0

親力親為

尋日比yahoo生吞咗嗰篇遲下記起先再post喇。整佢個制﹗

每朝早﹐有時或者係等到下晝我先得閑﹐但我都盡量保持呢個習慣﹐咩習慣﹖咪就係執床執房囉。如果嗰晚入房發現張床係未執嘅話﹐咁唔洗問喇﹐嗰日應該係忙到黐咗線﹐莫講話執床﹐睇怕我應該係連毒都無時間去排。

好彩得兩張床同兩間房要執﹐如果唔係﹐我體內嘅毒素應該會將我毒到變咗綠色都似。執床不外乎係摺下被﹐掃下將床咁喇。我有一把喺印尼買返嚟嘅掃﹐嗰度D人執床嘅時候會先搬開D被﹐然後用嗰把野拍打將床﹐撥晒床上嘅塵﹑頭髮﹑死皮之類嘅垃圾落地之後先鋪返D被﹑枕頭﹑床「冚」上去﹐跟住再掃地等等。我個人鍾意吸塵機多過用掃把掃地﹐因為硬係覺得用掃把會有「漏網之塵」﹐用吸塵機吸鬼咗就一了百了﹐雖然唔擔保可以將全部嘅塵都吸到一乾二淨﹐不過好過無喇。

每日我就係重複做以上嘅野﹐口水禧間房多D野做﹐因為除咗要吸地下嘅塵之外﹐重有佢床側邊D櫃仔頂上﹑裝玩具嘅箱蓋﹑燈罩﹑梳化床等等﹐所以佢成日問我做乜要吸塵﹐我都同佢講就係因為佢我先要做多D野呀﹐麻煩友﹗

四歲半喇﹐決定要佢幫手做D家務先得。如果唔係﹐呀媽真係唔擺得耐架喇﹗

叫佢自己摺張被仔﹐見佢都好比心機咁左摺右摺﹐雖然包到成隻雲吞咁樣有D詼諧﹐不過都叫做肯嘗試去做﹐好過無喇。最緊要係呢個形狀都塞到入去衣櫃裡面﹐唔洗我再摺過﹐OK喇﹐過關﹗

有時D衫洗完乾好咗要摺﹐佢都會埋嚟幫手﹐不過佢摺衫嘅技術就暫時都不敢恭維﹐事關佢大哥係捲衫而唔係摺衫﹐件件咁捲咪「巢」囉﹐到時咪要我燙﹖有無發現我哋三件唔著裇衫﹖咪就係我唔想燙衫吖嘛﹗所以買衫嘅時候盡兩避開D要燙嘅質地﹐買T裇就最好﹗唔係我唔識燙衫﹐以前個個禮拜要燙校服訓練有數﹐我不知燙得幾靚呀﹗不過係而家覺得無必要著裇衫﹐燙餐懵著一著又洗﹐跟住又要再燙﹐嘥時間兼戇居﹐所以我哋嘅櫃裡面係無乜裇衫嘅。除非第時有人發明一部機﹐劈件衫入去會自己燙靚晒出返嚟喇﹐嗰陣就可以考慮下買裇衫。

所以禧婆婆買衫比口水禧都好醒目﹐唔會買裇衫﹐因為佢知佢個女我寧願將件靚衫擺喺櫃等發霉都唔會攞出嚟比個孫著﹐買嚟盞嘥錢。

自細訓練佢自己執野保持間房乾淨﹐可保我將來唔會入佢房時叉錯腳踩到佢D著過嘅底橫﹑臭襪﹑泥褲﹑汗臭衫﹗男人多過女人嘅屋企通常都執到個女人PK﹐唔訓練好佢哋盞對唔住自己條腰同對手呀大佬﹗

禧媽

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)