嘩﹗等咗三個月﹐終於開學喇喂﹗重要係我至愛嘅下晝班﹐今日返學唔洗再好似返上晝班咁C淋X賴﹐仆返學校先發現未刷牙嗰隻「頻能」﹗
朝早唔洗較鬧鐘﹑早餐同午餐一齊食﹐食完梳洗刷牙換衫執埋個茶點盒就去返學﹐無得頂呀﹗GOOD!!!
新嘅學年﹐每個禮拜開始要返四日學﹐兩個老師負責一人教兩日。舊年嘅老師會星期二同四嚟上堂﹐一同三就係新老師負責。聽講以前呢班唔係返四日﹐今年學校加多一日比學生﹐上堂嘅模式都唔同以前﹐好彩暑假上過summer camp﹐口水禧知道家陣上堂應該要做D乜﹐知道要喺課室裡面做晒老師叫佢哋做嘅野之後先可以出去玩。逢星期二﹑四重會開埋以前preschool嗰邊比小朋友過去玩D stegel﹐因為老師話始終呢個年紀都重係好鍾意擒高擒低爬呢樣嗰樣﹐所以除咗出去後院玩之外﹐都會開stegel比D細路爬下﹐有助佢哋嘅身體發育。
今年再唔會有snack parents﹐所以家長要同自己嘅小朋友準備食物盒同茶點。老師唔鍾意我哋用密實袋﹐因為唔環保喎﹐叫我哋最好買個食物盒比小朋友帶野食返學。於是最鍾意臨急抱佛腳嘅我尋日先醒起要買食物盒﹐行晒成間target先揾一個﹐其實唔係好啱心水﹐不過無得揀唯有買鬼咗返屋企先。點知後來去超市見到有個重正﹐即刻買咗返屋企﹐準備退Q咗先前喺target買嗰個。呢度有得退野真係好﹐唔啱心水無謂嘥錢。
呢個就係後來買嘅﹐分上下兩層。下面嗰格再分兩格。正方形﹐啱啱好可以放入去口水禧個食物袋再加埋冰墊冷藏住D水果同芝士。個質地基硬正﹐口水禧有時鬼咁輪盡﹐跌咗個盒落地都唔怕跌爛喇﹗
由於返學前食咗個pancake早餐再加杯奶﹐睇怕都飽到上心口﹐茶點時間應該都食唔落太多野食﹐所以大部份茶點食物都係生果﹑芝士同一隻蛋。應該都夠食喇啩﹗
老師嚟家訪嗰陣話送咗口水禧去學校我哋就可以走﹐今日同禧爸送口水禧去返學﹐口水禧都熟晒架步﹐除咗因為暑假嘅summer camp之外﹐重有就係學校早兩日有個open house﹐其實即係開學前比少朋友去學校一個鐘頭試下上堂﹐等佢哋知下新學年嘅上堂情序﹐所以大部份有嚟open house嘅小朋友今日一入到學校都知要做乜﹐唔洗兩頭騰。
今年﹐我每個禮拜要去co-op兩日﹐因為唔夠人co-op兼且比舊年多咗一日學要返。其餘時間我都唔洗去學校幫手。所以唔知下次去香港嘅時候﹐口水禧會唔會唔識已經變咗英文channel呢﹖放心﹐我哋喺屋企仍然係會同佢講廣東話嘅﹐所以就算未必可以好似而家咁流利﹐但都唔會完全唔識講同聽啩。
上個禮拜﹐約咗班中一個同學仔去公園play date。口水禧當然係無乜同同學講野﹐不過一兩粒單字都講到﹐同同學仔都叫玩到下嘅。其實變相係我上咗兩個鐘頭英文會話就真﹐因為同學仔個媽咪都喺度﹐咁大家吹下水不知不覺就吹咗兩粒鐘。其實口水禧開始返學之後﹐連帶埋我都要學野﹐即使以前有返工嘅時候都大把外國人嘅同事﹐間唔中都會吹下水﹐但好少會傾兩粒鐘咁耐架(博炒咩﹗)﹗而家去多咗學校嘅活動﹐變咗見到唔識嘅人都吹到下水架喇﹐就算喺超市都可以同唔識嘅人講一大餐﹐講完bye bye繼續行﹐問你怕未﹗
初初嚟呢度嘅時候覺得好怪雞﹐同陌生人講野好危險架喎﹗但住耐咗你就會覺得其實都OK﹐迎面行埋嚟唔識都可以打招呼講聲hi﹐唔洗野野都黑口黑面咁掂行掂過嘅。
講開開學﹐上個星期五﹐屋企附近嘅小學生有開學巡遊﹐事前已經派咗D汽球比我哋吹脹掛喺門口﹐嗰朝大約十點鐘就有警察叔叔開路﹐因為我哋係大街﹐所以巡遊嘅學生會經過我哋門口﹐預先已經掛咗波波喺郵箱﹐見到警察即刻叫口水禧出嚟standby﹐等人哋行過嘅時候同人揮手表示下支持。
唔知其他學校有無呢個節目﹐但我哋呢頭嘅學校就每年開學都有。以前口水禧未開始返學﹐我哋都無乜感覺(幾冷漠﹗
)。莫講話掛波波﹐有時人哋行過我哋都唔知發生咩事﹗而家條友仔開始要返學﹐我哋先留意多咗關於學校嘅野。呢D咪係「針唔吉到肉都唔知痛」嘅情況囉﹗
之前都有諗過口水禧讀小學嗰陣洗唔洗搬屋﹐搬去再好少少嘅區讀嗰度嘅學校。但而家反而覺得喺呢頭嘅學校都OK吖﹐至少呢個開學巡遊節目我覺得幾好喎﹐老師家長學生一齊參加﹐沿途嘅家長同小朋友見口水禧企喺屋企門口都會大家揮下手笑笑口咁﹐重多謝我哋企出嚟支持D小朋友添﹐幾好禮貌喎又﹗所以就算間野唔係top one﹐睇D細路都行得幾開心﹐咁間學校都應該符合以學生為本嘅要求﹐唔係當學生係填鴨﹐呢個係辦學校最基本嘅原則。不過我都會揾下資料﹐或者去學校行下睇下真實上課嘅情況(口水禧學校嘅老師話有D學校係比家長去睇上堂)再作決定都未遲。
我唔係虎媽﹐我唔洗要仔女讀名校做最top嗰個。做個有禮貌又開心嘅正常人已經好好。
早排暑假嗰陣咪話買咗D填色呀剪貼習作簿比口水禧玩嘅﹖開頭都間唔中有同佢一齊坐低做下﹐後來當然係無咗件事喇﹗除咗係唔得閑成日咁坐之外﹐重有就係有時見佢亂做都幾火滾﹗重同禧爸講以後個仔嘅功課佢負責﹐因為我唔想激到爆血管呀﹗
但發現原來個老豆都有得個仔亂咁畫亂咁剪﹐所以最後係我哋兩個都無睇住口水禧做本野﹐話之佢。(我知﹐我哋唔係人﹗)
其實條友仔係會自己攞嚟做的。有時我喺廚房煮飯都會見到佢喺張枱仔度自己畫呀畫呀﹐剪呀剪呀咁﹐但我無特等行埋去睇佢做乜﹐有得佢自己搞掂。係﹗我想佢慣咗以後自動波做功課吖嘛﹗(幾咁懶嘅呀媽﹗
)
當然喇﹐無人理嘅話﹐佢有時會揭咗去最後嗰版玩D貼紙。我都有得佢玩。
結果有一日下晝得閑少少﹐坐低喺梳化見到佢嗰幾本野﹐手痕攞嚟睇下﹐唔睇由自可﹐一睇……笑爆嘴﹗條友仔自己學寫字﹐睇下佢D斜線幾搞笑﹗
原來佢已經自己畫咗打橫打棟打斜。填色就……烏呢馬叉…..
有日我聽到佢邊畫邊講﹕「有化學野﹐唔好食呀﹐有毒架﹐會毒死你架﹗中咗毒﹐變咗咁嘅色……有化學野﹐有毒架﹐唔好食呀﹐化學野嚟架﹗食咗化學野嘅顏色……有化學野(重複講咗N次同一段說話﹗)」
於是一個下午﹐我揭開佢本野睇下……
食咗化學野﹐中咗毒嘅豬同鴨仔﹗
(但隻毒豬仍然會笑﹗)
救命呀﹗
我唔理佢點做本野其實係想知佢喺唔識字嘅情況之下到底知唔知自己要點做D練習。結果發現聯線﹑配對﹑填色同寫字佢係知點做。深少少要睇咗題目先明嘅嗰D當然係亂Q咁畫。但我都想睇下佢會點搞﹐原來係有圖畫嘅就填色﹐無圖畫嘅就飛。重會話佢唔識玩嗰D﹐所以唔玩。原來做練習對佢嚟講係玩。好吖﹗咁樣好呀﹐「做功課」呢三個字好悶﹐「玩練習」幾好吖﹐至少係人都會主動地去「玩」﹐但被動地去「做」。
驚唔驚以後對做功課唔認真﹖唔驚喎﹐因為佢做緊嗰陣態度係認真想做嗰件事﹐屁股不離座﹐好有興趣去研究。做幾頁覺得夠喇就會放低去玩其他野。最少都坐到半個鐘頭。我嘅要求唔高﹐坐得耐唔代表乜野﹐「想做」呢種態度先係最重要。我只記得自己小時候做功課閒閒哋都幾粒鐘咁坐﹐但不情願﹐亦都無興趣﹐為求交差了事﹐毫無趣味可言。讀完書畢咗業乜Q都唔記得晒﹐咁又有乜野用﹖
放學喇﹐要去接口水禧返屋企喇﹗
弊﹗原來我重未刷牙﹐咁頭先去學校嗰陣同家長講野咪……
