大除夕﹐講下搞笑野。
舊史既然沖咗落廁所﹐
得閑先撈返上嚟繼續。
2011
你揾多D﹔
我(老公)揾多D
﹔
你哋健康D﹔
我哋又健康D﹔
你哋開心D﹔
我哋又開心D﹔
最緊要係……
我繼續喪D﹐
我個仔過癮D﹐
我老公比我哋兩仔乸玩多D﹗
大除夕朝早﹐有條友仔神神秘秘
粒聲都無﹐自己喺房度……
睇乜睇得咁入神呀﹖
口水禧﹕嘩﹐原來呀媽真係咁霉架﹗
口水禧﹕陰公囉﹐副身家得嗰雞碎咁多﹐夠唔夠養大我架﹖
口水禧﹕唉﹐都係咪旨意佢喇﹗我自己養自己好過。
口水禧﹕嘩﹐唔知佢第時係咪諗住我養埋佢架呢﹖唔係啩……
講下笑啫﹐我都無存摺嘅。
就算比佢揾到存摺有乜好驚﹖
最驚係比佢揾到D二公﹑三公﹑四五六七八公嘅情信﹐
然後攞去問老豆D字點讀﹗
我每一日執口水禧張床嘅時候
都好鍾意聞下佢張被。
自己個仔嘅味道零舍好聞。
口中猛話佢D野臭﹐
其實自己聞到上咗癮。
企喺我旁邊嘅口水禧﹐
聽到媽媽話佢D野臭會好開心﹐
不停叫我聞下呢樣聞下嗰樣﹐
當我係警犬咁訓練。
Dolly, go!
有邊個細路唔鍾意同人玩大被冚過頭﹖
和哋一大一細笠住張被由房行去書房揾禧爸。
一路行﹐一路四圍摸下﹐
費事大除夕喺自己屋企中頭獎吖嘛﹗
由細個BB嘅時候﹐
我同佢老豆就成日喺幫口水禧換杉時左啜又啜。
唧下呢度嗰度﹐
玩下佢嘅手手腳腳﹐
小時候BB嘅口水禧最開心就係比我哋玩。
我哋成日對住BB時嘅佢話﹕
嘩﹗有個豬仔喺度喎﹐咁鬼香﹐真係要非禮下先﹗
長大後竟然學咗「非禮」呢個詞語。
成日話﹕「呀﹐媽媽﹐你非禮我吖﹗」
仔呀仔﹐喺中國人面前唔好咁講呀﹐
呀媽會比人拉去痞監架大佬﹗
今日﹐佢係被竇裡面比媽媽大肆「非禮」咗一獲。
雙方非常滿意。
重有幫兇同我哋影相添。
除夕夜邀請咗我哋嘅鐵腳朋友嚟食雲吞。
大時大節必定同佢哋一齊過﹐
十年以嚟都係咁樣。
除夕食雲吞幾好吖﹐
我包嘅雲吞成個元寶咁﹐
食咗希望來年大家都賺多D喇﹗
口水禧瞓完晏覺撲出嚟飯廳虎視眈眈望住D雲吞。
見佢個款梗係身痕好想搞喇﹐
唉﹗除夕流流﹐唔比佢掂下佢點會安樂﹗
唯有比D野佢幫手做下﹐
等佢過下手癮喇。
叫佢負責比皮我﹐
佢就一疊幾張咁劈比我。
喂﹐大佬呀﹐咁多張皮包一隻雲吞點包呀﹖
家下唔係包傷風嗰D雲吞呀﹐
唔洗咁厚架﹗
叫佢將我包好嘅雲吞擺去個木盤度﹐
佢就掛住玩皮﹐
逐隻叫佢擺先記得擺。
當中攞攞下拆散我D雲吞當然唔少得。
重要駁嘴駁舌卸膊唔認錯。
呢個助手真係……
炒得兼唔補錢重要佢賠錢添呀﹗
佢老豆話今晚嘅雲吞好好食﹐
叔叔姨姨都話好食﹐
梗係喇﹐口水禧加咗料架嘛﹗
隻隻都比佢「非禮」過……
唔該快手喇﹐人客就到喇﹗
口水禧﹕你有你急﹐我有我玩﹐車﹗
尋晚口水禧問我
媽媽﹐我係邊個生架﹖(作C你﹐咁都問得出口﹗)
我話﹕我囉﹗
口水禧﹕咁你係邊個生架﹖
我﹕婆婆囉。
口水禧﹕咁爸呢﹖
我﹕嫲嫲囉。
口水禧﹕咁公公呢﹖
我﹕公公嘅媽媽生架囉。
口水禧﹕咁……我生咩呀﹖
我﹕你﹖生瘡囉。
口水禧﹕我生巴斯光年呀﹗
我已經有三粒孫喇各位﹗
兩個口水禧老婆
(重記唔記得之前有個video口水禧話自己生咗兩個老婆﹖)
一個巴斯光年。
重點係﹕無個係人
