38

三藩市唐人街之旅

點呀?wrapLive用成點呀?有無email左比我但我未加你架?有一組人曾經email左我而我又已經邀請左佢地入我本相簿,但之後佢地成班就無左影啦,喂~喂~喂~喂~~~~~ 返來啦喂!去左邊呀你地?請即與地球通話,over over!

好,入正題啦。無錯,農曆新年嘅年唔知幾多,學校安排左二年班去三藩市嘅唐人街旅行。其實我住得一啲都唔近唐人街,亦好少去嗰度,人多車多但車位少係我最驚嘅地方。黎左咁多年,去過嘅次數應該少過手指加腳趾,因為其實要買唐人嘅野唔一定淨係得三藩市個唐人街先有嘅。

因此聽到「唐人街半日遊」呢個節目,我已經想搵籍口唔去,事關平時嘅唐人街已經好擠迫下架啦,新年流流嘅唐人街就更加唔洗講啦,重要帶住班細路去,莫講話帶廿幾個,淨係帶口水禧一個我都嫌多啦。但一個唐人唔參加「唐人街半日遊」又真係怪左啲,而且我個人唔想去又唔等如口水禧唔想去啫。咁佢去,我就要去架啦,事關啲細路去到啲咁繁忙嘅街道就會好容易忘我得濟發生意外,唔通到時我賴人地家長義工無睇實我個仔咩,係咪先?唉,咁唯有去啦。

一如以往,平時叫人幫手就完全無人,但學校旅行嗰日就突然有好多義工「上水換氧氣筒」,我完全費時追究點解我又無校車搭要自己揸車啦,因為我一早就迫左禧爸嗰日放半日假,同我一齊去,所以有無校車坐對我黎講已經唔重要。

 

IMG_0139

登凳!各位觀眾,等我黎介紹,呢個就係三藩市唐人街其中一條街啦。係咪好有節日氣氛呢!我已經完全記唔起我細個嗰陣究竟有無見過咁樣造型嘅香港啦,最記得見過呢個情境嘅大多數係喺西片入面啲唐人街,我感覺上啲唐人街外貌keep左幾廿年都係呢個樣,好少轉款。

本來我地自己揸車嘅家長要同坐校車嘅人喺牌方度集合嘅,但我地去到嘅時候,佢地已經成班步操緊上黎,所以我地就無機會影到個牌方啦。三藩市嘅唐人街除左有好多唐人住之外,呢度重係遊客區黎架,所以有幾條街嘅鋪頭係賣緊我地香港幾廿年前尖沙咀遊客區會賣嘅富有濃厚中國風色彩嘅手工藝品,啲外國遊客黎到呢度梗係好容易「中招」買唔少啦。

IMG_0138

呢對野在我眼中有少少恐怖,但在外國人眼中叫靚。又金又紅,成對野滿晒圖畫咁,佢地覺得好有中國特色,手工精緻,間唔中喺街都見過有外國人著。

IMG_0129我地一行三班人分唔同地點同時間去逛由老師預先編排好嘅行程,咁就唔洗同一時間塞爆人地條街,甚至係鋪頭。我地班第一站係去左參觀整fortune cookie嘅工場。咪以為係好大嗰種喎,其實個場細到唔夠容納我地全部細路同家長。於是我地要分批入去行個圈就要出返黎,老師話大人細路都唔可以買野,費事耽誤時間喎。當我地入去嘅時候,老闆重免費派左啲餅比我地食,可能諗住會兜到啲生意,點知我地一輪衝風入去洗劫完之後乜鬼都無買就出返黎,我以為老師會叫一個家長代全班買啦,點知無喎,其實真係唔好意思,我地之後重有兩班同學會去參觀架嘛!我覺得學校好似無預先同人講聲會有學生去參觀,所以場面都幾尷尬,話晒新年流流丫嘛!有時啲文化衝突咪就係咁樣黎架囉。

IMG_0134

混完吉之後,我地成隊人馬就穿過啲橫街窄巷去左第二條街。途經一間雜貨鋪,門口掛左好多條鹹魚,啲細路個個「摙」住個鼻猛話好臭,低頭見到其他乾貨,個個鬼喳大叫咁,行過嘅行人不禁望住我地成班嘩鬼,完全唔知班細路喺度驚呼啲乜,又係嘅,嗰啲野我日見夜見,當然覺得無乜特別丫;但啲未見過嘅就會覺得一條魚曬乾左吊喺度又咁大味,重連埋個頭咁恐怖,梗係叫啦。外國嘅超市,好少會見到血淋淋嘅魚或動物放喺攤檔度擺賣。魚通常切好晒一塊塊魚扒,成條魚嘅話會放喺啲碎冰上面,乾乾淨淨,一滴血都見唔到。雞鴨兔唔會見到頭;牛豬羊就更加唔會比你見到好似香港街市豬肉檔地下成隻豬訓喺度添啦。見到啲細路望見吊鹹魚都咁大反應,我個內心呢諗緊:「哈!你班友仔一陣入去中藥鋪嗰陣扶實唔好暈呀!」(係我認我唔係人!hard-laugh

呀,唔知係咪全美國唐人街都係咁叫,三藩市嘅唐人街裡面,你會見到好多招牌寫住「XX孖結」,係咪諗爆頭都唔知咩黎呢?嗱!我估架咋,我無專登去查明個真相,我諗就係英文’market’ 唔知點樣啟發出黎變左「孖結」,我初初黎聽啲人講話「買乜買物去乜乜孖結啦,大把貨」,我R左好耐頭都唔知佢講乜Q,後來去到唐人街先知。佢地啲翻譯真係好另類,例如’apartment’ 叫「栢文」;’sunroom’叫「太陽間」;我聽好多啲老華僑叫唐人街叫「唐人埠」;中國人又會叫自己做唐人。不過後生啲海外華人學生當然唔會咁樣講野啦,除非佢地有老一輩,黎左好耐嘅親人同佢地一齊住,耳濡目染之下跟埋一齊講啦。

 

IMG_0124

有一樣野我覺得好奇怪嘅係雖然唐人街都幾多黎自中國大陸嘅人,但喺街又唔多覺好多簡體中文字喎。不過呢度嘅中文學校就大多數教啲細路寫簡體字,我唔清楚有無教繁體字嘅學校,其實我唔識睇或寫簡體字,近乎「簡體字文盲」嗰個境界添。個人唔鍾意簡體字,因為覺得佢破壞左中文字嘅美感。如果要教口水禧寫中文,我會教佢寫繁體。想學簡體唯有靠佢大個自己學啦,因為個呀媽都無能為力!

IMG_0128

 

班友去完藥材鋪之後,我地就去到呢個「天后古廟」樓下。藥材鋪裡面發生過咩事我完全唔知,因為我無入去,諗住留返啲機會比班平時絕對無可能會去嘅細路入去見識下啦,我又唔係未見過。

好彩老師都知道廟係唔可以亂入去玩嘅,始終都應該要尊重返人地嘅宗教,係咪先?於是老師搵左其中一個家長上去問下廟嘅主持可唔可以比班細路上去,人地當然唔比啦,理由係新年好多人喺度做緊法事,所以唔方便有小朋友喺度行黎行去騷擾人。無得入廟,我地只好繼續去下一個景點,無得參觀廟,但我地可以入教堂。

 

IMG_0148

呢座係好出名嘅St. Mary’s Church。聽老師講,1906年三藩市嗰場超級大地震當中,呢個教堂四圍嘅建築物都倒塌晒,唯獨是教堂屹立不倒,雖然之後都有因為地震而發生過火災,但1909年修咠左之後就一直喺同一個位至今。

IMG_0155

 

帶左班細路入去教堂,好彩佢地都好醒目,知道要保持安靜,因為當時教堂入面有學校舉行緊活動。我重聽到佢地唱廣東話嘅賀年歌添!估唔到喎真係!由於我地住嘅地方無三藩市咁多唐人,所以平時真係好少喺街聽到廣東話,就算去唐人超市,都會比較多機會聽到國語,突然聽到廣東話賀年歌真係覺得好驚訝,佢地唱嗰啲係大家農曆新年喺電視聽啲明星唱嗰啲賀年歌呀,聽到啲歌會令人諗起薛家燕……同埋佢粒墨。hard-laugh

IMG_0171

喺教堂坐左一輪之後,由於未到放飯時間,有住過唐人街嘅家長提議可以帶班嘩鬼去附近嘅一個公園放下電。於是喺我地去公園之前,我地帶左班友去參觀餅鋪(又係餅!)正所謂外國人嘅口味同中國人,甚至係香港人都甚不同,對我黎講,我諗香港人係最嘴刁嘅。又或者係習慣左一種口味同飲食文化之後,其實要改變確係唔容易。我黎左咁耐,絕少幫襯呢啲「好地道」嘅唐人街餅鋪,一來裝修「太復古」,「復古」到我完全記唔起佢係屬於邊個年代。二來食慣香港餅鋪嘅野,我只可以話我自己唔太鍾意呢邊嘅餅鋪嘅口味。其實呢度係有奇華餅家、85C,生計呀呢啲比較近似香港口味嘅餅鋪,但都唔啱我,係,我認我確係難服侍depressed,所以抵我無包食囉。

 

IMG_0176

拿,唐人街餅鋪嘅店內面貌就係咁樣嘅。silly 我相信一定有其他比呢間更「復古」嘅。

好彩我嗰日因為無校車搭,所以我唔洗做chaperone,即係類似保母車嘅跟車義工,職責當然唔止跟車咁野少啦,重要負責被分配入自己嗰組嘅小朋友喺「旅途」上一切嘅事項,包括佢地嘅安全同紀律。如果老師咁啱睇得起你,分幾件完全唔受控嘅比你,包你全程都會喺心裡面大唱「人在旅途灑淚時」。吓?唔知咩歌?唉!我都唔知架,我問禧爸架咋。hard-laugh 

點解會咁講呢?事緣我嗰日呢就負責影相架啫,入到餅鋪,啲細路見到有野食,新奇又好玩,一次過滿足晒佢地嘅願望,哇!啲情緒澎湃得幾洶湧呀,大叫聲此起彼「唔落」,比起頭先去fortune cookie工場更有「洗劫」feel。臨行前,老師比左啲錢每組嘅chaperone,等佢地喺餅鋪買野比啲細路,每人可以揀一件餅食,小朋友有得揀野食啦喎,真係老豆呀媽係邊個都無所謂,邊個揸錢嘅就認佢做爹娘啦。

我匆匆影幾張相之後就即刻退返出去店外,哇,當堂覺得街外係世外桃源,裡面真係戰場一樣。

正當我企喺街同一眾家長吹水之際,突然眼尾有個熟悉嘅身影喺我附近好開心咁食緊一個全場最多朱古力嘅大件餅,個個家長都係度邊嘩嘩聲邊偷笑話:「哈!今日有排癲啦佢!」正當我轉身諗住湊下熱鬧睇下邊個傻丙咁餓之際,嗰個傻丙原來就係我個仔cyclopse 唉~~~~~ (妖……

口水禧有個特點就係無懼幾多眼睛注視緊自己,幾多支spotlight照住自己個頭都好,佢會繼續一係優栽悠栽做佢做緊嘅野;或者繼續堅持做佢想做嘅事,完全唔受其他人或事嘅影響。所以喺九萬幾隻眼望住竊笑嘅情況之下,佢眯起雙眼開心地享受佢手上嘅朱古力餅。thumbs-up 而佢嘅母親大人亦只有企喺佢側邊抹汗。

IMG_0257

嘆完「大餐」之後,我地就帶佢地去公園放下電先,因為重未到放飯時間。呢度大部份嘅酒樓唔會好似香港嘅酒樓開咁早,所以喺香港飲慣早茶嘅人黎度三藩市恐怕要飲中茶啦。如果一定要好早食早餐嘅話,一係就去食西式早餐;一係就去上面相片中嘅麵包鋪買麵包,再唔係咪自己煮囉。無計,尤其係住得離唐人區比較遠嘅人就更加無「飲早茶」呢回事啦,三藩市已經算比較好,有較多唐人野,如果住係啲無咁多中國人嘅州的話,飲餐茶可能要揸成粒鐘頭車先有得飲,飲完再揸成粒鐘車先返到屋企架。

喺公園玩左大約二十分鐘,終於等到放飯時間啦。頭先去完麵包鋪係啲細路食野咋,我地大人無食過野架。我朝早六點食完早餐之後就無再進食過啦,有啲家長直頭連早餐都未食添。於是集合好啲細路點好人數之後,我地就成班向住一間預先book好嘅唐人街中式酒樓進發。

我係一個食野幾麻煩嘅人,味覺比較敏感嘅人就係咁痛苦架啦。不過,喺無得揀嘅情況之下我都會硬食面前嘅食物,我連印尼嘅烏蠅餐都照食,必要時,可以突然乜食物都入得口嘅。味覺神經好敏感嘅人,少少怪味都逃唔過佢條脷同個鼻,有得揀嘅話,我會唔食或者只食好少,留返個肚去食其他合乎我要求嘅食物。三藩市唐人街嘅大部份中餐館(我只敢講三藩市啦,其他未試過),以我個人黎講係好少機會令我有食欲嘅。嗱!住唐人街嘅人唔好噓我先,我都認左係我自己食野麻煩咯,口味嘅野好個人嘅,係咪先?

雖然確實係有啲肚餓,然而我清楚呢一餐我應該唔會搵到啱我食嘅野架啦。不過點都要比下面食少少咁啦。如果唔係,齋坐喺度,乜都唔食又好怪相架嘛。

第一道餸類似炸雲吞咁嘅野,不過佢裡面係無乜「涵」嘅。口水禧側邊坐左個菲律賓裔嘅同學,佢一穫就夾左四、五件去之己隻碟度。口裡面食緊,隻手已經唔理其他人夾緊轉盤上面嘅野食,佢就起勢想將碟炸雲吞轉返過黎自己面前再夾。對面坐左幾個白人同學同家長望住佢呆左。

說時遲那時快,喺菲律賓同學嘅側邊係一位中國人同學同佢媽媽。同學仔發嘮騷話肚餓,佢媽媽叫佢食炸雲吞,但同學仔話唔鍾意食。就係咁,一個猛嗌肚餓,另一個就話肚餓嗰個自己唔食炸雲吞。肚餓嘅被鬧,郁手打呀媽。

對面嘅白人同學同埋家長靜晒,望住我地呢邊。

幾個餸之後,就係凡中餐館必有嘅幸運曲奇。菲律賓同學照樣一野立咗幾個落自己隻碟。今次中國同學唔執輸,佢都立咗幾個落自己隻碟。佢媽媽初初食緊野睇唔見呀仔立咗咁多,後來佢發現咗之後,邊鬧個仔之餘,將呀仔碟中嘅幾個幸運曲奇掉返落出面「公海」隻大碟度,佢話要留返比其他人食

白人同學同家長,重有我,呆。

餐飯未埋單,我就要先離開。事關校巴可以行特快線,而我揸車就要塞車。唔預早啲時間,一陣校巴返到去,我重未返到,口水禧就要踎喺學校等我。個個散晒水得返佢一條友喺度遊蕩確實唔係幾安全。

呢篇野橫誇大半年黎寫真係有無咁誇張呀!唔係見口水禧下個禮拜就要升三年班,呢個二年班嘅旅行blog都未攪掂,真係覺得自己入左黑洞呀!今日返學校幫口水禧攪註冊嘅事,睇左分班,有啲失望無得同過去三年一齊做義工嘅同班家長再同一班,唔知今年我地班嘅家長係點㗎呢?我雖然明白就算完全無義工,學校都會繼續運作嘅,但係都係嗰句啦,老師嘅日子好過啲發少啲火,小朋友嘅日子都會容易過啲。再講丫,重有唔係好多年比我有機會去學校做野,參與下口水禧嘅學校生活,所以如果可以嘅話,我都會盡量幫下手,留個回憶比我自己。

blog呢,盡力啦…… 你肯等,我就……。哈哈!

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

禧媽

38 Comments

  1. 始終不會刪除這個BOOKMARK,
    好驚喜見到一大篇文:D
    謝謝你的心機和時間!!!!!!

    • 何止滾水淥腳呀,我地個個每日都處於倒瀉屎嘅狀態㗎! :wacko:

  2. 等你post blog 等到頸長~
    話說紐約呢邊最早期移民都係台山人, 所以呢邊d 地方名,包括唐人街內嘅各街名,同埋d 大橋橋名,中文譯音都系安照台山話去譯,我初初成日聽d 人話”民鐵吾橋”,我諗即系邊條橋呀, 後來先知系指Manhattan bridge

  3. 嘩!10月先發現禧媽updated ~~~入黎支持下先~ 等禧哥既3年級紀錄

  4. long time no see Hay ma!!! so miss you and your lovely son!! please write more :) you are so good

  5. 真係開心,幾驚你放棄左打blog!!今次篇blog無你地既合照既,話哂過左咁耐睇下有無靚左,哈哈

    • 我唔係放棄,我係放…….慢啫。 :yes:
      有無靚咗?梗係無啦,邊有錢去整容丫! :cry:

    • 呢度脫期頗嚴重,耐啲先貢入嚟都ok架!(講完唔知會唔會比人打穫!!!) :wacko: !!!

    • 久唔久貢出嚟,係咪更大驚喜呢? :yahoo:
      我個仔結婚,莫講話你唔知,我諗連我都未必知。可能佢結咗先通知我呢。 :unsure:

  6. blog呢,盡力啦…… 你肯等,我就……X。哈哈! :mail:
    唔好以為我睇唔到… :yahoo:
    個font size 係咪1 :wacko:

    • 家吓咪好囉,幫你驗埋眼咯! :yes:
      有得揀,我想揀font size 0.01架! :yahoo:

    • 咪唉聲嘆氣啦,我上寫下瀉嘅狀態下完成呢篇野,有血有淚架陰公! :cry:

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)