今日係口水禧summer camp嘅最後一日﹐尋日老師放咗學之後先臨急臨忙send email比我哋D呀媽話今日全部細路都著睡衣返學喇﹐叫PJ (pajamas) Day﹐等大家顛下喇。正經野唔o岩我﹐呢D神神哋唔正路嘅野就最合我心意架喇。不過呀媽無得著睡衣﹐嗰件收埋喺櫃桶底嘅「維多利亞的秘密
」就繼續有得佢秘密喇﹗
雖然我就無試過著睡衣返學﹐不過諗起都覺得應該幾過癮﹐咁o岩口水禧成日都話想著睡衣出街﹐呢次真係開正佢嗰飯﹐可以大條道理著住睡衣出街喇﹗
口水禧﹕唔知平時呀媽呢個look o岩唔o岩我著住PJ去學校呢﹖
今朝例遲返到學校(真係好唔掂﹐日日都遲到﹗
真係好
呀﹗)﹐一打開學校門﹐入面全部都係著住睡衣嘅小朋友走嚟走去﹐有D連鞋都費事著﹐頭髮蓬鬆﹐成個顛婆咁樣﹐真係令我大開眼界﹗平時D小姐們﹐著裙仔﹐紮辮仔﹐靚靚咁返學﹐嘩﹗乜得佢哋今日D真面目出晒嚟嘅﹖直情好似睇到D明星素顏咁震撼﹗我呢個C 9 當堂變咗靚爆鏡喇﹗
呢位小姐﹐你個頭……拆晒D髮卷未架﹖
連老師都係著睡衣返工﹐問你服未﹖
有D小朋友嘅睡衣口水禧都有﹐其實個個都係喺嗰幾個地方買埋嗰幾個牌子嘅睡衣架喇。不過原來D同學仔唔係衫同褲一套咁著﹐有D會上身著一件﹐下身又攞第二套嘅褲嚟mix & match﹐都幾搞野架喎﹗好明顯係媽媽收衫嗰陣都懶得分返邊件衫同邊條褲係一套﹐是鬼但摺埋一堆﹐著嗰陣求其立一件衫一條褲就算喇。咁又係嘅﹐瞓覺著嘅衫﹐邊個得閑睇你吖﹗
本來已經帶埋口水禧件睡袍去學校﹐點知落車嗰陣覺得有D熱﹐所以都係換返件外套就算。佢哋D小朋友睡衣係好貼身嘅﹐我諗咁樣夜晚瞓覺無咁凍同埋會舒服D啩。所以個個都係著住原子褲(貼身到成條現代褲咁)﹐都唔知著乜野鞋先唔搞笑﹐唯有比佢著住拖鞋去返學囉﹐睡衣襯拖鞋﹐o岩晒喇﹗
circle time嘅時候﹐口水禧每逢老師叫佢哋坐前D去聽故事嗰陣﹐佢都係坐最後嘅﹐然後就好唔專心咁四圍望。都係嘅﹐都唔知個老師講乜﹐比著我走咗佬添。呢張相入面﹐佢都係閉目養下神咁﹐都叫做好比面架喇。
尋晚九點幾十點先上床﹐梗係唔夠瞓喇﹗
唔單止著睡衣﹐老師重開埋爐整pancake過佢哋食添。呢三個靚女已經急不及待博晒命咁食﹐都唔理得有無儀態。
口水禧喺屋企已經食咗「mug呸」做早餐。老師問佢想唔想食pancake﹐佢話唔想。但係因為我特登企遠少少﹐等佢同老師可以直接問答﹐佢哋兩個喺明D唔明D嘅情況之下就比老師叫咗佢去煮pancake。
隔離個女同學都好鍾意同口水禧玩。不過我諗佢係睇中口水禧個呀媽先順便同埋口水禧玩啫。
因為每次我哋兩母子返到學校嘅時候﹐呢位小妹妹就會從老遠即刻撲埋嚟同我打招呼﹐circle time嘅時候又會坐埋嚟口水禧隔離但係挨住口水禧呀媽喎﹐我就係咁無喇喇多咗幾個女。
E~~~又上咗「釣魚臺」呀﹖
我都唔輸蝕架﹐呢位靚仔話要整泥膠pancake我食﹐我望住佢整﹐心裡面有D擔心一陣佢整好咗諗住我會真係食嘅話﹐我點算好呢﹖唔食﹐又唔比面﹐又hurt到佢﹔咁唔通食咩﹖我唔想打直入嚟﹐打橫出返去喇。
好比心機整架呢位pancake老細﹗整完重周圍揾我哋添﹗大大聲叫我同口水禧個名話”your pancake is ready! Come on!”(我匿埋咗喺櫃後面……)
飲飽食醉﹐口水禧終於瞓醒喇。重背住Clara識咗第二個添﹗
有咩睇﹖
我嘅大作 – 永遠的微笑
口水禧﹕呀媽﹐唔緊要﹐喺美國呢家野好普遍架啫﹗我都識緊第二個﹗
最後一次summer camp嘅circle time﹐口水禧繼續佢嘅臥底style﹐都係好唔專心咁做緊一樣野﹐對眼又望緊第二樣咁喇。今趟唔專心咁做緊乜野呢﹖
登登登登……
係嘅﹐唔識聽﹐無野做﹐唔係玩手指就係玩腳趾架喇﹐家下都係玩自己嗰D啫﹐又唔係玩人哋D腳趾﹐唔影響到人嘅。
老師嗰本大書好正﹐最適合circle time成班細路坐埋一齊聽故事用﹐咁就唔會得前面嗰D小朋友睇到﹐後面睇唔到﹐搞到要同埋口水禧一齊成棚人玩腳趾喇。
近日睇咗好多Toy Story﹐見到馬就話要騎﹐因為Toy Story 2入面Woody 騎馬。唔係扮Woody就係扮巴斯光年﹐周圍探測﹐’dood’呢樣’dood’嗰樣﹐我諗今年嘅halloween扮巴斯光年都幾大機會。
騎第二隻嗰陣重立咗本書嚟睇﹐不過係調轉本書嚟睇嘅。
戴埋帽更加認為自己係Woody添﹗喺上面坐咗好耐都唔落嚟。喺屋企就不停講to infinity and beyond.我諗我都要執返個角色先可以配合到佢嘅演出。
放咗學去咗In & Out。呢張相下次要比呔仔睇﹐問佢呢個係咩嚟架﹖
呔仔﹕波波。
