大丈夫

邊個係大丈夫﹖唔係我喇梗係(我點豪極都係女人吖﹗)﹐亦都唔係禧爸喎﹐講緊梗係我屋企另外一件雄性﹐口水禧喇喂﹗何解係大丈夫呢﹖因為大丈夫做咩架﹖估到喇嘛﹖咪就係一言九鼎囉﹐弊就弊在我屋企嗰件大丈夫唔係「鼎」而係「頂」嗰下慘﹗

呢個星期嘅口水禧唔知係進化咗去另一個階段﹐定係個膽又生多咗D毛出嚟﹐日頂夜頂我個X﹐好似顛咗咁﹐總之係又頂唔係又頂﹐我真係頂佢唔順就真﹗

繼續玩相反詞已經係屢見不鮮﹐我都慣咗當聽唔到

﹐有一日我頂唔順同佢講﹐叫佢廢話留返比自己聽唔好講比我聽﹐佢當然係一輪嘴繼續追擊我喇﹐咩「唔係廢話係翠華」﹑「呢D唔係駁嘴係講野」呀上一篇blog都講咗﹐真係應佢又唔係唔應佢又唔係﹐繼續嗌落去盞嘥時間﹗

講大話當食菜﹐問親佢乜乜係咪佢搞爛﹐第一句肯定話唔係。問多幾次都話唔係。直至一係恐嚇或者話如果佢講真話我唔會鬧佢﹐佢先話其實係佢整爛嘅。不過千其唔好以為佢自首等如認錯喎﹐佢係覺得自己咁做無問題架。例如特登踩爛D玩具(係咪好抵C呢﹗

)﹐佢話嗰D唔係特登﹐亦都唔係踩爛﹐佢會理直氣壯咁話﹕「D玩具係爛嘅﹗」或者直頭話﹕「D玩具唔係禧禧嘅﹐禧禧係無玩具嘅﹗」繼而重要繼續豬o翁話我間屋企都係爛嘅﹐禧禧係無屋企嘅一大抽聽完都想大巴星到佢嘴都爛為止嘅廢話。

唔理佢由得佢講咩﹐佢會以為你聽唔到佢講野﹐佢會大聲D﹐叫咗你先﹐你問佢咩事嘅話就上當﹐因為佢會好似播帶咁重複再由頭到尾講多一次頭先嗰段廢話比你聽。我而家已經可以練到聽完都無表情﹐「啊」一聲就算嘅境界。(雖然心裡面就鬧緊﹕「你個seafood鬼吖﹗好想中你塊面呀﹗」

)

再進化D係開始會駁嘴駁到懶有邏輯﹐一句得埋嚟﹐你都唔知點反擊嗰隻。

有日喺車度佢同我講話嗰日喺叔叔屋企想睇怪獸公司﹐但係叔叔揾唔到隻碟。其實隻碟喺我哋屋企﹐但係我哋呃佢話比返叔叔。因為之前佢睇過之後就話驚衣櫃有野跳出嚟嚇佢﹐所以都費事再比佢睇住。但係咁樣解佢聽話唔比佢睇係怕佢會驚﹐佢肯定駁爆我個嘴都唔掂。於是被迫要講大話﹐呃佢話隻碟比咗叔叔。於是咎日當佢話喺叔叔屋企睇唔到套卡通嘅時候﹐我口快講咗話可能隻碟喺我哋度所以叔叔揾唔到﹐佢即刻話﹕「唔係喎﹐爸爸話已經比返叔叔喇喎﹗」於是情急之下唯有屈落叔叔個女度話「可能姐姐攞咗去呢﹗」咁佢先至無再追擊隻碟。

第二樣野又唔見俥咁好記性﹐我叫佢要聽話﹐唔好搞乜野乜野又唔見佢記得﹗

有日喺學校睇緊雞﹐有隻雞好搞野﹐除咗成身都係毛之外﹐連對腳都係毛﹐好似著咗對毛毛鞋咁四圍走。我同口水禧講﹕「嘩﹗嗰隻雞咁多腳毛嘅﹗」佢隨即爆咗句「XXX(佢老豆個花名)都有喇﹗(禧爸係有超多腳毛嘅)」D反應快到我都要

﹗

有日喺廁所佢洗緊手﹐我哋叫佢唔好玩水洗咁耐﹐佢竟然爆咗句﹕「收嗲喇﹗」於是即刻篤佢出嚟﹐話佢知唔可以對住爸爸媽媽或者任何長輩講呢句野﹐只有同好好嘅朋友私底下講笑嘅時候先可以用。佢話﹕「禧禧大個仔喇﹐可以講﹗」(因為前一日我讚佢大個仔﹐可以留喺叔叔屋企都唔喊)於是佢就當咗係我平時教佢一D說話小朋友唔可以講住﹐要大個先可以講呢句野已經生效﹐因為佢大個仔。講比禧婆婆聽﹐佢不知幾開心﹐重話要寄多D禮物嚟答謝口水禧幫佢報仇。車﹗我自有辦法治佢喇﹗

其實我覺得個問題唔係喺佢嘅言語用詞或者頂嘴嘅內容﹐而係佢嘅動機。點解乜都要唱反調﹐重要係好大反應嘅反調添﹗都未計佢夠膽尖叫喝爆我同佢老豆添﹗上個星期放咗學﹐籍住洗多兩個廁所﹐吸耐D塵﹐拖延多D時間同佢個老師研究(應該係請教喇﹐我邊夠資格去同人研究吖﹗)口水禧呢排做咩事咁串﹐老師話小朋友到咗三歲幾四歲﹐就會開始覺得要主導返大人﹐要大人聽佢哋嘅一套﹐小朋友先係話事揸fit人。所以事無大小都要頂咗先﹐如果大人無反對﹐咁咪小朋友贏咗囉。就算大人反對﹐小朋友反抗﹐咁都起碼反抗咗﹐有發言權先。乜權都好喇﹐總之要有D權揸喺手﹐咁就覺得自己大晒喇﹐大個喇﹐有毛有翼﹐巴閉喇﹗亦都可能係佢哋處於又想自己話事但又知道話唔到事﹐有D野又想大人幫佢哋做但又想自己做﹐(差唔多係精神分裂咁款﹗

)﹐於是就會喺自己都好茅盾嘅心情底下亂咁發洩﹐發顛﹐發狂﹑發奴騷……

之前我間唔中都會感覺到口水禧行為上有唔同咗嘅變化﹐然後又好似無事變返平時咁。不過我知道呢次唔會再變返以前嗰隻叫佢做佢就做嘅綿羊﹐家下變咗叫佢做佢唔做唔叫佢做佢即刻做嘅魔童﹗