為期六日嘅最後一個summer school終於喺今日酷熱嘅天氣之下曲終人散喇。好野﹐明早可以自由活動﹐唔洗趕頭趕命趕返學﹗
有咩自由活動﹖多喇﹐你話勒﹐一個思奶點會無野做架﹖除咗唔想做嗰陣會呃自己無野做﹐但其實D野多到十對手都做唔晒就有啫﹗
而家夜晚質咗口水禧上床後﹐我就去繼續洗碗抹爐頭嗰D﹐搞掂個廚房就去sunroom吸下塵﹐咁我第二朝就淨係吸下禧爸個書房﹑廳同房就得喇。以前一獲過做晒﹐因為成日覺得抹一個地方但唔抹其他地方﹐咁對拖鞋踩過未抹嗰度再行返嚟抹咗嗰度咪即係帶埋D塵嚟囉﹖(係﹐我係變變哋態嘅﹗
)雖然今時今日仍然係咁樣諗﹐不過有時都要向現實低頭﹐個仔越嚟越大﹐都係時候要每日攝多少少時間教下佢野﹑一齊玩下遊戲睇下書﹑畫下野﹑去下打書釘等等……咩都好喇﹐總之就要陪佢多少少喇。一日24小時都兩母子困獸鬥咁重要陪多少少﹖係呀﹐我同佢一齊喺屋企但唔代表我有好多時間都同佢一齊活動架。
講出嚟都無人會信一個全天候喺屋企打躉嘅媽媽會無時間陪呀仔玩﹐但事實如此﹐我亦無需掩飾D咩﹐感覺口水禧開始有想接收更多新知識嘅行為﹐所以覺得係時候教仔囉﹐就係咁簡單。
原諒我成日講講下會唔知飄咗去邊﹐離晒題咁﹐呢個咪就係點解呢個blog咁Q多字有時連我自己都會睇到眼瞓嘅原因囉﹗
(係未好抵C呢我﹖)而家早起身﹐忙完一整日到夜晚可以有時間坐低靜靜出blog之時﹐腦袋已經極度疲倦(無blog出嗰日即係已經疲到無晒電)﹐組織能力大減﹐遊花園能力大增﹐請多多包容﹗(頂﹗重未入正題……
)
好喇﹐講返個暑期班先。好不容易就上完晒六堂嘅Pre-Kindergarten (幼稚園學前班)﹐亦都對將來口水禧去pre-K甚至係幼稚園有少少概念。第一日返嘅時候﹐我以為幫口水禧報錯咗班﹐除咗因為一個preschool嘅同班同學都見唔到之外﹐對於上堂嘅流程都非常詫異﹐無諗過老師會好似教小學生咁上堂﹗circle time唔再玩玩下咁進行﹐而係教D常識野如地深吸力同磁場﹔要小朋友運用邏輯思考答問題﹐例如﹕老師有次問D小朋友知唔知自己圍住太陽行咗幾多圈﹖我初初聽到以為佢哋要答五年﹐但小朋友答五次。我即刻覺得自己有嚴重嘅智商問題﹗
又有一次﹐老師問磁石嘅周圍有乜野我哋睇唔見﹐有個細路(七歲)答”magetic field”(磁場)﹐我活咗三十幾年﹐真係唔識。除咗呢D野﹐老師重會講完小段句子﹐然後要小朋友跟住一齊講﹐嗰幾句野﹐我家下都未記得晒﹐莫講話口水禧。
除咗circle time之外﹐老師比小朋友做嘅手工都唔係好似以前preschool咗嗰D是但亂Q咁畫就交貨嘅野﹐你都睇見之前有篇blog有個video影住個平衡玩具喺條繩上面行架喇﹐嗰舊野就係其中一件手工。重有一D剪剪貼貼嘅野﹐口水禧手腳未有其他大少少嘅同學咁靈活﹐所以都要揾人幫手剪下﹐其他差唔多年紀嘅間唔中都會有D野做唔到要我哋大人幫手做。
所以我初初真係以為報錯咗班﹐送咗口水禧去大個仔班添。今日做手工嗰陣多口問下班中大D嘅小朋友究竟呢個summer school係咩名﹐佢哋確認咗話係pre-K﹐咁我都定D﹐如果唔係﹐返咗六日先知道去錯班嘅話﹐都咪話唔好笑﹗要知道我成日都會搭錯車﹑行錯路﹑記錯日期架嘛﹐咁去錯班呢D咁難得嘅事又真係好難唔發生喺我身上架喎﹗
不過諗真D﹐其實D細路都差唔多五歲﹐係時候真真正正咁返學喇。再係咁hea法﹐家長可能會以為學校呃錢架﹗
其實比起我細個返幼稚園﹐而家呢度pre-K嘅課程都係算超hea﹐邊有好似以前係咁抄抄寫寫﹐認字計數讀英文。
但我識寫咁多字﹑識讀識串晒D英文生字﹑數學就…..到頭來一個七歲嘅都知咩係magetic field而我係唔知嘅﹔五歲嘅都知自己圍咗個太陽行咗五次而我重以為人哋答錯……真係枉我讀咗廿年書﹗
唔緊要﹐好彩我除時都可以去口水禧學校上霸王堂﹐超﹗從新再返過學之嘛﹐有幾難﹗
已經幾日無見sparky嘅人發達喇﹐呢篇blog有幾張sparky嘅玉照同video。想睇蛇吞鼠嘅朋友﹐唔好意思喇﹐老師已經靜雞雞吼學校無人嘅時候餵咗sparky食大餐﹐所以大家無緣睇sparky嘅天才表演喇。
不過﹐sparky食咗大餐都需要排毒嘅﹐尋日老師放咗sparky出嚟遊街﹐諗住比佢郁動下方便佢「爆石」﹐但被萬人圍嘅情況之下﹐sparky難以輕鬆散步﹐只有極度驚慌想揾窿捐。
老師一放sparky落沙池﹐小朋友洶湧而上﹐sparky抵受唔住眾人嘅熱情歡呼﹐見有塊木板就即刻想匿埋﹐點知發現自己大半條身驅重係外露﹐真係把鬼﹗
行蹤敗露之後繼續極速走難
知道自己太長﹐面前有個雪糕筒都費時爬入去﹐費事一陣唔夠位縮埋條尾入去又比人扯返出嚟瘀爆﹗身邊嘅歡呼聲不絕於耳﹐成個紅館登台嘅大明星一樣﹗
結果﹐梗係疴唔出喇。可憐嘅sparky唯有忍住篤C返屋企。
八十後嘅小朋友應該唔知嗰兩句歌詞出自何處。八十前嘅唔好扮野﹐劉美君嗰首「Jay﹐一張醉臉傻痴痴……」你無理由會唔知嘅﹗點解未聽過下低嗰句﹖梗係喇﹐啱啱新鮮滾熱辣我作架嘛﹗(係﹐我低俗﹐我核突﹐但我無喺金紫荊廣場亂派野比人吖﹗)
************************
你無睇錯﹐係有個麻甩仔玩煮飯仔。見佢喺學校都好鍾意玩﹐所以整返套返嚟陪佢一齊玩。我細個無玩過呀﹐皆因我走去玩返D麻甩仔野吖嘛﹐踢波爬樹捉蟲擔泥嗰D。口水禧見到呢套野好興奮﹐明明眼瞓到就係頂唔順暈低都要玩一陣先肯去瞓。好喇﹐睇佢老豆個款都唔慌識玩呢尾野﹐等我呢個日日都玩真嗰D嘅陪下個仔顛下喇。
我哋扮開餐廳﹐我係廚師﹐佢係廚師加企枱同傳菜。但佢亂咁標價﹐一碟意粉收人USD50﹔生果盤﹑下午茶﹑消夜通通USD50﹗但成隻雞又係USD50喎﹗點做生意架﹖開頭重話唔收錢添﹗我話咁等執笠都得喇﹗好彩有一下比我考佢﹐佢都無比我大起。我話有碟野要收平D﹐佢話收USD30﹔有碟野要收多D﹐佢話收USD60。好在啫﹐幾驚佢唔知咩叫收少D咩叫收多D呀﹗
燉咗煲雞湯比佢老豆﹐拿拿臨攞入書房叫佢老豆飲。
都話咗個老豆唔識玩煮飯仔架喇﹐初頭就咁應咗一野就將個煲擺喺隔離﹐到我叫佢要雀躍D飲﹐佢先係咁二好唔入戲咁飲比個仔睇﹐不過口水禧都好開心咁出返去繼續煮。個老豆揸住隻雞做咩呀﹖﹖﹖食呀﹗
導演﹗﹗﹗﹗﹗﹗﹗﹗呢個老臨炒咗佢喇﹗
USD50
USD50﹐點解咁貴﹖梗係喇﹐大廚禧連個鑊(藍色)都送埋比你食喎﹗
當佢見到我食得好滋味嘅時候﹐佢話要跟埋我一齊食。點知佢趴喺地下好似動物咁食。如果你見到個細路咁樣﹐你會唔會丙呢﹖
我有無丙﹖你覺得呢﹖估下﹗我都想知道自己喺人哋眼中係個咩呀媽。
