新年未到咁快開大檔﹖
喂﹗買定離手呀下﹗
開﹗
呢位賭神貴姓呀﹖
洗唔洗企得咁有型呀﹖
輸好多咩﹖
神情好緊張咁喎﹗
目不轉精﹐牛咁眼睥實D牌。
慌C對面嗰個係老千換佢D牌咁款。
諗緊呢鋪如果贏咗就發大達喇。
可以買好多野……
最緊要係可以即刻揾個真嘅Vidal Sassoon修下個髮型先﹐
唔洗再比屋企件A貨Vidal Balloon遭質個頭﹗
口水禧﹕各位睇下我個頭…..
我呀媽真係當我個頭係椰殼架﹗
前面都未算重災區﹐睇下我後面﹗
簡直係慘不忍睹嘅程度喇﹗
崩嘅﹖
唔怪之得佢自己剪剪下即刻話唔剪喇﹐
原來係玩大咗﹗
再剪落去﹐
我諗我要剃光個頭先可以修補到架喇﹗
突然好羨慕老豆﹗
唔洗好似我咁隔幾個月就要食一次驚風散﹗
下個禮拜要返學﹐都唔知點見人﹗
E﹐係咪潛到靚牌呀﹖
潛到靚牌嘅人通常有以下嘅表情﹕
眼角微微向上戚
嘴覺會戚得勁D
面部肌肉放鬆到個嘴控制唔到
所以個口會微微張開
如果係賭身家嘅人重會流埋口水添﹗
個嘴形重帶點輕挑添﹗
通常都係眼神同嘴型先出賣自己
今次連棚牙都穿晒崩添﹗
睇下前面D陰﹐有拋物線架﹗
不過唔等如兩邊嘅拋物線係對稱架下﹗
sorry!
你上咗小學﹐呀媽唔會再搞你個頭。
放心﹗
(口水禧﹕下﹖重要等到小學先可以脫險呀﹖
)
拿拿拿﹐現晒形喇﹗
如果係同人玩show hand﹐
重唔比人估到晒你D牌咩﹐傻佬﹗
真係分分鐘連條底橫都輸埋比人﹗
(禧婆婆﹕咁我要同佢玩鋪show hand先﹗
)
勝利的微笑
風騷得佢吖﹗
Memory game – 對對牌
考記性嘅玩意。D細路寧舍好記性。應承過佢嘅野唔做追你九條街。但係佢應承你嘅野呢又唔等如會記得做架喎。口水禧專門記佢呀媽揸車去錯邊條街﹐行路過咗龍﹐邊度幾時比人抄牌嗰D。(唉﹗)記D有用嘅野喇﹐衰仔﹗
從來都無同佢玩過遊戲﹐一直都係玩D實在嘅玩具例如車呀﹑積木呀﹑公仔嗰D。尋日喺walmart見到呢副牌玩考記性﹐覺得有時間三個人一齊玩下幾過癮﹐又可以大家坐埋一齊玩下﹐又可以見到條友仔玩遊戲嘅真面目- 專打茅波﹐連揭幾張直至揾到張一樣嘅牌為止﹗重要唔排隊﹐未到佢就伸手去揭牌。唔遵守遊戲規則等等。
因為未玩過唔知規舉﹐算喇。玩咗幾次之後開始知道究竟應該點做﹐都會識得等人揭完到自己嗰陣先揭。不過細路未有大人咁好耐性﹐連揭幾野揾唔到牌就會開始茅﹐所以有時都要「鬆章」比佢﹐提下佢邊兩張可能一樣﹐等佢都中下獎有D鼓勵咁喇。
睇嚟開始唔洗齋買玩具比佢﹐可以向遊戲項目入手喇。大佬﹐D玩具執到我CC下﹐見到就火滾喇﹗
