0

Spring Break

口水禧與媽媽嘅第一個spring break終於揭冪喇﹗

話實咩係spring break我都唔係好清楚﹐淨係知個個學生都有假放啫。不過間間學校可能放假嘅時間都唔一樣﹐但係肯定係喺呢個時候放。口水禧學校放一個禮拜﹐即係呢個星期我哋唔洗再晨咁早起身趕到倒瀉X咁仆到返學校。無錯﹐佢放假﹐最開心嘅暫時係我。

如果有睇過我講幼稚園嘅點滴應該都知道我細個係坐褓母車返學嘅。因為住得遠﹐所以我日日都係頭幾個上車嘅小朋友﹐朝早六點半就上車﹐唔記得學校幾點上堂﹐但好記得我每日都係遲到罰企嗰個。

到咗小學﹐我係返下晝班嘅﹐十一點半上車﹐十二點半就返到學校﹐無遲過到。我肯定係個下晝班嘅材料﹐因為我最憎就係星期六長週返朝早﹐又係六點半上車﹐七點半返到學校﹐半個魂魄重喺屋企瞓緊覺。特別係冬天尤其痛苦﹐我住郊區﹐冬天凍到唔係人咁品。嗰陣無而家咁多咩暖爐暖包暖乜暖物﹐得件啡色羊毛底衫﹐唔係好暖但超「吉」肉﹐著晒D底衫+羊毛底衫+棉背心+恤衫+校服裙+冷衫+校褸之後……對隔勒底都好難夾得埋﹐成舊粽咁「碌」返學﹐上半身郁得好似鐵甲人﹐下半身凍到夾住對大脾行﹐絲襪加長灰襪從來都同保暖係無關係嘅﹐嘥氣﹗男仔就好喇﹐有條長褲﹐入面著條虧佬褲都得﹐女仔就真係無辦法可以保住對腳嘅溫度。

所以超憎返上晝班﹗不過到咗中學就梗係點憎都要返學喇﹐一路到大學都有朝早堂要上﹐真係攞命﹗

口水禧一個星期返三日學﹐重要係隔日返﹐聽落好似好正咁喎﹐實情都唔係嘅﹐通常放假嗰日嘅時間表係緊過返學嗰日﹐因為返學之前一晚要八點踢佢去瞓﹐所以嗰晚要好早食晚飯。而且嗰日唔可以比佢瞓晏覺﹐因為佢朝早通常都唔係好早起身﹐九點幾起身之後如果要瞓晏覺起碼都要過咗下晝三點先瞓得著﹐三點先瞓晏覺就差唔多五﹑六點先起身﹐咁八點就根本瞓唔著。所以省咗個晏覺嘅話就要六點幾食飯﹐一來襯佢重有少少電快手食飯﹐二來等佢可以食完抖一陣先去瞓可以去多幾次廁所﹐咁就唔會漏尿(係﹐間唔中都重會)。所以嗰日嘅時間要好好安排﹐咁先可以比佢嗰晚瞓飽第二日夠精神去返學。

第二朝起身之後嘅倒瀉X情況就唔洗形容﹐其實呢度返學已經叫做輕鬆好多﹐遲到都唔係好大件事(preschool)﹐所以都唔洗超級追殺D細路要快快快嘅﹐除咗我要co-op嗰日就要催口水禧快D食快D呢樣嗰樣。所以一個星期落嚟有五日都係處於少少精神緊張嘅狀態﹐對於spring break放一個星期就梗係開心到飛起喇﹗至少真係比我瞓多少少先起身吖大佬﹐唔洗問點解喇係嘛﹖放假嘅時候﹐所有嘅野都變得唔係咁趕﹐做又得唔做又得﹐情緒好D﹐某人曳嘅話都柄少D喇。

好好彩﹐嚟緊九月開學嘅prek-k生涯﹐口水禧係返下晝班呀﹗YES!!!YES!!!!YES!!!!十二點幾先返學﹐下晝兩點幾三點放學﹐簡直係無得彈呀﹗(暫時我覺得喇)不過唯一唔好嘅就係夏天會好熱囉。中午有時會熱到九十幾一百度華氏﹐即係差唔多攝氏三十幾四十度﹐邊個去co-op睇室外嗰個家長就真係人肉BBQ喇﹗一個星期返四日學﹐即係有可能一個禮拜要去co-op兩次﹐想唔中暑都要諗下帶D乜去降溫好﹗重要買定幾支太陽油去頂住烈日當空曬到甩皮﹐好彩我有頂好大嘅草帽愛嚟平時喺出面淋花嗰陣戴嘅﹐睇怕都要帶埋呢D私伙野出動先得。++

Spring break呢個禮拜都無乜特別節目﹐因為禧爸無spring break嘅﹐所以我哋都係好似平時咁樣生活。某人都係繼續定時起身定時瞓晏覺玩玩具食瞓疴﹐夜晚晏少少瞓都無問題。

其他人有D會一家大細去第二度玩下﹐如果唔係就要等到暑假﹑感恩節或者聖誕加新年先有得成家人一齊放假去玩。老師叫我哋要襯D細路未上小學之前好好珍惜呢D假期﹐小朋友上咗小學之後就無咁容易喺淡季去玩喇。我哋都諗第時禧哥讀咗小學之後我哋點樣去香港好呢﹖暑假又鬼咁熱﹐聖誕D機票又好鬼貴﹐點算好﹖﹖﹖﹖個人覺得請假去香港係無問題嘅﹐不過學校肯定好唔happy﹐由其係公立學校﹐因為學生唔返一日學政府就比少一日資助嗰個學生返學嘅錢﹐變相即係影響學校個荷包﹐所以除非係有病或者屋企有事﹐如果唔係比佢哋知道你請假去旅行嘅話﹐可能會意見多多呀之呀jor都唔定…..

上個星期五spring break假期前一日喺學校撞見個同學家長﹐我口痕同人打牙「較」嗰陣問人假期會唔會去第二度玩﹐嗰個媽媽話唔會喇﹐重問我哋會唔會去第二度玩﹐我話禧爸要返工﹐所以我哋都唔會去邊度。跟手個媽媽就話﹕「呀﹐咁好吖﹐我哋可以約個playdate出嚟玩吖﹗」原來喺呢度放假前問人哋會唔會去第二度玩會引伸落去等如約人去玩嘅意思﹐我嗰下先知咋。不過都會有D人答完就算﹐因為唔係好熟嘅話都未必會問你約唔約個playdate嘅。我同嗰個媽媽有時喺學校都傾到下計﹐所以都算比較熟﹐可能咁樣佢以為我約佢同佢個小朋友去玩。無所謂喇﹐等口水禧同人哋有個playdate都好嘅﹐有得免費補英文喎﹗(係﹐我係cheap﹗講下笑唔係唔得呀﹖)

實情係想口水禧有個學校朋友熟落下﹐第時返學都無咁路人甲。以前問佢想唔想有playdate佢都麻麻哋。而家問佢﹐佢會話好。可能大個咗少少開始會想有D社交活動。正式脫離幼兒時期嗰陣嘅自己同自己玩style。相信不久嘅將來﹐我都會加入其他家長車出車入管接管送D少爺小姐去playdate或者party嘅行列。Yeah!

呢排間唔中都會同口水禧講下英文﹐發現佢返到學校會主動撩下同學講兩句﹐變返好似去香港之前咁。雖然條友仔間唔史會話﹕「我唔洗講英文呀﹗no english! no english!」之但係講完呢句野之後佢又會問下呢個字英文點講嗰句野英文點講。所以有時我哋都費時睬佢﹐照講可也。

我發現一點好有趣﹐當我講一句英文嘅時候﹐好多時口水禧都會話﹕「呀﹐你講咩呀﹖即係點解呀﹖」例如我問”what is your favourite fruit?”(你鍾意食乜野生果﹖)﹐如果佢唔識答﹐我就會話”I like apple, kiwi and banana. (講嘅時候同時指住我講嘅嗰三樣生果)What about you(指住佢)?”講多兩次﹐佢就會知道要答乜野﹐慢慢會講幾樣佢鍾意食嘅生果名。跟住我哋再教埋佢成句講” I like banana, apple and kiwi.”叫佢成句野講一次﹐佢就會跟住講一句。即係話﹐教佢講英文嘅時候唔好佢一問點解就即刻講個中文解釋出嚟﹐講多幾個例子﹐最好有實物比佢睇到﹐再加一D肢體語言同埋動作﹐等佢估下個意思先﹐慢慢佢就會領略到大概嘅意思。我喺學校見到口水禧嘅老師同D唔識英文嘅小朋友講野都係咁樣手口並用咁溝通﹐多數D細路都明﹐如果真係唔知講乜先至會叫佢媽媽嚟翻譯比佢知。

當然以而家嘅情況﹐太複雜嘅英文係無可能會明﹐莫講話唔識英文嘅口水禧唔明﹐有時佢D鬼仔同學都未必明。所以盡量用好簡單嘅字﹐句子有咁簡單得咁簡單﹐而且講嘅內容要同佢日常生活成日會接觸到嘅野就最好喇。

我發現條友仔而家開始會喺自言自語嘅時候爆英文﹐雖然90%嘅內容係唔知咩野話﹐不過肯定佢係模仿緊卡通片入面D英文對白。唔知道下年去香港嘅時候﹐佢係講咩話架呢﹖

我細個係先學國語然後返學學廣東話﹐但係個過程係點我就完全無印象。所以對於口水禧點樣由淨係講廣東話變成識講流利嘅英文成個過程好有興趣﹐一點一滴都要記低﹗就好似佢細個唔識講野嘅時候﹐屋企超靜﹐間唔中有佢D外星話﹐都係一粒音起兩粒音止﹐嗰陣我同禧爸成日都幢景究竟口水禧識講野嘅時候係會點架呢﹖到而家多野講到想佢停一兩秒都好難﹗有時睇返佢細個嘅video靜到爆都好懷念屋企曾經都大部份時間係好安靜嘅﹐真舒服﹗

所以我要記低佢呢個中文變英文嘅過程﹐第時佢自己睇返都會覺得好搞野。

Spring break重有一個節目就係帶佢去補返D游水堂。話說返香港嗰陣請咗十堂假﹐家下放假得閑就帶佢去上堂。呢排唔知食咗乜野﹐進度突飛猛進﹐個膽大咗﹐所以已經唔洗再攬住老師條腰或頸都游到喇。話咗喇﹐細路大大下自然就識嘅野﹐根本唔洗喺唔適當嘅時候迫佢做。

 

禧媽

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)