上次喺醫藥分家度寫過因為一個口罩﹐搞到我同口水禧由天光頻能到天黑先返到屋企﹐有時真係想佢好似香港咁﹐睇完醫生即刻攞藥﹐就算個醫生mark up少少賺D錢都算比佢賺喇﹐如果唔係好似我哋呢度咁成日為咗樽藥騰嚟騰去撲個空﹐嘥時間又嘥油錢得個吉重蝕得多喇﹗
好似我面上嗰粒「羅生」咁﹐星期一去覆診﹐雖然呀羅生已經縮細咗好多﹐由一粒五蚊咁大嘅瘡縮到一毫子咁大﹐但係都重係叫做重有粒野喺裡面吖嘛﹐又唔唧得﹐又唔篤得爆佢﹐醫生見齋食藥都唔係辦法﹐於是就開咗醫生紙叫我去藥房配隻藥膏搽下﹐雙管齊下﹐睇下可唔可以盡快剿滅咗粒「羅生」﹐咪一陣生到周面係我就真係絲襪笠頭先陪到口水禧去返學。
嗰日下晝就已經去咗藥房配藥﹐個藥劑師話無貨要訂﹐叫我第二日(即星期二中午去攞藥)。結果我尋日(星期二)有事無去到攞藥﹐今日口水禧放咗學先一齊去攞喇。點知去到都話未有得攞﹐話打去間廠都話無貨﹗乜呢期潮流興生瘡咩﹖D藥咁搶手嘅﹖
好彩我粒「羅生」已經縮細咗﹐暫時食住藥同用熱毛巾敷面都OK﹐如果唔係﹐等得D藥膏嚟消腫嘅話﹐我睇怕粒野已經腫到我伸條脷去塊面側邊都lam到粒瘡lu!
或者畫D眼耳口鼻上去﹐等自己多個頭仔喺塊面度囉﹗或者話比人聽﹐我大肚大咗上塊面度呀﹗個仔將會喺我個鼻哥窿度順產﹗
所以你話﹐係咪寧願比醫生賺嗰D錢都好過要自己笛幾次都笛唔到支藥膏返嚟吖﹗話聽日有得攞喎﹐信幾多成好呢﹖我預咗粒瘡消失咗都未攞到支藥架喇﹐不過如果等到N日後真係有貨都殺住先喇﹐攞返屋企看門口都好﹐萬一下次「羅生」再嚟探我﹐我都唔洗又等藥等到人哋以為我塊面大肚就生吖﹗
呢度乜都講私癮﹐排隊攞藥都要企遠D。提款都要隔無雷公咁遠架﹐唔似以前喺香港咁﹐後面嗰個人差唔多要扒喺你背脊度等你噤完到佢噤。口水禧見到地下個標誌覺得好好玩﹐好似自己對腳印o岩o岩好fit晒落個標誌對腳印咁。家陣你估係荷里活D明星打手印咩﹐傻仔﹗
等梗個藥劑師打電話追藥﹐呢個人就擒凳落凳﹐騰嚟騰去﹐見無人喺度﹐有得佢自己忙飽佢喇。大鄉里係咁架喇﹗不過我都唔望要做呢度嘅常客喇﹐睬﹗
返完學已經開始電力有限﹐對黑眼圈又出嚟喇。細路仔就係咁﹐眼瞓時有個眼瞓樣﹐但係你問佢眼唔眼瞓﹐佢蛇咬都話自己唔眼瞓架喎。可能佢哋覺得眼瞓應該係連答野都答唔到就合埋咗眼嗰D先叫眼瞓。傻仔﹐返到屋企食咗晏﹐一達落床就上晒「釣魚臺」喇你﹐唔眼瞓吖拿﹗
你睇呢個樣直頭係迷失focus﹐對唔到焦咁制喇﹗你呀媽係青光眼﹐但重未盲架﹐估我真係睇唔出咩﹗好彩九月開學係返上晝班﹐放咗學可以返屋企瞓晏覺叉電。如果早一個月出世嘅話就要被分去下晝班喇﹐下午兩三點嗰陣我諗佢肯定個樣好似人哋食咗迷幻藥咁迷到是但揾個女人認做呀媽都得呀﹗
而家每日都維持要瞓晏覺嘅習慣﹐一瞓可以瞓兩個幾鐘到三個鐘都得。瞓得係好事嚟嘅﹐我被佢疲勞轟炸咗成個上晝都要休息下架﹐佢瞓咗我就可以加速做好D家務﹐寫下blog﹐或者喺梳化度「失去下知覺」都好喇。由其是同佢返學嗰幾日﹐喺梳化失去知覺嘅機會非常大。副新眼鏡重未攞得﹐要戴住隱形眼鏡真係瞓晏覺都唔方便。
「
呢位小朋友﹐藥房無洗牙服務架﹐唔洗擘到個口咁大喇﹗
超級巨聲咪就係咁樣培育出嚟架囉﹗
