任人譏笑我嘅「巧妙安排」。好彩平時接口水禧放學唔係咁﹐如果唔係﹐口水禧就要讀夜校先得喇﹗

第一站﹐我哋去咗呢度。個名好似係 Palace of Fine Art之類喇 (想知就上網查下喇﹐點解我唔查埋比你﹖你重敢信我咩﹖唔驚我又唔知點咗你去邊呀﹖) 。

嚟過幾次﹐由無口水禧到有呢條友﹐次次都係因為帶朋友或親戚先會嚟。係影結婚相嘅勝地。我成日都會同跟我哋嚟嘅人講「The Rock咪喺度拍架囉。」嗰日當然亦都有講喇﹐禧爸話我咁舊嘅戲重攞嚟講羅」爆﹐無計喇﹐我無做資料搜集吖嘛﹐真係唔知呢棟野嘅由來係咩吖嘛﹐咪唯有求其講D我知嘅野囉。

唔好以為相中咁slim嘅女子係我﹐非也非也﹗此乃慘被我強行滯留SFO灌咗唔知幾多咖啡嘅同學D。怕且下次佢再嚟嘅話﹐會喺飛機打定電話提我去接機都似﹗

熱情嘅口水禧見雀就走埋去﹐點知人哋拿拿聲飛走。寧願跳海都唔理口水禧。

長期被困在家嘅小朋友﹐一有機會出去就會唔記得雙親嘅存在。呢件蛋散﹐專吼呀媽唔得閒﹐同姨姨講緊野嗰陣就有毛有翼﹐結果要佢老豆麻膺捉雞仔咁夾佢返嚟。唔係唔比你走﹐之但係唔好消失喺我視線範圍吖嘛大哥﹗真係吖﹗

對於任何屋企無嘅事物都有濃厚興趣﹐尤其鍾意見野就爬﹐爬完就跳。

只要唔係人哋個身﹐我任得佢喪摸。

呢個情景當然係禧婆婆來電﹐揾孫。

第二站去咗金門橋。行咗一陣﹐怕曬嘅D同學話無搽防曬﹐於是調返轉頭上返車﹐落咗去橋底。D細路真係唔洗買玩具﹐因為佢哋去到邊都有玩嘅材料。

佢話想去沙灘﹐但時間緊迫無時間去(無理由叫D同學嚟SF陪我哋去沙灘啩﹗)﹐於是就地玩起泥沙上嚟。實則呢度咁大風﹐落水凍到嘔﹐一陣風吹過﹐食沙就少不免﹐最慘係對眼入咗沙﹐裡面又有隱形眼鏡﹐你話點算﹖

正想離開嗰度之際﹐比我見到有D人出出入入呢座野﹐而呢座野嘅外牆所有窿(封住晒﹐應該唔算係窗)﹐實在非常神秘﹐於是呃咗其他幾個傻仔陪我入去八啩。

呢座叫Fort Point嘅建築物喺1853年開始起﹐已經有150年歷史。以前用嚟作海事防衛之用﹐但未真正喺度開過火。我估佢平時應該有D野比人參觀或者有演習之類嘅節目﹐不過當日我哋去嘅時候人哋都差唔多收工﹐所以淨係比我哋周圍行下睇下。裡面有大炮﹑比士乒住嘅房﹑重有D我睇極都唔知愛嚟做乜嘅工具。如果有時間可以睇下D相嘅介紹﹐不過嗰日行程太緊湊﹐所以得個行字。立下眼就走人﹐無睇真D野。

頭殼頂就係金門橋喇﹐條橋193X年已經起好﹐每年都要同佢油油﹐等佢時時都紅當當咁搶眼。

去完呢個fort point發生咗一件事。當晚我如常瞓到半夜三更醒咗﹐望出房門個天窗下有度光好快咁掠過﹐我驟眼望落以為已經天光﹐嗰度係太陽光。但係當我望出我房內嘅窗時又見到出面係天黑架喎﹐諗諗下度光會唔會係月亮嘅光呢﹖但好快又覺得無可能﹐因為掠過嘅速度好快﹐真係一「斬」眼之間嘅事﹐斷估月亮無理由識行啩﹖咁會唔會係有野飛過個天窗呢﹖呢樣又無可能﹐因為如果係有飛過屋頂﹐咁我應該係見到有黑影好快咁掠過﹐無理由會係見到光掠過架﹗再諗下會唔會係UFO呢﹖又覺得唔會﹐因為度光好窄﹐睇親電視D人話見到UFO都係成架野都係光﹐咁如果佢飛過我屋頂﹐我應該見到房外都光先啱﹐可能光到入房架喎。當下有D驚﹐瞓唔返唯有坐起身上網上到六點有D眼瞓先瞓返。

諗諗下又唔知係咪去過Fort Point呢D歷史遺跡領咗野(係﹐當一個人驚嘅時候真係乜都賴人哋架﹗)。跟住好快又安慰自己﹐嗰D都係保衛自己國家嘅人﹐係好人嚟嘅﹐唔驚唔驚﹗

不過而家諗諗下﹐覺得可能係值昇機或者飛機嘅物體……(咩﹖應該有聲﹖唉﹗比我繼續安慰自己喇……)

嗰日嘅最後一站係Fisherman Wharf (漁人碼頭)。點解某人咁乖肯坐定定影相﹖梗係喇﹐睇下後面D園藝野﹐有海豚吖嘛﹐都係佢嘅「飛佛」嚟架。係佢自己主動坐弟重要求我影佢架。

何解會做咗半隻大閘蟹﹖

因為佢見到有樣野想玩﹐所以就算比人綁到咁樣亦都在所不辭﹗咩野咁好玩﹖

準備……

一飛沖天

呢樣野後生嗰陣去D theme park都好想玩﹐最後玩咗個叫Sky Screamer嘅野之後從此個膽就嚇破咗唔敢再玩。嚇破我個膽並唔係個玩意﹐而係最「聰明」嗰個禧爸﹗

話說十年前喺某個主題公園有三條茂李走去玩Sky Screamer﹐三個人比包紮一齊﹐面向地下被吊到十層樓咁高(唔記得確實嘅高度﹐淨係憑感覺覺得好高)﹐工作人員用咪叫我哋可以解開個扣﹐當時我哋三人嘅排位係一個朋友夾喺我同禧爸嘅中間﹐禧爸負責解扣﹐但我哋揾嚟揾去都唔知個扣喺邊度﹐正當我哋愁緊﹕「嘩﹗唔係玩都無玩就要人哋吊返我哋落去咁瘀皮呀嘩﹗」之際﹐突然唔知乜野鬆脫﹐我哋三個直向地面飛墮﹐有如人哋跳樓一樣﹐頭向下直衝﹗當時我心諗「X街﹗斷咗繩呀﹖死梗﹗」然後個腦已經一片空白﹐喺飛墮嘅十秒裡面﹐三個人靜到一粒字都無講過﹐超呆﹗十秒後﹐喺就嚟到地面嘅時候突然感覺有繩調住我哋﹐三個人就隨之喺空中游盪咗一輪﹐呢個時候我哋先識得反應﹐大呼一聲「嚇死﹗」。

落地之後先發現原來係禧爸解咗個扣﹐所以我哋先會飛墮而唔係有野斷咗令到我哋飛墮﹐不禁想打獲禧爸﹗原來連個朋友都以為係有野斷咗﹐發生意外﹐所以不約而同三個人都嚇到唔敢出聲﹐直至知道無事先至敢講野。玩完之後重發現我個隔肋底因為被綁得太緊而損咗﹐玩到隔肋底爛都真係唔知講乜好﹗

嗰個蛋散事後重話﹕「車﹗我都唔知架﹐周圍扯周圍噤﹐突然拉中咗個制咪飛墮囉﹐我以為你哋知架添﹗」大佬﹗咁你扯之前講聲我哋知吖﹐淨係聽到你講話唔知點算﹐揾唔到個制﹐等我哋重周圍望緊邊度有咪比我哋叫地面D人放返我哋落去﹐點知就突然聽到”park”一聲﹐好似有野斷咗﹐跟住就……

嗰次之後﹐呢D咁攞膽嘅玩意就同我絕咗緣喇。我哋重話﹐邊個傻佬想跳樓自殺﹐應該先去玩下呢個野﹐包保嚇完當堂唔想死﹐真係嚇到嚇飽﹗

口水禧玩嘅呢個無我哋嗰個咁驚嚇﹐只係比起跳彈床再高少少而已。加上佢唔係好識點樣出力un﹐所以都唔飛得幾高。有時重要隔離個工作人員幫手先飛得起。不過對佢嚟講絕對係好好玩。當做暫時圓咗佢平日發夢都話想飛上天嘅心願。至於第時大個想飛上天﹐就要靠佢自己發明D野飛自己上去喇。

嗰晚我哋喺附近食飯﹐之後就打道回俯﹐因為D同學已經超過廿四個鐘無瞓過﹐早一晚去飲時嘅妝重未落﹐認真服咗佢﹗返到屋企先即刻洗被鋪床單﹐好彩唔洗搞到半夜先比佢瞓﹗ 

一連幾日撞正口水禧要返學﹐只好有兩日送咗D同學去「大出血」﹐幫手推動下美國嘅經濟﹐我co-op完再去接返佢。走前一日去咗de young睇畫展﹐多謝佢嘅出現令到平時無腳陪伴嘅我都有機會去感受下藝術氣息。估唔到一個平時蓬頭垢面不修邊幅嘅呀嬸都會有呢D雅興呀呢﹖我無畫畫天份﹐但我鍾意睇囉。問你怕未﹗

希望下次D同學再嚟嘅時候揀正口水禧放假之時喇﹐咁我哋就可以多D時間帶佢周圍去跌錢﹐幫助經濟復甦﹐對成個世界都好吖﹗呢D綿力﹐作為地球人﹐點可以唔出呀﹐D小姐﹗

幾乎漏咗佢呢個旅程亂嘅結束嗰一點添﹗

話說某人離開SF嗰日﹐我co-op完返到屋企洗乾淨喺學校同泥沙玩完返屋企成粒沙翁嘅口水禧之後就車D同學往機場。去到個check in counter先發現唔係嗰個航空公司而係UA。重要係飛內陸線嘅UA櫃位﹐令到當時身處國際機場嘅我哋呆咗一輪﹐因為以為要去返內陸嗰邊好遠﹐再加上路盲嘅我突然要揾內陸機場嘅挑戰感到驚慌﹗(呢D就叫做大鄉里喇﹗)。好彩問咗人知道係可以行去內陸機場即時鬆口氣﹐因為之前聽過禧爸搞錯terminal幾乎送機尾嘅故事實在嚇到D同學花容失色﹗但最後都有驚無險安全令佢可以順利上機﹗

最好笑係我個仔﹐佢問我點解要趕住去機場﹐我話遲咗嘅話咁D姨姨就要送機尾架喇。然後我個聰明仔接住問﹕「咁我哋送完機尾去邊度呀﹖」

仔﹐送完機尾﹐我哋咪帶姨姨去返櫃位攞出佢嘅信用卡加好多錢再買過張機票﹐然後姨姨可能亦會嬲到「送我一程」囉﹗

禧媽

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)