媽媽生活隨筆

尋日堪稱係我哋嘅破財日！一日破左成千蚊美金財！我知，好多人一日都洗到成千蚊，但我哋唔係大富之家丫嘛，仔細老婆「亂」（我點敢認自己係嫩口個嫩呀！），禧爸一個人賺三個人洗，一日跌咁多錢出街都咪話無感覺！事緣係前幾日當我出去後園淋花嘅時候，駭然發現一篤人屎咁大篤嘅屎訓左喺我草地上，簡直係勃然大怒！一望就知邊個做嘅好事啦頂！正是纏繞我哋多年嘅浣熊。頂，以前喺一個位爆石我都算，家陣轉移陣地，攪到去草地屙，重要爛爛哋嗰隻，剷又唔剷得晒，留返啲黐喺啲草上幾核凸呀！都未嘔完，尋日再留兩大篤比我留念，重要開始有擴散嘅跡象，惹黎好多烏蠅兼臭到飛起，真係忍無可忍，呢穫唔揾人黎捉真係唔掂！事關浣熊嘅糞便裡面有種寄生蟲對小朋友嘅腦非常危險，輕則破壞個腦，重則送個細路去賣蛋。以前係硬地屙都好清理，而且黎黎去去都係同一個點上屙。家下係四散草地上，需知我屋企有條友會係草地上打滾，見野就執黎玩，萬一執左篤屎黎玩嘅話，我唔敢想象會發生乜野事。早排有人玩我喺出面掃貓屋嘅掃把，結果成頸生粒粒，攪左兩個禮拜先好返。點都唔可以冒險博佢唔會玩屎，唯有call人黎擺籠捉浣熊。第一隻盛惠三百美金，之後每隻一百二十五蚊，捉到唔再黎為止。真係驚捉完之後，我哋三個要去訓街！個叔叔話通常捉幾隻就會停幾年，望就咁望啦！我有一晚半夜望過出窗，見到十幾廿隻...... 攪完浣熊，個銀包重滴緊血，部吸塵機跪低左，攞去整，個叔叔報價同部機買返黎個價差唔多。即係不如買過部好過。又跌幾百蚊！跟住手提電話去左賣蛋，又跌幾百...... 呢個月褲袋穿晒窿，係時候要同個銀包止下血啦！ Read more [...]

我真係唔想口水禧日記呢個blog變左做我嘅私人怨婦「區」樂部，但條氣真係chok上心口咁濟！由於近日嘅花粉敏感好嚴重，唔出得去跑步，我入面個炸蛋就黎要爆，今日已經燃燒緊，火到入面屎都滾咁濟，唯有喺度放低幾「兩」（個輸入法無正確嗰個字嘅？）先，啲粗言穢語今朝已向我老公表演晒，所以而家個口應該乾淨左少少，放心！下星期學校旅行日，平時一班話之你死嘅家長們突然喺外太空返落黎地球，個個都報名話要陪個細路去旅行。好多開學咁耐完全潛水嘅粉皮都竟然有報名，我嗰日真係要睇清楚下呢班自私精嘅真面目先得。由於啲細路係會搭校車去目的地嘅，每班可以有最多七件家長跟車，淨返嗰啲就要自己揸車去。睇到呢度，可能已經估到發生咩事啦。無錯，就係爭住跟車啦。平時得我同另外一個下晝班嘅媽媽做到 Read more [...]

考牌官架到，民婦正在考牌、續牌、述職中~~~~~(人擋殺人，佛擋殺佛狀態中)

梗係唔係真係有獎嗰啲獎啦，我邊有咁好運呀？講緊嘅就係領咗口水禧嘢，佢好返時到我倒下。咁証明其實呢個病毒真係唔嘢小喎，連埋學校病咗嘅小朋友，都可能十個八個人中招，都未計佢哋嘅屋企人有無人領野.前日開始有啲頭痛，繼而就係全身酸痛，心知不妙，怕且都係領咗野啦。於是前晚食咗兩粒樂迅感冒靈，諗住襯嗰病重未發生深厚嘅感情之前試吓可唔可以早啲出招剿滅佢，食完葯重特登提早瞓覺。點知朝早五點天都未光就醒鬼咗要去交水費。就係咁，再瞓返通常都會瞓過龍，遲咗起身，好彩返學無遲到唧。一起身嗰吓feel Read more [...]

今朝因為有人打電話嚟學校講咗一句"you're next"就收咗線﹐成間學校(中學+小學幼稚園)封鎖唔比人出入﹐全部課室﹑乜叉室都要熄燈鎖門﹐大家唔准講野﹐直至警察搜完成間學校先放人。無聊嘅人太多﹐而且最鍾意趁亂出嚟玩野。上個禮拜同今個禮拜已經有幾間學校比人打電話整蠱話放咗炸旦﹐緊急疏散﹐封鎖學校﹐最後證實只係運吉。估唔到我哋都加入埋運吉行列﹐嚇餐飽之餘﹐但凡有人敲課室門都即刻觸動所有神經線﹐開門嗰下好似預咗隨時要將門外嗰個人斬﹑劈﹑殺﹗ 有幾個裝修工人今日入嚟課室嗰陣﹐比我哋幾個大人睥爆﹐由頭掃到落腳﹐幾位壯男被幾位老女﹑中女喪「目及」好不尷尬﹗情境有如被久旱逢甘露dry爆嘅幾隻乸用眼神非禮咁唔自在﹐佢哋一字排開﹐比我地審問完就嚇走咗。比我哋平安返多四日﹐跟住放假﹐因為我哋個個D神經好疲累﹐準備斬劈殺都要用力﹐對眼四圍「目及」G4上身咁﹐好謝好謝﹗ 原來企喺D大人物隔離嘅保鑣係咁辛苦的。甘拜下風。唔洗擔心﹐學校已準備搞家長自衛隊巡校﹐我突然想學扑頭黨絕技﹑迷魂黨神功﹑祈福黨嘅口才﹑水貨黨拖行沉重行李嘅少林金剛腿﹑重有黃金黨嘅即叫即疴(一地黃金﹐扇死D變態佬﹗)﹐重有火雲邪神用手指夾子彈﹗  Read more [...]

我希望死咗嘅小朋友永遠都喺一個開心再無痛苦嘅地方生活﹐唔好再返嚟我哋呢個殘酷嘅世界。自從呢件事發生後﹐新聞每日不停不停咁播﹐一幕幕催淚嘅畫面不停不停咁重複播完又播﹐畫面上D細路個個同我仔差唔多大﹐我自己都好驚再睇呢D畫面﹐但又好想知道政府有無咩對策防止再有類似嘅事喺學校發生﹐所以都好想睇新聞。無奈﹗呢排D人真係黐X咗線﹐戲院又開槍﹑學校又開﹑醫院又開﹑連揸緊車都向街上行人亂開。X﹗呢D曲街幾時比天收呀唔該﹖無乜事﹐唔想去mall﹐唔去買野﹐總之屋企最安全。尋日﹐無奈要同口水禧去買聖誕禮物返學校同同學交換。買野前﹐我哋喺百貨商店食少少野先。食食下有個六尺咁高嘅大山婆﹐頭髮凌亂﹐個樣甩甩漏漏﹐大聲問starbucks嘅職員點解無奶﹐職員話得返全脂奶﹐跟住佢哋對話咗一輪﹐我無聽佢哋講野﹐淨係顧住叫口水禧快D食。食食下﹐嗰個大山婆又好大聲問個職員佢杯凍茶得未。唔知佢哋又對話咗一輪講咩﹐我同口水禧繼續食。食食下﹐條大山婆突然一個羅友好大力咁坐咗喺我哋兩個對面張凳﹐即係同我哋搭檯。呢度﹐只有唐人街先會有機會同人搭檯﹐其他地方好少會有咁嘅情況。就算有﹐你坐之前都會禮貌地問人個位有無人坐啩﹖個大山婆坐落嚟嗰下﹐我同口水禧兩張凳連張檯都彈起咗一下﹐chok咗一野﹐我哋兩個傻咗﹐口水禧本來玩緊玩具都停咗﹐唔敢伸手去攞。我唔敢望個八婆個死人樣﹐因為佢坐低咗之後﹐就好悔氣咁將一杯奶倒落杯凍茶裡面﹐搞都唔搞下就一支飲筒隊落去喪啜。重因為倒奶嗰陣動作大得濟﹐D奶淨污糟咗佢隻手﹐跟住佢問都唔問﹐就攞咗我張紙巾﹐邊悔氣咁抹佢隻手﹐邊喺一分鐘內飲晒佢杯好大嘅凍茶。嗰個飲樣真係衰到我呢世女未見過一個女人﹐飲一杯野可以飲得咁令人想作嘔同打7佢﹗ 喺佢飲緊佢杯屎水之時﹐佢個唔知係老公定情人(講完都想嘔﹗)都一個羅友好大力坐落嚟﹐我同口水禧又比佢哋搞到彈咗一野。佢老公好Q大聲講電話﹐但至少聽佢講野嘅內容係正常嘅。當時口水禧嚇到把膠刀都跌咗落地﹐佢話想去攞過把﹐我都唔知比佢行開去攞定唔比好。因為喺個老公講電話之前﹐我以為佢兩個曲街係黐線嘅﹐我見個大山婆好嬲咁嘅樣﹐再加埋諗起朝早校園槍單野同埋早兩日有個mall﹐有個PK揸槍入去做低咗幾件﹐我驚我哋兩個有乜E郁﹐個八婆會一係攞槍射我哋﹐一係顛起上嚟打獲我哋。我最叻就係喺顛嘅人面前扮無野﹐但其實隔肋底到嚇到濕晒漏水咁濟。於是我細聲叫口水禧快D食(其實都唔知幾想成盒野唔Q食掉咗佢起身即刻走人﹐但又驚會驚動對面兩個黐線佬﹐以為我歧視佢哋)﹐喺嗰一分幾鐘裡面﹐我除咗感覺到成身汗之外﹐我覺得我塊面好熱﹐因為我見口水禧個樣到僵晒﹐但佢重要望住對面嗰兩個人(真係比佢激C﹗)唔係我誇﹐但你真係唔知喺下一秒﹐自己會唔會變咗件人肉避彈衣﹐要幫個仔擋子彈。好彩個死八婆用光速嘅速度飲完杯野同個老公起身走人。嗰一刻真係有嚇到腳軟再有返感覺嘅感覺。我忍唔住都要同口水禧講﹕「嘩﹗我嚇到隔肋底都濕晒呀仔﹗」如果唔係個仔喺度﹐我應該同個大山婆炒咗野。唉﹗好﹗我忍﹗夜晚﹐我揸車同口水禧去揾個朋友嘅仔﹐然後三個人去食飯。揾咗好耐先揾到個街邊位泊車﹐當我倒緊車嘅時候﹐有條PK一個唔該插咗我個位。嗰一刻我真係好嬲﹐準備開車門落車去炒獲甘﹐但一諗起車上唔止有我個仔﹐重有人哋個仔﹐佢兩個是旦一件有事的話﹐我死十次都唔掂。深呼吸﹐好﹗我忍咗佢。揸走架車再揾過個位。公路上比人係咁cut線﹐一係就亂咁停車阻住我行﹐比著以前顛狂嘅日子﹐已經喪咗。但而家我驚人哋發嬲會開槍射我車上嘅人呀﹐好﹗我忍﹗禧婆婆話就係驚我揸車嗰陣會同人霎氣﹐佢話﹕「你知你喇﹐顛起上嚟會琢人車尾﹐一係喺人車頭cut 返線﹐一唔係就舉手指鬧人......」我諗我以後都唔會咁樣喇﹐我忍唔到屎尿屁﹐我都要忍嗰D Read more [...]

一個母親﹐每天最渴望的就是看著孩子蹦蹦跳跳從課室出來﹐牽著媽媽的手一起回家去。這樣的要求不算太高吧﹖ 請為我們這些要求不高的媽媽們出點力﹐控制槍械買賣﹐以及為每所學校加建圍欄鐵閘。我們只想孩子每天平安回來媽媽的懷抱。 Read more [...]